ວັນສຸກ, ວັນທີ 06 ທັນວາ 2024
ກອງປະຊຸມປະເມີນການຈັດຕັ້ງປະຕິບັດກົດໝາຍ 3 ສະບັບ
ເວລາອອກຂ່າວ: 2023-08-31 15:29:39 | ຜູ້ຂຽນ : admin2 | ຈຳນວນຄົນເຂົ້າຊົມ: 1185 | ຄວາມນິຍົມ: 
ໃນວັນທີ 30 ສິງຫາ 2023 ນີ້ ກອງພົນທີ 3 ໄດ້ຮັບກຽດເປັນເຈົ້າພາບຈັດກອງປະຊຸມປະເມີນຜົນການຈັດຕັ້ງປະຕິບັດກົດໝາຍ ໃນຂົງເຂດວຽກງານປ້ອງກັນຊາດຂຶ້ນຢູ່ທີ່ສະໂມສອນຫ້ອງພະລາທິການ ໂດຍການເປັນປະທານຂອງ ສະຫາຍ ພົນຈັດຕະວາ ກັນທອງ ສຸກເລືອງຄຳ ຫົວໜ້າກົມກົດໝາຍ ກົມໃຫຍ່ການເມືອງກອງທັບ, ມີສະຫາຍ ພັນເອກ ສໍຍັນ ລໍອິນສອນ ຮອງເລຂາຄະນະພັກ ຫົວໜ້າການເມືອງກອງພົນທີ 3, ມີບັນດາສະຫາຍຫົວໜ້າ, ຮອງຫົວໜ້າກອງບັນຊາການທະຫານແຂວງອຸດົມໄຊ, ຫຼວງນ້ຳທາ, ບໍ່ແກ້ວ, ຜົ້ງສາລີ, ຕາງໜ້າສະພາປະຊາຊົນແຂວງ, ຫ້ອງວ່າການປົກຄອງແຂວງ, ພະແນກສຶກສາທິການ ແລະ ກິລາແຂວງ, ຫ້ອງການປ້ອງກັນຊາດ-ປ້ອງກັນຄວາມສະຫງົບແຂວງ, ກົມກຳລັງພົນແລະ ຄະນະພັກ-ຄະນະບັນຊາອົງການ 5 ຫ້ອງພະແນກການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
ການປະເມີນຜົນການຈັດຕັ້ງປະຕິບັດກົດໝາຍລວມມີ 3 ສະບັບ ຄື: ກົດໝາຍນາຍທະຫານກອງທັບປະຊາຊົນລາວ, ສະບັບປັບປຸງປີ 2018 ປະກອບມີ 5 ພາກ 8 ໝວດ 50 ມາດຕາ, ກົດໝາຍວ່າດ້ວຍພັນທະປ້ອງກັນຊາດ, ສະບັບປັບປຸງ ປີ 2012 ປະກອບມີ 6 ພາກ 10 ໝວດ 70 ມາດຕາ ແລະ ກົດໝາຍວ່າດ້ວຍປ້ອງກັນຊາດ, ສະບັບປັບປຸງ ປີ 2015 ປະກອບມີ 10 ພາກ 8 ໝວດ 65 ມາດຕາ, ໃນພິທີບັນດາຜູ້ແທນກອງປະຊຸມ ໄດ້ພັດປ່ຽນກັນຂຶ້ນປະກອບຄຳຄິດເຫັນຕໍ່ກັບກົດໝາຍ 3 ສະບັບດັ່ງກ່າວ, ຢ່າງຕັ້ງໜ້າ ແລະ ມີຄວາມຮັບຜິດຊອບສູງ, ເພື່ອເຮັດໃຫ້ບາງໝວດ, ບາງມາດຕາທີ່ໄດ້ກຳນົດໄວ້ໃຫ້ມີຄວາມລະອຽດ, ຈະແຈ້ງ ແລະ ສອດຄ່ອງກັບສະພາບການຂະຫຍາຍຕົວຂອງກອງທັບໃນປະຈຸບັນ.
ໂອກາດດັ່ງກ່າວ ສະຫາຍ ພົນຈັດຕະວາ ກັນທອງ ສຸກເລືອງຄໍາ ຫົວໜ້າກົມກົດໝາຍ ກົມໃຫຍ່ການເມືອງກອງທັບ ໄດ້ຮຽກຮ້ອງໃຫ້ຄະນະຜູ້ແທນກອງປະຊຸມພ້ອມກັນເອົາໃຈໃສ່ຄົ້ນຄວ້າເຊື່ອມຊຶມຕໍ່ກັບເນື້ອໃນກົດໝາຍດັ່ງກ່າວ, ໃຫ້ເລິກເຊີ່ງ ແລະ ຮັດກຸ່ມເພື່ອເຮັດໃຫ້ກົດໝາຍທັງ 3 ສະບັບ, ໄດ້ຮັບການປັບປຸງໃຫ້ສອດຄ່ອງສົມບູນ, ເພື່ອເປັນການສະດວກໃນການຈັດຕັ້ງປະຕິບັດໃນຕໍ່ໜ້າໃຫ້ໄດ້ຮັບຜົນດີຂຶ້ນເທື່ອລະກ້າວ.
ໂດຍ: ລີໂດ ດວງສະຫວັນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
