ວັນສຸກ, ວັນທີ 06 ທັນວາ 2024
ລັດຖະບານ ອົດສະຕຣາລີ ມອບອຸປະກອນການຮຽນ ໃຫ້ໂຮງຮຽນປະຖົມທີ່ຖືກນ້ຳຖ້ວມ ຢູ່ແຂວງຫຼວງນໍ້າທາ
ເວລາອອກຂ່າວ: 2024-10-31 08:52:21 | ຜູ້ຂຽນ : admin3 | ຈຳນວນຄົນເຂົ້າຊົມ: 274 | ຄວາມນິຍົມ: 
ລັດຖະບານອົດສະຕຣາລີ ໄດ້ຈັດຊື້ປຶ້ມແບບຮຽນ 7.740 ຫົວ ແລະ ປຶ້ມຄູ່ມືຄູ 1.530 ຫົວ ລວມມູນຄ່າທັງໝົດ 330 ລ້ານກວ່າກີບ ຫຼື ປະມານ 22.500 ໂດລາ
ອົດສະຕຣາລີ ເພື່ອມອບໃຫ້ໂຮງຮຽນປະຖົມສຶກສາ ຢູ່ເມືອງຫຼວງນ້ຳທາ, ເມືອງນາແລ ແລະ ເມືອງສິງ ແຂວງຫຼວງນ້ຳທາ ທີ່ໄດ້ຮັບຜົນກະທົບ ຈາກໄພນ້ຳຖ້ວມ ໃນໄລຍະຜ່ານມາ, ຕາງໜ້າມອບໂດຍ ທ່ານນາງ ເບັນນິຕາ ຊຳເມີວິວ ຮອງເອກອັກຄະລັດຖະທູດອົດສະຕຣາລີ ປະຈໍາ ສປປລາວ ແລະ ຮັບໂດຍ ທ່ານສຳລານ ພັນຄະວົງ ຮອງລັດຖະມົນຕີກະຊວງສຶກສາທິການ ແລະ ກິລາ.
ໂອກາດດັ່ງກ່າວ, ທ່ານ ສຳລານ ພັນຄະວົງ ໄດ້ຕີລາຄາສູງ ແລະ ສະແດງຄວາມຂອບໃຈ ຕໍ່ລັດຖະບານອົດສະຕຣາລີ ທີ່ໄດ້ໃຫ້ການສະໜັບສະໜູນ ແກ່ຂະແໜງການສຶກສາ ຢ່າງບໍ່ຢຸດຢັ້ງ ບໍ່ວ່າໄລຍະປົກກະຕິ ກໍຄືໃນໄລຍະວິກິດການຄັ້ງນີ້, ກະຊວງສຶກສາທິການ ແລະ ກິລາ ແລະ ອົງການການປົກຄອງແຂວງ ໄດ້
ເລັ່ງແກ້ໄຂຜົນກະທົບຫຼັງຈາກພະຍຸໄຕ້ຝຸ່ນຢາກິ, ໄດ້ອະນາໄມຂີ້ຕົມ, ສິ່ງເສດເຫຼືອ ແລະ ຮັບປະກັນຄວາມປອດໄພຂອງໂຮງຮຽນ ເພື່ອໃຫ້ນັກຮຽນສາມາດກັບມາຮຽນຄືນໄດ້ ເຊິ່ງວຽກບູລິມະສິດໃນປັດຈຸບັນ ແມ່ນການທົດແທນປຶ້ມແບບຮຽນ ເພື່ອໃຫ້ຫ້ອງຮຽນ ສາມາດກັບຄືນມາສືບຕໍ່ການຮຽນ-ການສອນ ໄດ້ໄວທີ່ສຸດ.
ທ່ານ ນາງ ເບັນນິຕາ ຊຳເມີວິວ ໄດ້ກ່າວວ່າ: ລັດຖະບານອົດສະຕຣາລີ ໄດ້ຮ່ວມມື ໄລຍະຍາວ ກັບລັດຖະບານ ສປປ ລາວ ເພື່ອຮັບປະກັນການສຶກສາປະຖົມສຶກສາ ທີ່ມີຄຸນນະພາບໃຫ້ສາມາດເຂົ້າເຖິງໄດ້ໂດຍນັກຮຽນທຸກຄົນ ພ້ອມທັງ, ໄດ້ສະໜັບສະໜູນກະຊວງສຶກສາທິການ ແລະ ກິລາ ໃນການທົບທວນ, ຜະລິດ ແລະ ແຈກຢາຍສື່ການຮຽນ ສຳລັບທຸກຂັ້ນຮຽນ ຂອງປະຖົມສຶກສາ. ລັດຖະບານອົດສະຕຣາລີ ຈະຮ່ວມມືກັບກະຊວງສຶກສາທິການ ແລະ ກິລາ ໃນຄວາມພະຍາຍາມຟື້ນຟູ
ແລະ ໃຫ້ການສະໜັບສະໜູນພິເສດ ເພື່ອທົດແທນສື່ການຮຽນ-ການສອນ ທີ່ເສຍຫາຍໃນເຂດທີ່ຖືກຜົນກະທົບ.
ບົດລາຍງານຫຼ້າສຸດຂອງຄະນະຄຸ້ມຄອງໄພພິບັດ ກະຊວງສຶກສາທິການ ແລະ ກິລາ ໃຫ້ຮູ້ວ່າ: ຄວາມເສຍຫາຍຈາກພາຍຸໄຕ້ຝຸ່ນຢາກິ ໃນເດືອນກັນຍາ 2024 ໄດ້ສົ່ງຜົນກະທົບຕໍ່ຄູ ແລະ ນັກຮຽນ ຈຳນວນ 1.800 ຄົນ ໃນ 17 ໂຮງຮຽນ ຢູ່ເມືອງຫຼວງນ້ຳທາ, ເມືອງນາແລ ແລະ ເມືອງສິງ ເຮັດໃຫ້ປຶ້ມແບບຮຽນ, ສື່ການຮຽນ-ການສອນ, ໂຕະ, ຄອມພິວເຕີ, ເຄື່ອງທົດລອງ ແລະ ອື່ນໆ ໄດ້ຮັບຄວາມເສຍຫາຍຢ່າງໜັກບໍ່ສາມາດສ້ອມແປງໄດ້.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
