ວັນສຸກ, ວັນທີ 06 ທັນວາ 2024
ມີຫຼາຍວຽກງານທີ່ຕ້ອງເຮັດໃນການກະກຽມ ແລະ ຈັດຕັ້ງສະເຫຼີມສະຫຼອງ 75 ປີກອງທັບ
ເວລາອອກຂ່າວ: 2023-08-08 16:14:04 | ຜູ້ຂຽນ : admin2 | ຈຳນວນຄົນເຂົ້າຊົມ: 1329 | ຄວາມນິຍົມ: 
ອີງຕາມຄຳສັ່ງແນະນຳຂອງຄະນະເລຂາທິການສູນກາງພັກກໍ່ຄືແຜນການ ແລະ ຄໍາສັ່ງແນະນໍາຂອງກະຊວງປ້ອງກັນ ປະເທດກ່ຽວກັບການຫ້າງຫາກະກຽມໃຫ້ແກ່ການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໃນວັນທີ 20 ມັງກອນ 2024 ທີ່ຈະມາເຖິງໃນຕໍ່ໜ້ານີ້, ກົມໂຄສະນາອົບຮົມໃນຖານະທີ່ເປັນເສນາທິການດ້ານວຽກ ງານການເມືອງແນວຄິດໃຫ້ແກ່ກົມໃຫຍ່ການເມືອງກອງທັບ ໄດ້ຮັບການຊີ້ນຳໂດຍກົງຈາກກົມໃຫຍ່ການເມືອງກອງທັບ ໃຫ້ຮ່ວມກັບຄະນະຊີ້ນຳຂັ້ນກະຊວງ ຄົ້ນຄວ້າຮ່າງບັນດານິຕິກຳ, ແຜນການ, ເອກະສານຕ່າງໆເພື່ອເປັນບ່ອນອີງໃຫ້ແກ່ ການຫ້າງຫາກະກຽມ ແລະ ຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ.
ສະຫາຍ ພົນຈັດຕະວາ ແປ້ນຄໍາ ບຸດຈັນແພງ ກໍາມະການຄະນະພັກກົມໃຫຍ່ ຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ ໄດ້ໃຫ້ສໍາພາດກັບນັກຂ່າວໜັງສືພິມກອງທັບວ່າ: ເພື່ອຮັບປະກັນໃຫ້ແກ່ການສະເຫຼີມສະຫຼອງ ວັນສ້າງຕັ້ງກອງທັບມີຂະບວນການຟົດຟື້ນໃນຂອບເຂດທົ່ວ ປະເທດ ດັ່ງນັ້ນກົມໂຄສະນາອົບຮົມ ໄດ້ປະຕິບັດຕາມຄໍາສັ່ງແນະນຳກໍ່ຄືແຜນການຂອງກະຊວງປ້ອງກັນປະເທດ ກ່ຽວກັບການຈັດຕັ້ງສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ເພື່ອເຮັດໃຫ້ບັນດາຂະບວນການ, ວຽກງານດ້ານຕ່າງໆໄດ້ດຳ ເນີນໄປຢ່າງຟົດຟື້ນ, ຕໍ່ເນື່ອງ ກົມໂຄສະນາອົບຮົມ ໄດ້ລົງເຄື່ອນໄຫວຊີ້ນໍາ-ຊຸກຍູ້ບັນດາກົມກອງກຳລັງຫຼວງ-ກຳລັງທ້ອງຖິ່ນໃນທົ່ວກອງທັບກ່ຽວກັບການ ຫ້າງຫາກະກຽມ ແລະ ຈັດຕັ້ງສະເຫຼີມສະຫຼອງວັນປະຫວັດສາດສຳຄັນດັ່ງກ່າວ, ໄດ້ນຳເອົາບັນດາເອກະສານກໍຄືນິຕິກຳທີ່ເປັນບ່ອນອີງ ໃນການຈັດຕັ້ງສະເຫຼີມສະຫຼອງລົງເຜີຍແຜ່ແນະນຳຢູ່ກົມກອງທ້ອງຖິ່ນຢ່າງທົ່ວເຖິງເປັນຕົ້ນແມ່ນ: ຄໍາແນະນໍາກ່ຽວກັບການຈັດຕັ້ງດໍາເນີນຊີວິດການເມືອງ, ໂຄສະນາປາຖະກະຖາ ແລະ ເປີດຂະບວນການແຂ່ງຂັນ, ຄຳແນະນຳກ່ຽວກັບການເຂົ້າຮ່ວມຂະບວນການແຂ່ງຂັນນັກຮ້ອງ-ຂັບລຳສຽງດີທົ່ວກອງທັບ. ພ້ອມນີ້ຍັງໄດ້ນໍາເອົາມູນເຊື້ອແຫ່ງການເຕີບໃຫຍ່ເຂັ້ມແຂງຂອງກອງທັບ ຜົນງານ ແລະ ໄຊຊະນະທີ່ກອງທັບຍາດມາໄດ້ໃນຕະຫຼອດໄລຍະ 75 ປີ ໄປຈັດຕັ້ງເຜີຍແຜ່ໃຫ້ທົ່ວເຖິງ ທຸກເປົ້າໝາຍທັງໃນ ແລະ ນອກກອງກັບ, ສະເພາະຢູ່ຂັ້ນສູນກາງກໍ່ຄືກະຊວງປ້ອງກັນປະເທດ ພວກເຮົາໄດ້ມີ ແຜນການເຄື່ອນໄຫວໂຄສະນາປາຖະກະຖາຢູ່ບັນດາກະຊວງ, ອົງການ, ສຳນັກງານ, ບັນດາສະຖາບັນການສຶກສາໃນເຂດໃຈກາງນະຄອນຫຼວງ ໂດຍເຊີນການນຳກະຊວງ, ພະນັກງານປະຕິວັດອາວຸໂສບຳນານເປັນຜູ້ປາຖະກະຖາ...
ຕະຫຼອດ 75 ປີ ວຽກງານໂຄສະນາອົບຮົມ ໄດ້ປະກອບສ່ວນສໍາຄັນຂອງການເຕີບໃຫຍ່ຂະຫຍາຍຕົວໄປຄຽງຄູ່ກັບກອງທັບ ໂດຍສະເພາະໄລຍະການຕໍ່ສູ້ປົດປ່ອຍຊາດ, ໄດ້ເຄື່ອນໄຫວໃນຖານະເປັນກອງໂຄສະນາ-ຂົນຂວາຍປະກອບອາວຸດ, ນໍາເອົາແນວທາງ, ມະຕິຄຳສັ່ງຂອງຂຶ້ນເທິງເຜີຍແຜ່ເຊື່ອມຊຶມໃຫ້ນາຍ ແລະ ພົນທະຫານ, ນຳໃຊ້ພາຫະນະສື່ມວນຊົນ. ຄົ້ນຄວ້າ ແນວທາງການຕໍ່ສູ້, ສະພາບການຕີພິມເປັນບົດຂ່າວເຜີຍແຜ່ໄປທົ່ວເຂດທີ່ໝັ້ນ ແລະ ແນວຫຼັງຂອງສັດຕູ, ຈັດຕັ້ງໜ່ວຍ ງານສິລະປະວັນນະຄະດີເຄື່ອນໄຫວສ້າງບັນຍາກາດ, ປຸກລະດົມນັກປະພັນປະດິດແຕ່ງບົດເພງ, ບົດຟ້ອນສະທ້ອນຄວາມ ມຸ້ງມາດປາດຖະໜາໃນການຕໍ່ສູ້ປົດປ່ອຍຊາດຂອງປະຊາຊົນລາວ, ສອງແສງການຈັດຕັ້ງປະຕິບັດໜ້າທີ່ຂອງບັນດາອ້າຍ ນ້ອງທະຫານ, ບັນດາເຫຼົ່າຮົບ, ກົມກອງ...ໃນໄລຍະທີ່ກອງທັບເຮົາປະຕິບັດສອງໜ້າທີ່ຍຸດທະສາດຄືປົກປັກຮັກສາ ແລະ ສ້າງສາພັດທະນາປະເທດຊາດ. ວຽກງານໂຄສະນາອົບຮົມໄດ້ສືບຕໍ່ພາລະບົດບາດ ແລະ ໜ້າທີ່ຂອງຕົນກວ້າງອອກ; ໜັກໜ່ວງກ່ວາເກົ່າ. ໃນສະພາບ ການໃໝ່ກອງທັບປະຊາຊົນລາວຖືເອົາການສຶກສາອົບຮົມການເມືອງ-ນຳພາແນວຄິດເປັນກົກໃນດ້ານກໍ່ສ້າງກອງທັບ.
ດັ່ງນັ້ນ, ເພື່ອເປັນການສືບຕໍ່ຫ້າງຫາກະກຽມໃຫ້ແກ່ການຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນ ລາວ ຄົບຮອບ 75 ປີ ທີ່ຈະໝູນວຽນມາບັນຈົບຄົບຮອບ ໃນ ວັນທີ 20 ມັງກອນ 2024, ໃນຂົງເຂດວຽກງານ ໂຄສະນາອົບຮົມ ຈະໄດ້ສຸມໃສ່ວຽກງານດັ່ງນີ້:ສົມທົບກັບພາກສ່ວນກ່ຽວຂ້ອງຈັດຕັ້ງນັ້ນດໍາເນີນຊີວິດການເມືອງທົ່ວກອງທັບ; ສ້າງຄຳສັ່ງແນະນຳຂອງກົມໃຫຍ່ການເມືອງກອງທັບ ວ່າດ້ວຍການເປີດຂະບວນການແຂ່ງຂັນສ້າງຜົນງານຂໍ່າ ນັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ; ສົມທົບກັບກັບໂຮງຮຽນທິດສະດີການເມືອງກອງທັບ ຈັດຕັ້ງຊຸດຝຶກອົບຮົມໄລຍະສັ້ນ ວຽກງານໂຄສະນາ-ປາຖະກະຖາໃຫ້ພະນັກງານການເມືອງຢູ່ກົມກອງກຳລັງຫຼວງ - ກຳລັງທ້ອງຖິ່ນ; ຄົ້ນຄວ້າຮຽບຮຽງ-ປັງປຸງບົດມູນເຊື້ອກອງທັບປະຊາຊົນລາວ ຄົບຮອບ 75 ປີ ເພື່ອເປັນເອກະສານ ປາຖະກະຖາ, 5. ສ້າງແຜນການເຄື່ອນໄຫວປາຖະກະຖາມູນເຊື້ອກອງທັບ ຄົບຮອບ 75 ປີ ຢູ່ບັນດາກະຊວງ, ອົງການ, ສຳນັກງານ ແລະ ສະຖາບັນການສຶກສາໃນເຂດນະຄອນຫຼວງວຽງຈັນຢ່າງກວ້າງຂວາງ; ໄປພ້ອມໆກັບການໂຄສະນາ-ປາຖະກະຖາ ຍັງຈະໄດ້ເອົາໃຈໃສ່ຊຸກຍູ້ບັນດາອົງການສື່ຂອງກອງທັບ ຈັດຕັ້ງເຄື່ອນໄຫວໂຄສະນາ ຂະບວນການຕ່າງໆຢ່າງແຂງແຮງ; ຄົ້ນຄວ້າອອກແບບກາໝາຍ(ໂລໂກ້), ແບບພິທີສະເຫຼີມສະຫຼອງ; ອອກແບບຮູບພາບໂຄສະນາມຸນເຊື້ອ, ທຸງ ຢ່ອນ, ພ້ອມທັງຈັດຕັ້ງປະດັບປະດາ ແລະ ໂຄສະນາຕາມຈຸດ ສໍາຄັນໃນນະຄອນຫຼວງວຽງຈັນ ແລະ ຢູ່ກົມກອງ - ທ້ອງຖິ່ນ; ຄົ້ນຄວ້າສ້າງຮູບເງົາເອກະສານ “75 ປີ ແຫ່ງການເຕີບໃຫຍ່ເຂັ້ມແຂງຂອງກອງທັບປະຊາຊົ ລາວ" (ຮູບແບບ DVD); ຈັດຕັ້ງງານແຂ່ງຂັນນັກຮ້ອງ - ຂັບລຳສຽງຕີທົ່ວກອງທັບ ໂດຍຈັດຕັ້ງເປັນ 5 ເຂດ ແລະ ຄັດເລືອກເອົາ ລາຍການທີ່ດີເດັ່ນເຂົ້າມາແຂ່ງຂັນຊິງຊະນະເລີດ ຢູ່ນະຄອນຫຼວງວຽງຈັນ; ຈັດຕັ້ງກອງປະຊຸມຖະແຫຼງຂ່າວ ຕໍ່ສື່ມວນຊົນລາວ ກ່ຽວກັບການກະກຽມ ແລະ ຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ; ສົມທົບກັບພາກສ່ວນກ່ຽວຂ້ອງຮັບຕ້ອນຄະນະສິລະປະກອນກອງທັບປະເທດເພື່ອນມິດ 5 ຄະນະ; ຈັດຕັ້ງສິລະປະກອນກອງທັບ ລົງເຄື່ອນໄຫວສະແດງຂໍ່ານັບຊົມເຊີຍ 75 ປີ ກອງທັບຢູ່ຂັ້ນກະຊວງ ແລະ ເຄື່ອນໄຫວສະແດງຮັບໃຊ້ກົມກອງທະຫານ ແລະ ປະຊາຊົນທ້ອງຖິ່ນຕ່າງໆ; ເປີດນໍາໃຊ້ຫໍພິພິທະພັນກອງທັບຄືນໃໝ່ພາຍຫຼັງທີ່ໄດ້ສຸມໃສ່ສ້ອມແປງ - ປັບປຸງຈັດວາງສະແດງວັດຖຸພັນປະຫວັດສາດເພີ່ມຕື່ມຈຳນວນໜຶ່ງ.
ສະນັ້ນ, ເນື່ອງໃນໂອກາດອັນມີຄວາມໝາຍຄວາມສໍາຄັນນີ້ຂ້າພະເຈົ້າ ໃນນາມຜູ້ຮັບຜິດຊອບວຽກງານໂຄສະນາ - ຂະບວນການສະເຫຼີມສະຫຼອງວັນສ້າງຕັ້ງກອງທັບຄົບຮອບ 75 ປີ, ຕາງໜ້າໃຫ້ຄະນະກົມ, ພະນັກງານໂຄສະນາທຸກ ຖ້ວນໜ້າ ນະໂອກາດອັນມີຄວາມໝາຍສຳຄັນນີ້ ຂໍຝາກຄວາມຢ້ຽມຢາມຖາມຂ່າວ ແລະ ຄວາມອວຍໄຊໃຫ້ພອນອັນ ປະເສີດມາຍັງການນຳພັກ-ລັດ, ຄະນະນຳກະຊວງປ້ອງກັນປະເທດ, ກົມໃຫຍ່ການເມືອງກອງທັບ ຕະຫຼອດຮອດນາຍ ແລະ ພົນທະຫານທຸກຄົນໃນທົ່ວກອງທັບ ມີສຸຂະພາບແຂງແຮງ, ມີພາລະນາໄມສົມບູນ ໃຫ້ທຸກທ່ານໄດ້ຮັບການຍ້ອງຍໍ ຜົນງານຢ່າງສົມກຽດໃນຕະຫຼອດໄລຍະ 75 ປີ ກອງທັບ.
ໂດຍ: ອາຫວຸ້ນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
