ວັນອັງຄານ, ວັນທີ 18 ສິງຫາ 2026
ກອງປະຊຸມເປີດກວ້າງຄົບຄະນະບໍລິຫານງານພັກ ກອງບັນຊາການທະຫານແຂວງຊຽງຂວາງ ປະຈຳໄຕມາດ II
ເວລາອອກຂ່າວ: 2026-07-13 15:54:18 | ຜູ້ຂຽນ : admin2 | ຈຳນວນຄົນເຂົ້າຊົມ: 588 | ຄວາມນິຍົມ: 
ວັນທີ 13 ກໍລະກົດ 2026 ນີ້, ກອງບັນຊາການທະຫານແຂວງຊຽງຂວາງ ໄດ້ຈັດກອງປະຊຸມເປີດກວ້າງຄົບຄະນະບໍລິຫານງານພັກ ຄັ້ງທີ 2 ສະໄໝທີ VI ປະຈຳໄຕມາດ II ປີ 2026, ໂດຍການເປັນປະທານຂອງ ສະຫາຍ ພົນຈັດຕະວາ ວັນທອງ ພົງສະຫວັນ ກຳມະການຄະນະປະຈຳພັກແຂວງ, ຫົວໜ້າການເມືອງ ກອງບັນຊາການທະຫານແຂວງຊຽງຂວາງ, ມີບັນດາສະຫາຍຄະນະບໍລິຫານງານພັກກອງບັນຊາການ, ຕາງໜ້າຈາກໂຮງຮຽນການທະຫານທ້ອງຖິ່ນ, ກອງປະຕິບັດງານ 131, ກອງພັນ ແລະ ກອງຮ້ອຍເອກະລາດ ເຂົ້າຮ່ວມ.
ສະຫາຍ ພັນເອກ ວົງສອນ ຢ່າຈົງຕົວ ກຳມະການຄະນະປະຈຳພັກ, ຮອງຫົວໜ້າການເມືອງ ກອງບັນຊາການແຂວງຊຽງຂວາງ ໄດ້ຜ່ານບົດສະຫຼຸບຕີລາຄາຄືນການນຳພາ ຂອງຄະນະພັກກອງບັນຊາການໃນໄລຍະຜ່ານມາ ໂດຍປີ່ນອ້ອມ 4 ໜ້າທີ່ໃຫຍ່ 26 ແຜນງານທີ່ກະຊວງປ້ອງກັນປະເທດວາງອອກ ແລະ ການຈັດຕັ້ງປະຕິບັດແຜນຍຸດທະສາດກໍ່ສ້າງຮາກຖານການເມືອງ ຕາມ 4 ເນື້ອໃນ 4 ຄາດໝາຍ, ຜ່ານການຈັດຕັ້ງປະຕິບັດຕົວຈິງ ສາມາດສ້າງບ້ານປ້ອງກັນຊາດເຂັ້ມແຂງ ຢູ່ເມືອງ ໜອງແຮດ ແລະ ເມືອງຜາໄຊ ໄດ້ 24 ບ້ານ, ມີ 1,946 ຄອບຄົວ; ໄດ້ຈັດຕັ້ງກຳລັງປ້ອງກັນເສັ້ນທາງຍຸດທະສາດ ເປັນຕົ້ນແມ່ນເສັ້ນທາງ 7A, 5A, 1D ແລະ ສຳນັກງານອົງການຕ່າງໆ ໃຫ້ມີຄວາມປອດໄພ 100%. ພ້ອມນັ້ນ, ຍັງໄດ້ເປັນເຈົ້າການຫັນລົງກໍ່ສ້າງຮາກຖານການເມືອງຮ່ວມກັບກອງປະຕິບັດງານ 209, ວຽກງານກຽມພ້ອມສູ້ຮົບ ແລະ ກອບກູ້ໄພພິບັດ ໄດ້ຈັດຕັ້ງລະບົບປະຈຳການຕະຫຼອດ 24 ຊົ່ວໂມງ, ຊີ້ນຳກຳລັງເຄື່ອນໄຫວໃຫຍ່-ນ້ອຍ, ປ້ອງກັນໂຄງການ, ເຄື່ອນໄຫວລາດຕາເວນຕາມຊາຍແດນຝ່າຍດຽວ ແລະ ລາດຕາເວນຮ່ວມກັບ ສສ ຫວຽດນາມເປັນປົກກະຕິ, ຊີ້ນຳ-ນຳພາ ຮາກຖານພັກ ສຶກສາອົບຮົມການເມືອງ-ນຳພາແນວຄິດໃຫ້ພະນັກງານ-ນັກຮົບ ມີແນວຄິດໜັກແໜ້ນ, ປັບປຸງກໍ່ສ້າງການຈັດຕັ້ງພັກ ໃນທຸກຂົງເຂດໄປພ້ອມການເຄື່ອນໄຫວກວດສອບເລຂາ, ຮອງເລຂາ ຢູ່ຮາກຖານພັກ ແລະ ປະເມີນໜ່ວຍພັກປອດໃສ່ ເຂັ້ມແຂງ ໜັກແໜ້ນ ປະຈຳປີ 2025, ປະກາດອະນຸມັດພັກການ-ບຳນານ 7 ສະຫາຍ, ໄປກໍ່ສ້າງ-ບຳລຸງ 2 ສະຫາຍ, ຍົກຍ້າຍໄປຮັບໜ້າທີ່ໃໝ່ 27 ສະຫາຍ, ໄດ້ຮັບການເລື່ອນຊັ້ນ 356 ສະຫາຍ, ປະກາດຄູອາສາເຂົ້າລັດຖະກອນ ໄດ້ 4 ເມືອງ, ຍົກຂັ້ນເງີນເດືອນ 5 ສະຫາຍ, ປະຕິບັດນະໂຍບາຍຕໍ່ພະນັກງານປະຈຳການ , ບຳນານ ເສຍຊີວິດ 6 ສະຫາຍ, ຍ້ອງຍໍຕ່າງໆ ໃຫ້ພະນັກງານທີ່ມີຜົນງານດີເດັ່ນ 30 ສະຫາຍ, ອະນຸມັດສ້າງຄອບຄົວ 33 ຄູ່, ນະໂຍບາຍປິ່ນປົວຍາວນານ 3 ສະຫາຍ. ນອກນີ້, ວຽກງານພົວພັນຮ່ວມມືກັບອຳນາດການປົກຄອງທ້ອງຖິ່ນ ແລະ ສາກົນ ໄດ້ເຂົ້າຮ່ວມກອງປະຊຸມພົບປະແລກປ່ຽນບົດຮຽນໃນການຈັດຕັ້ງປະຕິບັດ ວຽກງານຂຸດຄົ້ນ, ທ້ອນໂຮມຮ່າງອັດຖິ ປະຈຳປີ 2025-2026 ຢູ່ແຂວງເຫງະອານ, ຈັດສົງອັດຖິປະຈຳລະດູແລ້ງ 2025-2026 ໄດ້ 71 ອັດຖິ ກັບຄືນປະເທດ ແລະ ເຂົ້າຮ່ວມກອງປະຊຸມສະໄໝສາມັນ ລະຫວ່າງ ກະຊວງປ້ອງກັນປະເທດ ກັບ ທະຫານເຂດ 2, ເຂດ 4 ສສ ຫວຽດນາມ ແລະ ຈັດຕັ້ງອວຍພອນກົມກອງເພື່ອນເນື່ອງໃນໂອກາດວັນສຳຄັນຕ່າງໆ. ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ຜັດປ່ຽນກັນປະກອບຄຳຄິດຄຳເຫັນໃສ່ຮ່າງບົດສະຫຼຸບ ແລະ ທິດທາງແຜນການ ເພື່ອຖອດຖອນບົດຮຽນ, ເສີມຂະຫຍາຍດ້ານດີ, ຊອກຫາວິທີແກ້ໄຂຂໍ້ຄົງຄ້າງ ເພື່ອເຮັດໃຫ້ແຜນການມີເນື້ອໃນສົມບູນ ແລະ ແທດເໝາະກັບຕົວຈິງ.
ໃນຕອນທ້າຍກອງປະຊຸມ, ຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳ ຈາກສະຫາຍປະທານ ຕື່ມອີກ
ພາບໂດຍ: ຫຸມພັນ ສິງດາລາ; ຂ່າວໂດຍ: ວັດທະນາ ພັນທະວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
