ວັນສຸກ, ວັນທີ 06 ທັນວາ 2024
ສະຫະພັນກິລາ ກາຣາເຕໂດ້ ແຫ່ງຊາດລາວ ປະກາດແຕ່ງຕັ້ງຄະນະບໍລິຫານງານຊຸດໃໝ່ ປີ 2024-2028
ເວລາອອກຂ່າວ: 2024-10-24 09:10:27 | ຜູ້ຂຽນ : admin3 | ຈຳນວນຄົນເຂົ້າຊົມ: 593 | ຄວາມນິຍົມ: 
ສະຫະພັນກິລາ ກາຣາເຕໂດ້ ແຫ່ງຊາດລາວ ໄດ້ປະກາດແຕ່ງຕັ້ງຄະນະບໍລິຫານງານຊຸດໃໝ່ຄັ້ງນີ້, ຈັດຂຶ້ນວັນທີ 21 ຕຸລາ 2024 ທີ່ກະຊວງສຶກສາທິການ ແລະ ກິລາ, ໂດຍມີ ທ່ານ ແສງພອນ ພົນອາມາດ ຮອງປະທານ-ເລຂາທິການ ຄະນະກຳມະການໂອແລມປິກແຫ່ງຊາດລາວ ພ້ອມດ້ວຍຄະນະບໍລິຫານງານຊຸດເກົ່າ ແລະ ຊຸດໃໝ່ ຂອງສະຫະພັນ ແລະ ສື່ມວນຊົນເຂົ້າຮ່ວມ.
ຄະນະບໍລິຫານງານຊຸດໃໝ່ ສົກປີ 2024-2028 ລວມທັງໝົດ 27 ທ່ານ, ໂດຍແຕ່ງຕັ້ງ ທ່ານ ແກ້ວວິສຸກ ໂສລະພົນ ຮອງລັດຖະມົນຕີ ກະຊວງເຕັກໂນໂລ
ຊີ ແລະ ການສື່ສານ ເປັນປະທານສະຫະພັນຜູ້ໃໝ່ ພ້ອມດ້ວຍຮອງປະທານອີກ 4 ທ່ານ, ປະທານກິດຕິມະສັກ, ທີ່ປຶກສາ 3 ທ່ານ, ເລຂາ 1 ທ່ານ, ຮອງເລຂາ 2 ທ່ານ, ກຳມະການ 13 ທ່ານ ແລະ ຜູ້ຊ່ວຍວຽກ 3 ທ່ານ. ໂດຍມີການມອບຮັບຕ່ຳແໜ່ງປະທານຜູ້ເກົ່າ ແລະ ຜູ້ໃໝ່ ລະຫວ່າງ ທ່ານ ພົງສະຫວັດ ບຸບຜາ ອະດີດລັດຖະມົນຕີ ຫ້ອງວ່າການປະທານປະເທດ ປະທານສະຫະພັນກິລາກາຣາເຕໂດhແຫ່ງຊາດລາວ (ຜູ້ເກົ່າ) ກັບ ທ່ານ ແກ້ວວິສຸກ ໂສລະພົນ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ປະທານສະຫະພັນກິລາກາຣາເຕໂດ້ແຫ່ງຊາດລາວ (ຜູ້ໃຫມ່).
ທ່ານ ພົງສະຫວັດ ບຸບຜາ ຕາງໜ້າຄະນະບໍລິຫານງານສະຫະພັນກິລາກາຣາເຕໂດ້ ແຫ່ງຊາດ ຊຸດເກົ່າ ປີ 2019-2024 ໄດ້ລາຍງານຜົນສຳເລັດທີ່ຍາດມາໄດ້ໃນໄລຍະຜ່ານມາ, ໂດຍມີຫຼາຍຜົນງານທີ່ພົ້ນເດັ່ນ ເປັນຕົ້ນ: ການສ້າງບຸກຄະລາກອນຮອບດ້ານເຊັ່ນ: ກຳມະການຕັດສິນ, ຄູຝຶກ, ນັກກິລາ ແລະ ຄະນະກຳມະການຈັດການແຂ່ງຂັນ, ສະເພາະການເຄື່ອນໄຫວນຳພານັກກິລາເຂົ້າຮ່ວມແຂ່ງຂັນ ໃນລະດັບຕ່າງໆ ທັງພາກພື້ນ ແລະ ສາກົນ ສາມາດຍາດໄດ້ 6 ຫລຽນເງິນ ແລະ 8 ຫລຽນທອງ. ເຖິງແມ່ນວ່າ ໄລຍະການເຄື່ອນໄຫວ ແຕ່ປີ 2019-2024 ແມ່ນຈະພົບບັນຫາ ແລະ ຂໍ້ຫຍຸ້ງຍາກຫຼາຍຢ່າງ ແຕ່ສະຫະພັນ ໄດ້ມີການປຸກລະດົມຂົນຂວາຍ ເຂົ້າຮ່ວມການແຂ່ງຂັນ ແລະ ສ້າງບຸກຄະລາກອນຢ່າງຕໍ່ເນື່ອງ ເພື່ອສືບຕໍ່ພັດທະນາວົງການກິລາກາຣາເຕໂດ້ລາວ ໃຫ້ເຕີບໂຕຢ່າງບໍ່ຢຸດຢັ້ງ.
ສຳລັບເປົ້າໝາຍ ວິໄສທັດຂອງຄະນະບໍລິຫານງານຊຸດໃໝ່ ທ່ານ ແກ້ວວີສຸກ ໂສລະພົນ ພ້ອມສືບຕໍ່ຊຸກຍູ້ ສົ່ງເສີມ ແລະ ພັດທະນາສະຫະພັນ ກໍຄືບັນດາສະໂມສອນຕ່າງໆ ໃຫ້ມີເຕີບໂຕຢ່າງເຂັ້ມແຂງ ແລະ ຍືນຍົງ, ສູ່ຊົນສ້າງໂອກາດໃຫ້ຄູຝຶກ ແລະ ນັກກິລາ ລວມທັງກຳມະການຕັດສິນ ແລະ ບຸກຄະລາກອນຮອບດ້ານ ໄດ້ມີການເຄື່ອນໄຫວຢ່າງຕໍ່ເນື່ອງລຽນຕິດ ເພື່ອຍົກລະດັບສີມື ພັດທະນາຂີດຄວາມສາມາດ ໃຫ້ທຽມທັນກັບພາກພື້ນ ແລະ ສາກົນ, ໂດຍສະເພາະການຈະຈັດແຂ່ງຂັນປະຈຳປີ ພາຍໃນປະເທດ ແລະ ສືບຕໍ່ສົ່ງນັກກິລາເຂົ້າຮ່ວມການແຂ່ງຂັນ ຢູ່ພາກພື້ນ ແລະ ສາກົນ, ຈະພະຍາຍາມບຸກລະດົມຂົນຂວາຍຊອກຫາແຫຼ່ງທຶນຕ່າງໆ ເພື່ອປະກອບເຂົ້າເປັນງົບປະມານຂອງສະຫະພັນ, ຊ່ວຍເຫລືອບັນດານັກກິລາ, ບຸກ
ຄະລາກອນຕ່າງໆ ພ້ອມກັບພົວພັນປະສານງານກັບສະຖານທູດຍີ່ປຸ່ນ ແລະ ອົງການ JICA ປະຈຳ ສປປ ລາວ ເພື່ອໃຫ້ໄດ້ຮັບການສະໜັບສະໜູນທາງດ້ານງົບປະມານ, ວັດຖຸອຸປະກອນ, ຄູຝຶກ ແລະ ອາສາສະຫມັກຕ່າງໆ ເພື່ອຜັນຂະຫຍາຍມູນເຊື້ອອັນດີເດັ່ນ ແລະ ຍາດໄດ້ຜົນສຳເລັດອັນໃຫມ່ ໃຫຍ່ຂຶ້ນກວ່າເກົ່າ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
