POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນພຸດ, ວັນທີ 17 ມິຖຸນາ 2026

ຜູ້ແທນສະພາແຫ່ງຊາດລາວ ປະຊຸມສະເພາະກິດ ກ່ຽວກັບກ່ຽວກັບການແຜ່ລະບາດຂອງພະຍາດ Covid-19 ໃນເວທີປຶກສາຫາລືລັດຖະສະພາອາຊີ-ປາຊີຟິກ ຜ່ານລະບົບອອນລາຍ
ເວລາອອກຂ່າວ: 2020-04-28 12:49:21 | ຜູ້ຂຽນ : admin3 | ຈຳນວນຄົນເຂົ້າຊົມ: 615 | ຄວາມນິຍົມ:

ຜູ້ແທນສະພາແຫ່ງຊາດລາວ ທ່ານ ປອ. ນາງ ພອນເພັດ ບຸບຜາ ຮອງປະທານກຳມາທິການວັດທະນະທຳ-ສັງ ຄົມ ໄດ້ສຳເລັດ ປະຊຸມສະເພາະກິດ ກ່ຽວກັບການແຜ່ລະບາດຂອງພະຍາດອັກເສບປອດ Covid-19 ຂອງເວທີປຶກສາຫາລືລັດຖະສະພາອາຊີ-ປາຊີຟິກ ກ່ຽວກັບສຸຂະພາບໂລກ ຜ່ານລະບົບອອນລາຍ (Video Conference), ໃນວັນທີ 23 ເມສາ 2020, ເລີ່ມແຕ່ເວລາ 11:00-13:00 ໂມງ ຕາມເວລາທ້ອງຖິ່ນຂອງນະຄອນ ຫຼວງມະນີລາ ປະເທດຟີລິບປິນ. ກອງປະຊຸມດັ່ງກ່າວໄດ້ເປີດຢ່າງເປັນທາງການໂດຍການເປັນປະທານຂອງພະນະທ່ານ ກີໂຊ ຕາເກິມ ປະທານເວທີລັດຖະສະພາອາຊີ-ປາຊີຟິກ ກ່ຽວກັບສຸຂະພາບໂລກ, ເອກອັກຄະລັດຖະທູດສຸຂະພາບ ຂອງອົງການອະນາໄມໂລກ, ສະມາຊິກສະພາອາຫານແຫ່ງຊາດຍີ່ປຸ່ນ. ເຂົ້າຮ່ວມກອງປະຊຸມດັ່ງກ່າວມີ ຫົວໜ້າ ຝ່າຍຄຸ້ມຄອງໂຄງການອົງການອະນາໄມໂລກປະຈຳພາກພື້ນອາຊີ-ປາຊິຟິກຕາເວັນຕົກ; ຫົວໜ້າອົງການອະນາໄມໂລກປະຈຳພາກພື້ນອາຊີຕາເວັນອອກສ່ຽງໃຕ້; ຫົວໜ້າອົງການອະນາໄມໂລກປະຈຳພາກພື້ນປາຊີຟິກຕາເວັນຕົກ; ບັນດາລັດຖະມົນຕີ, ຮອງລັດຖະມົນຕີກະຊວງສາທາລະນະສຸກ ແລະ ຜູ້ແທນຈາກບັນດາປະເທດສະມາຊິກ ເຊິ່ງເປັນສະມາຊິກສະພາແຫ່ງຊາດ ເຂົ້້າຮ່ວມທັງໝົດ 30 ປະເທດ. ນອກນັ້ນ, ຍັງມີວິຊາການ ແລະ ກອງເລຂາຈາກອົງການອານາໄມໂລກປະຈຳພາກພື້ນອາຊີ-ປາຊີຟິກ ຕາເວັນຕົກຈຳນວນໜຶ່ງເຂົ້າຮ່ວມ. ປະທານເວທີລັດຖະສະພາອາຊີ-ປາຊີຟິກ ໄດ້ມີຄຳເຫັນກ່າວເປີດວ່າ ການແຜ່ລະບາດຂອງພະຍາດ Covid-19 ແມ່ນເປັນວົງກວ້າງ ແລະ ຮ້າຍແຮງ ຊຶ່ງສົ່ງຜົນກະທົບບໍ່ສະເພາະຕໍ່ດ້ານ ສຸຂະພາບ ແຕ່ຍັງສົ່ງຜົນກະທົບຕໍ່ດ້ານເສດຖະກິດ-ສັງຄົມ ອີກດ້ວຍ. ບັນດາປະເທດໃນພາກພື້ນໄດ້ສຸມທຸກຄວາມພະຍາຍາມ ແລະ ມີການຮ່ວມມືກັບບັນດານາໆປະເທດ ເພື່ອຕໍ່ສູ້ກັບພະຍາດດັ່ງກ່າວ ເພື່ອເຮັດໃຫ້ປະຊາຄົມໂລກມີຄວາມປອດໄພ ແລະ ໝັ້ນຄົງ ແລະ ສະມາຊິກລັດຖະສະພາ ເຊິ່ງເປັນຕົວແທນຂອງໝົດທຸກຄົນ ຈະຕ້ອງໄດ້ຊຸກຍູ້ ແລະ ເຕົ້າໂຮມຄວາມສາມັກຄີຂອງທຸກພາກສ່ວນທັງພາກລັດ ແລະ ສັງຄົມ ເພື່ອຢັບຢັ້ງການແຜ່ລະບາດໃນຄັ້ງນີ້. ກອງປະຊຸມຍັງໄດ້ມີການຮັບຟັງການລາຍງານສະພາບການ ແຜ່ລະບາດຂອງພະຍາດອັກເສບປອດ Covid-19 ຢູ່ພາກພື້ນອາຊີ-ປາຊີຟິກ, ສະພາບບັນຫາໃນການຮັບມືກັບ ການແຜ່ລະບາດຂອງພະຍາດອັກເສບປອດ Covid-19 ຊຶ່ງສະເໜີໂດຍອົງການອະນາໄມໂລກ; ໄດ້ມີການແລກປ່ຽນ ແລະ ສົນທະນາກ່ຽວກັັບສະພາບການ ແຜ່ລະບາດ ແລະ ການຮັບມືຕໍ່ພະຍາດດັ່ງກ່າວຂອງບາງປະເທດ ເປັນຕົ້ນ ສ.ເກົາຫຼີ, ຍີ່ປຸ່ນ, ຟີລິບປິນ, ຟີຈິ, ມົງໂກລີ ແລະ ຄຸກໄອແລນ. ໃນກອງປະຊຸມ ທ່ານ ປອ. ນ. ພອນເພັດ ບຸບຜາ ໄດ້ລາຍງານກ່ຽວກັບສະພາບການຮັບມືການແຜ່ລະບາດພະຍາດ Covid-19 ຂອງ ສປປ ລາວ ໃນສະເພາະໜ້າ, ໄລຍະກາງ ແລະ ໄລຍະຍາວ ຊຶ່ງລັດຖະບານຂອງ ສປປ ລາວ ໄດ້ດໍາເນີນການກໍານົດບັນດາມາດຕະການໃນການປ້ອງກັນມາແຕ່ໄລຍະຕົ້ນ ຊຶ່ງລວມມີມາດຕະການປິດການເຂົ້າ-ອອກ ປະເທດ ພ້ອມທັງປະຕິບັດມາດຕະການ ແລະ ຄຳແນະນຳຂອງອົງການອະນາໄມໂລກກ່ຽວກັບການເວັ້ນໄລຍະຫ່າງທາງສັງຄົມ ຢ່າງເຄັ່ງຄັດ. ລັດຖະບານ ສປປ ລາວ ໄດ້ມີການຈັດສັນງົບປະມານເພື່ອຕອບໂຕ້ການແຜ່ລະບາດຂອງພະຍາດດັ່ງກ່າວ ແລະ ໄດ້ຖືບັນຫາສຸຂະພາບເປັນວຽກງານບູລິມະສິດທີ່ສຳຄັນ. ໃນການຈັດຕັ້ງປະຕິບັດພາລະບົດບາດຂອງສະມາຊິກສະພາແຫ່ງຊາດ, ສະພາແຫ່ງຊາດແຫ່ງ ສປປ ລາວ ໄດ້ມີການແຕ່ງຕັ້ງໜ່ວຍງານສະເພາະກິດພາຍໃນສະພາແຫ່ງຊາດເພື່ອຕິດຕາມຂ່າວສານຢ່າງໃກ້ສິດກັບຄະນະສະເພາະກິດລະດັບຊາດ ເພື່ອປ້ອງກັນ ແລະ ຄວມຄຸມການແຜ່ລະບາດຂອງພະຍາດ Covid-19, ເພື່ອຮັບປະກັນປະສິດທິພາບ ແລະ ປະສິດທິຜົນໃນການນຳພາການຕິດຕາມກວດກາ ແລະ ປະເມີນຜົນການຈັດຕັ້ງປະຕິບັດບັນດາມາດຕະການປ້ອງກັນ ແລະ ຄວບຄຸມການແຜ່ລະບາດ. ສະພາແຫ່ງຊາດແຫ່ງ ສປປ ລາວ, ໄດ້ມີການຕິດຕາມກວດກາການຈັດຕັ້ງປະຕິບັດກົດ ໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ ເຊິ່ງໄດ້ປະກາດໃຊ້ໃນປີ 2017, ກົດໝາຍອື່ນທີ່ກ່ຽວຂ້ອງລວມທັງນິຕິກໍາລຸ່ມກົດໝາຍ ແລະ ໄດ້ອອກຄໍາແນະນໍາຈໍານວນໜຶ່ງທີ່ກ່ຽວຂ້ອງກັບພະຍາດ Covid-19 ເພື່ອເປັນບ່ອນອີງໃຫ້ແກ່ບັນດາ ສສຊ ປະຈໍາຢູ່ບັນດາເຂດເລືອກຕັ້ງໃນທົ່ວປະເທດ ໄດ້ປະຕິບັດພາລະບົດບາດຂອງຕົນ ໃນການຕິດຕາມກວດກາການຈັດຕັ້ງປະຕິບັດບັນດາມາດຕະການ ແລະ ການຄວບຄຸມການແຜ່ລະບາດພະຍາດ Covid-19 ຢ່າງເຂັ້ມງວດ. ພ້ອມນີ້, ຍັງໄດ້ສະເໜີໃຫ້ມີການເສີມຂະຫຍາຍຄວາມສາມັກຄີຮ່ວມກັນ, ສ້າງຂີດຄວາມສາມາດ, ແລກປ່ຽນບົດຮຽນ ແລະ ປະສົບການໃນການຕ້ານ ແລະ ສະກັດກັ້ນພະຍາດ Covid-19 ແລະ ເຫັນຄວາມຈໍາເປັນໃຫ້ມີການຮ່ວມມືກັນຢ່າງກວ້າງຂວາງ ແລະ ສະໜິດແໜ້ນ ໃນການເຂົ້າຮ່ວມຄົ້ນຄວ້າວິໄຈ ແລະ ການມີສ່ວນຮ່ວມຂອງພາກສ່ວນທີ່ກ່ຽວຂ້ອງໃນດ້ານຄວາມຮູ້, ຄວາມສາມາດ, ດ້ານຄວາມຊ່ຽວຊານ ແລະ ດ້ານງົບປະມານ ເພື່ອຄົ້ນຄວ້າວັກຊີນທີ່ຖືກຕ້ອງ ເພື່ອກໍາຈັດໄວຣັດຊະນິດນີ້ ແລະ ຢຸດຕິການແຜ່ລະບາດອັນຮ້າຍແຮງນີ້ ເພື່ອໃຫ້ສາມາດປົກປ້ອງສຸຂະພາບ ແລະ ການດໍາລົງຊີວິດຂອງປະຊາຊົນໃນທົ່ວໂລກ ໂດຍບໍ່ປ່ອຍປະຜູ້ໃດໄວ້ທາງຫຼັງ. ນອກນີ້ຍັງໄດ້ສະແດງຄວາມຍ້ອງຍໍຊົມເຊີຍຕໍ່ເວທີປຶກສາຫາລືລັດຖະສະພາອາຊີ-ປາຊີຟິກ ກ່ຽວກັບສຸຂະພາບໂລກ ທີ່ໄດ້ຈັດກອງປະຊຸມທາງໄກຄັ້ງນີ້ຂຶ້ນ ແລະ ສະແດງຄວາມຂອບໃຈຢ່າງສູງມາຍັງອົງການອານາໄມໂລກ ທີ່ໄດ້ມີການນໍາສະເໜີຂໍ້ມູນລ່າສຸດກ່ຽວກັບສະພາບພະຍາດ ອັກເສບປອດ Covid-19 ຊຶ່ງມີການຮ່ວມມືກັບທຸກປະເທດໃນຂົງເຂດກໍຄືທົ່ວໂລກ.

news to day and hot news