ວັນເສົາ, ວັນທີ 14 ກຸມພາ 2026
ໝາກຜົນການຫັນລົງກໍ່ສ້າງຮາກຖານການເມືອງ-ພັດທະນາຊົນນະບົດ ແລະ ແກ້ໄຂຄວາມທຸກຍາກ ຢູ່ແຂວງຈຳປາສັກ
ເວລາອອກຂ່າວ: 2026-01-14 09:10:31 | ຜູ້ຂຽນ : admin3 | ຈຳນວນຄົນເຂົ້າຊົມ: 204 | ຄວາມນິຍົມ: 
ສະຫາຍ ອາລຸນໄຊ ສູນນະລາດ ກໍາມະການສູນກາງພັກ, ເລຂາຄະນະບໍລິຫານງານພັກແຂວງຈຳປາສັກ ໄດ້ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນ
ທົ່ວປະເທດ ຄັ້ງທີ XII ຂອງພັກ ໃນວັນທີ 6 ມັງກອນ 2026 ທີ່ຫໍປະຊຸມແຫ່ງຊາດໃນຫົວຂໍ້: “ຫັນລົງກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກຢູ່ ແຂວງຈຳປາສັກ”.
ສະຫາຍ ອາລຸນໄຊ ສູນນະລາດ ກ່າວວ່າ: ຕະຫຼອດໄລຍະຜ່ານມາ, ຄະນະພັກ-ຄະນະກຳມະການປົກຄອງແຂວງຈຳປາສັກ ໄດ້ຖືເປັນວຽກຍຸດທະສາດທີ່ສຳຄັນຕໍ່ການນຳພາ-ຊີ້ນຳວຽກງານກໍ່ສ້າງຮາກຖານການເມືອງ ຕິດພັນກັບວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຕາມ 4 ເນື້ອໃນ 4 ຄາດໝາຍ ສະແດງອອກ ຄື: ວຽກງານການເມືອງແນວຄິດ, ຄະນະພັກແຂວງ ໄດ້ຖືເອົາວຽກງານການເມືອງ-ແນວຄິດເປັນກົກ, ເປັນວຽກສຳຄັນໃນການກໍ່ສ້າງພັກ ກໍຄືວຽກງານກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກຢ່າງແຂງແຮງ ໂດຍຖືເອົາວຽກງານສຶກສາອົບຮົມການເມືອງ-ແນວຄິດ ແລະ ນຳພາຈັດຕັ້ງເຜີຍແຜ່, ເຊື່ອມຊຶມ ບັນດາມະຕິ, ຄຳສັ່ງຕ່າງໆ ຂອງສູນກາງພັກ, ຂອງອົງຄະນະພັກແຂວງ ໃຫ້ບັນດາເປົ້າໝາຍຕ່າງໆຢ່າງເລິກເຊິ່ງ.
ໄດ້ສຸມໃສ່ປັບປຸງການຈັດຕັ້ງໃນລະບົບການ ເມືອງຢູ່ຂັ້ນຮາກຖານ, ສາມາດປະຕິບັດບົດບາດ ເປັນແກນນຳ ໃນລະບົບການເມືອງ ໄປຄຽງຄູ່ກັບການປັບປຸງພາລະບົດບາດ, ສັບຊ້ອນ, ຈັດວາງ ຄະນະພັກຂັ້ນຕ່າງໆໃຫ້ສອດຄ່ອງກັບສະພາບຄວາມເປັນຈິງ ສາມາດນຳພາຈັດຕັ້ງປະຕິບັດໜ້າທີ່ການເມືອງ ທັງມີຜົນສຳເລັດໃນແຕ່ລະໄລຍະ ເຮັດໃຫ້ຮາກຖານໜັກແໜ້ນ, ການຈັດຕັ້ງພັກມີຄວາມເຕີບໃຫຍ່ເຂັ້ມແຂງ ແລະ ສ້າງໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນ, ຮາກຖານ ມີຄວາມສະຫງົບໜັກແໜ້ນ, ສະພາບການພັດທະນາຢູ່ຮາກຖານ ມີຖ່ວງທ່າກ້າວໜ້າ ແລະ ຂະຫຍາຍຕົວຢ່າງໝັ້ນທ່ຽງ, ການພັດທະນາເສດ
ຖະກິດ-ສັງຄົມ, ສຸມໃສ່ແກ້ໄຂຄວາມທຸກຍາກຂອງປະຊາຊົນດ້ວຍຫຼາຍຮູບ-ຫຼາຍວິທີການ ອັນສຳຄັນ ແມ່ນໄດ້ສ້າງ ແລະ ປັບປຸງກຳລັງການຜະລິດ ແລະ ການພົວພັນການຜະລິດໃຫ້ເຂັ້ມແຂງ ຕາມທິດເສດຖະກິດເອກະລາດ ແລະ ເປັນເຈົ້າຕົນເອງ (ສອຈ), ປັດຈຸບັນທົ່ວແຂວງມີກຸ່ມການຜະລິດທັງໝົດ 116 ກຸ່ມ, 89 ບ້ານ, ມີສະມາຊິກ 2.926 ຄອບຄົວ, ສະຫະກອນການຜະລິດ 14 ສະຫະກອນ, ສະມາຊິກ 2.045 ຄົນ, ສາມາດ ຜະລິດເປັນສິນຄ້າກຸ້ມຕົນເອງ 188 ຜະລິດຕະພັນ, ເປັນສິນຄ້າໂອດັອບ 150 ຜະລິດຕະພັນ, ສ້າງເປັນຍີ່ທໍ້ ສິນຄ້າຂອງຕົນເອງ 40 ຜະລິດຕະພັນ ແລະ ສົ່ງອອກ 18 ຜະລິດຕະພັນ, ທົ່ວແຂວງມີກອງທຶນພັດທະນາບ້ານ 681 ກອງທຶນ, ມີສະມາຊິກ 7 ແສນກວ່າຄົນ, ມີທຶນ 90,2 ຕື້ກີບ ເພີ່ມຂຶ້ນ 8,88%, ກອງທຶນສະຫະກອນສິນເຊື່ອເງິນຝາກປະຢັດ (ສສງ) ມີ 8 ແຫ່ງ, ກໍ່ສ້າງ ແລະ ປັບປຸງພື້ນຖານໂຄງລ່າງ ໂດຍສະເພາະການກໍ່ສ້າງ ເສັ້ນທາງເພື່ອເຊື່ອມຕໍ່ລະຫວ່າງແຂວງ ກັບ ເມືອງ, ເມືອງຫາບ້ານ ແລະ ຫາເຂດຈຸດສຸມພັດທະນາ, ພິເສດໄດ້ສຸມໃສ່ແກ້ໄຂບ້ານທີ່ບໍ່ທັນພົ້ນທຸກຕາມມາດຖານ ດຳລັດ 348/ນຍ ທີ່ຍັງຄ້າງ 6 ບ້ານ ໄດ້ມີທາງທຽວໄດ້ 2 ລະດູ ສຳເລັດ
100% ສິ່ງທີ່ພົ້ນເດັ່ນ ແລະ ໜ້າຊື່ນຊົມທີ່ສຸດ ແມ່ນປະຊາຊົນບັນດາເຜົ່າມີຄວາມຕື່ນຕົວ ແລະ ສະຫຼະທຶນຮອນຢ່າງຫຼວງຫຼາຍ ທັງປະກອບສ່ວນເຫື່ອແຮງ ເຂົ້າ
ໃນການກໍ່ສ້າງເສັ້ນທາງ ແລະ ຂົວ (ເສັ້ນທາງ 366,97 ກິໂລແມັດ, ຂົວ 295 ແມັດ) ເປັນມູນຄ່າທັງໝົດ 79,32 ຕື້ກີບ, ເດັ່ນກວ່າໝູ່ ແມ່ນການກໍ່ສ້າງທາງເບຕົງລະຫວ່າງບ້ານ ຕໍ່ບ້ານ ມີຄວາມຍາວ 78,67 ກິໂລແມັດ, ມູນຄ່າ 60,67 ຕື້ກວ່າກີບ ແລະ ຂົວເບຕົງ ຍາວ195 ແມັດ, ມູນຄ່າ 9,01 ຕື້ກີບ.
ວຽກງານປ້ອງກັນຊາດ-ປ້ອງກັນຄວາມສະຫງົບ: ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ໄດ້ຮັບການຈັດຕັ້ງປະ
ຕິບັດຢ່າງຕໍ່ເນື່ອງ, ໃນນັ້ນ ໄດ້ຫັນເອົາກຳລັງລົງກໍ່ສ້າງຮາກຖານການເມືອງ ຕາມສາຍຕັ້ງທັງໝົດ 1.001 ສະຫາຍ, ນຳພາປັບປຸງກຳລັງກອງຫຼອນ, ປກສ ບ້ານ, ສ້າງ ແລະ ປັບປຸງທ່າສະໜາມສົງຄາມ 3 ຂັ້ນ. ສາມາດສ້າງໄດ້ບ້ານປ້ອມໝັ້ນ 301 ບ້ານ, ກຸ່ມບ້ານສູ້ຮົບຕິດລ່ຽນ 125 ກຸ່ມບ້ານ, ບ້ານປ້ອງກັນຊາດເຂັ້ມແຂງ 587 ບ້ານ ກວມເອົາ 91,43%, ບ້ານປ້ອງກັນຄວາມສະຫງົບດີ 623 ບ້ານ ກວມ 93,92%, ໃນນັ້ນ ອັນພົ້ນເດັ່ນ ສາມາດຮັກສາບ້ານປ້ອງກັນຄວາມສະຫງົບ 3 ປີ ຊ້ອນ 550 ບ້ານ, ກວມ 85,66%, ເຮັດໃຫ້ທົ່ວສັງຄົມ ແລະ ປະຊາຊົນບັນດາເຜົ່າຕື່ນຕົວປະກອບສ່ວນພັນທະເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ລວມມູນຄ່າ 23,94 ຕື້ກວ່າກີບໄດ້ຈັດຕັ້ງການອົບຮົມຫັດແອບຊ້ອມຮົບຂັ້ນຍຸດທະວິທີໃຫ້ເປົ້າໝາຍຕ່າງໆຢ່າງເປັນຂະບວນຕໍ່ເນື່ອງ, ພ້ອມກັນນັ້ນ ຄະນະພັກແຕ່ລະຂັ້ນ ໄດ້ສຸມໃສ່ນຳພາສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ດ້ວຍມາດຕະການຕ່າງໆ ຢ່າງເອົາໃຈໃສ່.
ສະຫາຍ ອາລຸນໄຊ ສູນນະລາດ ກ່າວຕື່ມວ່າ: ເພື່ອຫັນວຽກງານກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກນັ້ນ, ຄະນະພັກ, ຄະນະກຳມະການການປົກຄອງ ແລະ ປະຊາຊົນ ຊາວແຂວງຈຳປາສັກ ຈະໄດ້ສຸມໃສ່ເພີ່ມທະວີວຽກງານການເມືອງແນວຄິດ ດ້ວຍການປັບປຸງວຽກງານໂຄສະນາເຜີຍແຜ່ສຶກສາອົບຮົມ ເພື່ອແນ່ໃສ່ສ້າງ
ສະຕິຊາດ, ສະຕິກົດໝາຍ, ສະຕິການຈັດຕັ້ງ, ສະຕິພັນທະຄວາມຮັບຜິດຊອບໃນສັງຄົມ ແລະ ສະຕິເປັນເຈົ້າ ດ້ວຍຫຼາຍຮູບການ ວິທີການທີ່ສອດຄ່ອງກັບບັນຫາ ແລະ ເປົ້າໝາຍ, ບູລະນະລະບອບປະຊາທິປະໄຕ ປະຊາຊົນ ແຕ່ຮາກຖານ, ນຳພາສ້າງ ແລະ ປັບປຸງຕາແສງ, ອົງການປົກຄອງບ້ານ ໂດຍສຸມໃສ່ສ້າງຄວາມເຂັ້ມແຂງໃຫ້ບຸກຄະລາກອນ ແລະ ກົງຈັກຕ່າງໆ ຂອງຕາແສງ ແລະ 5 ໜ່ວຍງານຂັ້ນບ້ານ ໃຫ້ມີຄວາມສາມາດໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ເພື່ອເຮັດໃຫ້ສັງຄົມ ມີປະຊາທິປະໄຕ ຍຸຕິທຳແຕ່ຮາກຖານຂຶ້ນມາ, ສືບຕໍ່ກໍ່ສ້າງ ແລະ ປັບປຸງພື້ນຖານໂຄງລ່າງ ຮັບໃຊ້ແກ່ການຜະລິດ ແລະ ການດຳລົງຊີວິດຂອງ ປະຊາຊົນບັນດາເຜົ່າ ຕິດພັນກັບການສົ່ງເສີມການຜະລິດເປັນສິນຄ້າ, ການປຸງແຕ່ງ ແລະ ການບໍລິການຕາມທ່າແຮງຂອງທ້ອງຖິ່ນ, ຕາມທິດ ສ້າງເສດຖະກິດ ເອກະລາດ ເປັນເຈົ້າຕົນເອງ, ອະນຸລັກຮັກສາວັດທະນະທຳຮີດຄອງປະເພນີອັນດີງາມຂອງທ້ອງຖິ່ນ ໄປຄຽງຄູ່ກັບການຊຸກຍູ້ການທ່ອງທ່ຽວທຳມະ
ຊາດ, ປະຫວັດສາດ, ວັດທະນະທຳຢ່າງເອົາໃຈໃສ່, ຍົກສູງຄຸນນະພາບການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ໃຫ້ເຂັ້ມແຂງ ດ້ວຍການສ້າງທ່າສະໜາມສາມຂັ້ນ, ສ້າງບ້ານປ້ອມໝັ້ນ, ບ້ານປ້ອງກັນຊາດເຂັ້ມແຂງ, ບ້ານປ້ອງກັນຄວາມສະຫງົບດີ, ບ້ານປອດຢາເສບຕິດ ແລະ ສະກັດກັ້ນໜໍ່ແໜງຄວາມບໍ່ສະຫງົບຢ່າງເອົາໃຈໃສ່
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
