POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນເສົາ, ວັນທີ 14 ກຸມພາ 2026

ເຊກອງ ຈະສຸມໃສ່ປັບໂຄງສ້າງການລົງທຶນຄືນໃໝ່ ແກ້ໄຂບັນຫາການພັດທະນາພາຍໃນແຂວງ
ເວລາອອກຂ່າວ: 2026-01-14 09:06:48 | ຜູ້ຂຽນ : admin3 | ຈຳນວນຄົນເຂົ້າຊົມ: 152 | ຄວາມນິຍົມ:

ໃນໄລຍະ 6 ເດືອນຕົ້ນປີ 2026 ນີ້, ແຂວງເຊກອງ ຈະສຸມໃສ່ປັບໂຄງສ້າງການລົງທຶນຄືນໃໝ່, ຍົກສູງປະສິດທິຜົນການລົງທຶນຂອງລັດ, ສຸມງົບປະມານເຂົ້າ ໃນບັນດາໂຄງການຈຸດສຸມ ເພື່ອແກ້ໄຂບັນຫາການພັດທະນາຂອງແຂວງ, ບັນດາເມືອງ, ໃຫ້ບຸລິມະສິດ ການລົງທຶນການພັດທະນາໂຄງລ່າງພື້ນຖານຄົມມະນາຄົມ, ການສຶກສາ, ສາທາລະນະສຸກສຳລັບເຂດຊົນນະບົດ, ເຂດພູດອຍຫ່າງໄກສອກຫຼີກ ເພື່ອຮັບປະກັນການເຊື່ອມຕໍ່ຢ່າງເປັນລະບົບ ລະຫວ່າງ ຊົນນະບົດກັບຕົວເມືອງ, ເຂດພູດອຍກັບເຂດທົ່ງພຽງ. ທ່ານ ບຸນທະວີ ນະຄອນສິດ ຮອງປະທານຄະນະກຳມະການປົກຄອງແຂວງເຊກອງ, ຜູ້ຊີ້ນຳວຽກງານເສດຖະກິດ ໄດ້ໃຫ້ສຳພາດຕໍ່ສື່ມວນຊົນ ໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງ ຄັ້ງທີ II ປະຈຳປີ 2025 ໃນວັນທີ 12 ມັງກອນ 2026 ນີ້ວ່າ: ໃນ 6 ເດືອນຕົ້ນປີ 2026 ແຂວງເຊກອງ ຈະສ້າງເງື່ອນໄຂສິ່ງອຳນວຍຄວາມສະດວກ ໃນການດຶງດູດການລົງທຶນຂອງພາກເອກະຊົນພາຍໃນ ແລະ ການລົງທຶນໂດຍກົງຈາກຕ່າງປະເທດ ເພື່ອສ້າງເປັນປັດໄຈພື້ນຖານໃຫ້ແກ່ການສ້າງເສດຖະກິດເອກະລາດ ເປັນເຈົ້າຕົນເອງທີ່ຍືນຍົງ ແລະ ທົ່ວເຖິງ, ຫຼີກເວັ້ນການສ້າງໂຄງການລົງທຶນ ທີ່ບໍ່ໄປຕາມກົດໝາຍ ແລະ ລະບຽບການ, ເລັ່ງຊຳລະໜີ້ສິນໂຄງການລົງທຶນ, ກວດກາ ແລະ ພິຈາລະນາຄືນ ການໂຈະໂຄງການລົງທຶນລັດ ທີ່ບໍ່ສອດຄ່ອງກັບ ແຜນການ 5 ປີ ຄັ້ງທີ X ຫຼື ໂຄງການທີ່ມີຄ່າໃຊ້ຈ່າຍສູງ ແຕ່ຜົນຕອບແທນຕ່ຳ ຖ່ວງດຶງງົບປະມານ, ຮັບປະກັນຄວາມກົມກຽວ ລະຫວ່າງ ການວາງແຜນພັດທະນາ ແລະ ແຜນງົບປະມານ. ພ້ອມນີ້, ຍັງຈະສືບຕໍ່ຊຸກຍູ້ການສ້າງຖານການຜະລິດໃໝ່ ໃນຂົງເຂດອຸດສະຫະກຳ, ກະສິກຳ, ຫັດຖະກຳ ແລະ ການບໍລິການໃຫ້ແຂງແຮງກວ່າເກົ່າ ເພື່ອເປັນຖານເສດຖະກິດທີ່ເຂັ້ມແຂງ ກໍຄື ຖານລາຍຮັບທີ່ໝັ້ນຄົງ, ສາມາດປ່ຽນແທນການນຳເຂົ້າ ແລະ ສະໜອງໃຫ້ໂຄງການລົງທຶນຂະໜາດໃຫຍ່, ຂະໜາດກາງພາຍໃນແຂວງໃຫ້ພຽງພໍ ໂດຍການຊຸກຍູ້ສົ່ງເສີມການລົງທຶນ ຂອງເອກະຊົນພາຍໃນ ແລະ ຕ່າງປະເທດເຂົ້າໃນວຽກງານດັ່ງກ່າວ. ທ່ານ ບຸນທະວີ ນະຄອນສິດ ຍັງໃຫ້ຮູ້ອີກວ່າ: ການສ້າງເສດຖະກິດ ເອກະລາດເປັນເຈົ້າຕົນເອງ ຕາມມະຕິ 04/ກມສພ, ສະບັບລົງວັນທີ 11 ເມສາ 2024 ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່, ໄລຍະຜ່ານມາ ອົງການປົກຄອງແຂວງເຊກອງ ໄດ້ເອົາໃຈໃສ່ຈັດຕັ້ງປະຕິບັດ ແລະ ຜັນຂະຫຍາຍລົງສູ່ບັນດາເມືອງ, ພະແນກການ, ອົງການທຽບເທົ່າຂັ້ນແຂວງ ຕະຫຼອດຮອດການມີສ່ວນຮ່ວມຂອງປະຊາຊົນບັນດາເຜົ່າແຕ່ຫົວທີ, ລົງເລິກ ແລະ ເຖິງຖອງ ເພື່ອສ້າງເງື່ອນໄຂທີ່ຈຳເປັນພື້ນຖານໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການພັດທະນາເສດຖະກິດ-ສັງຄົມ ທັງໃນໄລຍະສັ້ນ ແລະ ໄລຍະຍາວ ໃຫ້ນັບມື້ເປັນຮູບປະທຳຍິ່ງໆຂຶ້ນ ໂດຍເລັ່ງໃສ່ພັດທະນາຂະແໜງເສດຖະກິດ ທີ່ເປັນປາຍແຫຼມ ເຊັ່ນ: ກະສິກຳ (ກາເຟ, ພືດຜັກ, ໄມ້ໃຫ້ໝາກ, ການລ້ຽງສັດເປັນຟາມ, ໂສມ, ການປຸງແຕ່ງຜົນຜະລິດກະສິກຳ), ອຸດສາຫະກຳ-ຫັດຖະກຳ (ພະລັງງານໄຟຟ້າ, ບໍ່ແຮ່, ອຸດສາຫະກຳເບົາ ແລະ ຫັດຖະກຳຕ່ຳແຜ່ນ) ແລະ ການບໍລິການ (ການທ່ອງທ່ຽວ, ການຂົນສົ່ງ). ໃນຕໍ່ໜ້າຈະຕ້ອງສຸມໃສ່ການເພີ່ມທະວີການສົ່ງເສີມການຜະລິດ ເພື່ອທົດແທນການນຳເຂົ້າ ແລະ ເປັນສິນຄ້າສົ່ງອອກ ໃຫ້ເປັນຮູບປະທຳຕົວຈິງຫຼາຍຂຶ້ນ, ຫັນການນຳໃຊ້ເຄື່ອງມືທີ່ທັນສະໄໝເຂົ້າໃນການຈັດເກັບລາຍຮັບ, ສະກັດກັ້ນການຮົ່ວໄຫຼ, ໄປພ້ອມກັບການຂະຫຍາຍຖານລາຍຮັບໃໝ່, ສ້າງການຫັນປ່ຽນ ເພື່ອກ້າວເຂົ້າສູ່ການສ້າງເສດຖະກິດເອກະລາດ ເປັນເຈົ້າຕົນເອງ, ເອົາໃຈໃສ່ພັດທະນາຂະແໜງເສດຖະກິດທີ່ເປັນປາຍແຫຼມ ຕິດພັນກັບການເກັບພັນທະເຂົ້າງົບປະມານແຫ່ງລັດຂອງບັນດາໂຄງການລົງທຶນຂະໜາດໃຫຍ່ ເປັນຕົ້ນໂຄງການ ພະລັງງານໄຟຟ້ານ້ຳຕົກ, ໂຄງການພະລັງງານໄຟຟ້າຖ່ານຫີນ, ໂຄງການໄຟຟ້າພະລັງງານລົມ ແລະ ໂຄງການຂຸດຄົ້ນແຮ່ທາດຕ່າງໆ.

news to day and hot news