ວັນເສົາ, ວັນທີ 11 ກໍລະກົດ 2026
ທ່ານ ສີ ຈິ້ນຜິງ ແລະ ພັນລະຍາ ສຳເລັດການຢ້ຽມຢາມ ສປປ ເກົາຫຼີ ຢ່າງຈົບງາມ
ເວລາອອກຂ່າວ: 2026-06-11 09:40:54 | ຜູ້ຂຽນ : admin3 | ຈຳນວນຄົນເຂົ້າຊົມ: 136 | ຄວາມນິຍົມ: 
ພາລະກິດການຢ້ຽມຢາມ ສປປ ເກົາຫຼີ ໃນພາກເຊົ້າວັນທີ 9 ມິຖຸນາ ນີ້, ທ່ານ ສີ ຈິ້ນຜິງ ເລຂາ ທິການໃຫຍ່ຄະນະກຳມະການສູນກາງພັກຄອມມູນິດຈີນ ປະທານປະເທດຈີນ ພ້ອມດ້ວຍພັນລະຍາ ໄດ້ຢ້ຽມຢາມໂຮງຮຽນພະນັກງານສູນກາງພັກແຮງງານເກົາຫຼີ, ໄປຢ້ຽມຊົມຫໍມິດຕະພາບ ສປ ຈີນ-ສປປ ເກົາຫຼີ ແລະ ຢ້ຽມຢາມໂຮງຮຽນພະນັກງານສູນກາງພັກແຮງງານເກົາຫຼີ ທີ່ຕັ້ງຢູ່ນະຄອນຫຼວງພຽງຢາງ, ໂດຍມີທ່ານ ກິມເຈິງອຸນ ເລຂາທິການໃຫຍ່ພັກແຮງງານເກົາຫຼີ ປະທານກິດຈະການແຫ່ງລັດ ສປປ ເກົາຫຼີ ແລະ ພັນລະຍາ ຮ່ວມເດີນທາງໄປນຳ, ເຊິ່ງຢູ່ທີ່ນັ້ນ, ຜູ້ນຳສູງສຸດສອງປະເທດໄດ້ຮ່ວມກັນປູກຕົ້ນໄມ້ເພື່ອເປັນທີລະນຶກໃຫ້ແກ່ວັນສ້າງຕັ້ງສາຍພົວພັນທີ່ມາຍາວນານຂອງສອງປະເທດ ແລະ ເປັນຫຼັກຖານແຫ່ງການຢ້ຽມຢາມ ສປປ ເກົາຫຼີ ໃນຮອບຫຼາຍປີຂອງຜູ້ນຳ ສປ ຈີນ ຕື່ມອີກ.
ໃນຕອນທ່ຽງ, ທ່ານ ສີ ຈິ້ນຜິງ ແລະ ທ່ານ ນາງ ເພີງລີ້ຢວນ ພັນລະຍາ ໄດ້ເຂົ້າຮ່ວມງານລ້ຽງອາຫານທ່ຽງວົງແຄບ ເພື່ອສົ່ງຄະນະຜູ້ນຳ ສປ ຈີນ, ຈັດຂຶ້ນໂດຍທ່ານ ກິມເຈິງອຸນ ພ້ອມພັນລະຍາ. ໃນງານລ້ຽງດັ່ງກ່າວ, ຜູ້ນຳສູງສຸດຂອງສອງພັກສອງລັດໄດ້ລົງເລິກແລກປ່ຽນຄວາມຄິດຄວາມເຫັນກ່ຽວກັບການປັບປຸງ ແລະ ການສືບທອດມິດຕະພາບອັນເປັນມູນເຊື້ອ ລະຫວ່າງ ສປ ຈີນ ແລະ ສປປ ເກົາຫຼີ ຕື່ມອີກ ເປັນຕົ້ນ:
ທ່ານ ສີ ຈິ້ນຜິງ ກ່າວວ່າ, ຜ່ານການຢ້ຽມຢາມຄັ້ງນີ້, ເຮັດໃຫ້ສອງຝ່າຍມີຄວາມເຂົ້າໃຈກັນເລິກເຊິ່ງ ແລະ ຮອບດ້ານກວ່າເກົ່າ, ທິດທາງການພັດທະນາໃນ
ອະນາຄົດມີຄວາມຈະແຈ້ງກວ່າເກົ່າ. ຂ້າພະເຈົ້າຍິນດີຮ່ວມກັບທ່ານເລຂາທິການໃຫຍ່ ກິມເຈິງອຸນ ເພື່ອຮ່ວມກັນນຳພາການພົວພັນ ຈີນ-ສປປ ເກົາຫຼີ ບັນລຸການພັດທະນາຫຼາຍກວ່າເກົ່າ ແລະ ເພີ່ມແຮງຂັບເຄື່ອນທີ່ແຂງແຮງອັນໃໝ່ເຂົ້າໃນພາລະກິດສັງຄົມນິຍົມຂອງສອງປະເທດ.
ທ່ານ ກິມເຈິງອຸນ ກ່າວວ່າ, ການຢ້ຽມຢາມຂອງທ່ານເລຂາທິການໃຫຍ່ ສີ ຈິ້ນຜິງ ໃນຄັ້ງນີ້ ໄດ້ຮັບຜົນສຳເລັດຢ່າງຈົບງາມ, ໄດ້ສົ່ງສັນຍານທາງບວກໄປທົ່ວໂລກກ່ຽວກັບການເພີ່ມທະວີການຮ່ວມມືມິດຕະພາບລະຫວ່າງ ສປປ ເກົາຫຼີ ແລະ ຈີນ, ໄດ້ຮັບຄວາມສົນໃຈໃນລະດັບສູງຈາກທຸກຝ່າຍ. ການຢ້ຽມຢາມຄັ້ງນີ້ ມີຄວາມໝາຍສຳຄັນເປັນຢ່າງຍິ່ງຕໍ່ການພົວພັນສອງປະເທດ ແລະ ການພັດທະນາຂອງພາກພື້ນນີ້ໃນອະນາຄົດ.
ໃນຕອນບ່າຍຂອງວັນດຽວກັນ, ທ່ານ ກິມເຈິງອຸນ ເລຂາທິການໃຫຍ່ພັກແຮງງານເກົາຫຼີ ປະທານກິດຈະການແຫ່ງລັດ ສປປ ເກົາຫຼີ ແລະ ທ່ານ ນາງ ລີຊຸງຈູ ພັນລະຍາຂອງທ່ານ ໄດ້ຈັດພິທີສົ່ງຢ່າງຟົດຟື້ນຍິ່ງໃຫຍ່ ເພື່ອເປັນກຽດແກ່ ທ່ານ ສີ ຈິ້ນຜິງ ແລະ ທ່ານ ນາງ ເພີງລີ້ຢວນ ພັນລະຍາຂອງທ່ານ ຢູ່ສະໜາມບິນນະຄອນຫຼວງພຽງຢາງ, ໂດຍການຢ້ຽມຢາມ ສປປ ເກົາຫຼີ ທາງລັດຖະກິດຄັ້ງນີ້ ໄດ້ຮັບຜົນສຳເລັດເຕັມເມັດເຕັມໜ່ວຍ ແລະ ເດີນທາງກັບຮອດນະຄອນຫຼວງປັກກິ່ງ ດ້ວຍຄວາມສະຫວັດດີພາບ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
