POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນພຸດ, ວັນທີ 15 ເມສາ 2026

ປິດຊຸດອົບຮົມການນຳໃຊ້ລະບົບຄຸ້ມຄອງ ແລະ ລາຍງານຈຳນວນສະມາຊິກປະກັນສັງຄົມ ພາກປະຈຳການ ຊຸດທີ II
ເວລາອອກຂ່າວ: 2026-02-27 15:59:54 | ຜູ້ຂຽນ : admin2 | ຈຳນວນຄົນເຂົ້າຊົມ: 1014 | ຄວາມນິຍົມ:

ວັນທີ 27 ກຸມພາ 2026 ນີ້, ກົມປະກັນສັງຄົມ ກົມໃຫຍ່ການເມືອງກອງທັບ ໄດ້ຈັດພິທີ ປີດຊຸດອົບຮົມການນໍາໃຊ້ລະບົບຄຸ້ມຄອງ ແລະ ລາຍງານຈໍານວນສະມາຊິກປະກັນສັງຄົມ ພາກປະຈໍາການ ຊຸດທີ II ພາຍຫຼັງທີ່ໄດ້ດໍາເນີນມາເປັນເວລາ 5 ວັນ, ໂດຍການເປັນປະທານຂອງສະຫາຍ ພົນຈັດຕະວາ ໄຊຍະແສງ ໄມມະນີ ຫົວໜ້າກົມປະກັນສັງຄົມ, ມີຄະນະກົມ, ຫົວໜ້າ-ຮອງຫົວໜ້າພະແນກ, ວິຊາການກົມປະກັນສັງຄົມ ແລະ ນັກເຝິກອົບຮົມ ທີ່ມາຈາກພະແນກ-ຂະແໜງປະກັນສັງຄົມ 27 ກົມກອງ ເຂົ້າຮ່ວມ. ໃນພິທີ ສະຫາຍ ພັນໂທ ນາງ ພອນສຸກ ກັນຍາວົງ ຮອງຫົວໜ້າກົມປະກັນສັງຄົມ ໄດ້ຜ່ານບົດສະຫຼຸບຕີລາຄາຜົນສໍາເລັດການເຝິກອົບຮົບ ການນຳໃຊ້ລະບົບຄຸ້ມຄອງ ແລະ ລາຍງານຈໍານວນສະມາຊິກປະກັນສັງຄົມ ພາກປະຈຳການ ຊຸດທີ II ໃຫ້ຮູ້ວ່າ: ການເຝິກອົບຮົມຄັ້ງນີ້ ໃຊ້ເວລາ 5 ວັນ ແບ່ງອອກເປັນ 2 ພາກ ຄື: ພາກທິດສະດີ ໃຊ້ເວລາ 1 ວັນ ອົບຮົມ ວິທີການສ້າງເອກະສານລາຍງານບັນຊີຈຳນວນສະມາຊິກປະກັນສັງຄົມ ມີ 2 ບົດ ແລະ ການນໍາໃຊ້ລະບົບໂປຼແກຼມບັນຊີຄຸ້ມຄອງສະມາຊິກປະກັນສັງຄົມ ພາກປະຈຳການ ມີ 4 ບົດ, ພາກປະຕິບັດຕົວຈິງ ໂດຍການນໍາໃຊ້ລະບົບໂປຣແກຣມ ປະກອບມີ 4 ບົດ ໃຊ້ເວລາ 2 ວັນ. ໃນການທົດລອງນໍາໃຊ້ລະບົບຕົວຈິງ ໄດ້ໃຫ້ກົມກອງຂຶ້ນມາທົດລອງເພື່ອທົດສອບຄວາມເຂົ້າໃຈ ກ່ຽວກັບບົດຮຽນທີ່ໄດ້ຮຽນມາ ໃນພາກທິດສະດີ ແລະ ການນໍາໃຊ້ລະບົບ ຈໍານວນ 27 ກົມກອງ ແລະ ເປີດໂອກາດໃຫ້ບັນດານັກເຝິກອົບຮົມ ໄດ້ແລກປ່ຽນບົດຮຽນ ແລະ ສະເໜີຖາມຄູ-ອາຈານ ຕໍ່ກັບບັນຫາທີ່ນັກເຝິກອົບຮົມມີຄວາມສົນໃຈ. ສ່ວນການປະເມີນຜົນ ແລະ ທົດສອບ ແມ່ນໄດ້ແບ່ງອອກເປັນ 3 ຊຸດ, ຊຸດລະ 9 ກົມກອງ, ສາມາດສະຫຼຸບຕີລາຄາປະເມີນຜົນໄດ້ຮັບ ດັ່ງນີ້: ປະເພດດີຫຼາຍ (ເກັ່ງ) ມີ 10 ກົມກອງ ເທົ່າກັບ 37%, ປະເພດດີ ມີ 6 ກົມກອງ ເທົ່າກັບ 22%, ປະເພດກາງ ມີ 11 ກົມກອງ ເທົ່າກັບ 41%. ຈາກນັ້ນ, ກໍໄດ້ມອບໃບຢັ້ງຢືນ ໃຫ້ນັກເຝິກອົບຮົມ ທີ່ສໍາເລັດການເຝິກອົບຮົມໃນຄັ້ງນີ້. ໂອກາດນີ້, ສະຫາຍ ພົນຈັດຕະວາ ໄຊຍະແສງ ໄມມະນີ ໄດ້ມີຄໍາເຫັນໂອ້ລົມ ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດຂອງການເຝິກອົບຮົມຄັ້ງນີ້ ພ້ອມທັງໄດ້ເນັ້ນໜັກໃຫ້ບັນດາສະຫາຍທີ່ໄດ້ຜ່ານການເຝິກອົບຮົມ ຈົ່ງເປັນເຈົ້າການເພີ່ມທະວີຄວາມຮັບຜິດຊອບ ຕໍ່ໜ້າທີ່ການເມືອງຂອງຕົນໃຫ້ສູງຂຶ້ນກວ່າເກົ່າ, ນຳເອົາບົດຮຽນທີ່ໄດ້ຮໍ່າຮຽນມາ ໄປຜັນຂະຫຍາຍຈັດຕັ້ງປະຕິບັດ ນໍາໃຊ້ເຂົ້າໃນວຽກງານຕົວຈິງຢູ່ໃນກົມກອງຂອງຕົນ ໃຫ້ໄດ້ຮັບໝາກຜົນຕົວຈິງ ແລະ ມີປະສິດທິຜົນສູງ. ໂດຍ: ຝືວື່

news to day and hot news