POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອາທິດ, ວັນທີ 16 ສິງຫາ 2026

ລັດຖະບານ ຈະສຸມໃສ່ຫຼາຍບັນຫາ ເພື່ອເຮັດໃຫ້ການສຶກສາ ຢູ່ເຂດຊົນນະບົດຫ່າງໄກສອກຫຼີກ ມີຄຸນນະພາບ
ເວລາອອກຂ່າວ: 2026-07-10 15:36:34 | ຜູ້ຂຽນ : admin2 | ຈຳນວນຄົນເຂົ້າຊົມ: 962 | ຄວາມນິຍົມ:

ລັດຖະບານ ກໍຄື ກະຊວງສຶກສາທິການ ແລະ ກິລາ (ສສກ) ຈະສຸມໃສ່ຫຼາຍບັນຫາ ເພື່ອເຮັດໃຫ້ການສຶກສາ ຢູ່ເຂດຊົນນະບົດຫ່າງໄກສອກຫຼີກ ມີຄຸນນະພາບ ແລະ ເທົ່າທຽມກັບຕົວເມືອງ ທັງເປັນການດຶງດູດຈິດໃຈໃຫ້ເດັກນ້ອຍນັກຮຽນຢາກມາສຶກສາຮໍ່າຮຽນ ເພື່ອຫຼຸດຜ່ອນການປະລະການຮຽນ ແລະ ການອອກໂຮງຮຽນກາງປີ. ທ່ານ ທອງສະລິດ ມັງໜໍ່ເມກ ຮອງນາຍົກລັດຖະມົນຕີ, ລັດຖະມົນຕີກະຊວງ ສສກ ໄດ້ຊີ້ແຈງຕໍ່ການຊັກຖາມ ຂອງສະພາແຫ່ງຊາດ ກ່ຽວກັບວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ໃນກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ X ໃນວັນທີ 8 ກໍລະກົດ ຜ່ານມາ, ທີ່ສະພາແຫ່ງຊາດ ວ່າ: ຜົນສໍາເລັດ ແລະ ບົດຮຽນທີ່ສໍາຄັນ ຂອງການແກ້ໄຂບັນຫານັ້ນ ແມ່ນການປະກອບສ່ວນທີ່ສໍາຄັນ, ເປັນເຈົ້າການຂອງອໍານາດການປົກຄອງທ້ອງຖິ່ນ (ເມືອງ, ບ້ານ), ພໍ່ແມ່ຜູ້ປົກຄອງ ແລະ ອໍານວຍການ, ຄູ-ອາຈານແຕ່ລະແຫ່ງ. ໃນຕໍ່ໜ້າຄວນສຸມໃສ່ຕື່ມ ເຊັ່ນ: ສຸມໃສ່ການຂະຫຍາຍ ແລະ ສະໜອງອາຫານທ່ຽງໃນໂຮງຮຽນໃຫ້ທົ່ວເຖິງເຂດຫ່າງໄກສອກຫຼີກ, ສ້າງຄວາມຮູ້ໃຫ້ໂຮງຮຽນ ແລະ ຊຸມຊົນທ້ອງຖິ່ນໃນການຜະລິດກະສິກຳພາຍໃນບ້ານ ເພື່ອມາສະໜອງເປັນວັດຖຸດິບໃຫ້ແກ່ອາຫານທ່ຽງ ເພື່ອຄວາມຍືນຍົງ, ສົ່ງເສີມຄວາມຮູ້ດ້ານໂພຊະນາການ ແລະ ສຸຂະອະນາໄມ ແລະ ຄວາມປອດໄພຂອງອາຫານ ເພື່ອໃຫ້ເດັກມີສຸຂະພາບແຂງແຮງ ພ້ອມທີ່ຈະມາຮຽນ; ສຸມໃສ່ການປັບປຸງຫຼັກສູດການຮຽນ-ການສອນຊັ້ນກຽມປະຖົມ (ກຸ່ມຮຽນຜ່ານການຫຼິ້ນ, ຫຼັກສູດພັກແລ້ງ 10 ອາທິດ) ໃຫ້ເຊື່ອມຕໍ່ກັບ ປ1 ໂດຍສະເພາະໃນຊັ້ນປະຖົມ ກໍຄື ການຂະຫຍາຍການຮຽນຊັ້ນປະຖົມໃຫ້ມີຮອດຊັ້ນ ປ6 ເພື່ອສ້າງພື້ນຖານທີ່ເຂັ້ມແຂງ ໃຫ້ເດັກກ່ອນຂຶ້ນຮຽນໃນຊັ້ນມັດທະຍົມ; ສ້າງຄວາມເຂັ້ມແຂງໃຫ້ສູນການສຶກສານອກໂຮງຮຽນ ເພື່ອຮັບຮອງນັກຮຽນທີ່ຕົກລົ່ນ ແລະ ປະລະການຮຽນຈາກໃນລະບົບ ພ້ອມທັງ ເຝິກອົບຮົມວິຊາຊີບຂັ້ນພື້ນຖານ; ຊຸກຍູ້ການສ້າງຫ້ອງສະໝຸດ ໃຫ້ເປັນສູນການອ່ານ ແລະ ຮຽນຮູ້ ເພື່ອສ້າງບັນຍາກາດການຮຽນໃຫ້ໜ້າສົນໃຈ ແລະ ສົ່ງເສີມການສຶກສາຮຽນຮ່ວມ ເພື່ອໃຫ້ເດັກທຸກກຸ່ມ, ທຸກສະພາບຮ່າງກາຍ ແລະ ຊົນເຜົ່າ ໄດ້ເຂົ້າເຖິງການສຶກສາຢ່າງເທົ່າທຽມ; ເພີ່ມທະວີການສະໜອງເບ້ຍລ້ຽງໃຫ້ນັກຮຽນຈາກຄອບຄົວທຸກຍາກ, ເດັກຂາດໂອກາດ ແລະ ນັກຮຽນພິການ ໃຫ້ໄດ້ຮັບການສຶກສາຢ່າງສະເໝີພາບ ລວມເຖິງການກໍ່ສ້າງຫໍພັກນັກຮຽນ ແລະ ສະໜອງສິ່ງອໍານວຍຄວາມສະດວກທີ່ຈໍາເປັນຢູ່ໃນເຂດຫ່າງໄກສອກຫຼີກ ເພື່ອຫຼຸດຜ່ອນອຸປະສັກໃນການເດີນທາງມາຮຽນ ແລະ ປ້ອງກັນການປະລະການຮຽນ; ຊຸກຍູ້ການມີສ່ວນຮ່ວມຂອງຊຸມຊົນ, ຜ່ານການເພີ່ມບົດບາດ ຂອງຄະນະພັດທະນາການສຶກສາຂັ້ນບ້ານ ໃຫ້ເຂົ້າມາມີສ່ວນຮ່ວມວາງແຜນພັດທະນາໂຮງຮຽນ ແລະ ຊຸກຍູ້ໃຫ້ສະຖາບັນຄອບຄົວ ຕິດຕາມລູກຫຼານບໍ່ໃຫ້ປະລະການຮຽນ. ຄຽງຄູ່ກັບການຈັດຕັ້ງປະຕິບັດນະໂຍບາຍປົກປ້ອງເດັກ ແລະ ວຽກງານຕ້ານການຄ້າມະນຸດໃນໂຮງຮຽນ ເພື່ອສ້າງສະພາບແວດລ້ອມທີ່ປອດໄພໃຫ້ນັກຮຽນ; ຍົກສູງລະບົບການນິເທດພາຍໃນ ໂດຍສ້າງຄວາມເຂັ້ມແຂງໃຫ້ລະບົບກຸ່ມໂຮງຮຽນ ແລະ ສຶກສາ ຕາແສງ ເພື່ອລົງຕິດຕາມ, ຊ່ວຍເຫຼືອ ແລະ ປະເມີນຜົນການສອນຂອງຄູຢ່າງໃກ້ຊິດ; ການພັດທະນາວິຊາຊີບຄູແບບຕໍ່ເນື່ອງ ເພື່ອສ້າງຄວາມເຂັ້ມແຂງໃຫ້ຄູ ທັງຊັ້ນກ່ອນໄວຮຽນ ຈົນເຖິງຊັ້ນມັດທະຍົມສຶກສາ ເພື່ອຍົກລະດັບຄວາມຮູ້ ແລະ ເຕັກນິກການສອນໃໝ່ໆ; ສະໜອງສື່ ແລະ ອຸປະກອນ ICT ໃຫ້ໂຮງຮຽນ ພ້ອມທັງສົ່ງເສີມໃຫ້ຄູຂັ້ນຮາກຖານ ສາມາດນໍາໃຊ້ແພັລດຟອມດີຈີຕອນ (ເຊັ່ນ: ຄັງປັນຍາລາວ) ເຂົ້າໃນການຮຽນການສອນ ແລະ ການພັດທະນາຕົນເອງ; ສ້າງສື່ການຮຽນ-ການສອນທາງດີຈີຕອນ ແລະ ແພລັດຟອມການຮຽນຮູ້ຕ່າງໆ ເພື່ອນໍາໃຊ້ທັງໃນຂັ້ນສູນກາງ ແລະ ທ້ອງຖິ່ນ; ຈັດຕັ້ງການປະເມີນຕົນເອງຂອງໂຮງຮຽນ ແລະ ນໍາໃຊ້ມາດຕະຖານຄຸນນະພາບການສຶກສາຂັ້ນພື້ນຖານພາກ 3 ຢ່າງເຂັ້ມງວດ ເພື່ອວັດແທກປະສິດທິພາບການສອນຂອງຄູ ທີ່ສົ່ງຜົນຕໍ່ການຮຽນຂອງນັກຮຽນ; ກໍານົດນະໂຍບາຍການສົ່ງເສີມ ແລະ ຍ້ອງຍໍຄູດີເດັ່ນ ແລະ ໂຮງຮຽນຕົວແບບ ເພື່ອສ້າງແຮງຈູງໃຈໃນການແຂ່ງຂັນພັດທະນາຜົນງານ.

news to day and hot news