ວັນພະຫັດ, ວັນທີ 05 ທັນວາ 2024
ກອງປະຊຸມກະກຽມຈັດຕັ້ງສະເຫຼີມສະຫຼອງ 3 ວັນປະຫວັດສາດ
ເວລາອອກຂ່າວ: 2024-11-13 15:15:06 | ຜູ້ຂຽນ : admin2 | ຈຳນວນຄົນເຂົ້າຊົມ: 1120 | ຄວາມນິຍົມ: 
ວັນທີ 13 ພະຈິກ 2024 ນີ້, ທີ່ຫ້ອງວ່າການກະຊວງປ້ອງກັນປະເທດ ໄດ້ຈັດກອງປະຊຸມກະກຽມຈັດຕັ້ງສະເຫຼີມສະຫຼອງ 3 ວັນປະຫວັດສາດ ຄື: ວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 105 ປີ ແລະ ແຕ່ງຕັ້ງຄະນະຊີ້ນຳ, ອະນຸກຳມະການຮັບຜິດຊອບຈັດຕັ້ງສະເຫຼີມສະຫຼອງ, ໂດຍການເປັນປະທານ ຂອງສະຫາຍ ພົນໂທ ສຈ ປອ ທອງລອຍ ສິລິວົງ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ, ມີຄະນະນຳກົມໃຫຍ່, ຫ້ອງວ່າການກະຊວງ, ກົມ, ຫ້ອງການ, ກົມກອງ ເຂົ້າຮ່ວມ.
ສະຫາຍ ພົນຈັດຕະວາ ເດືອນສະຫວັນ ສາຍພິມຄໍາປະທຸມ ຫົວໜ້າຫ້ອງວ່າການກະຊວງປ້ອງກັນປະເທດ ໄດ້ຜ່ານຂໍ້ຕົກລົງແຕ່ງຕັ້ງຄະນະຊີ້ນຳ ແລະ ອະນຸກຳມະການຮັບຜິດຊອບຈັດຕັ້ງສະເຫຼີມສະຫຼອງ ແລະ ຜ່ານແຜນການເພື່ອຫວນຄືນມູນເຊື້ອອັນສະຫງ່າງາມແຫ່ງການກໍ່ຕັ້ງ ແລະ ການເຕີບໃຫຍ່ຂະຫຍາຍຕົວຂອງ ພັກປະຊາຊົນປະຕິວັດລາວ ໃນຍ່ານທາງ 70 ປີ ທີ່ເຕັມໄປດ້ວຍສິ່ງທ້າທາຍທົດສອບລະອິດລະອ້ຽວຂ້ຽວຂາດທີ່ສຸດ, ມູນເຊື້ອ 50 ປີ ແຫ່ງການປະຕິວັດຊາດປະຊາທິປະໄຕ ກ້າວໄປສູ່ການສະຖາປະນາ ສປປ ລາວ ຢ່າງສະຫງ່າຜ່າເຜີຍ ແລະ ມີຜົນສໍາເລັດໃຫຍ່ຫຼວງຫຼາຍດ້ານໃນພາລະກິດປົກປັກຮັກສາ ແລະ ພັດທະນາປະເທດຊາດ; ພ້ອມທັງສະແດງເຖີງຜົນງານຄຸນງາມຄວາມດີ ແລະ ສະແດງຄວາມກະຕັນຍູຮູ້ບຸນຄຸນຕໍ່ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກ ຂອງປະຊາຊົນລາວບັນດາເຜົ່າ. ເພື່ອສຶກສາອົບຮົມ ພະນັກງານ-ສະມາຊິກພັກ, ທະຫານ-ຕຳຫຼວດ ຕະຫຼອດຮອດປະຊາຊົນບັນດາເຜົ່າ, ນັບທັງສະມາຊິກພັກຢູ່ຊົນນະບົດ ໃຫ້ຮັບຮູ້ເຂົ້າໃຈທາດແທ້ຂອງພັກທີ່ເປັນຕົວແທນຂອງຊົນຊັ້ນກຳມະກອນ, ເຊື່ອມຊຶມເລິກເຊິ່ງທາດແທ້, ມູນເຊື້ອອັນດີງາມຂອງພັກ, ເຫັນແຈ້ງຜົນງານອັນໃຫຍ່ຫຼວງ ໃນການບໍລິຫານລັດ, ຮໍ່າຮຽນຄຸນສົມບັດສິນທຳປະຕິວັດຂອງ ປະທານ ໄກສອນ ພົມວິຫານ ເພື່ອພ້ອມກັນຕັ້ງໜ້າຄົ້ນຄວ້າ, ສຶກສາ ແລະ ປະຕິບັດແບບຢ່າງຂອງເພີ່ນ ແນໃສ່ຕ້ານການໂຄສະນາບິດເບືອນຂອງພວກຄົນບໍ່ດີ; ເພີ່ມທະວີຄວາມເປັນແບບຢ່າງນໍາໜ້າ, ຍົກສູງຄວາມຮັບຜິດຊອບການເມືອງ, ເສີມຂະຫຍາຍມານະຈິດປະຕິວັດ, ຕັດສິນໃຈບຸກບືນສູ້ຊົນເຮັດຫຼ້ອນໜ້າທີ່ວຽກງານທີ່ ພັກ-ລັດ ມອບໝາຍໃຫ້. ເພື່ອປຸກລະດົມຢ່າງແຂງແຮງຂະບວນການທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວ ທັງຊາດ ໃນການບຸກບືນສູ້ຊົນຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີແຫ່ງຊາດ ຄັ້ງທີ IX ແລະ ສອງວາລະແຫ່ງຊາດ ຕິດພັນກັບການສ້າງຜົນງານ ຂໍ່ານັບຮັບຕ້ອນບັນດາວັນບຸນໃຫຍ່ທີ່ສໍາຄັນຂອງພັກ, ຂອງຊາດ ໃນປີ 2025; ພ້ອມທັງ ຕັ້ງໜ້າກະກຽມກອງປະຊຸມໃຫຍ່ຂັ້ນຂອງຕົນ ເພື່ອກ້າວເຂົ້າສູ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ຢ່າງເປັນຂະບວນຟົດຟື້ນແຂງແຮງ ແລະ ເບີກບານມ່ວນຊື່ນ.
ໂດຍ: ໄພລິນ ບຸນຍັງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
