ວັນສຸກ, ວັນທີ 06 ທັນວາ 2024
ເຈົ້າໜ້າທີ່ອາວຸໂສກົດໝາຍອາຊຽນ ສປປ ລາວ ເຂົ້າຮ່ວມກອງປະຊຸມ ຢູ່ສິງກະໂປ
ເວລາອອກຂ່າວ: 2024-10-21 09:48:23 | ຜູ້ຂຽນ : admin3 | ຈຳນວນຄົນເຂົ້າຊົມ: 147 | ຄວາມນິຍົມ: 
ເມື່ອບໍ່ດົນຜ່ານມານີ້, ຄະນະຜູ້ທນຈາກກະຊວງຍຸຕິທຳແຫ່ງ ສປປ ລາວ ໃນນາມເຈົ້າໜ້າທີ່ອາວຸໂສກົດໝາຍອາຊຽນ ສປປ ລາວ (ASLOM-Lao PDR), ນຳພາໂດຍ ທ່ານ ຄຳພອນ ສີປະເສີດ ຫົວໜ້າກົມຮ່ວມມືສາກົນ ກະຊວງຍຸຕິທຳ ພ້ອມດ້ວຍຜູ້ຕາງໜ້າຈາກອົງການໄອຍະການປະຊາຊົນສູງສຸດ ແລະ ກະຊວງການຕ່າງປະເທດ ໄດເຂົ້າຮ່ວມກອງປະຊຸມວິຊາການ ກ່ຽວກັບສົນທິສັນຍາອາຊຽນ ວ່າດ້ວຍການສົ່ງຜູ້ຮ້າຍຂ້າມແດນ ຄັ້ງທີ 11; ກອງປະຊຸມກ່ຽວກັບການສ້າງຄວາມກົມກຽວທາງດ້ານກົດໝາຍການຄ້າອາຊຽນ ຄັ້ງທີ 13 ແລະ ກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນ ຄັ້ງທີ 23 ທີ່ ປະເທດສິງກະໂປ.
ກອງປະຊຸມຄັ້ງນີ້, ເປັນເຈົ້າພາບໂດຍກະຊວງກົດໝາຍ ປະເທດສິງກະໂປ ເຊິ່ງມີຄະນະຜູ້ແທນເຂົ້າຮ່ວມກອງປະຊຸມຈາກເຈົ້າໜ້າທີ່ອາວຸໂສກົດໝາຍຈາກປະເທດສະມາຊິກອາຊຽນ, ກອງເລຂາອາຊຽນ, ປະເທດຕີມໍແລັດສະເຕ (ຜູ້ສັງເກດການ) ລວມທັງຜູ້ຕາງໜ້າຈາກກະຊວງຍຸຕິທຳ ປະເທດຍີ່ປຸ່ນ ແລະ ອົງການຈັດ
ຕັ້ງສາກົນ (World Justice Project, HCCH, UNCITRAL, UNIDROIT ແລະ INSOL International).
ກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນ ຄັ້ງທີ 23 ໄດ້ພິຈາລະນາ, ຮັບຟັງ ແລະ ປຶກສາຫາລືຫຼາຍຫົວຂໍ້ສຳຄັນຄື: ການຮ່າງສົນທິສັນຍາອາຊຽນ ວ່າດ້ວຍການສົ່ງຜູ້ຮ້າຍຂ້າມແດນ, ກອງປະຊຸມເປີດກວ້າງທາງດ້ານກົດໝາຍອາຊຽນ, ການຢ້ຽມຢາມ ແລະ ແລກປ່ຽນບົດຮຽນທາງດ້ານກົດໝາຍ ແລະ ຍຸຕິທຳຂອງປະເທດສະມາຊິກອາຊຽນ, ໂຄງການເຈົ້າໜ້າທີ່ກົດໝາຍອາຊຽນ(AGLOP), ການສ້າງຄວາມເຂັ້ມແຂງໃຫ້ແກ່ຕາໜ່າງຂໍ້ມູນຂ່າວສານ ຂອງປະເທດສະມາຊິກອາຊຽນ (ALIA), ປຶ້ມສັງລວມຂໍ້ມູນອົງການຈັດຕັ້ງກົດໝາຍອາຊຽນ (ASEAN Government Law Directory), ການສ້າງ ຄວາມກົມກຽວທາງດ້ານກົດ ໝາຍການຄ້າອາຊຽນ, ການເປີດເສລີການບໍລິການທາງດ້ານກົດໝາຍ, ການໂອນຕົວນັກໂທດ ແລະ ການໂອນຕົວຜູ້ຖືກຕັດສິນລົງໂທດ, ການປ້ອງກັນອາຊະຍາກຳ ແລະ ຄວາມຍຸຕິທຳທາງອາຍາ, ການຮ່ວມມືທາງດ້ານວຽກງານຕຸລາການ, ການເສີມສ້າງຄວາມເຂັ້ມແຂງ ກ່ຽວກັບການຊ່ວຍເຫຼືອເຊິ່ງກັນ ແລະ ກັນທາງດ້ານກົດໝາຍ ໃນເລື່ອງແພ່ງ ແລະ ການຄ້າ, ການປະຕິຮູບວຽກງານອະນຸຍາໂຕຕຸລາການການຄ້າລະຫວ່າງປະເທດ (ຂໍ້ສະເໜີໃໝ່).
ສຳລັບການຮ່ວມມືລະຫວ່າງອາຊຽນ ກັບພາຍນອກເຈົ້າໜ້າ ທີ່ອາວຸໂສກົດໝາຍອາຊຽນ ໄດ້ຮັບຟັງການສະເໜີແລກປ່ຽນບົດຮຽນຈາກອົງການ HCCH,
UNCITRAL ແລະ UNIDROID ກ່ຽວກັບຄວາມສຳຄັນໃນການເຂົ້າເປັນສະມາຊິກ ແລະ ພາຄີຂອງສົນທິສັນຍາ ເພື່ອເປັນບ່ອນອີງໃຫ້ແກ່ປະເທດສະມາຊິກພິຈາລະນາການເຂົ້າເປັນສະມາຊິກ ແລະ ພາຄີໃນອະນາຄົດ; ວຽກງານ ແລະ ບົດຮຽນທີ່ດີຈາກອົງການຍຸຕິທຳໂລກ (World Justice Project) ແລະ INSOL International ເພື່ອເປັນທິດທາງໃຫ້ແກ່ປະເທດສະມາຊິກ ໃນການພິຈາລະນາການຮ່ວມມືສອງຝ່າຍ ແລະ ການຮ່ວມມືຫຼາຍຝ່າຍ; ການສະເໜີຈາກຜູ້ຕາງໜ້າກະຊວງຍຸຕິທຳຍີ່ປຸ່ນ ກ່ຽວກັບການຜັນຂະຫຍາຍ ແລະ ຈັດຕັ້ງປະຕິບັດແຜນປະຕິບັດງານອາຊຽນ-ຍີ່ປຸ່ນ ສຳລັບໄຕມາດທີ 4 ຂອງປີ 2024 ແລະ ແຜນກິດຈະກຳປີ 2025 ໂດຍສະເພາະການສະເໜີຈັດກອງປະຊຸມລັດຖະມົນຕີຍຸຕິທຳ ອາຊຽນ-ຍີ່ປຸ່ນ ໃນປີ 2025. ຜ່ານການປຶກສາຫາລືໃນກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນ ຄັ້ງທີ 23, ປະເທດສະມາຊິກສາມາດສ້າງໄດ້ຜົນສຳເລັດຫຼາຍດ້ານ ໂດຍສະເພາະຜ່ານການລາຍງານ ຂອງປະເທດສະມາຊິກກ່ຽວກັບຄວາມຄືບໜ້າຂອງການຜັນຂະຫຍາຍ ແລະ ຈັດຕັ້ງປະຕິບັດບົດລາຍງານກອງປະຊຸມເຈົ້າໜ້າທີ່ອາວຸໂສ ກົດໝາຍອາຊຽນ ຄັ້ງທີ 21 ແລະ 22 ລວມທັງຖະແຫຼງການຮ່ວມລະຫວ່າງລັດຖະມົນຕີກົດໝາຍອາຊຽນ ຄັ້ງທີ 12. ພ້ອມກັນນັ້ນ, ປະເທດສະມາຊິກ ສາມາດຮັບຮອງເອົາເນື້ອໃນພື້ນຖານຂອງບົດລາຍງານກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນ ຄັ້ງທີ 23
ເພື່ອສະເໜີການຮັບຮອງໃນກອງປະຊຸມລັດຖະມົນຕີກົດໝາຍອາຊຽນ ຄັ້ງທີ 13 ທີ່ປະເທດຟີລິບປິນ ຈະເປັນເຈົ້າພາບໃນປີ 2025.
ສຳລັບເຈົ້າໜ້າທີ່ອາວຸໂສກົດ ໝາຍອາຊຽນ ສປປ ລາວ ໃນການນຳເອົາຜົນສຳເລັດດັ່ງກ່າວມາຜັນຂະຫຍາຍ ແລະ ຈັດຕັ້ງປະຕິບັດພາຍໃນ, ກົມຮ່ວມມືສາ ກົນ ໃນນາມຈຸດປະສານງານວຽກງານອາຊຽນ ຂອງກະຊວງຍຸຕິທຳຈະປະສານສົມທົບກັບບັນດາກົມພາຍໃນກະຊວງຍຸຕິທຳ, ພ້ອມທັງຂະແໜງການທີ່ກ່ຽວຂ້ອງ ເພື່ອຈັດກອງປະຊຸມເຜີຍແຜ່ຜົນສຳເລັດ ຈາກການເຂົ້າຮ່ວມກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນ ຄັ້ງທີ 23 ໃນເດືອນພະຈິກ 2024 ເພື່ອນຳໃຊ້ເວທີດັ່ງກ່າວໃນການ ແລກປ່ຽນບົດຮຽນ ແລະ ພິຈາລະນາການກຳນົດການຮ່ວມມືທາງດ້ານກົດໝາຍ ແລະ ຍຸຕິທຳ ໃນອະນາຄົດ ບົນພື້ນຖານຫົວຂໍ້ ແລະ ບົດລາຍງານທີ່ຖືກຮັບຮອງໂດຍປະເທດສະມາຊິກ.
ໂດຍ: ວິລະກອນ ສົມຊະນິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
