ວັນສຸກ, ວັນທີ 06 ທັນວາ 2024
ຄະນະກອງຂຸດຄົ້ນອັດຖິ ທະຫານອາສາສະໝັກ ແລະ ຊ່ຽວຊານ ສສ ຫວຽດນາມ ເຄື່ອນໄຫວເຮັດວຽກຮ່ວມກັບຄະນະປະຕິບັດງານພິເສດ ແຂວງວຽງຈັນ
ເວລາອອກຂ່າວ: 2024-11-08 09:41:07 | ຜູ້ຂຽນ : admin2 | ຈຳນວນຄົນເຂົ້າຊົມ: 900 | ຄວາມນິຍົມ: 
ວັນທີ 06 ພະຈິກ 2024 ນີ້, ສະຫາຍ ພັນເອກ ເຈ ຫງອ໋ກ ຮາ ຫົວໜ້າການທະຫານ ກອງຂຸດຄົ້ນອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ປະຈໍາຢູ່ ແຂວງຊຽງຂວາງ ແລະ ເມືອງ ລ້ອງແຈ້ງ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ກອງບັນຊາການທະຫານແຂວງວຽງຈັນ ໂດຍຕ້ອນຮັບຂອງສະຫາຍ ພູວົງ ບຸນຊູ ຮອງເຈົ້າແຂວງ ແຂວງວຽງຈັນ, ຫົວໜ້າ ຄະນະສະເພາະກິດປະຕິບັດງານພິເສດຂັ້ນແຂວງ, ມີສະຫາຍ ພົນຈັດຕະວາ ບຸນຜອງ ບຸດທະວົງ ຫົວໜ້າການເມືອງ ກອງບັນຊາການທະຫານແຂວງວຽງຈັນ, ພ້ອມດ້ວຍພະນັກງານຫຼັກແຫຼ່ງ ໃຫ້ການຕ້ອນຮັບຢ່າງອົບອຸ່ນ.
ພັນເອກ ເຈ ຫງ໋ອກ ຮາ ກໍ່ໄດ້ລາຍງານໂດຍຫຍໍ້ ກ່ຽວກັບການເຄື່ອນໄຫວຊອກຄົ້ນຮ່າງອັດຖິ, ເຊິ່ງກ່ອນອື່ນສະຫາຍໄດ້ຍ້ອງຍໍຊົມເຊີຍ ຕໍ່ຜົນສໍາເລັດໃນການຈັດຕັ້ງປະຕະບັດວຽກງານໃນໄລຍະຜ່ານມາເຫັນວ່າມີຜົນສໍາເລັດຢ່າງຈົບງາມ ສໍາລັບລະດູແລ້ງ 2023-2024, ຜ່ານມານີ້ ຄະນະຊີ້ນຳ 515 ທະຫານເຂດ 4 ກອງທັບປະຊາຊົນຫວຽດນາມ ໄດ້ມອບໜ້າທີ່ໃຫ້ແຂວງ ເຫງະອ່ານ ສົມທົບກັບ 3 ແຂວງ ຊຽງຂວາງ ວຽງຈັນ ແລະ ໄຊສົມບູນ ສຳຫຼວດເກັບກຳຂໍ້ມູນຊອກຄົ້ນ ທ້ອນໂຮມຮ່າງອັດຖິສົ່ງກັບຄືນປະເທດ 80 ອັດຖິ, ຜ່ານການປະຕິບັດໜ້າທີ່ດ້ວຍນ້ຳໃຈມານະອົດທົນ ແລະ ມີຄວາມຮັບຜິດຊອບສູງ ຂອງອ້າຍນ້ອງພະນັກງານ ກອງຂຸດຄົ້ນອະຖິ ສາມາດຂຸດຄົ້ນໄດ້ 87 ຮ່າງອັດຖິ ລື່ນຄາດໝາຍ 7 ອັດຖິ ບັນລຸໄດ້ 108,7% ຂອງແຜນການ. ສໍາລັບລະດູແລ້ງ 2024-2025 ນີ້, ຫວັງຢ່າງຍິ່ງວ່າຈະໄດ້ຮັບການຊ່ວຍເຫຼືອຈາກ ຄະນະປະຕິບັດງານພິເສດແຂວງວຽງຈັນ ແລະ ການຮ່ວມມືຈາກອໍານາດການປົກຄອງທ້ອງຖິ່ນ ພໍ່ແມ່ປະຊາຊົນບັນດາເຜົ່າ ໃນວຽກງານຊອກຂຸດຄົ້ນຮ່າງອັດຖິໃຫ້ໄດ້ຕາມແຜນທີ່ວາງໄວ້.
ສະຫາຍ ພູວົງ ບຸນຊູ ໄດ້ໃຫ້ຄໍາໝັ້ນສັນວາວ່າ: ຈະສືບຕໍ່ປະສານສົມທົບກັບບັນດາພາກສ່ວນທີ່ກ່ຽວຂ້ອງ ໃຫ້ການຊ່ວຍເຫຼືອໃນທຸກດ້ານ ເຂົ້າໃນວຽກງານຂຸດຄົ້ນຮ່າງອັດຖິ ເພື່ອນໍາສົ່ງກັບຄືນສູ່ປະເທດ, ສາມາດຮັບປະກັນໄດ້ຢ່າງຖືກຕ້ອງສອດຄ່ອງ ແລະ ມີຜົນສຳເລັດສູງ, ຈະເອົາໃຈໃສ່ລະດົມຊຸກຍູ້ກຳລັງ ລົງເຮັດເຮັດໜ້າທີ່ປ້ອງກັນຊາດ-ປ້ອງກັນຄວາມສະຫງົບ ຮັບປະກັນໃຫ້ແກ່ການເຄື່ອນໄຫວວຽກງານດັ່ງກ່າວ ມີຄວາມສະຫງົບປອດໄພ. ພ້ອມນັ້ນກໍ່ໄດ້ມອບລົດຈັກ ຈໍານວນ 01 ຄັນ, ໃຫ້ແກ່ອ້າຍນ້ອງກອງຂຸດຄົ້ນອັດຖິ ເພື່ອນໍາໃຊ້ເຂົ້າໃນການເຄື່ອນໄຫວເຮັດວຽກໃຫ້ມີຄວາມສະດວກຫຼາຍຂຶ້ນ, ຈາກນັ້ນກໍ່ໄດ້ນໍາພາຄະນະດັ່ງກ່າວ, ເຂົ້າຢ້ຽມຊົມ ຫໍສີລາຈາລຶກວິລະບູລຸດນັກຮົບປະສົມ ລາວ-ຫວຽດນາມ ທີ່ບ້ານໂພນແຮ່ ເມືອງທຸລະຄົມ ແຂວງວຽງຈັນ. ໂດຍ: ສາຍຄໍາ ພອນມະນີ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
