POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນພຸດ, ວັນທີ 17 ມິຖຸນາ 2026

ກຳລັງຊ່າງແສງ ກອງທັບປະຊາຊົນລາວ ສຳເລັດພາລະກິດກວດກູ້ ລບຕ ແລະ ຖອນກຳລັງກັບຄືນກົມກອງ
ເວລາອອກຂ່າວ: 2026-05-11 15:18:04 | ຜູ້ຂຽນ : admin2 | ຈຳນວນຄົນເຂົ້າຊົມ: 503 | ຄວາມນິຍົມ:

ວັນທີ 7 ພຶດສະພາ 2026 ນີ້, ຄະນະຮັບຜິດຊອບກວດກູ້ ແລະ ທຳລາຍລະເບີດບໍ່ທັນແຕກ (ລບຕ) ເພື່ອມະນຸດສະທຳ ລາວ-ຣັດເຊຍ ໄດ້ຈັດກອງປະຊຸມສະຫຼຸບຜົນສຳເລັດການກວດກູ້ ແລະ ທຳລາຍລະເບີດບໍ່ທັນແຕກ ເພື່ອມະນຸດສະທຳ ລາວ-ຣັດເຊຍ ໃນສົກປີ 2025-2026 ຢູ່ເມືອງວຽງໄຊ ແຂວງຫົວພັນ ແລະ ໄດ້ຖອນກຳລັງພ້ອມພາຫະນະກັບຄືນກົມກອງ, ໂດຍມີສະຫາຍ ພົນຕີ ສີພອນໄຊ ຄຳທອງເຫວີນ ຮອງຫົວໜ້າກົມໃຫຍ່ເສນາທິການກອງທັບ, ມີສະຫາຍ ພົນຈັດຕະວາ ວົງຈັນ ພັນຈັນທະມານ ຮອງຫົວໜ້າກົມໃຫຍ່ການເມືອງກອງທັບ, ຄະນະຮັບຜິດຊອບກວດກູ້ ແລະ ທຳລາຍລະເບີດບໍ່ທັນແຕກ ເພື່ອມະນຸດສະທຳ ລາວ-ຣັດເຊຍ, ພາກສ່ວນທີ່ກ່ຽວຂ້ອງ ແລະ ນັກກວດກູ້ ແລະ ທຳລາຍລະເບີດເຂົ້າຮ່ວມ. ໃນກອງປະຊຸມໄດ້ສະຫຼຸບຕີລາຄາຄືນຜົນສຳເລັດການປະຕິບັດກວດກູ້ ແລະ ທຳລາຍລະເບີດບໍ່ທັນແຕກ ເພື່ອມະນຸດສະທຳ ລາວ-ຣັດເຊຍ ໃນຄັ້ງນີ້ ໄດ້ຈັດຕັ້ງປະຕິບັດລະຫວ່າງວັນທີ 28 ມີນາ ຫາ 6 ພຶດສະພາ 2026 ຈິ່ງໄດ້ສຳເລັດ ແລະ ຖອນກຳລັງກັບຄືນກົມກອງ, ໂດຍນຳໃຊ້ກຳລັງພົນທັງໝົດ 80 ສະຫາຍ ພ້ອມເຄື່ອງກວດລະເບີດ 32 ເຄື່ອງ, ເຊິ່ງສາມາດກວດກູ້ໄດ້ 2 ສະໜາມຫຼັກ ດັ່ງນີ້: ເນື້ອທີ່ກວດກູ້ໄດ້ທັງໝົດ 18,98 ເຮັກຕາ (185.985 ຕາແມັດ), ເຊິ່ງເປັນເຂດພັດທະນາບ້ານພັກ ແລະ ພື້ນທີ່ກະສິກຳ (ບ້ານນາໄກ); ຈຳນວນລະເບີດທີ່ກວດພົບທັງໝົດ 103 ລູກ (ໃນນີ້ມີລະເບີດລູກຫວ່ານ BLU-26 ຈຳນວນ 31 ໜ່ວຍ ແລະ ສັບພະວຸດອື່ນໆ 72 ລູກ ເຊັ່ນ: ລູກປືນໃຫຍ່, ຈະຫຼວດ ແລະ ລະເບີດມື); ເສດສະເກັດ ແລະ ເສດເຫຼັກ ກວດພົບ ແລະ ເກັບມ້ຽນໄດ້ຫຼາຍກວ່າ 49.000 ສິ້ນສ່ວນ; ການທຳລາຍ ໄດ້ດຳເນີນການທຳລາຍລະເບີດຢູ່ກັບທີ່ຢ່າງປອດໄພທັງໝົດ 29 ຄັ້ງ ລວມ 91 ໜ່ວຍ. ຜົນສຳເລັດໃນຄັ້ງນີ້ ເຮັດໃຫ້ເນື້ອທີ່ດິນຂອງລັດ ແລະ ປະຊາຊົນເມືອງວຽງໄຊ ມີຄວາມປອດໄພ, ສາມາດນຳໃຊ້ເຂົ້າໃນການຜະລິດກະສິກຳ ແລະ ພັດທະນາພື້ນຖານໂຄງລ່າງ ໂດຍບໍ່ມີຄວາມສ່ຽງຈາກລະເບີດຕົກຄ້າງອີກຕໍ່ໄປ. ສັງລວມແລ້ວ, ຜ່ານການຈັດຕັ້ງປະຕິບັດວຽກງານກວດກູ້ ແລະ ທຳລາຍລະເບີດບໍ່ທັນແຕກໃນຄັ້ງນີ້ເຫັນວ່າ: ພະນັກງານ-ນັກຮົບທຸກສະຫາຍ ມີແນວຄິດອຸ່ນອຽງທຸ່ນທ່ຽງ, ມີຄວາມຮັບຜິດຊອບສູງ ແລະ ມີຄວາມຊຳນິຊຳນານດ້ານວິຊາສະເພາະ. ໄດ້ຮັບການຮ່ວມມືຢ່າງດີຈາກຊ່ຽວຊານ ສ ຣັດເຊຍ ແລະ ອຳນາດການປົກຄອງທ້ອງຖິ່ນ, ເຮັດໃຫ້ການຈັດຕັ້ງປະຕິບັດວຽກງານມີຄວາມສະດວກ ແລະ ມີຄວາມສະຫງົບ 100%. ຄຽງຄູ່ກັບຜົນສຳເລັດດັ່ງກ່າວ ຄະນະຮັບຜິດຊອບ ແລະ ນັກກວດກູ້ ຍັງພົບຄວາມຫຍຸ້ງບາງດ້ານເປັນຕົ້ນແມ່ນສະພາບອາກາດຝົນຕົກ ແລະ ເນື້ອທີ່ບາງບ່ອນມີເສດເຫຼັກປົນເຈືອຫຼາຍ ເຮັດໃຫ້ການກວດກູ້ຊັກຊ້າໃນບາງຊ່ວງ, ແຕ່ກໍສາມາດເຮັດສຳເລັດຕາມແຜນການທີ່ວາງໄວ້.

news to day and hot news