ວັນພະຫັດ, ວັນທີ 05 ທັນວາ 2024
ມອບຫຼຽນກາມິດຕະພາບ ໃຫ້ຊ່ຽວຊານການແພດໂຮງໝໍສູນກາງ 108
ເວລາອອກຂ່າວ: 2024-11-13 11:42:06 | ຜູ້ຂຽນ : admin2 | ຈຳນວນຄົນເຂົ້າຊົມ: 809 | ຄວາມນິຍົມ: 
ໃນວັນທີ 12 ພະຈິກ 2024, ໂຮງໝໍສູນກາງ 103 ກອງທັບປະຊາຊົນລາວ ໄດ້ຈັດພິທີມອບຫຼຽນກາມິດຕະພາບໃຫ້ຊ່ຽວຊານການແພດໂຮງໝໍສູນກາງ 108 ກອງທັບປະຊາຊົນຫວຽດນາມ ທີ່ມາຊ່ວຍເຫຼືອທາງການແພດໃນໄລຍະເວລາ 3 ເດືອນ. ໂດຍການເປັນປະທານຂອງ ສະຫາຍ ພົນຈັດຕະວາ ຈັນດີ ສຸລິວົງສັກ ຮອງຫົວໜ້າກົມໃຫຍ່ພະລາທິການກອງທັບ, ມີຄະນະພັກ-ຄະນະບັນຊາໂຮງໝໍສູນກາງ 103 ກອງທັບປະຊາຊົນລາວ ຕະຫຼອດເຖິງພະແນກການທີ່ກ່ຽວຂ້ອງເຂົ້າຮ່ວມ.
ສະຫາຍ ພົນຈັດຕະວາ ຈັນດີ ສຸລິວົງສັກ ໄດ້ໃຫ້ກຽດປະດັບຫຼຽນກາມິດຕະພາບໃຫ້ ສະຫາຍ ພັນຕີ ດຣ. ຫວຽນ ເຟືອງ ຕຽນ ເພື່ອເປັນການຍ້ອງຍໍສັນລະເສີນຜົນງານດີເດັ່ນໃນການຊ່ວຍເຫຼືອດ້ານການແພດ ເຊິ່ງມາປະຈໍາການທີ່ພະແນກແຂ້ວ-ຄາງ-ໜ້າ, ພະແນກສັນຍະກໍາ ແລະ ພະແນກຕ່າງໆຂອງໂຮງໝໍສູນກາງ 103 ກອງທັບປະຊາຊົນລາວ ກະຊວງປ້ອງກັນປະເທດ ຕົກລົງມອບຫຼຽນກາມິດຕະພາບກອງທັບປະຊາຊົນລາວ ເພື່ອເປັນການສັນລະເສີນຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືີຮອບດ້ານລະຫວ່າງສອງພັກ-ສອງລັດ, ສອງກອງທັບ ແລະ ປະຊາຊົນສອງຊາດ ລາວ-ຫວຽດນາມໃຫ້ໝັ້ນຄົງທະນົງແກ່ນ. ພ້ອມນີ້, ຄະນະອໍານວຍການໂຮງໝໍສູນກາງ 103 ກອງທັບປະຊາຊົນລາວ ກໍໄດ້ຕົກລົງມອບໃບຍ້ອງຍໍໃຫ້ຊ່ຽວຊານດັ່ງກ່າວ ເພື່ອສະແດງຄວາມຮູ້ບຸນຄຸນທີ່ໄດ້ເສຍສະຫຼະເວລາເພື່ອມາປະຕິບັດວຽກງານຕາມການມອບໝາຍຂອງການນໍາດ້ວຍຄວາມຮັບຜິດຊອບສູງ ແລະ ມີຜົນງານອັນດີເດັ່ນອັນເປັນທີ່ຍອມຮັບຂອງບັນດາຄະນະອໍານວຍການໂຮງໝໍສູນກາງ 103 ກອງທັບປະຊາຊົນລາວ.
ໂອກາດດັ່ງກ່າວ, ສະຫາຍ ພົນຈັດຕະວາ ຈັນດີ ສຸລິວົງສັກ ໄດ້ສະແດງຄວາມຍ້ອງຍໍ ແລະ ຄວາມພາກພູມໃຈຢ່າງຍິງຕໍ່ຜົນງານຂອງ ສະຫາຍ ຫວຽນ ເຟືອງ ຕຽນ ທີ່ໄດ້ກໍ່ສ້າງຂຶ້ນມາ ມັນສ່ອງແສງໃຫ້ເຫັນຜົນສໍາເລັດ ແລະ ຄວາມສາມາດ, ປະສົບການໃນການແກ້ໄຂກໍລະນີຕ່າງໆໃນໄລຍະປະຕິບັດວຽກງນດ້ວຍຜົນສໍາເລັດສູງ ສົມກັບສັນຍານາມທີ່ເອີ້ນວ່າ “ຊ່ຽວຊານ” ເຊິ່ງເປັນທີ່ຍອມຮັບຈາກພັກລັດ ແລະ ປະຊາຊົນສອງຊາດ ລາວ-ຫວຽດນາມ. ພ້ອມນີ້, ກໍໄດ້ອວຍພອນໃຫ້ ສະຫາຍ ພັນຕີ ຫວຽນ ເຟືອງ ຕຽນ ເດີນທາງກັບບ້ານເກີດເມືອງນອນຂອງຕົນດ້ວຍຄວາມສະຫວັດດີພາບ.
ຂ່າວ: ໂຊກທະວີ ແກ້ວບຸດຕະລາດ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
