POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນເສົາ, ວັນທີ 14 ກຸມພາ 2026

ລາວ-ຈີນ ວາງແຜນພັດທະນາຊ່ວຍຍູ້ໜູນກັນສ້າງ ເສດຖະກິດ-ສັງຄົມແຫ່ງຊາດ 5 ປີ
ເວລາອອກຂ່າວ: 2026-01-16 09:07:37 | ຜູ້ຂຽນ : admin1 | ຈຳນວນຄົນເຂົ້າຊົມ: 266 | ຄວາມນິຍົມ:

ວິທະຍຸໂທລະພາບສູນກາງຈີນ CMG ໄດ້ລາຍງານວ່າ: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກປະຊາຊົນປະຕິວັດລາວ ທີ່ຈັດຂຶ້ນ ລະຫວ່າງ ວັນທີ 6-8 ມັງກອນ 2026 ຜ່ານມາ ໄດ້ພິຈາລະນາ ແລະ ຮັບຮອງເອົາເອກະສານສຳຄັນຕ່າງໆ ເຊັ່ນ: “ບົດລາຍງານສະຫຼຸບຕີລາຄາການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 (ປີ 2021-2025) ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 10 (ປີ 2026-2030)” ເປັນຕົ້ນ. ເມື່ອສົມທຽບກັບຂໍ້ສະເໜີກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 15 ຂອງຈີນ ທີ່ໄດ້ຮັບຮອງເອົາໃນປີຜ່ານມາ, ເອກະສານຂອງສອງປະເທດ ຖືເປັນເອກະສານທີ່ມີຄວາມໝາຍຍຸດທະສາດຕໍ່ສອງປະເທດ ແລະ ໄດ້ສະແດງໃຫ້ເຫັນເຖິງພຶດຕິກຳຕົວຈິງ ໃນການສ້າງຄູ່ຮ່ວມຊາຕາກຳ ລາວ-ຈີນ ຢ່າງມີຊີວິດຊີວາ. ການໃຊ້ແຜນການ 5 ປີ ເພື່ອກຳນົດທິດທາງການພັດທະນາປະເທດ ແມ່ນຄວາມເຫັນທີ່ເປັນເອກະພາບກັນຂອງສອງປະເທດຈີນ ແລະ ລາວ ໃນພຶດຕິກຳແຫ່ງການປົກຄອງປະເທດ. ຈີນ ໄດ້ສ້າງລະບົບການວາງແຜນພັດທະນາ ແລະ ການປະຕິບັດຕົວຈິງທີ່ເກີດຜົນມາເປັນເວລາຫຼາຍສິບປີ, ໂດຍສະເພາະແມ່ນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 14 ຂອງຈີນ ໄດ້ຮັບຜົນສຳເລັດຢ່າງໂດດເດັ່ນ ເຊັ່ນ: ໄດ້ສ້າງລະບົບປະກັນສັງຄົມທີ່ໃຫຍ່ທີ່ສຸດໃນໂລກ, ອັດຕາປົກຄຸມຂອງລະບົບ 5G ໄດ້ກວມ 90% ຂອງກຸ່ມບ້ານບໍລິຫານໃນທົ່ວປະເທດ, ຄຸນນະພາບດ້ານສິ່ງແວດລ້ອມນິເວດ ໄດ້ຮັບການປັບປຸງໃຫ້ດີຂຶ້ນຢ່າງໜັກແໜ້ນ, ຈີນ ໄດ້ຮັບການບຸກທະລຸໃນດ້ານວິທະຍາສາດເຕັກໂນໂລຊີ ທີ່ສຳຄັນ ເຊັ່ນ: ການຜະລິດເຮືອບິນໃຫຍ່ C919, ກຳປັ່ນບັນທຸກເຮືອບິນຝູຈ້ຽນ ແລະ ອື່ນໆ ເຊິ່ງໄດ້ກາຍເປັນບົດຮຽນທີ່ດີໃຫ້ແກ່ບັນດາປະເທດກຳລັງພັດທະນາ. ລາວ ກໍປະສົບຜົນສຳເລັດທີ່ໂດດເດັ່ນ ໃນໄລຍະການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ເຊັ່ນດຽວກັນ: ຫຼາຍເປົ້າໝາຍທີ່ກຳນົດໄວ້ໃນແຜນດັ່ງກ່າວຂອງລາວ ເຊັ່ນ: ອັດຕາເຕີບໂຕດ້ານເສດຖະກິດ, ລາຍຮັບງົບປະມານ, ຍອດມູນຄ່າການຄ້າກັບຕ່າງປະເທດ ແລະ ອື່ນໆ ລ້ວນແຕ່ບັນລຸເກີນຄາດໝາຍ, ອັດຕາຄວາມທຸກຍາກໄດ້ຫຼຸດລົງຈາກ 18,3% ໃນປີ 2019 ມາເປັນ 15% ໃນປີ 2025. ຜົນງານເຫຼົ່ານີ້ບໍ່ພຽງແຕ່ໄດ້ສະແດງໃຫ້ເຫັນເຖິງສະຕິປັນຍາໃນການພັດທະນາຂອງລາວ ທີ່ອີງໃສ່ສະພາບເງື່ອນໄຂຕົວຈິງຂອງປະເທດເທົ່ານັ້ນ, ຍັງມີຄວາມຄ້າຍຄືກັນກັບແນວຄິດແກນກາງຂອງຈີນ ທີ່ຖືເອົາປະ ຊາຊົນເປັນໃຈກາງຂອງແຜນພັດທະນາແຫ່ງຊາດ. 6 ເປົ້າໝາຍແກນກາງທີ່ລະບຸໄວ້ໃນແຜນພັດທະນາແຫ່ງຊາດ 5 ປີ ຄັ້ງທີ 10 ຂອງລາວ ມີຄວາມຄ້າຍຄືກັບແນວຄິດການພັດທະນາຂອງຈີນ ເຊັ່ນ: ໃນຂົງເຂດການພັດທະນາສີຂຽວ, ລາວ ໄດ້ສະເໜີອອກມາວ່າ ໃຫ້ອັດຕາປົກຫຸ້ມຂອງປ່າໄມ້ບັນລຸເຖິງ 70%, ລະດັບພື້ນຖານໃນການປ່ອຍອາຍພິດເຮືອນແກ້ວຫຼຸດລົງ 60% ເຊິ່ງ ຈີນ ກໍໄດ້ສະ ເໜີຍຸດທະສາດການປ່ອຍກາກບອນໃຫ້ເຖິງຈຸດສູງສຸດ ແລະ ປອດການປ່ອຍກາກບອນ ລວມເຖິງແນວຄິດການພັດທະນາສີຂຽວ ໃນຂໍ້ສະເໜີກ່ຽວກັບແຜນພັດທະ ນາແຫ່ງຊາດ 5 ປີ ຄັ້ງທີ 15. ໃນດ້ານການເຊື່ອມໂຍງເຊື່ອມຈອດກັບພາກພື້ນ, ລາວ ໄດ້ຈັດເອົາເສັ້ນທາງລົດໄຟ ລາວ-ຈີນ ໄລຍະ 2 ແລະ ເສັ້ນທາງລົດໄຟ ລາວ-ໄທ ເຂົ້າໃນແຜນພັດທະນາແຫ່ງຊາດ ເຊິ່ງຈະກາຍເປັນກຳລັງແຮງ ທີ່ຊ່ວຍຊູຍູ້ໜູນການກໍ່ສ້າງພື້ນຖານໂຄງລ່າງຂ້າມຊາດ ພາຍໃຕ້ຂອບ “ໜຶ່ງແລວໜຶ່ງເສັ້ນທາງ” ຂອງຈີນ. ໃນດ້ານການປັບປຸງຊີວິດການເປັນຢູ່ຂອງປະຊາຊົນ, ລາວ ໄດ້ສະເໜີເປົ້າໝາຍຫຼຸດຜ່ອນອັດຕາຄວາມທຸກຍາກໃຫ້ຕ່ຳລົງ ແລະ ສ້າງວຽກເຮັດງານທຳຫຼາຍຂຶ້ນ, ສ່ວນ ຈີນ ກໍມີການສ້າງລະບົບປະກັນຊີວິດການເປັນຢູ່ ຂອງປະຊາຊົນ ພາຍໃຕ້ທິດຊີ້ນຳ “ການສ້າງຄວາມຮັ່ງມີຮ່ວມກັນ”. ນອກຈາກນີ້, ຈີນ ມີບົດຮຽນອັນໃຫຍ່ຫຼວງໃນຂົງເຂດຫຼຸດຜ່ອນຄວາມທຸກຍາກ ແລະ ການສ້າງຄວາມຈະເລີນຮຸ່ງເຮືອງຢູ່ເຂດຊົນນະບົດ ເຊິ່ງຖືເປັນບົດຮຽນສຳຄັນທີ່ສຸດ ໃນການນຳໄປຈັດຕັ້ງປະຕິບັດຕົວຈິງ ຜ່ານໂຄງການທົດລອງຫຼຸດຜ່ອນຄວາມທຸກຍາກຢູ່ພາກພື້ນອາຊີຕາເວັນອອກ ແລະ ຢູ່ບ້ານຊຽງລ້ອມ ນະຄອນຫຼວງພະບາງ ຂອງລາວ. ສິ່ງທີ່ໜ້າສັງເກດນັ້ນກໍຄື: ລາວ ໄດ້ສະເໜີໃຫ້ຖືເອົາການຫັນເປັນແບບດີຈິຕ໋ອນ ເປັນຂອດບຸກທະລຸໃນການພັດທະນາ, ຈີນ ກໍມີຍຸດທະສາດຂັບເຄື່ອນການພັດທະນາດ້ວຍການປະດິດສ້າງໃໝ່ເຊັ່ນດຽວກັນ. ຈີນ ແລະ ລາວ ສາມາດດຳເນີນການຮ່ວມມືໃນຂົງເຂດການພັດທະນາທີ່ມີຄຸນນະພາບສູງຕ່າງໆ ເຊັ່ນ: ເສດຖະກິດດີຈິຕ໋ອນ, ການບໍລິຫານດ້ວຍປັນຍາປະດິດ ແລະ ອື່ນໆ ເຊິ່ງຈະສາມາດເພີ່ມພະລັງຂັບເຄື່ອນອັນແຂງແຮງເຂົ້າໃນການພັດທະນາຂອງລາວ. ຈາກແຜນພັດທະນາກາຍເປັນການພັດທະນາຕົວຈິງ ຈະຕັດແຍກອອກຈາກຄູ່ຮ່ວມຊາຕາກຳ ລາວ-ຈີນ ທີ່ໝັ້ນແກ່ນບໍ່ໄດ້. ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 12 ຂອງພັກປະຊາຊົນປະຕິວັດລາວ ໄດ້ສະເໜີໃຫ້ເປີດກວ້າງການພົວພັນຄູ່ຮ່ວມຍຸດທະສາດຮອບດ້ານກັບຈີນ ຢ່າງຈະແຈ້ງ, ສ່ວນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງ ທີ່ລະບຸໄວ້ໃນຂໍ້ສະເໜີກ່ຽວກັບແຜນພັດທະນາແຫ່ງຊາດ 5 ປີ ຄັ້ງທີ 15 ຂອງຈີນ ຈະເປັນທິດຊີ້ນຳທາງຍຸດທະສາດໃຫ້ແກ່ສອງປະເທດຈີນ ແລະ ລາວ ລົງເລິກການປະສານສົມທົບກັນ, ການຮ່ວມມືຕົວຈິງຕ່າງໆ ເຊັ່ນ: ການເຊັນສັນຍາກ່ຽວກັບການກວດກາປະຕູດຽວ, ຄັ້ງດຽວຢູ່ດ່ານສາກົນທາງລົດໄຟ ລາວ-ຈີນ, ການສ້າງຕັ້ງສູນການຮ່ວມມືການປະດິດສ້າງໃໝ່ດ້ານປັນຍາປະດິດ ແລະ ອື່ນໆ ຈະຊ່ວຍຊຸກຍູ້ການປະຕິບັດແຜນພັດທະນາແຫ່ງຊາດຂອງສອງປະເທດ ໃຫ້ປະສົບຜົນສຳເລັດຢ່າງຕໍ່ເນື່ອງ. ສອງປະເທດຈີນ ແລະ ລາວ ພັດທະນາປະເທດແບບຊ່ວຍຊູຍູ້ໜູນກັນ ທາດແທ້ແລ້ວແມ່ນການສະໜັບສະໜູນເຊິ່ງກັນ ແລະ ກັນລະຫວ່າງ ປະເທດກຳລັງພັດທະນາ ໃນການເລືອກເສັ້ນທາງການພັດທະນາດ້ວຍຕົນເອງ ແລະ ເປັນພຶດຕິກຳຕົວຈິງແບບມີຊີວິດຊີວາ ໃນການຈັດຕັ້ງປະຕິບັດແນວຄິດການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ. ພາຍໃຕ້ສະພາບແວດລ້ອມສາກົນ ທີ່ເຕັມໄປດ້ວຍຄວາມບໍ່ແນ່ນອນ, ສອງປະເທດໄດ້ຖອດຖອນບົດຮຽນເຊິ່ງກັນ ແລະ ກັນ ແລະ ປະສານສົມທົບກັນໃນດ້ານການພັດທະນາ ດ້ວຍຮູບແບບການວາງແຜນພັດທະນາແຫ່ງຊາດ ທີ່ຄ້າຍຄືກັນ ເຊິ່ງບໍ່ພຽງແຕ່ສາມາດແກ້ໄຂຄວາມຫຍຸ້ງຍາກດ້ານການພັດທະນາຂອງໃຜລາວເທົ່ານັ້ນ, ຍິ່ງສາມາດເປັນແບບຢ່າງທີ່ດີ ໃຫ້ແກ່ການຮ່ວມມືພາກພື້ນ. ຄຽງຄູ່ກັບການສ້າງຄູ່ຮ່ວມຊາຕາກຳ ລາວ-ຈີນ ໄດ້ຮັບການຈັດຕັ້ງປະຕິບັດນັບມື້ກ້າວສູ່ລວງເລິກ, ນີ້ຈະກາຍເປັນຜົນການຮ່ວມມືຕົວຈິງທີ່ເປັນຮູບປະທຳຫຼາຍຂຶ້ນຢ່າງແນ່ນອນ ແລະ ຊ່ວຍໃຫ້ປະຊາຊົນສອງປະເທດຊົມໃຊ້ໂອກາດໃນການພັດທະນາໄດ້ດີກວ່າເກົ່າ.

news to day and hot news