ວັນພຸດ, ວັນທີ 09 ກັນຍາ 2026
ກອງພັນໃຫຍ່ 605 ມອບເງິນນະໂຍບາຍອຸດໜູນບຳນານ ໃຫ້ນາຍທະຫານ
ເວລາອອກຂ່າວ: 2026-08-17 08:38:02 | ຜູ້ຂຽນ : admin1 | ຈຳນວນຄົນເຂົ້າຊົມ: 76 | ຄວາມນິຍົມ: 
ໃນວັນທີ 12 ສິງຫາ 2026 ນີ້, ກອງພັນໃຫຍ່ 605 ໄດ້ຈັດຕັ້ງມອບເງິນອຸດໜູນບຳນານ ໃຫ້ນາຍທະຫານທີ່ພັກການຮັບບຳນານ, ໂດຍການເປັນປະທານຂອງ ສະຫາຍ ພັນເອກ ໄມສີ ມາວັນດີ ຫົວໜ້າການເມືອງກອງພັນໃຫຍ່ 605, ມີຄະນະພັກ-ຄະນະບັນຊາ ກອງພັນໃຫຍ່, ກົມກອງ, ຂະແໜງການທີ່ກ່ຽວຂ້ອງ ແລະ ນາຍທະຫານທີ່ພັກການ ຮັບບຳນານເຂົ້າຮ່ວມ.
ສະຫາຍ ພັນໂທ ສີສະຫວາດ ລາດຕະສິນ ຫົວໜ້າຂະແໜງນະໂຍບາຍ ກອງພັນໃຫຍ່ 605ໄດ້ຜ່ານເອກະສານ ການຄິດໄລ່ເງິນອຸດໜູນ ແລະ ເງິນຊົດເຊີຍ ໃຫ້ນາຍທະຫານ ທີ່ພັກການເຂົ້າຮັບບຳນານຢູ່ ກອງພັນໃຫຍ່ 605, ອີງຕາມກົດໝາຍ ວ່າດ້ວຍນາຍທະຫານກອງທັບປະຊາຊົນລາວ ໝວດທີ 1 ມາດຕາ 33 ແລະ 34, ການຍົກຂັ້ນເງິນເດືອນ, ອີງຕາມກົດໝາຍປະກັນສັງຄົມ, ອີງຕາມການຄົ້ນຄວ້າ ແລະ ນຳສະເໜີຂອງກົມໃຫຍ່ການເມືອງກອງທັບ, ກະຊວງປ້ອງກັນປະເທດ ຕົກລົງ ມອບເງິນຊົດເຊີຍໃຫ້ພະນັກງານທີ່ພັກການ ຮັບບຳນານ ຈຳນວນ 2 ສະຫາຍ, ໃນນັ້ນ ຊັ້ນພັນໂທ 1 ສະຫາຍ ແລະ ຊັ້ນພັນຕີ 1 ສະຫາຍ ລວມເປັນເງິນທັງໝົດ 55.157.000 ກີບ, ເຊິ່ງໃຫ້ກຽດມອບໂດຍ
ສະຫາຍ ພັນເອກ ໄມສີ ມາວັນດີ ຫົວໜ້າການເມືອງ ກອງພັນໃຫຍ່ 605.
ໂອກາດນີ້ ສະຫາຍ ພັນເອກ ໄມສີ ມາວັນດີ ກໍໄດ້ມີຄຳເຫັນໂອ້ລົມ ພ້ອມທັງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ, ຄຸນງາມຄວາມດີ ຂອງບັນດາສະຫາຍ ນາຍທະຫານທີ່ພັກການຮັບບຳນານ ທີ່ໄດ້ສຸມທຸກສະຕິປັນຍາ, ເຫື່ອແຮງບໍ່ຮູ້ອິດຮູ້ເມື່ອຍ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ໃນໄລຍະຜ່ານມາ, ເວົ້າສະເພາະ ແມ່ນການປະກອບສ່ວນປັບປຸງກໍ່ສ້າງກົມກອງ ໃຫ້ມີຄວາມເຕີຍໃຫຍ່, ເຂັ້ມແຂງໜັກແໜ້ນ, ເຮັດສຳເລັດໜ້າທີ່ການເມືອງອັນມີກຽດສະຫງ່າທີ່ພັກ-ລັດ ແລະ ປະຊາຊົນມອບໝາຍໃຫ້. ພ້ອມທັງໄດ້ຮຽກຮ້ອງໃຫ້ນາຍທະຫານທີ່ພັກການ ຮັບບຳນານ ຈົ່ງສືບຕໍ່ເປັນແບບຢ່າງທີ່ດີ ໃຫ້ພະນັກງານ-ນັກຮົບ ຫຸ້ນສືບທອດ ສືບຕໍ່ສຶກສາອົບຮົມລູກຫຼານໃຫ້ເປັນຄົນດີ ຂອງຊາດ, ຂອງສັງຄົມ ແລະ ນຳໃຊ້ເງິນອຸດໜູນດັ່ງກ່າວເຂົ້າໃນຊີວິດຄອບຄົວໃຫ້ເກີດປະໂຫຍດສູງສຸດ.
ຂ່າວ: ນາງ ໜູແດງ ລາດສະແກ້ວ
ພາບ: ເພັງ ມະນີລະສິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
