ວັນອັງຄານ, ວັນທີ 03 ທັນວາ 2024
ກອງປະຊຸມເຜີຍແຜ່ຄຳສັ່ງຂອງກະຊວງປ້ອງກັນປະເທດ ວ່າດ້ວຍການເພີ່ມທະວີການນຳພາປັບປຸງວຽກງານກຽມພ້ອມສູ້ຮົບທົ່ວກອງທັບ
ເວລາອອກຂ່າວ: 2023-08-09 12:09:03 | ຜູ້ຂຽນ : admin2 | ຈຳນວນຄົນເຂົ້າຊົມ: 898 | ຄວາມນິຍົມ: 
ໃນວັນທີ 8 ສິງຫາ 2023 ນີ້, ກອງບັນຊາການທະຫານແຂວງວຽງຈັນ ໄດ້ເປີດກອງປະຊຸມເຜີຍແຜ່ຄໍາສັ່ງຂອງກະຊວງປ້ອງກັນປະເທດ ວ່າດ້ວຍການເພີ່ມທະວີການນຳພາປັບປຸງວຽກງານກຽມພ້ອມສູ້ຮົບທົ່ວກອງທັບ. ໂດຍການເປັນປະທານຂອງ ສະຫາຍ ພົນຕີ ສີດາລໍ່ ຈົ່ງເຕັງເຈ້ຍຊ້າ, ຮອງຫົວໜ້າກົມໃຫຍ່ເສນາທິການກອງທັບ, ມີກົມໃຫຍ່ພະລາທິການກອງທັບ, ກົມໃຫຍ່ເຕັກນິກ, ກົມໃຫຍ່ການເມືອງ, ກົມໃຫຍ່ເສນາທິການ, ກອງບັນຊາການທະຫານແຂວງວຽງຈັນ, ກອງພົນທີ 1, ວິທະຍາຄານກົມມະດໍາ, ວິທະຍາຄານພະລາທິການກອງທັບ, ກອງພັນໃຫຍ່ 497, ກອງພັນໃຫຍ່ 941 ແລະ ພະແນກການທີ່ກ່ຽວຂ້ອງເຂົ້າຮ່ວມ.
ໂດຍອີງຕາມຄຳສັ່ງຂອງກະຊວງປ້ອງກັນປະເທດ ວ່າດ້ວຍການເພີ່ມທະວີການນຳພາປັບປຸງວຽກງານກຽມພ້ອມສູ້ຮົບຂອງກອງທັບ, ເຮັດໃຫ້ບັນດາອົງການ, ກໍາລັງຫຼວງ, ກໍາລັງທ້ອງຖິ່ນໃນທົ່ວກອງທັບມີຄວາມຮັບຮູ້ເຂົ້າໃຈ ແລະ ມີຄວາມເປັນເອກະພາບໃນການຈັດຕັ້ງປະຕິບັດຢ່າງຖືກຕ້ອງ, ຄົບຖ້ວນ, ເຂັ້ມງວດ ແລະ ມີປະສິດທິຜົນສູງ, ການປັບປຸງວຽກງານກຽມພ້ອມສູ້ຮົບຕ້ອງເລັ່ງໃສ່ຄຸນນະພາບເປັນກົກ ມີລັກຊະນະຮອບດ້ານ, ປະຕິບັດຢ່າງເຂັ້ມງວດ ແລະ ເປັນປົກກະຕິ, ຖືເອົາວຽກງານກຽມພ້ອມສູ້ຮົບເປັນໜ້າທີ່ໃຈກາງ ແລະ ຄວາມຮັບຜິດຊອບຂອງພະນັກງານ-ນັກຮົບທຸກຄົນໃນທົ່ວກອງທັບ, ຄະນະພັກ-ຄະນະບັນຊາທຸກຂັ້ນຖືເປັນສຳຄັນວຽກງານສຶກສາອົບຮົມການເມືອງແນວຄິດ ໃຫ້ພະນັກງານ-ນັກຮົບຮັບຮູ້ກຳແໜ້ນການຜັນແປຂອງສະພາບການໂດຍສະເພາະຍຸດທະສາດຫັນປ່ຽນໂດຍສັນຕິ ຂອງອິດທິກຳລັງປໍລະປັກ, ມີສະຕິຕື່ນຕົວ ມີຄວາມຮັບຜິດຊອບໃນການຈັດຕັ້ງປະຕິບັດລະບອບປະຈຳການກຽມພ້ອມສູ້ຮົບຢ່າງເປັນປົກກະຕິ, ໄລຍະຜ່ານມາເຖິງວ່າສະພາບການຂອງໂລກ ພາກພື້ນ ແລະ ພາຍໃນປະເທດມີທັງຂໍ້ສະດວກ ແລະ ຂໍ້ຫຍຸ້ງຍາກທີ່ສົ່ງຜົນກະທົບຕໍ່ການຈັດຕັ້ງປະຕິບັດໜ້າທີ່ຂອງກອງທັບ ແນວໃດກະຕາມພາຍໃຕ້ການຊີ້ນຳ-ນຳພາຂອງຄະນະພັກກະຊວງປ້ອງກັນປະເທດ, ຄະນະພັກ-ຄະນະບັນຊາທຸກຂັ້ນ ກໍ່ບໍ່ໄດ້ລົດລະວຽກງານກຽມພ້ອມສູ້ຮົບ ແລະ ຍິ່ງເພີ່ມທະວີສະຕິລະວັງຕົວເປັນເຈົ້າການຮັບມືກັບສະຖານະການແງ່ຮ້າຍທີ່ອາດຈະເກີດຂຶ້ນຢູ່ທຸກເວລາ, ເຊິ່ງມັນສະແດງອອກຜົນສໍາເລັດໃນການແກ້ໄຂບັນຫາໜໍ່ແໜງຄວາມບໍ່ສະຫງົບຕ່າງໆ ແລະ ການຊ່ວຍເຫຼືອປະຊາຊົນບັນເທົາທຸກໄພພິບັດຢ່າງທັນການ ອັນໄດ້ສ້າງຄວາມເຊື່ອໝັ້ນຈາກພັກ-ລັດ, ອົງການປົກຄອງທ້ອງຖິ່ນ ແລະ ປະຊາຊົນບັນດາເຜົ່າຕໍ່ກອງທັບເຮົາ, ຈາກນັ້ນບັນດາກົມທີ່ກ່ຽວຂ້ອງໄດ້ຂຶ້ນຜ່ານເອກະສານ ແລະ ແນະນຳວຽກຈຳນວນໜຶ່ງ, ກອງປະຊຸມດັ່ງກ່າວຈະໄດ້ດໍາເນີນໄປເປັນເວລາ 3 ວັນຈຶ່ງຈະສໍາເລັດ.
ໂດຍ: ຈັນທະຈອນ ສີສະເກດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
