POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນສຸກ, ວັນທີ 06 ທັນວາ 2024

ຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດຖະມົນຕີແຮງງານອາຊຽນ ຄັ້ງທີ 28
ເວລາອອກຂ່າວ: 2024-11-04 09:38:23 | ຜູ້ຂຽນ : admin3 | ຈຳນວນຄົນເຂົ້າຊົມ: 120 | ຄວາມນິຍົມ:

ຄະນະຜູ້ແທນ ສປປ ລາວ ນຳໂດຍ ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ເຂົ້າຮ່ວມກອງປະຊຸມ ລັດຖະມົນຕີແຮງງານອາຊຽນ ຄັ້ງທີ 28, ກອງປະຊຸມລັດຖະມົນຕີແຮງງານອາຊຽນ ບວກສາມ ຄັ້ງທີ 13 ແລະ ກອງປະຊຸມກ່ຽວຂ້ອງ ໃນລະຫວ່າງວັນທີ 28-31 ຕຸລາ 2024 ທີ່່ປະເທດສິງກະໂປ ພາຍໃຕ້ຫົວຂໍ້: ການເພີ່ມທະວີຄວາມເຂັ້ມແຂງ ແລະ ການສົ່ງເສີມນະວັດຕະກຳ ພາຍໃຕ້ການເປັນປະທານຂອງ ທ່ານ Tan See Leng ລັດຖະມົນຕີກະຊວງແຮງງານ ປະເທດສິງກະໂປ, ມີບັນດາລັດຖະມົນຕີແຮງງານອາຊຽນ, ອາຊຽນບວກສາມ, ເລຂາທິການໃຫຍ່ອາຊຽນ, ກອງເລຂາອາຊຽນອາຊຽນ, ເຈົ້າໜ້າທີ່ອາວຸໂສແຮງງານບັນດາປະເທດສະມາຊິກອາຊຽນ, ອາຊຽນບວກສາມ ແລະ ຕີມໍ ແລັດສະເຕ ໃນນາມຜູ້ສັງເກດການເຂົ້າຮ່ວມ. ກອງປະຊຸມລັດຖະມົນຕີແຮງງານໃນຄັ້ງນີ້, ໄດ້ພ້ອມກັນ ປຶກສາຫາລືບັນຫາສຳຄັນຕ່າງໆ ໂດຍສະເພາະການຈັດຕັ້ງປະຕິບັດແຜນງານລັດຖະມົນຕີແຮງງານອາຊຽນ ໄລຍະ ປີ 2021-2025 ໃຫ້ສຳເລັດຕາມແຜນການ, ການແລກປ່ຽນທັດສະ ນະຍຸດທະສາດການຮ່ວມມືຂອງຂະແໜງແຮງງານຫຼັງປີ 2025 ເພື່ອການສ້າງແຜນງານລັດຖະມົນຕີແຮງງານອາຊຽນ ແລະ ບັນດາແຜນງານຕ່າງໆ ທີ່ກ່ຽວຂ້ອງ ດ້ານແຮງງານໄລຍະໃໝ່ ປີ 2026-2030, ປຶກສາຫາລືການຈັດຕັ້ງຜັນຂະຫຍາຍບັນດາຖະແຫຼງການຕ່າງໆ ທີ່ກ່ຽວຂ້ອງດ້ານແຮງງານ ລວມທັງການຮ່ວມມື ແລະ ການສະໜັບສະໜູນຈາກບັນດາປະເທດອາຊຽນບວກສາມ, ບັນດາຄູ່ຮ່ວມງານ ແລະ ອົງການຈັດຕັ້ງສາກົນທີ່ກ່ຽວຂ້ອງຕ່າງໆ ແນໃສ່ເພື່ອເພີ່ມທະວີການຮ່ວມມື ດ້ານວຽກງານແຮງງານອາຊຽນ ແລະ ປຶກສາຫາລື ຮັບຮອງຖະແຫຼງການຮ່ວມ ກອງປະຊຸມລັດຖະມົນຕີແຮງງານອາຊຽນ ຄັ້ງທີ 28 ແລະ ບວກສາມ ຄັ້ງທີ 13 ພ້ອມທັງຮັບຮອງບົດລາຍງານຜົນກອງປະຊຸມເຈົ້າໜ້າທີ່ອາວຸໂສແຮງງານອາຊຽນຄັ້ງທີ 19 ແລະ ຄັ້ງທີ 20. ໃນໂອກາດເຂົ້າຮ່ວມກອງປະຊຸມໃນຄັ້ງນີ້, ຜູ້ແທນ ສປປ ລາວ ໄດ້ມີຄຳເຫັນ ແລະ ຕີລາຄາສູງ ຕໍ່ຜົນສຳເລັດການະເປັນປະທານກອງປະຊຸມລັດຖະມົນຕີແຮງງານອາຊຽນຄັ້ງທີ 28 ແລະ ກອງປະຊຸມກ່ຽວຂ້ອງ ຂອງປະເທດສິງກະໂປ ແລະ ການຈັດຕັ້ງປະຕິບັດຮ່ວມກັນວຽກງານແຮງງານອາຊຽນຕະຫຼອດໄລຍະ 50 ປີຜ່ານມາ. ນອກນີ້, ຍັງໄດ້ລາຍງານຜົນສຳເລັດໃນການສ້າງຖະແຫຼງການວຽງຈັນ ວ່າດ້ວຍການເຄື່ອນຍ້າຍແຮງງານ, ການພັດທະນາ ແລະ ຮັບຮູ້ສີມືແຮງງານເຄື່ອນຍ້າຍ ແລະ ລາຍງານການກວດກາການຈັດຕັ້ງປະຕິບັດຖະແຫຼງການດັ່ງກ່າວ ທີ່ໄດ້ຮັບຮອງໃນກອງປະຊຸມສຸດຍອດຜູ້ນຳອາຊຽນ ຄັ້ງທີ 44 ແລະ 45 ທີ່ ສປປ ລາວ ເປັນປະທານອາຊຽນ ໃນເດືອນຕຸລາ ຜ່ານມາ, ລາຍງານຄວາມ ຄືບໜ້າການຈັດ ຕັ້ງປະຕິບັດ ແຜນປະຕິບັດງານຄວາມເປັນເອກະສັນຂອງອາຊຽນ ວ່າດ້ວຍການປົກປ້ອງສົ່ງເສີມສິດທິແຮງງານເຄື່ອນຍ້າຍອາຊຽນ ແລະ ແລກປ່ຽນຄຳຄິດເຫັນກ່ຽວກັບການຈັດຕັ້ງປະຕິບັດແຜນງານລຶບລ້າງການນຳໃຊ້ແຮງງານເດັກ ໃນທຸກຮູບແບບ ທີ່ຮ້າຍແຮງ, ຊຶ່ງບັນດາປະເທດສະມາຊິກອາຊຽນ ກໍຄື ສປປ ລາວ ໄດ້ມີຄວາມພະຍາມໃນການຈັດຕັ້ງຜັນຂະຫຍາຍວຽກງານດັ່ງກ່າວເຂົ້າສູ່ແຜນງານລະດັບຊາດ ແນໃສ່ເພື່ອການປ້ອງກັນບັນຫາແຮງງານເດັກ, ການປົກປ້ອງແຮງງານໄວໜຸ່ມ ແລະ ສົ່ງເສີມວຽກທີ່ມີຄຸນຄ່າ ແລະ ເປັນທຳ ສຳລັບໄວໜຸ່ມໃນຕໍ່ໜ້າໃຫ້ມີປະສິດທິຜົນ. ກອງປະຊຸມລັດຖະມົນຕີແຮງງງານອາຊຽນ ຄັ້ງທີ 29 ມີແຜນຈະຈັດຂຶ້ນທີ່ປະເທດ ໄທໃນປີ 2026.

news to day and hot news