ວັນເສົາ, ວັນທີ 07 ທັນວາ 2024
ການປັບປຸງ-ສ້ອມແປງເສັ້ນທາງແຕ່ສີໄຄ ຫາ ສີເກີດ ຈະໃຫ້ສຳເລັດໃນຕົ້ນປີ 2025
ເວລາອອກຂ່າວ: 2024-10-31 08:48:14 | ຜູ້ຂຽນ : admin3 | ຈຳນວນຄົນເຂົ້າຊົມ: 328 | ຄວາມນິຍົມ: 
ກົມຂົນສົ່ງ ກະຊວງໂຍທາທິການ ແລະ ຂົນສົ່ງ (ຍທຂ) ກຳລັງເລັ່ງປັບປຸງ ແລະ ສ້ອມແປງເສັ້ນທາງເລກທີ 13 ເໜືອ ແຕ່ສີໄຄ-ສີເກີດ ທີ່ມີໄລຍະທາງຍາວ 6 ກິໂລແມັດ ໂດຍແມ່ນກຸ່ມ ບໍລິສັດຕັງຈະເລີນ ຈຳກັດ (TCR) ເປັນຜູ້ຮັບເໝົາກໍ່ສ້າງ. ມາຮອດວັນທີ 17 ຕຸລາ 2024 ການຈັດຕັ້ງປະຕິບັດວຽກໂຄງການປັບປຸງ ແລະ ສ້ອມແປງເສັ້ນທາງດັ່ງກ່າວ ມີຄວາມຄືບໜ້າ 66% ແລະ ຈະໃຫ້ສຳເລັດສົມບູນໃນຕົ້ນປີ 2025.
ທ່ານ ລັດສະໝີ ອະລິຍະວົງສິງ ຫົວໜ້າໂຄງການປັບປຸງ ແລະ ສ້ອມແປງທາງເລກ 13 ເໜືອ ໄລຍະທາງແຕ່ນະຄອນຫຼວງວຽງຈັນ (ນວ) ຫາໂພນໂຮງ ກົມຂົວທາງກະຊວງ ຍທຂ ໄດ້ໃຫ້ຮູ້ກ່ຽວກັບຄວາມຄືບໜ້າການຈັດຕັ້ງປະຕິບັດວຽກໂຄງການປັບປຸງ ແລະ ສ້ອມແປງເສັ້ນທາງດັ່ງກ່າວ ວ່າ: ໂຄງການດັ່ງກ່າວໄດ້ເລີ່ມຈັດຕັ້ງປະຕິບັດມາແຕ່ວັນທີ 1 ຕຸລາ 2023 ຈົນເຖິງ 31 ມີນາ 2025 (13 ເດືອນ) ແຕ່ມີໄລຍະເວລາກໍ່ສ້າງ 18 ເດືອນ. ມາຮອດວັນທີ 17 ຕຸລາ 2024 ການຈັດຕັ້ງປະຕິບັດວຽກໂຄງການມີຄວາມຄືບໜ້າ 66% ທຽບໃສ່ແຜນດັດແກ້ໃໝ່ຍັງຫຼຸດ 20%, ຖ້າທຽບໃສ່ແຜນເບື້ອງຕົ້ນໄດ້ 0%, ໄດ້ເຮັດການທົດລອງຄວາມເປັນຄື້ນໜ້າທາງໄລຍະ 600 ແມັດ; ສຳເລັດໂຄງການເຂດບ້ານໄຊມຸງຄຸນ ເມືອງສີໂຄດ
ຕະບອງ ນວ ສະເລ່ຍປະມານ 2,7 ກິໂລແມັດ ກຳລັງນຳເອົາກົນຈັກມາເພີ່ມເພື່ອເລັ່ງປັບໜ້າທາງຈົກດິນບວມອອກ, ຖົມດິນແດງຊັບເກຣດ ແລະ ຊັບເບດ
ໂດຍໃຊ້ແຮງງານທັງໝົດ 105 ຄົນ ໃນນັ້ນ, ໄດ້ແບ່ງທີມງານ (ແຮງງານ) ອອກເປັນ 2 ທີມຄື: ທີມງານປູເບຕົງໜ້າທາງມີ 3 ທີມ (1 ທີມ/ມາຍສະໂຕນ), ທີມລະ 15 ຄົນ ລວມທັງໝົດ 45 ຄົນ; ທີມງານເຮັດຮ່ອງນ້ຳໂຕຢູມີ 6 ທີມ (ເຮັດທັງສອງຂ້າງທາງ 12,630 ແມັດຍາວ), ທີມລະ 10 ຄົນ ລວມທັງໝົດ 60 ຄົນ. ພ້ອມນັ້ນ, ມີຫຼາຍໜ້າວຽກມີຄວາມຄືບໜ້າເປັນຕົ້ນ ວຽກບຸກເບີກລອກໜ້າທາງໄດ້ 96,3%, ດິນຂຸດໜ້າທາງ 62%, ດິນຖົມໜ້າທາງ 79,7%, ດິນຊັ້ນຊັບເກຣດ 63,7%, ດິນຊັ້ນຊັບເບດ 51%, ຊັ້ນໜ້າທາງເບຕົງເສີມເຫຼັກ 32,6%, ທໍ່ລ່ຽມເບຕົງເສີມເຫຼັກ 50%, ທໍ່ກົມເບຕົງເສີມເຫຼັກ 100%, ຮ່ອງລະບາຍນ້ຳໂຕຢູ 90,6% ໃນນັ້ນ, ວຽກງານຍົກຍ້າຍລະບົບສາທາລະນຸປະໂພກລວມມີ ໄຟຟ້າ 90%, ນ້ຳປະປາ (ບໍ່ໄດ້ຍົກຍ້າຍອອກປະໄວ້ຄືເກົ່າແຕ່ຍ້າຍທໍ່ກາງ-ນ້ອຍຕິດກັບຮ່ອງນ້ຳໂຕຢູທັງສອງຂ້າງ ແລະ ແປງທໍ່ນ້ອຍເຂົ້າຄົວເຮືອນເວລາຖືກກະທົບ). ໃນນັ້ນ, ວຽກທີ່ຍົກຍ້າຍ ແລະ ເຊັນສັນຍາແລ້ວມີ ສາຍໄຍແກ້ວ, ກ້ອງວົງຈອນປິດ, ສາຍເຄເບີ້ນຈຳປາລາວ, ໂທລະພາບໃຊ້ສາຍລາວ, ໂທລະຄົມລາວ, ເບສເທເລຄອມ, ລາວໂທລະຄົມ, ສື່ສານໄຟຟ້າລາວ. ສຳລັບວຽກຍົກຍ້າຍສະຕາໂທລະຄົມ (ກຳລັງເຈລະຈາ).
ທ່ານ ລັດສະໝີ ອະລິຍະວົງສິງ ຍັງໃຫ້ຮູ້ບາງບັນຫາທ້າທາຍ-ຫຍຸ້ງຍາກວ່າ: ໄລຍະທາງດັ່ງກ່າວ ນອນໃນຕົວເມືອງທີ່ເປັນເຂດຊຸມຊົນໜາແໜ້ນ; ລົດບັນທຸກໜັກຍັງແລ່ນຕາມປົກກະຕິ; ລະດູຝົນປີນີ້ ແກ່ຍາວເວລາສົມຄວນ; ການຍົກຍ້າຍລະບົບສາທາລະນຸປະໂພກຫຼ້າຊ້າບໍ່ໄດ້ຕາມແຜນເບື້ອງຕົ້ນ ມາຮອດປັດຈຸບັນສະເລ່ຍລວມໄດ້ປະມານ 90% ໄດ້ແກ້ໄຂ, ສ້ອມແປງເສັ້ນທາງຮັບໃຊ້ການສັນຈອນເປັນປົກກະ
ຕິ; ມີປະຊາຊົນ ແລະ ຜູ້ນຳໃຊ້ທາງໄດ້ສະເໜີຫຼາຍຕໍ່ບັນຫາຂີ້ຝຸ່ນ, ທາງເຂົ້າເຮືອນມີຂີ້ຕົມ, ນ້ຳປະປາຕັດຂາດ, ທາງຊອຍເຂົ້າບ້ານ ແລະ ອື່ນໆ ແຕ່ກໍໄດ້ຊອກຫາວິທີແກ້ໄຂຢ່າງຕໍ່ເນື່ອງ. ເຖິງຢ່າງໃດກໍຕາມ ການຈັດຕັ້ງປະຕິບັດວຽກໂຄງການປັບປຸງ ແລະ ສ້ອມແປງເສັ້ນທາງດັ່ງກ່າວຈະສຳເລັດສົມບູນໃນເດືອນມີນາ 2025.
ໂດຍ: ວັນເພັງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
