ວັນອັງຄານ, ວັນທີ 03 ທັນວາ 2024
ຮອງປະທານປະເທດເຄື່ອນໄຫວຕິດຕາມ ຊຸກຍູ້ແກ້ໄຂ ຟື້ນຟູຜົນກະທົບຈາກໄພນໍ້າຖ້ວມເຂດບ້ານນາຕານ ເມືອງນາກາຍ
ເວລາອອກຂ່າວ: 2023-08-29 13:35:06 | ຜູ້ຂຽນ : admin2 | ຈຳນວນຄົນເຂົ້າຊົມ: 1311 | ຄວາມນິຍົມ: 
ວັນທີ 27 ສິງຫາ 2023 ທີ່ຜ່ານມານີ້, ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ ພ້ອມດ້ວຍຄະນະໄດ້ເດີນທາງມາເຄື່ອນໄຫວເຮັດວຽກຕິດຕາມສະພາບການແກ້ໄຂຟື້ນຟູຜົນກະທົບທີ່ເກີດຈາກ ສະພາບນໍ້າຖ້ວມ ເຂດບ້ານນາຕານ ເມືອງນາກາຍ ໃນລະຫວ່າງ ຕົ້ນເດືອນສິງຫາ ທີ່ຜ່ານມາ ອັນໄດ້ເຮັດໃຫ້ ໄຮ່ນາ ຮົ້ວສວນ, ເຮືອນຊານບ້ານຊ່ອງຂອງປະຊາຊົນຖືກຖ້ວມ ແລະ ສັດລ້ຽງຂອງປະຊາຊົນສູນຫາຍ, ລົ້ມຕາຍ ເປັນຈໍານວນຫລາຍ. ພາຍຫລັງທີ່ທ່ານພ້ອມດ້ວຍຄະນະໄດ້ສໍາເລັດການຕິດຕາມສະພາບການຟື້ນຟູທີ່ເມືອງຄູນຄໍາ ໂດຍມີ ທ່ານ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງ ເຈົ້າແຂວງໆຄໍາມ່ວນ ຮ່ວມເດີນທາງຕິດ ຕາມໃຫ້ກຽດຕ້ອນຮັບທີ່ບ້ານນາຕານ ໂດຍທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ ພ້ອມດ້ວຍບັນດາການນໍາຂອງແຂວງ, ຂອງເມືອງ ຕະຫລອດເຖິງອຳນາດການປົກຄອງບ້ານ ແລະ ພໍ່ແມ່ປະຊາຊົນໃຫ້ການຕ້ອນຮັບເປັນຈໍານວນຫລວງຫລາຍ.
ໂອກາດນີ້, ທ່ານ ນາງ ບົວກາ ແກ້ວມະນີ ເຈົ້າເມືອງໆນາກາຍ ກໍໄດ້ລາຍງານສະພາບນໍ້າຖ້ວມໃນເຂດບ້ານນາຕານ ແລະ ການຮີບຮ້ອນປະຕິບັດການຊ່ວຍເຫລືອປະຊາຊົນຜ່ານມາ ລວມເຖິງ ແຜນການຟື້ນຟູຫລັງນໍ້າຖ້ວມ ເພື່ອໃຫ້ເຂົາສູ່ສະພາບປົກກະຕິໂດຍໄວ. ເຊິ່ງສະພາບຜົນກະທົບທີ່ເມືອງນາກາຍແມ່ນເລີ່ມແຕ່ວັນທີ 3-5 ສິງຫາ 2023 ເກີດມີຝົນຕົກໜັກ ເຮັດໃຫ້ລະດັບນໍ້າສູງຂຶ້ນເລື້ອຍໆ ສົ່ງຜົນໃຫ້ນໍ້າອັ່ງຂຶ້ນຖ້ວມເນື້ອທີ່ທຳການຜະລິດໄຮ່ນາ, ເຮືອນຊານ, ຄອກສັດລ້ຽງ, ເລົ້າເຂົ້າ, ໂຮງຮຽນ ແລະ ແຫ່ງອື່ນໆ ໃນ 4 ຄຸ້ມບ້ານ ເຂດນາຕານ ໃນຈໍານວນ 216 ຫລັງຄາເຮືອນ, 323 ຄອບຄົວ, ເນື້ອທີ່ນາປີປັກດໍາ 2.025 ເຮັກຕາ, ເສຍຫາຍ 675 ເຮັກຕາ, ເລົ້າເຂົ້າ 236 ຫລັງຖືກນໍ້າຖ້ວມ, ສັດລ້ຽງປະເພດຄວາຍ ຕາຍ 26 ໂຕ, ສູນຫາຍ 84 ໂຕ, ງົວຕາຍ 93 ໂຕ, ສູນຫາຍ 105 ໂຕ, ໝູຕາຍ 40 ໂຕ, ສູນຫາຍ 50 ໂຕ, ລວມເຖິງແບ້ ແລະ ສັດປີກລົ້ມຕາຍ ແລະ ສູນຫາຍເປັນຈໍານວນຫລາຍ, ນອກນີ້ ຍັງມີພາຫະນະກົນຈັກ ປະເພດຕ່າງໆ ເຊັ່ນ: ລົດແທັກເຕີ້, ລົດໄຖນາເດີນຕາມ, ເຄື່ອງປັ່ນເຂົ້າ, ໂຮງສີເຂົ້າຂະໜາດນ້ອຍ, ລວມເຖິງລະບົບຊົນລະປະທານ, ໂຮງຮຽນ, ຕະຫລອດເຖິງລະບົບຕາໜ່າງຄົມມະນາຄົມກໍ່ເປ່ເພເສຍຫາຍ, ລວມມູນຄ່າຈາກການປະເມີນຂອງຄະນະກຳມະການຄຸ້ມຄອງໄພພິບັດຂັ້ນເມືອງ 11 ຕື້ກວ່າກີບ.
ໃນໂອກາດທີ່ມາເຮັດວຽກຕິດຕາມການຟື້ນຟູຄັ້ງນີ້ ທ່ານຮອງປະທານປະເທດກໍ່ໄດ້ສະແດງຄວາມເປັນຫ່ວງເປັນໄຍ ເຖິງພໍ່ແມ່ປະຊາຊົນທີ່ໄດ້ສູນຫາຍ ແລະ ຮັບຜົນກະທົບຈາກໄພນໍ້າຖ້ວມ ພ້ອມທັງສະແດງຄວາມຈິງໃຈ ຍົກໃຫ້ເຫັນເຖິງຄວາມເປັນເຈົ້າການເອົາໃຈໃສ່ຂອງການນໍາພັກ-ລັດຖະບານ ແລະ ອໍານາດການປົກຄອງທຸກຂັ້ນ, ຕະຫລອດເຖິງອົງການຈັດຕັ້ງ ໃນສັງຄົມທີ່ເປັນເຈົ້າການເອົາໃຈໃສ່ຮ່ວມກັນແກ້ໄຂຕໍ່ສະພາບການທີ່ເກີດຂຶ້ນ ດ້ວຍຄວາມຮັບຜິດຊອບຕໍ່ຊີວິດການເປັນຢູ່ຂອງພໍ່ແມ່ປະຊາຊົນ ບໍ່ວ່າໃນຍາມປົກກະຕິ ແລະ ຮີບຮ້ອນເລັ່ງດ່ວນໃນຍາມເກີດໄພພິບັດ ພ້ອມນີ້ ທ່ານຍັງເນັ້ນໜັກເຖິງ ພາກສ່ວນຮັບຜິດຊອບທຸກຂັ້ນ. ພ້ອມກັນເປັນເຈົ້າການສືບຕໍ່ນໍາພາປະຊາຊົນປົວແປງຟື້ນຟູຜົນກະທົບທີ່ເກີດຂຶ້ນໃຫ້ຄືນສູ່ສະພາບປົກກະຕິ ເປັນຕົ້ນພື້ນຖານທາງດ້ານກະສິກຳ, ສຶກສາກໍ່ເລັ່ງປັບປຸງປົວໂຮງຮຽນທີ່ເປ່ເພໃຫ້ກັບຄືນສູ່ສະພາບເດີມໂດຍໄວ ເພື່ອໃຫ້ລູກຫານໄດ້ເຂົ້າຮຽນເປັນປົກກະຕິ ໃນສົກຮຽນໃໝ່ ລວມເຖິງການຮັກສາສຸຂະພາບ ຫລັງນໍ້າລົງ ກໍ່ຄືພະຍາດໃນລະດູຝົນ ແລະ ການເຝົ້າລະວັງຕໍ່ສະພາບໃນປະຈຸບັນ ໄພພິບັດທາງທໍາມະຊາດທີ່ອາດເກີດຂຶ້ນໄດ້ໃນທຸກໆເມື່ອ.
ໂອກາດນີ້ ທ່ານຍັງໄດ້ມອບເຄື່ອງອຸປະໂພກ ແລະ ບໍລິໂພກຈໍານວນໜຶ່ງ ເຊັ່ນ: ເຂົ້າສານ, ນໍ້າດື່ມ, ອາຫານແຫ້ງ ແລະ ຢາປົວພະຍາດທີ່ຈໍາເປັນ ພ້ອມເງິນຈໍານວນ 60 ລ້ານກວ່າກີບ, ນອກນີ້ ທາງຄະນະພັກແຂວງ ຄໍາມ່ວນ ນໍາໂດຍ ທ່ານ ບຸນມີ ພິມມະສອນ ປະທານສະພາປະຊາຊົນແຂວງ ຍັງໄດ້ມອບເງິນ ຈໍານວນ 5 ລ້ານກີບ ແກ່ອຳນວຍການໂຮງຮຽນມັດທະຍົມບ້ານນາຕານ ເພື່ອນໍາໃຊ້ເຂົ້າໃນການປັບປຸງສ້ອມແປງ, ອຸປະກອນການຮຽນ-ການສອນທີ່ໄດ້ຮັບຜົນກະທົບເຮັດໃຫ້ລູກຫລານໄດ້ເຂົ້າຮຽນທັນກັບສົກຮຽນໃໝ່ປີນີ້.
ຂ່າວ: ທະວີແສງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
