ວັນເສົາ, ວັນທີ 07 ທັນວາ 2024
ທະຫານແຂວງອັດຕະປື ປະດັບຫຼຽນໄຊຊັ້ນII, ຊັ້ນ III ແລະ ໃບຍ້ອງຍໍຂັ້ນຕ່າງໆ
ເວລາອອກຂ່າວ: 2023-08-30 15:04:50 | ຜູ້ຂຽນ : admin2 | ຈຳນວນຄົນເຂົ້າຊົມ: 967 | ຄວາມນິຍົມ: 
ກອງບັນຊາການທະຫານແຂວງອັດຕະປື ໄດ້ສະຫຼຸບຜົນງານ ການຈັດຕັ້ງປະຕິບັດໂຄງການ 01728, ແຕ່ປີ 2017 - 2022 ຂຶ້ນໃນວັນທີ 29 ສິງຫາ 2023 ນີ້, ໂດຍໃຫ້ກຽດເຂົ້າຮ່ວມຂອງ ສະຫາຍ ເລັດ ໄຊຍະພອນ ກຳມະການສູນກາງພັກ ເລຂາພັກແຂວງ ເຈົ້າແຂວງອັດຕະປື, ມີ ສະຫາຍ ພົນຈັດຕະວາ ໂຊກໄຊ ພິມມະລາ ຄະນະປະຈຳພັກແຂວງ ເລຂາຄະນະພັກຫົວໜ້າການເມືອງ ກອງບັນຊາການທະຫານແຂວງອັດຕະປື. ມີບັນດາສະຫາຍ ໃນຄະນະພັກກອງບັນຊາການທະຫານແຂວງ, ແຂກຖືກເຊີນມາຈາກພະແນກການທີ່ກ່ຽວຂ້ອງຂອງແຂວງ, ຄະນະພັກ 5 ຫ້ອງ, ກົມກອງ ເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ແສງສຸລີ ເມກເມືອງໄຊ, ຄະນະພັກກອງບັນຊາການ ຫົວໜ້າຫ້ອງເສນາທິການທະຫານແຂວງອັດຕະປື ໄດ້ຂຶ້ນລາຍງານການເຄື່ອນໄຫວຈັດຕັ້ງປະຕິບັດຂອງໂຄງການ 01728. ອີງຕາມແຜນການເຄື່ອນໄຫວປະຕິບັດໜ້າທີ່ຮັບໃຊ້ໂຄງການ 01728 ຂອງກອງບັນຊາການທະຫານແຂວງອັດຕະປື ນັບແຕ່ປີ 2017 - 2022 ຕະຫຼອດໄລຍະ 5 ປີ ຜ່ານມາຄະນະພັກ-ຄະນະບັນຊາ ກອງບັນຊາການທະຫານແຂວງອັດຕະປື ແລະ ອົງການຊ່ວຍວຽກ ໄດ້ເອົາໃຈໃສ່ຕິດຕາມກໍາແໜ້ນສະພາບການຕ່າງໆໄດ້ມີຄວາມສະດຸ້ງໄວຕໍ່ບັນຫາທີ່ເກີດຂຶ້ນ ລວມທັງບັນຫາສິ່ງແວດລ້ອມ ແລະ ບັນຫາພາຍໃນຂອງໂຄງການ, ມີໄຫວພິກໃນການຄົ້ນຄວ້າມາດຕະການ, ວິທີການ ມີຄວາມເປັນເອກະພາບໃນການຈັດຕັ້ງປະຕິບັດເຄື່ອນໄຫວໂຄງການ 01728 ເພື່ອຊຸກຍູ້ບັນດາກົມກອງເພື່ອເຮັດສໍາເລັດໜ້າທີ່ ທີ່ໄດ້ຮັບມອບໝາຍຢ່າງຕໍ່ເນື່ອງ ແລະ ເຂັ້ມງວດ ດ້ວຍຄວາມຕັດສິນໃຈສູງ, ອົດທົນຜ່ານຜ່າຕໍ່ຄວາມຫຍຸ້ງຍາກ, ໃນທຸກຂົງເຂດຂອງການເຄື່ອນໄຫວວຽກງານຕົວຈິງ ເພື່ອເປັນການຕອບສະໜອງຜົນງານໃຫ້ແກ່ກົມກອງ ແລະ ບຸກຄົນ ທີ່ມີຜົນງານດີເດັ່ນໃນການປະກອບສ່ວນ ປັບປຸງການຈັດຕັ້ງ, ອົບຮົມຫັດແອບຊ້ອມຮົບປະສານສຽງແຕກ, ແກ້ໄຂສະພາບຄວາມບໍ່ສະຫງົບຕາມຊາຍແດນ ແລະ ກອບກູ້ໄພພິບັດຊ່ວຍເຫຼືອປະຊາຊົນ. ຜົນງານດັ່ງກ່າວເປັນການປະກອບສ່ວນອັນສຳຄັນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບເພື່ອປົກປັກຮັກສາ ແລະ ສ້າງສາພັດທະນາປະເທດຊາດ ຂອງໂຄງການ 01728 ມີຫຼາຍກົມກອງ ແລະ ບຸກໄດ້ຮັບການຍ້ອງຍໍ, ໃນພິທີໄດ້ຜ່ານຂໍ້ຕົກລົງ ຂອງກະຊວງປ້ອງກັນປະເທດ, ສະບັບເລກທີ 3142 ແລະ ຂໍ້ຕົກລົງຂອງກົມໃຫ່ຍການເມືອງກອງທັບ ສະບັບເລກທີ 2814 ລົງວັນທີ 5/6/2023 ວ່າດ້ວຍການມອບຫຼຽນໄຊພິລະອາດຫານ ແລະ ໃບຍ້ອງຍໍໃຫ້ແກ່ກົມກອງລວມໝູ່ ແລະ ບຸກຄົນດີເດັ່ນ ມີ 8 ກົມກອງຄື: ຫ້ອງເສນາທິການ, ຫ້ອງເຕັກນິກ, ກອງພັນທະຫານຮາບ 19, ກອງຮ້ອຍ 594, ກອງຮ້ອຍ 792, ກອງຮ້ອຍ 542, ກອງຮ້ອຍ 240 ແລະ ກອງຮ້ອຍ 570 ໄດ້ຮັບຫຼຽນໄຊພິລະອາດຫານຊັ້ນ II ແລະ ມີ 178 ສະຫາຍ, ກົມກອງລວມໝູ່ມີ 6 ກົມກອງ ຄື: ໂຮງໝໍທະຫານແຂວງອັດຕະປື, ມີ 4 ກອງຮ້ອຍ ແລະ ອົງການທີ່ຂຶ້ນ ກອງພັນ 19 ແລະ ມີ 270 ສະຫາຍ, ໄດ້ຮັບຫຼຽນໄຊພິລະອາດຫານ ຊັ້ນ lll, ໄດ້ຮັບໃບຍ້ອງຍໍ ຂັ້ນກະຊວງປ້ອງກັນປະເທດ 333 ສະຫາຍ, ໄດ້ຮັບຍ້ອງຍໍຂັ້ນກົມໃຫຍ່ການເມືອງ 326 ສະຫາຍ, ຕາງໜ້າແຕ່ລະກົມກອງຂຶ້ນຮັບ ໃຫ້ກຽດປະດັບຫຼຽນ ແລະ ມອບໃບຍ້ອງຍໍຂອງ ສະຫາຍ ເລັດ ໄຊຍະພອນ ແລະ ສະຫາຍ ພົນຈັດຕະວາ ໂຊກໄຊ ພິມມະລາ ໃຫ້ແກ່ກົມກອງລວມໝູ່ ແລະ ບຸກຄົນຢ່າງສົມກຽດ.
ໂດຍ: ພຸດສະໄໝ - ຕິ໋ມພອນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
