ວັນຈັນ, ວັນທີ 20 ກໍລະກົດ 2026
ກອງປະຊຸມພົບປະປຶກສາຫາລື ເອກະພາບເນື້ອໃນຮ່າງສັນຍາ ຄວາມປອດໄພທາງດ້ານການບິນ
ເວລາອອກຂ່າວ: 2026-06-05 08:49:52 | ຜູ້ຂຽນ : admin1 | ຈຳນວນຄົນເຂົ້າຊົມ: 208 | ຄວາມນິຍົມ: 
ວັນທີ 3 ມິຖຸນາ 2026 ນີ້, ກອງບັນຊາການທະຫານອາກາດ ລາວ-ຣັດເຊຍ ໄດ້ຈັດກອງປະຊຸມພົບປະເພື່ອປຶກສາຫາລື ແລະ ຄົ້ນຄວ້າເອກະພາບເນື້ອໃນຮ່າງສັນຍາ ໃນຂົງເຂດວຽກງານຄວາມປອດໄພທາງດ້ານການ ບິນ, ເຊິ່ງຝ່າຍລາວນຳໂດຍ ສະ ຫາຍ ພັນເອກ ບົວວັນ ກັນຍາວົງ ຫົວໜ້າຫ້ອງອົບຮົມການບິນ ກອງບັນຊາການທະຫານອາກາດ ກອງທັບປະຊາຊົນລາວ ແລະ ຝ່າຍຣັດເຊຍ ນຳພາໂດຍ ສະຫາຍ ພັນເອກ ອາເລັກຊັນເດີ ເຢບໂດກີມົບ ຮອງຫົວໜ້າກົມ (ໜ່ວຍງານ) ຄວາມປອດໄພດ້ານການ ບິນ, ກຳລັງປະກອບອາວຸດ ແຫ່ງ ສ ຣັດເຊຍ, ມີບັນດາຄະນະຜູ້ແທນ ແລະ ເຈົ້າໜ້າທີ່ກ່ຽວຂ້ອງທັງສອງຝ່າຍ ເຂົ້າຮ່ວມ.
ໃນກອງປະຊຸມ ທັງສອງຝ່າຍ ໄດ້ຮ່ວມກັນຄົ້ນຄວ້າ, ປຶກສາຫາລື ແລະ ປະກອບຄຳຄິດເຫັນ ໃສ່ຮ່າງສັນຍາຮ່ວມມື ໃນຂົງເຂດວຽກງານຄວາມປອດໄພທາງດ້ານການບິນ ຢ່າງກົງໄປກົງມາ ບົນພື້ນຖານຄວາມສອດຄ່ອງກັບລະບຽບຫຼັກການ ແລະ ກົດໝາຍ ຂອງທັງສອງປະເທດ. ເນື້ອໃນຫຼັກຂອງຮ່າງສັນຍາແມ່ນມຸ້ງເນັ້ນໃສ່ການສ້າງຂອບການຮ່ວມມືທີ່ຊັດເຈນ ໃນການແລກປ່ຽນຂໍ້ມູນຂ່າວສານ, ບົດຮຽນ, ເຕັກໂນໂລຊີ ແລະ ການຍົກລະດັບຄວາມຮູ້ຄວາມສາມາດ ໃຫ້ແກ່ນາຍທະຫານນັກບິນ ກໍຄື ເຈົ້າໜ້າທີ່ເຕັກນິກການບິນ ຂອງກອງທັບປະຊາຊົນລາວ ເພື່ອຮັບປະກັນຄວາມປອດໄພ ໃນການປະຕິບັດໜ້າທີ່ການບິນທະຫານ ໃຫ້ມີປະ ສິດທິພາບສູງ. ຜ່ານການປຶກສາຫາລື, ທັງສອງຝ່າຍ ໄດ້ມີຄວາມເປັນເອກະພາບກັນ ຕໍ່ກັບເນື້ອໃນສ່ວນໃຫຍ່ໃນຮ່າງສັນຍາດັ່ງກ່າວ ເຊິ່ງດຳເນີນໄປດ້ວຍບັນຍາກາດແຫ່ງຄວາມເຂົ້າອົກເຂົ້າໃຈ ແລະ ຮັດແໜ້ນສາຍພົວພັນມິດຕະພາບອັນດີງາມ ທີ່ມີມາແຕ່ດົນນານ ລະຫວ່າງ ສອງປະເທດ ລາວ-ຣັດເຊຍ ໂດຍສະເພາະແມ່ນສອງກອງທັບ ໄດ້ຮັບການພັດທະນາຂຶ້ນໄປເລື້ອຍໆ.
ຈາກນັ້ນ, ຫົວໜ້າຄະນະຜູ້ແທນທັງສອງຝ່າຍ ກໍໄດ້ຮ່ວມກັນລົງນາມໃນບົດບັນທຶກ ຜົນການພົບປະປຶກສາຫາລືຮ່ວມກັນ ຢ່າງເປັນທາງການ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
