POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນສຸກ, ວັນທີ 07 ສິງຫາ 2026

ສິ່ງທີ່ໜ້າປະທັບໃຈຂອງງານພົບປະມິດຕະພາບວຽກງານປ້ອງກັນຊາດ ຂັ້ນລັດຖະມົນຕີກະຊວງປ້ອງກັນປະເທດ ລາວ-ຫວຽດນາມ ຄັ້ງທີ 3
ເວລາອອກຂ່າວ: 2026-07-17 09:09:23 | ຜູ້ຂຽນ : admin1 | ຈຳນວນຄົນເຂົ້າຊົມ: 234 | ຄວາມນິຍົມ:

ງານພົບປະມິດຕະພາບປ້ອງກັນຊາດຊາຍແດນ ລາວ-ຫວຽດນາມ ຄັ້ງທີ 3 ໄດ້ຖືກຈາລຶກໄວ້ໃນໜ້າປະຫວັດສາດການທູດທະຫານດ້ວຍພາບຜົນ ສຳເລັດອັນສະຫງ່າລາສີ ໂດຍການເປັນປະທານຮ່ວມໃນພິທີພົບປະຂອງ ສະຫາຍ ພົນເອກ ຄຳລຽງ ອຸທະໄກສອນ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ແລະ ສະຫາຍ ພົນເອກ ຟານ ວັນ ຢາງ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດ ນາມ. ບັນຍາກາດຢູ່ບໍລິເວນດ່ານຊາຍແດນທີ່ເປັນສະຖານທີ່ຈັດງານ ໄດ້ຖືກປະດັບປະດາດ້ວຍທຸງຊາດຂອງສອງປະເທດຢ່າງສົມກຽດ. ພາບຂ່າວທີ່ສື່ມວນຊົນທັງສອງຊາດໄດ້ເຜີຍແຜ່ນັ້ນເຕັມໄປດ້ວຍຮອຍຍິ້ມ, ການຈັບມືອັນອົບອຸ່ນ ແລະ ການກອດສະແດງຄວາມຮັກແພງຖານສະຫາຍອ້າຍນ້ອງຮ່ວມອຸດົມການ ລະຫວ່າງ ຄະນະການນຳຂັ້ນສູງ, ນາຍ ແລະ ພົນທະຫານ ຕະຫຼອດຮອດປະ ຊາຊົນທັງສອງຝັ່ງຊາຍແດນ. ພິທີທາງການ, ສອງລັດຖະ ມົນຕີກະຊວງປ້ອງກັນປະເທດລາວ-ຫວຽດນາມ ໄດ້ຮ່ວມກັນທາສີຫຼັກໝາຍອະທິປະໄຕຊາຍແດນ ເຊິ່ງເປັນສັນຍາລັກແຫ່ງຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນ, ພ້ອມທັງ ໄດ້ຮ່ວມກັນປູກ “ຕົ້ນໄມ້ມິດຕະ ພາບ” ໄວ້ຢູ່ເຂດຊາຍແດນ ເພື່ອເປັນດັ່ງຕົວແທນຂອງສາຍພົວພັນ ລາວ-ຫວຽດນາມ ທີ່ຈະມີແຕ່ຄວາມຂຽວສົດງົດງາມ, ເຕີບໃຫຍ່ຂະຫຍາຍຕົວ ແລະ ໝັ້ນຄົງທະນົງແກ່ນຊົ່ວກາລະນານ. ເນື້ອໃນຜົນສຳເລັດການຮ່ວມມືທາງດ້ານການເມືອງ ແລະ ການທະຫານຜ່ານການພົບປະເຈລະຈາຢ່າງເປັນທາງການ, ສອງຝ່າຍໄດ້ຕີລາຄາສູງ ແລະ ພັນລະນາເຖິງໝາກຜົນແຫ່ງການຮ່ວມມືໃນໄລຍະຜ່ານມາ ໂດຍມີບັນດາຜົນສຳເລັດທີ່ເປັນເອກະພາບກັນ ດັ່ງນີ້: ຄວາມໄວ້ເນື້ອເຊື່ອໃຈທາງດ້ານການເມືອງ: ສອງກອງທັບໄດ້ກາຍເປັນເສົາ ຄ້ຳທີ່ໜັກແໜ້ນ ໃຫ້ແກ່ສາຍພົວ ພັນມິດຕະພາບອັນຍິ່ງໃຫຍ່ ລະ ຫວ່າງ ສອງພັກ, ສອງລັດ. ການພົບປະຄັ້ງນີ້ໄດ້ເພີ່ມທະວີຄວາມເຂົ້າອົກເຂົ້າໃຈ ແລະ ຄວາມເປັນເອກະພາບສູງໃນຍຸດທະສາດການປ້ອງກັນຊາດ-ປ້ອງກັນຄວາມສະຫງົບ. ການລົງນາມເອກະສານຮ່ວມມື: ທັງສອງລັດຖະມົນຕີກະຊວງປ້ອງກັນປະເທດລາວ-ຫວຽດ ນາມ ໄດ້ຮ່ວມກັນລົງນາມໃນບົດບັນທຶກຄວາມເຂົ້າໃຈ ແລະ ແຜນການຮ່ວມມື ທີ່ເນັ້ນໃສ່ການເພີ່ມທະວີກົນໄກລາດຕະເວນຮ່ວມ, ການແລກປ່ຽນຂໍ້ມູນຂ່າວ ສານຢ່າງທັນການ ເພື່ອຮ່ວມກັນແກ້ໄຂບັນຫາຄວາມບໍ່ສະຫງົບ, ສະກັດກັ້ນການລັກລອບເຂົ້າເມືອງຜິດກົດໝາຍ ແລະ ການທຳ ລາຍຊັບພະຍາກອນທຳມະຊາດຕາມເສັ້ນຊາຍແດນ; ການປາບປາມອາດຊະຍາກຳຂ້າມຊາດ ກຳລັງປ້ອງກັນຊາຍແດນຂອງທັງສອງປະເທດ ໄດ້ປະສານສົມ ທົບກັນຢ່າງແໜ້ນແຟ້ນ ໃນການສະກັດກັ້ນ ແລະ ທຳລາຍກຸ່ມແກ້ງ ຄ້າຢາເສບຕິດຂ້າມຊາດ, ການຄ້າເຖື່ອນ ແລະ ການເຄື່ອນໄຫວທີ່ຫວັງມ້າງເພທຳລາຍຄວາມສະຫງົບສຸກຂອງປະຊາຊົນ. ດ້ານວຽກງານມະນຸດສະທຳ ແລະ ສັງຄົມ ເພື່ອປະຊາຊົນສິ່ງທີ່ສື່ສັງຄົມອອນລາຍ ຜ່ານເຟດບຸກ (Facebook) ຂອງບັນດາສຳນັກຂ່າວໄດ້ແບ່ງປັນ ແລະ ໄດ້ຮັບຄວາມສົນໃຈຢ່າງຫຼວງຫຼາຍ ແມ່ນກິດຈະກຳພາກສະໜາມ ທີ່ກອງທັບສອງປະເທດໄດ້ຮ່ວມກັນຈັດຕັ້ງຂຶ້ນເພື່ອປະຊາຊົນ, ດ້ານການແພດ ກຳລັງເສນາຮັກ (ແພດທະຫານ) ຂອງລາວ ແລະ ຫວຽດນາມ ໄດ້ຕັ້ງຄ້າຍເຄື່ອນທີ່ ເພື່ອຈັດຕັ້ງການກວດສຸຂະພາບ, ປິ່ນປົວພະຍາດ ແລະ ແຈກຢາຍຢາຮັກສາໂລກ ໃຫ້ແກ່ປະຊາຊົນເຂດຊາຍແດນຜູ້ທີ່ມີຂໍ້ຈຳກັດທາງດ້ານເສດຖະກິດ ໂດຍບໍ່ໄດ້ຄິດຄ່າບໍລິການໃດໆ, ສ້າງຄວາມຕື້ນ ຕັນໃຈ ແລະ ຮອຍຍິ້ມໃຫ້ແກ່ຊາວ ບ້ານເປັນຢ່າງຍິ່ງ. ນອກນັ້ນພາຍ ໃນງານຍັງໄດ້ມີການມອບທຶນການສຶກສາ, ຄອມພິວເຕີ ແລະ ອຸປະກອນການຮຽນໃຫ້ແກ່ໂຮງ ຮຽນທ້ອງຖິ່ນ ພ້ອມທັງມອບເຄື່ອງອຸປະໂພກ-ບໍລິໂພກ ແລະ ສັດລ້ຽງ “ງົວພັນມິດຕະພາບ” ໃຫ້ແກ່ຄອບຄົວທຸກຍາກ ເພື່ອເປັນທຶນຮອນໃນການສ້າງເສດຖະກິດຄອບຄົວ. ພ້ອມນັ້ນຍັງໄດ້ມອບ-ຮັບສິ່ງປຸກສ້າງສາທາລະນະ ແລະ ການເປີດນຳໃຊ້ ຫ້ອງຮຽນ, ເຮືອນວັດທະນະທຳມິດຕະພາບ ທີ່ກອງທັບສອງປະເທດຮ່ວມກັນກໍ່ສ້າງ, ເຊິ່ງເປັນສິ່ງຢັ້ງຢືນທາງຮູບປະທຳວ່າ “ກອງທັບມາຈາກປະຊາຊົນ, ໂດຍປະຊາຊົນ ແລະ ເພື່ອປະຊາຊົນ”. ເພື່ອສືບຕໍ່ຜັນຂະຫຍາຍຜົນ ສຳເລັດອັນງົດງາມຂອງງານພົບປະຄັ້ງທີ 3 ນີ້ ໃຫ້ເຂົ້າສູ່ລວງເລິກ ແລະ ມີຄວາມຕໍ່ເນື່ອງ, ສອງຝ່າຍໄດ້ກຳນົດທິດທາງແຜນການຮ່ວມມືໃນຕໍ່ໜ້າ ດັ່ງນີ້: ຫັນກົນໄກການພົບປະໃຫ້ເປັນປົກກະຕິ ສືບຕໍ່ຮັກສາ ແລະ ຍົກສູງຄຸນນະພາບຂອງງານພົບປະມິດຕະພາບປ້ອງກັນຊາດຊາຍແດນ, ພ້ອມທັງຊຸກຍູ້ການພົບປະແລກປ່ຽນ ລະຫວ່າງ ກອງບັນຊາການທະຫານແຂວງ, ກອງຮ້ອຍປ້ອງກັນຊາຍແດນ ໃຫ້ມີຄວາມຖີ່ ແລະ ເປັນຮູບປະ ທຳຍິ່ງຂຶ້ນ. ເພີ່ມທະວີການລາດ ຕະເວນຮ່ວມສອງຝ່າຍ ຍູ້ແຮງການປະສານສົມທົບໃນການລາດຕະເວນຮ່ວມ ຕາມເສັ້ນທາງຊາຍແດນ ແລະ ລະບົບຫຼັກໝາຍ, ແນໃສ່ກວດກາ ແລະ ແກ້ໄຂທຸກກໍລະນີລະເມີດຊາຍແດນຢ່າງທັນການ ບົນພື້ນຖານອີງໃສກົດໝາຍ ແລະ ສາຍພົວພັນມິດຕະພາບ. ຍົກສູງຂີດຄວາມສາມາດໃນການແລກປ່ຽນຂໍ້ມູນຂ່າວສານ ສ້າງຊ່ອງທາງຕິດຕໍ່ສື່ສານທີ່ທັນສະໄໝ ແລະ ວ່ອງໄວ ລະ ຫວ່າງ ກົນໄກປ້ອງກັນຊາຍແດນ ສອງຝ່າຍ ເພື່ອແລກປ່ຽນຂໍ້ມູນ ຂ່າວສານກ່ຽວກັບຄວາມໝັ້ນ ຄົງ, ສະກັດກັ້ນທຸກກົນອຸບາຍມ້າງເພທຳລາຍຄວາມສາມັກຄີ ລາວ-ຫວຽດນາມ ຈາກກຸ່ມຄົນບໍ່ດີ. ຊຸກຍູ້ການສ້າງ “ຄູ່ແຝດ” ບ້ານ-ກົມກອງ: ສືບຕໍ່ຂະຫຍາຍຮູບແບບການສ້າງຄູ່ແຝດ ລະ ຫວ່າງ ບ້ານຕໍ່ບ້ານຢູ່ສອງຝັ່ງຊາຍ ແດນ ແລະ ລະຫວ່າງ ກົມກອງທະຫານປ້ອງກັນຊາຍແດນ ເພື່ອສ້າງຮາກຖານຄວາມໝັ້ນຄົງ ແລະ ຄວາມສາມັກຄີຈາກຂັ້ນຮາກຖານປະຊາຊົນ. ສືບຕໍ່ວຽກງານຊ່ວຍເຫຼືອ ປະຊາຊົນ ແລະ ພັດທະນາ ຕັ້ງໜ້າເຂົ້າຮ່ວມໃນການພັດທະນາເສດ ຖະກິດ-ສັງຄົມ ຢູ່ເຂດຊາຍແດນ, ຊ່ວຍເຫຼືອປະຊາຊົນໃນການລົບ ລ້າງຄວາມທຸກຍາກ, ປ້ອງກັນ ແລະ ຟື້ນຟູໄພພິບັດທາງທຳມະ ຊາດ ແລະ ການບໍລິການສາທາ ລະນະສຸກເຄື່ອນທີ່. ໃນຕໍ່ໜ້າຄະນະຮັບຜິດຊອບ ຂອງທັງສອງກະຊວງປ້ອງກັນປະເທດ ຈະຮ່ວມກັນທົບທວນ, ຖອດຖອນບົດຮຽນ ຈາກການຈັດງານຄັ້ງທີ 3 ນີ້ ເພື່ອເປັນບົດຮຽນອັນລ້ຳຄ່າ ໃນການວາງແຜນ, ຈັດຕັ້ງ ແລະ ກະກຽມຄວາມພ້ອມຮອບດ້ານ ໃຫ້ແກ່ງານພົບປະມິດຕະພາບປ້ອງກັນຊາດຊາຍແດນ ລາວ-ຫວຽດນາມ ຄັ້ງທີ 4 ໃຫ້ມີຄວາມໝາຍ ແລະ ຍິ່ງໃຫຍ່ກວ່າເກົ່າ. ໂດຍ: ໄພລິນ ບຸນຍັງ

news to day and hot news