ວັນອັງຄານ, ວັນທີ 16 ມິຖຸນາ 2026
ສຳຫຼວດພື້ນທີ່ ເພື່ອກຽມເຝິກຊ້ອມ ຕ້ານອາດສະຍາກຳຂ້າມຊາຍແດນ ລາວ-ຫວຽດນາມ
ເວລາອອກຂ່າວ: 2026-05-19 09:10:21 | ຜູ້ຂຽນ : admin1 | ຈຳນວນຄົນເຂົ້າຊົມ: 177 | ຄວາມນິຍົມ: 
ວັນທີ 7 ພຶດສະພາ 2026 ນີ້, ກອງບັນຊາການທະຫານແຂວງຄຳມ່ວນ ສປປ ລາວ ແລະ ກອງບັນຊາການທະຫານຊາຍແດນ ແຂວງກວາງຈິ ສສ ຫວຽດນາມ ໄດ້ລົງສຳຫຼວດພື້ນທີ່ຕົວຈິງ ເພື່ອກຽມພ້ອມໃນການເຝິກຊ້ອມຕ້ານອາດສະຍາກຳຂ້າມຊາຍແດນ ລາວ-ຫວຽດນາມ ຢູ່ທີ່ດ່ານສາກົນຈາລໍ
ແຂວງກວາງຈິ, ເຊິ່ງຝ່າຍລາວນຳໂດຍ ສະຫາຍ ພັນເອກ ບຸນເລີດ ບຸບຜາວັນ ຫົວໜ້າການທະຫານ ກອງບັນຊາການທະຫານແຂວງຄຳມ່ວນ ແລະ ຝ່າຍຫວຽດ ນຳໂດຍສະຫາຍ ພັນເອກ ຈິ່ງ ແທັງ ບິ່ງ ຫົວໜ້າການທະຫານ ກອງບັນຊາການທະຫານຊາຍແດນ ແຂວງກວາງຈິ ພ້ອມດ້ວຍຄະນະພັກ-ຄະນະບັນຊາ, ພະແນກການທີ່ກ່ຽວຂ້ອງທັງສອງຝ່າຍ ເຂົ້າຮ່ວມ.
ກ່ອນຈະລົງເຄື່ອນໄຫວສຳຫຼວດພື້ນທີ່ຕົວຈິງ ຄະນະຜູ້ແທນທັງສອງຝ່າຍ ໄດ້ພົບປະແລກປ່ຽນຄຳຄິດເຫັນຢ່າງກົງໄປກົງມາດ້ວຍຄວາມຮັບຜິດຊອບສູງ ເພື່ອຄວາມເປັນເອກະພາບດ້ານການກຳນົດເນື້ອໃນ, ເວລາ, ສະຖານທີ່ ແລະ ຄວາມພ້ອມດ້ານຕ່າງໆ ເພື່ອເຮັດໃຫ້ການເຝິກຊອ້ມຕ້ານອາດສະຍາກຳຂ້າມຊາຍແດນ ລາວ-ຫວຽດນາມ ກໍ່ຄືຊາຍແດນແຂວງຄຳມ່ວນ ກັບ ຊາຍແດນແຂວງກວາງຈິ ໃນຄັ້ງນີ້ໃຫ້ສຳເລັດຕາມແຜນການ ແລະ ລະດັບຄາດໝາຍທີ່ວາງໄວ້, ພ້ອມທັງຮັບປະກັນໄດ້ຄວາມປອດໄພ 100%. ສ່ວນການເຝິກຊ້ອມແມ່ນໄດ້ກຳນົດເອົາດ່ານສາກົນຈາລໍ-ນາເພົ້າ ເປັນສະຖານທີ່ເຝິກຊ້ອມຮ່ວມ ລະຫວ່າງ ທັງສອງຝ່າຍ ແລະ ກຳນົດເວລາໃນການເຝິກຊ້ອມຕົວຈິງ 20 ວັນ ໃຫ້ສຳເລັດ.
ຈາກນັ້ນ, ທັງສອງຝ່າຍ ກໍໄດ້ພ້ອມກັນລົງສຳຫຼວດສະຖານທີ່ຕົວຈິງ ທີ່ຈະໃຊ້ເຂົ້າໃນການເຝິກຊ້ອມຮ່ວມ ແລະ ເຊັນບົດບັນທຶກການແລກປ່ຽນດ້ານເນື້ອໃນການລົງສຳຫຼວດໃນພາກສະໜາມ ເພື່ອຮັບປະກັນໃຫ້ການເຝິກຊ້ອມຕ້ານອາດສະຍາກຳຂ້າມຊາຍແດນ ຂອງສອງແຂວງ ຄຳມ່ວນ-ກວາງຈິ ໃນຄັ້ງນີ້ຢ່າງເປັນທາງການ. ທັງນີ້ ກໍເພື່ອເພີ່ມທະວີທາງດ້ານວຽກງານຕ້ານ ແລະ ສະກັດກັ້ນບັນດາປາ
ກົດການຫຍໍ້ທໍ້ຕ່າງໆຕາມບໍລິເວນຊາຍແດນ, ຄຸ້ມຄອງຊາຍແດນ, ຫຼັກໝາຍຊາຍແດນ ຂອງທັງສອງປະເທດເວົ້າລວມ, ເວົ້າສະເພາະ ສອງແຂວງຄຳມ່ວນ-ກວາງຈິ ໃຫ້ມີຄວາມສະຫງົບ, ມີສະຖຽນລະພາບທາງດ້ານການເມືອງ ແລະ ມີຄວາມເປັນລະບຽບຮຽບຮ້ອຍ ແລະ ຍັງເປັນການຮັດແໜ້ນຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ ໃນການປະສານງານກັນຢ່າງກົມກຽວດ້ານວຽກງານຕ່າງໆ ລະຫວ່າງ ກອງບັນຊາການທະຫານແຂວງຄຳມ່ວນ ສປປ ລາວ ແລະ ກອງບັນຊາການ ທະຫານຊາຍແດນແຂວງກວາງຈິ ສສ ຫວຽດນາມ ໃຫ້ນັບມື້ແໜ້ນແຟ້ນຂຶ້ນໄປເລື້ອຍໆ.
ໂດຍ: ຈັນທະວີສຸກ ພົງເຂັມທອງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
