POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນຈັນ, ວັນທີ 20 ກໍລະກົດ 2026

ເວທີປາໄສອະນາຄົດອາຊຽນ 2026 ເປີດຂຶ້ນຢ່າງເປັນທາງການຢູ່ ສສ ຫວຽດນາມ
ເວລາອອກຂ່າວ: 2026-06-11 09:43:13 | ຜູ້ຂຽນ : admin3 | ຈຳນວນຄົນເຂົ້າຊົມ: 138 | ຄວາມນິຍົມ:

ຕອນເຊົ້າວັນທີ 9 ມິຖຸນາ, ທີ່ນະຄອນຫຼວງຮ່າໂນ້ຍ ສສ ຫວຽດນາມ, ເວທີປາໄສອະນາຄົດອາຊຽນ 2026 (AFF 2026) ໄດ້ເປີດຂຶ້ນຢ່າງເປັນທາງການ ພາຍໃຕ້ຫົວຂໍ້“ການສ້າງອະນາຄົດຮ່ວມກັນ: ສັນຕິພາບ, ຄວາມຈະເລີນຮຸ່ງເຮືອງ ແລະ ເອົາປະຊາຊົນເປັນໃຈກາງ”. ພິທີເປີດ AFF 2026 ໂດຍມີ ທ່ານ ເລມິງຮຶງ ນາຍົກລັດຖະມົນຕີ ສສ ຫວຽດນາມ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ທ່ານ ສົມເດັດ ຮຸນ ມາເນັດ ນາຍົກລັດຖະມົນຕີ ແຫ່ງຣາຊະອານາຈັກ ກຳປູເຈຍ, ທ່ານ ອະນຸທິນ ຊານວີຣະກູນ ນາຍົກລັດຖະມົນຕີ ແຫ່ງຣາຊະອາ ນາຈັກ ໄທ, ທ່ານ ໄກ ຣາລາ ຊານານາ ກຸສເມົາ ນາຍົກລັດຖະມົນຕີ ແຫ່ງ ຕີມໍ-ເລສເຕ, ທ່ານ ເລ ຮ່ວາຍ ຈຸງ ລັດຖະມົນຕີກະຊວງການຕ່າງປະເທດ ແລະ ທ່ານ ເກົ້າ ກິມ ຮຸນ ເລຂາທິການໃຫຍ່ອາຊຽນ ເຂົ້າຮ່ວມ. ກ່າວຄຳປາໄສໃນພິທີເປີດ, ທ່ານ ເລມິງຮຶງ ໄດ້ເນັ້ນໜັກວ່າ, AFF 2026 ມີຄວາມໝາຍສຳຄັນເປັນພິເສດ. ຫົວຂໍ້ຂອງເວທີປາໄສສະທ້ອນໃຫ້ເຫັນເຖິງຄຸນຄ່າຫຼັກທີ່ອາຊຽນໄດ້ດຳເນີນ ແລະ ກຳນົດທິດທາງສຳລັບອະນາຄົດຂອງປະຊາຄົມໃນໄລຍະຕໍ່ໄປ. ຫຼັງຈາກ 59 ປີຂອງການສ້າງຕັ້ງ ແລະ ການພັດທະນາ, ຜົນງານອັນໂດດເດັ່ນທີ່ສຸດຂອງອາຊຽນ ບໍ່ໄດ້ຢູ່ພຽງແຕ່ຂະໜາດປະຊາກອນເກືອບ 700 ລ້ານຄົນ ຫຼື ສະຖານະຂອງການເປັນໜຶ່ງໃນສູນກາງການເຕີບໂຕທາງເສດຖະກິດທີ່ມີຄວາມຄຶກຄື້ນ ແລະ ມີພະລັງຫຼາຍທີ່ສຸດໃນໂລກ, ແຕ່ຢູ່ທີ່ຄວາມພະຍາຍາມຮ່ວມກັນໃນການກ້າວຂ້າມຄວາມແຕກຕ່າງ, ສ້າງສາຍສຳພັນແຫ່ງຄວາມໄວ້ວາງໃຈ ແລະ ຂະຫຍາຍການຮ່ວມມື ຈົນກາຍເປັນປະຊາຄົມທີ່ມີຄວາມສາມັກຄີ, ມີຄວາມເຂັ້ມແຂງເພິ່ງພາຕົນເອງໄດ້ ແລະ ເປັນໜຶ່ງດຽວກັນທ່າມກາງຄວາມຫຼາກຫຼາຍ. ຖ້າເກືອບ 6 ທົດສະວັດທີ່ຜ່ານມາເປັນເສັ້ນທາງແຫ່ງການສ້າງເອກະລັກຂອງອາຊຽນ, ແລ້ວຫຼາຍທົດສະວັດຂ້າງໜ້ານີ້ຈະເປັນເສັ້ນທາງແຫ່ງການກຳນົດອະນາຄົດຂອງອາຊຽນ ໃນໂລກທີ່ກົດເກນພື້ນຖານຂອງເສດຖະກິດ, ເຕັກໂນໂລຊີ ແລະ ອຳນາດໃນລະດັບໂລກ ກຳລັງຖືກຂຽນຂຶ້ນໃໝ່. ເຕັກໂນໂລຊີກຳລັງກຳນົດຄວາມໝາຍໃໝ່ກ່ຽວກັບການແຂ່ງຂັນ, ປັນຍາປະດິດ (AI) ກຳລັງນິຍາມຜະລິດຕະພາບຂຶ້ນໃໝ່, ແລະ ຂໍ້ມູນ ກຳລັງນິຍາມອຳນາດຂຶ້ນໃໝ່; ຂະບວນການຫັນປ່ຽນສູ່ສີຂຽວກໍກຳລັງກຳນົດຄວາມໝາຍແບບແຜນການພັດທະນາໃໝ່ເຊັ່ນກັນ.ໃນຊ່ວງເວລາສຳຄັນອັນເປັນຈຸດຫັນປ່ຽນເຊັ່ນນີ້, ຄວາມໄດ້ປຽບຈະບໍ່ໄດ້ຕົກເປັນຂອງບັນດາປະເທດທີ່ມີຊັບພະຍາກອນຫຼາຍເທົ່ານັ້ນ, ແຕ່ຍັງເປັນຂອງປະເທດ ແລະ ພາກພື້ນທີ່ມີຄວາມສາມາດເຂົ້າຮ່ວມກຳນົດກົດເກນ ແລະ ມາດຕະຖານໃໝ່ໆຂອງຍຸກສະໄໝ. ຫວຽດນາມເຊື່ອວ່າ ອາຊຽນ ຈຳເປັນ ແລະ ຕ້ອງກາຍເປັນຜູ້ມີບົດບາດເຊີງບຸກໃນຂະບວນການນັ້ນ, ບ່ອນທີ່ບໍ່ແມ່ນພຽງແຕ່ຮັບເອົາທ່າອ່ຽງຂອງໂລກ, ແຕ່ຍັງເປັນແຮງຂັບເຄື່ອນທີ່ຮ່ວມກັນກຳນົດແນວທາງເຫຼົ່ານັ້ນດ້ວຍ”. ທ່ານນາຍົກຫວຽດນາມເນັ້ນ, ເພື່ອໃຫ້ຄວາມປາຖະໜາດັ່ງກ່າວກາຍເປັນຈິງ, ຕາມທັດສະນະຂອງທ່ານ, ອາຊຽນ ຈຳເປັນຕ້ອງສືບຕໍ່ສົ່ງເສີມຈິດໃຈແຫ່ງຄວາມສາມັກຄີ, ຄວາມເຂັ້ມແຂງເພິ່ງພາຕົນເອງ ແລະ ຄວາມເປັນໜຶ່ງດຽວທ່າມກາງຄວາມຫຼາກຫຼາຍ ຊຶ່ງເປັນຄຸນຄ່າທີ່ສ້າງຄວາມສຳເລັດໃຫ້ແກ່ອາຊຽນມາໂດຍຕະຫຼອດ. ແຕ່ການດຳເນີນງານຕ້ອງມີແນວທາງທີ່ສ້າງສັນຫຼາຍຂຶ້ນ: ມີຄວາມເຫັນດີເປັນເອກະພາບ ແລະ ຄ່ອງຕົວໃນການປະຕິບັດ; ຍຶດໝັ້ນໃນຫຼັກການ ແຕ່ປັບປຸງວິທີການໃຫ້ທັນສະໄໝ; ໃນການເດີນທາງໄປສູ່ການບັນລຸວິໄສທັດປະຊາຄົມອາຊຽນ 2045, ພ້ອມນັ້ນ ອາຊຽນຕ້ອງມຸ່ງໄປສູ່ 3 ຍຸດທະສາດສຳຄັນ ຄື: ໜຶ່ງ, ອາຊຽນ ບໍ່ຄວນຈຳກັດບົດບາດຂອງຕົນພຽງແຕ່ການເຂົ້າຮ່ວມໃນທ່າອ່ຽງຂອງໂລກ ແຕ່ຕ້ອງມີສ່ວນຮ່ວມໃນການກຳນົດແນວທາງເຫຼົ່ານັ້ນດ້ວຍ.ຕະຫຼອດຫຼາຍທົດສະວັດຜ່ານມາ, ອາຊຽນ ເປັນໜຶ່ງໃນພາກພື້ນທີ່ໄດ້ຮັບຜົນປະໂຫຍດຈາກສັນຕິພາບ, ການເຊື່ອມໂຍງ ແລະ ການຄ້າເສລີ. ແຕ່ໃນໂລກທີ່ກຳລັງແຕກແຍກເປັນກຸ່ມ ແລະ ມີການແຂ່ງຂັນຢ່າງຮຸນແຮງ, ອາຊຽນ ຈຳເປັນຕ້ອງມີສຽງທີ່ເຂັ້ມແຂງກວ່າເກົ່າໃນການຮ່ວມສ້າງມາດຕະຖານ, ກົດເກນ ແລະ ໂຄງສ້າງຄວາມຮ່ວມມືໃໝ່ໆ, ພ້ອມທັງແກ້ໄຂຄວາມແຕກຕ່າງໂດຍອີງໃສ່ກົດໝາຍສາກົນ. ອາຊຽນ ຄວນກາຍເປັນສູນກາງແຫ່ງການສົນທະນາ, ເປັນຈຸດໃຈກາງຂອງການຮ່ວມມື ແລະ ເປັນເສົາຄ້ຳແຫ່ງຄວາມໄວ້ເນື້ອເຊື່ອໃຈ. ນັ້ນຄືການປະກອບສ່ວນອັນພິເສດຂອງອາຊຽນ ຕໍ່ສັນຕິພາບ, ສະຖຽນລະພາບ, ການພັດທະນາ ທັງໃນພາກພື້ນ ແລະ ໃນລະດັບໂລກ. ສອງ, ອາຊຽນ ບໍ່ພຽງແຕ່ສູນກາງການຜະລິດເທົ່ານັ້ນ, ແຕ່ຕ້ອງກາຍເປັນສູນກາງແຫ່ງນະວັດຕະກຳ ແລະ ຄວາມຄິດສ້າງສັນ. ຄວາມໄດ້ປຽບດ້ານແຮງງານ ແລະ ທີ່ຕັ້ງທາງພູມສາດ ໄດ້ຊ່ວຍໃຫ້ ASEAN ກາຍເປັນຈຸດເຊື່ອມຕໍ່ສຳຄັນໜຶ່ງໃນຕ່ອງໂສ້ການສະໜອງຂອງໂລກ. ແຕ່ໃນຍຸກດິຈິຕອນ, ອະນາຄົດຈະບໍ່ໄດ້ເປັນຂອງເສດຖະກິດທີ່ຮູ້ພຽງແຕ່ການຜະລິດເທົ່ານັ້ນ, ແຕ່ຈະເປັນຂອງເສດຖະກິດທີ່ສາມາດສ້າງສັນ ແລະ ພັດທະນານະວັດຕະກຳໄດ້. ອາຊຽນ ຕ້ອງບໍ່ພຽງແຕ່ເປັນບ່ອນທີ່ເຕັກໂນໂລຊີຖືກນຳໃຊ້ເທົ່ານັ້ນ, ແຕ່ຕ້ອງກາຍເປັນສະຖານທີ່ທີ່ເທັກໂນໂລຊີ ຖືກຄິດຄົ້ນ ແລະ ສ້າງຂຶ້ນ, ບໍ່ພຽງແຕ່ເປັນບ່ອນທີ່ລະບົບຕ່ອງໂສ້ການສະໜອງຜ່ານເທົ່ານັ້ນ, ແຕ່ຍັງເປັນບ່ອນທີ່ລະບົບຕ່ອງໂສ້ມູນຄ່າຖືກສ້າງຂຶ້ນ. ສິ່ງນີ້ຮຽກຮ້ອງໃຫ້ອາຊຽນລົງທຶນຢ່າງເຂັ້ມແຂງຫຼາຍຂຶ້ນໃນດ້ານວິທະຍາສາດ ແລະ ເທັກໂນໂລຊີ, ນະວັດຕະກຳ, ເສດຖະກິດດິຈິຕອນ ແລະ ການພັດທະນາຊັບພະຍາກອນມະນຸດທີ່ມີຄຸນນະພາບສູງ. ເປົ້າໝາຍຄືການສ້າງລະບົບນິເວດດ້ານເທັກໂນໂລຊີ ແລະ ດິຈິຕອນທີ່ມີເອກະລັກຂອງອາຊຽນ, ສະທ້ອນໃຫ້ເຫັນຄຸນຄ່າ ແລະ ເອກະລັກຂອງອາຊຽນເອງ, ພ້ອມທັງປະກອບສ່ວນຢ່າງຕັ້ງໜ້າໃນການສ້າງມາດຕະຖານທົ່ວໂລກຮ່ວມກັນ. ສາມ, ອາຊຽນ ບໍ່ຄວນເປັນພຽງແຕ່ປະຊາຄົມຂອງບັນດາປະເທດສະມາຊິກ ແຕ່ຕ້ອງກາຍເປັນປະຊາຄົມຂອງປະຊາຊົນຢ່າງແທ້ຈິງ. ເປົ້າໝາຍສູງສຸດຂອງທຸກຍຸດທະສາດການພັດທະນາ ບໍ່ແມ່ນຢູ່ທີ່ຕົວເລກການເຕີບໂຕທາງເສດຖະກິດ, ແຕ່ຢູ່ທີ່ຄຸນນະພາບຊີວິດຂອງປະຊາຊົນ. ການສ້າງນະວັດຕະກຳທີ່ເຮັດໃຫ້ຊ່ອງຫວ່າງຄວາມເຫຼື່ອມລ້ຳກວ້າງຂຶ້ນ ບໍ່ອາດຖືວ່າເປັນຄວາມກ້າວໜ້າໄດ້, ການເຕີບໂຕທີ່ຂາດຄວາມທົ່ວເຖິງ ແລະ ບໍ່ຄອບຄຸມທຸກກຸ່ມຄົນ ກໍບໍ່ສາມາດຍືນຍົງໄດ້. ດັ່ງ ນັ້ນ, ຄວາມສຳເລັດຂອງ ASEAN ບໍ່ຄວນຖືກວັດແທກດ້ວຍຕົວເລກ GDP ເທົ່ານັ້ນ, ແຕ່ຄວນວັດແທກຈາກໂອກາດທີ່ສ້າງໃຫ້ແກ່ຄົນຮຸ່ນໃໝ່, ບົດບາດທີ່ມອບໃຫ້ແກ່ແມ່ຍິງ, ແລະ ການຄຸ້ມຄອງດູແລທີ່ມອບໃຫ້ແກ່ກຸ່ມຄົນທີ່ອ່ອນໄຫວ ຫຼື ມີຄວາມສ່ຽງ ເພື່ອໃຫ້ປະຊາຊົນທຸກຄົນຮູ້ສຶກວ່າ ອາຊຽນ ແຫ່ງນີ້ແມ່ນປະຊາຄົມທີ່ຕົນເອງເປັນສ່ວນໜຶ່ງຢ່າງແທ້ຈິງ. “ຄຸນຄ່າອັນຍິ່ງໃຫຍ່ທີ່ສຸດຂອງ ASEAN ໃນເກືອບ 60 ປີທີ່ຜ່ານມາ, ໄດ້ພິສູດໃຫ້ໂລກເຫັນວ່າ ຄວາມແຕກຕ່າງບໍ່ໄດ້ນຳໄປສູ່ການແຕກແຍກ, ຄວາມເປັນເອກະພາບບໍ່ໄດ້ລົບລ້າງຄວາມຫຼາກຫຼາຍ, ແລະ ການເຊື່ອມຈອດບໍ່ໄດ້ເຮັດໃຫ້ສູນເສຍເອກະລັກຂອງຕົນ. ຄຸນຄ່າອັນຍິ່ງໃຫຍ່ທີ່ສຸດຂອງອາຊຽນໃນຫຼາຍທົດສະວັດຂ້າງໜ້າ ຈະເປັນການພິສູດວ່າ ປະຊາຄົມທີ່ມີຄວາມສາມັກຄີ ແລະ ເຂັ້ມແຂງພຶ່ງພາຕົນເອງໄດ້ ສາມາດມີສ່ວນຮ່ວມຢ່າງສ້າງສັນໃນການກຳນົດທິດທາງຂອງສັນຕິພາບ, ຄວາມຮ່ວມມື ແລະ ການພັດທະນາ ທັງໃນພາກພື້ນ ແລະ ໃນໂລກ. ໃນເສັ້ນທາງນັ້ນ, ຫວຽດນາມຂໍໃຫ້ຄຳໝັ້ນສັນຍາຢ່າງແນ່ວແນ່ວ່າ ຈະສືບຕໍ່ເດີນຄຽງຂ້າງອາຊຽນດ້ວຍຄວາມມຸ່ງຫວັງໃນການສ້າງອະນາຄົດ, ດ້ວຍທັງຫົວໃຈ ແລະ ສະຕິປັນຍາ. ເພາະອະນາຄົດຂອງຫວຽດນາມ ຜູກພັນຢ່າງແໜ້ນແຟ້ນກັບອະນາຄົດຂອງອາຊຽນ ເຊັ່ນດຽວກັນກັບສັນຕິພາບ, ຄວາມໝັ້ນຄົງ ແລະ ຄວາມຮຸ່ງເຮືອງຮ່ວມກັນຂອງທົ່ວພາກພື້ນ,” ທ່ານ ເລມິງຮຶງ ເນັ້ນຢ້ຳຕື່ມ ໃນຂອບເຂດຂອງ AFF 2026 ມີກອງປະຊຸມໃຫຍ່ (Plenary Sessions) ວ່າດ້ວຍຫົວຂໍ້ຕ່າງໆ ເຊັ່ນ: ຄວາມເຂັ້ມແຂງເພິ່ງພາຕົນເອງ ແລະ ຄວາມສາມັກຄີຂອງອາຊຽນ, ການສົ່ງເສີມຂໍ້ລິເລີ່ມຂອງອາຊຽນໃນການປ້ອງກັນ ແລະ ຫຼຸດຜ່ອນຄວາມຂັດແຍ່ງ, ການນຳໃຊ້ປັນຍາປະດິດ (AI) ໃນອາຊຽນ, ຄວາມໝັ້ນຄົງດ້ານພະລັງງານ ແລະ ແບບແຜນການພັດທະນາ, ພ້ອມດ້ວຍກອງປະຊຸມສົນທະນາສະເພາະດ້ານອື່ນໆ ຫຼາຍຫົວຂໍ້. ນອກຈາກນັ້ນ ຍັງມີການຈັດສຳມະນາ ແລະ ການສົນທະນາກ່ຽວກັບຫົວຂໍ້ ເຕັກໂນໂລຊີການ ເງິນ (FinTech) ເພື່ອແລກປ່ຽນແນວຄິດ, ປະສົບການ ແລະ ແນວທາງໃໝ່ໆ ໃນການພັດທະນາການເງິນດິຈິຕອນ ແລະ ນະວັດຕະກຳດ້ານການເງິນໃນພາກພື້ນ. AFF 2026 ແມ່ນເຫດການດ້ານການຕ່າງປະເທດຫຼາຍຝ່າຍລະດັບສູງທີ່ມີຂະໜາດໃຫຍ່ ເຊິ່ງເປັນຄັ້ງທຳອິດທີ່ຫວຽດນາມເປັນເຈົ້າພາບຈັດຂຶ້ນ ພາຍຫຼັງຄວາມສຳເລັດຂອງກອງປະຊຸມໃຫຍ່ຂອງພັກ ຄັ້ງທີ XIV, ການເລືອກຕັ້ງສະພາແຫ່ງຊາດສະໄໝທີ XVI ແລະ ການແຕ່ງຕັ້ງບຸກຄະລາກອນຜູ້ນຳສຳຄັນຂອງພັກ ແລະ ລັດໃຫ້ຄົບຖ້ວນ. AFF ແມ່ນຂໍ້ລິເລີ່ມຂອງລັດຖະບານຫວຽດນາມ ທີ່ໄດ້ປະກາດໃນກອງປະຊຸມສຸດຍອດ ASEAN ປີ 2023 ໂດຍມີເປົ້າໝາຍສ້າງເວທີໃຫ້ຜູ້ນຳອາຊຽນ, ບັນດາຄູ່ຮ່ວມງານຂອງອາຊຽນ, ນັກວິຊາການ ແລະ ພາກທຸລະກິດນານາຊາດ ໄດ້ຮ່ວມກັນປຶກສາຫາລື, ສະເໜີແນວຄິດ ແລະ ຂໍ້ລິເລີ່ມໃໝ່ໆ ເພື່ອຮ່ວມກັນກຳນົດອະນາຄົດຂອງອາຊຽນ. ນອກຈາກນັ້ນ, AFF ຍັງເປັນຊ່ອງທາງເສີມສຳລັບຂະບວນການຮ່ວມມືຢ່າງເປັນທາງການຂອງອາຊຽນ. AFF ຈັດຂຶ້ນເປັນຄັ້ງທຳອິດໃນປີ 2024 ແລະ ຄັ້ງທີ 2 ໃນປີ 2025 ຊຶ່ງປະສົບຜົນສຳເລັດຢ່າງດີ, ດຶງດູດຄວາມສົນໃຈ, ການຕອບຮັບ ແລະ ການສະໜັບສະໜູນຢ່າງກວ້າງຂວາງຈາກບັນດາປະເທດອາຊຽນ ແລະ ເພື່ອນມິດສາ ກົນ, ເຫດການນີ້ໄດ້ຄ່ອຍໆຂະ ຫຍາຍອອກໄປນອກອາຊຽນ ຢັ້ງຢືນຊື່ສຽງຂອງຕົນໃນຖານະເປັນເວທີເປີດກວ້າງ ທີ່ມຸ່ງໄປສູ່ອະນາຄົດ ແລະ ສົ່ງເສີມການຮ່ວມມືຂອງພາກພື້ນອາຊຽນຢ່າງຍືນຍົງ.

news to day and hot news