POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນພຸດ, ວັນທີ 19 ພະຈິກ 2025

ຮັບຮອງເອົາ 10 ບ້ານ ທີ່ຂຶ້ນກັບ ເມືອງຊະນະຄາມ ເປັນບ້ານປ້ອງກັນຊາດເຂັ້ມແຂງ
ເວລາອອກຂ່າວ: 2025-10-15 09:15:21 | ຜູ້ຂຽນ : admin1 | ຈຳນວນຄົນເຂົ້າຊົມ: 614 | ຄວາມນິຍົມ:

ພິທີປະກາດການຮັບຮອງເອົາ 10 ບ້ານ ທີ່ຂຶ້ນກັບເມືອງຊະນະຄາມ ແຂວງວຽງຈັນ ຄື: ບ້ານດົງຂ່າ, ບ້ານດອນພຸງ, ບ້ານຫ້ວຍເຕົ່າ, ບ້ານບົວຈະເລີນ, ບ້ານໂພນສະຫວ່າງ, ບ້ານນາດີ, ບ້ານໂພນສະຫວາດ, ບ້ານນາເດື່ອ, ບ້ານໂພນງາມ ແລະ ບ້ານນາສົມບູນ ເປັນບ້ານປ້ອງກັນຊາດເຂັ້ມແຂງ ເຊິ່ງເປັນບ້ານທີ 14-23 ຂອງເມືອງຊະນະຄາມ, ໄດ້ຈັດຂຶ້ນໃນບໍ່ດົນຜ່ານມານີ້, ໂດຍການເປັນປະທານຂອງ ສະຫາຍ ພັນເອກ ສຸດໃຈ ມະຫາວົງ ຫົວ ໜ້າການເມືອງ ກອງບັນຊາການທະຫານແຂວງວຽງຈັນ, ມີ ສະຫາຍ ແກ້ວ ພິມມະວົງ ເຈົ້າເມືອງ ເມືອງຊະນະຄາມ, ມີພາກສ່ວນທີ່ກ່ຽວຂ້ອງ, ແຂກຖືກເຊີນ ຕະຫຼອດຮອດອຳນາດການປົກຄອງ 10 ບ້ານ ເຂົ້າຮ່ວມ. ສະຫາຍ ບ່ວຍ ຈັນທະກັນສອນ ເລຂາພັກບ້ານ ນາຍບ້ານ ບ້ານດົງຂ່າ ໄດ້ຕາງໜ້າໃຫ້ 10 ບ້ານ ຜ່ານບົດສະຫຼຸບການຈັດຕັ້ງປະຕິ ບັດປະເມີນຜົນການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງ ໂດຍໄດ້ຍົກໃຫ້ເຫັນດ້ານຕັ້ງໜ້າ ເປັນຕົ້ນແມ່ນໄດ້ຖືເອົາວຽກງານສຶກສາອົບຮົມການເມືອງ-ນຳພາແນວຄິດເປັນກົກ ດ້ວຍການນຳເອົາມະຕິຄຳສັ່ງຕ່າງໆຂອງພັກ, ກົດໝາຍຂອງລັດ ມາຈັດຕັ້ງເຜີຍ ແຜ່ໃຫ້ພໍ່ແມ່ປະຊາຊົນເຂົ້າໃຈ ແຈ້ງຕໍ່ແນວທາງນະໂຍບາຍຂອງ ພັກ ແລະ ເອກະສານອື່ນໆ ເພື່ອໃຫ້ເຂົາເຈົ້າຮັບຮູ້ເຊື່ອມຊຶມຢ່າງທົ່ວເຖິງ ເຮັດໃຫ້ພໍ່ແມ່ປະຊາຊົນມີຄວາມສະດຸ້ງໄວ, ຕື່ນຕົວປະກອບ ສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ຢ່າງຕັ້ງໜ້າ ພ້ອມທັງໄດ້ເປັນເຈົ້າການ ເຮັດໜ້າທີ່ຕິດຕາມສະ ພາບກຸ່ມຄົນບໍ່ຫວັງດີພາຍໃນບ້ານ ແລະ ຂອບເຂດຂອງຕົນຮັບຜິດຊອບຢ່າງເຂັ້ມງວດ ເພື່ອແກ້ໄຂໃຫ້ທັນເວລາ. ໃນຈຳນວນ 10 ບ້ານ ມີພົນລະເມືອງທັງໝົດ 9.760 ຄົນ, ຍິງ 4.805 ຄົນ, ມີ 2.023 ຄອບຄົວ, ມີ 143 ໜ່ວຍສາມັກຄີ, ບ້ານມີລະບົບການຈັດຕັ້ງຄົບຊຸດ, ມີທ່າ ແຮງບົ່ມຊ້ອນຫຼາຍດ້ານທີ່ເປັນເງື່ອນໄຂຂໍ້ສະດວກໃນການພັດ ທະນາເສດຖະກິດ-ສັງຄົມ ເຮັດໃຫ້ບ້ານໄດ້ຮັບການພັດທະນາຢ່າງຕໍ່ເນື່ອງ, ການສ້າງເສດຖະກິດແກ້ໄຂຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ, ເຮັດໃຫ້ຄອບຄົວຫຼຸດພົ້ນອອກຈາກຄວາມທຸກຍາກໄປເທື່ອລະກ້າວ, ສາມາດຕີລາຄາປະເມີນຜົນການຈັດຕັ້ງປະຕິບັດການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງໄດ້ 84% ໃນຈຳນວນ 73 ຄອບຄົວ. ຈາກຜົນສຳເລັດດັ່ງກ່າວ ສາມາດຮັບ ຮອງເອົາ 10 ບ້ານ ທີ່ຂຶ້ນກັບ ເມືອງຊະນະຄາມ ເປັນຄອບຄົວ ແລະ ບ້ານປ້ອງກັນຊາດເຂັ້ມແຂງ ຕາມ 6 ມາດຖານຂອງກະຊວງປ້ອງກັນປະເທດວາງອອກ. ໃນພິທີຍັງໄດ້ຜ່ານຂໍ້ຕົກລົງ ຂອງທ່ານເຈົ້າແຂວງ ແຂວງວຽງຈັນ ວ່າດ້ວຍການອະນຸມັດ ຮັບຮອງເອົາ 10 ບ້ານທີ່ຂຶ້ນກັບ ເມືອງຊະນະຄາມ ເປັນບ້ານປ້ອງກັນຊາດເຂັ້ມແຂງ ພ້ອມທັງມອບໃບຢັ້ງຢືນໃຫ້ແກ່ຄອບຄົວ ແລະ ບ້ານປ້ອງກັນຊາດເຂັ້ມແຂງຢ່າງສົມກຽດ. ໂອກາດດັ່ງກ່າວ, ສະຫາຍ ພັນເອກ ສຸດໃຈ ມະຫາວົງ ໄດ້ໂອ້ລົມຫຼາຍບັນຫາສຳຄັນ ແລະ ໄດ້ຮຽກຮ້ອງໃຫ້ແຕ່ລະພາກສ່ວນ ຕະຫຼອດຮອດອຳນາດການປົກ ຄອງບ້ານ ແລະ ພໍ່ແມ່ປະຊາ ຊົນທີ່ໄດ້ຮັບການຢັ້ງຢືນເປັນຄອບຄົວ ແລະ ບ້ານປ້ອງກັນຊາດ ເຂັ້ມແຂງໃນຄັ້ງນີ້, ຕ້ອງເປັນເຈົ້າການສືບຕໍ່ປະກອບສ່ວນເຂົ້າຮ່ວມການເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະ ຫງົບ, ປົກປັກຮັກສາບ້ານຊ່ອງຂອງຕົນໃຫ້ມີຄວາມສະຫງົບໂດຍພື້ນຖານ, ປັບປຸງຕານ່າງກອງຫຼອນຂັ້ນບ້ານໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ, ຮູ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນ, ເປັນເຈົ້າການປະສານສົມທົບກັບຂັ້ນເທິງ ແລະ ພາກສ່ວນທີ່ກ່ຽວຂ້ອງ ໃນເວລາມີສະພາບການຕ້ອງແກ້ໄຂໃຫ້ທັນເວລາ, ເພື່ອຕ້ານ ແລະ ສະກັດກັ້ນປະກົດການຫຍໍ້ ທໍ້ຕ່າງໆ, ໜໍ່ແໜງທີ່ຈະກໍໃຫ້ເກີດຄວາມບໍ່ສະຫງົບຢູ່ທ້ອງຖິ່ນຂອງຕົນ ໃນສະເພາະໜ້າ ແລະ ຍາວນານ. ໂດຍ: ເລມ໋ອນ ສຸວັນນະວົງ

news to day and hot news