POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນພຸດ, ວັນທີ 19 ພະຈິກ 2025

ກອງປະຊຸມ ສໍາມະນາ ຄົ້ນຄວ້າ ປະກອບຄໍາເຫັນໃສ່ຮ່າງກົດໝາຍ ວ່າດ້ວຍນາຍທະຫານກອງທັບປະຊາຊົນລາວ
ເວລາອອກຂ່າວ: 2025-10-15 15:49:34 | ຜູ້ຂຽນ : admin2 | ຈຳນວນຄົນເຂົ້າຊົມ: 916 | ຄວາມນິຍົມ:

ກອງປະຊຸມສໍາມະນາຄົ້ນຄວ້າປະກອບຄໍາເຫັນໃສ່ຮ່າງກົດໝາຍ ວ່າດ້ວຍນາຍທະຫານກອງທັບປະຊາຊົນລາວ (ສະບັບປັບປຸງ) ໄດ້ຈັດຂຶ້ນວັນທີ 15 ຕຸລາ 2025 ນີ້, ໂດຍການເປັນປະທານຂອງສະຫາຍ ພົນຕີ ວົງສອນ ອິນປານພິມ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ, ຫົວໜ້າຄະນະຮັບຜິດຊອບປັບປຸງກົດໝາຍວ່າດ້ວຍ ນາຍທະຫານກອງທັບປະຊາຊົນລາວ, ມີຕາງໜ້າ 4 ກົມໃຫຍ່, ຫ້ອງວ່າການກະຊວງປ້ອງກັນປະເທດ ພ້ອມດ້ວຍວິຊາການທີ່ກ່ຽວຂ້ອງເຂົ້າຮ່ວມ. ສະຫາຍ ພົນຕີ ວົງສອນ ອິນປານພິມ ໄດ້ກ່າວວ່າ: ການປະກອບຄໍາເຫັນໃສ່ຮ່າງກົດໝາຍວ່າດ້ວຍນາຍທະຫານກອງທັບປະຊາຊົນລາວ ແມ່ນນອນຢູ່ໃນແຜນການສ້າງ ແລະ ປັບປຸງກົດໝາຍ 5 ປີ ຂອງກະຊວງປ້ອງກັນປະເທດ ແລະ ຈະນໍາເຂົ້າຜ່ານຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ກົດໝາຍວ່າດ້ວຍນາຍທະຫານກອງທັບປະຊາຊົນລາວ ສະບັບເລກທີ 07/ສພຊ, ລົງວັນທີ 22 ຕຸລາ 2004 ແມ່ນເປັນສະບັບທໍາອິດໄດ້ຮັບຮອງເອົາໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ V ແລະ ປະກາດໃຊ້ຢ່າງເປັນທາງການ ຕາມລັດຖະດໍາລັດຂອງປະທານປະເທດ ສະບັບເລກທີ 69/ສປປ, ລົງວັນທີ 15 ພະຈິກ 2004 ເຊິ່ງປະກອບມີ 7 ໝວດ, 33 ມາດຕາ (ບໍ່ມີພາກ) ໄດ້ຖືກຈັດຕັ້ງປະຕິບັດມາ ເປັນເວລາ 14 ປີ ແລະ ມາເຖິງປີ 2018 ກົດໝາຍວ່າດ້ວຍນາຍທະຫານກອງທັບປະຊົນລາວ ໄດ້ມີການປັບປຸງເປັນຄັ້ງທໍາອິດ ເຊິ່ງຮັບຮອງເອົາຕາມມະຕິຂອງກອງປະຊຸມ ສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII, ສະບັບເລກທີ 084/ສພຊ, ລົງວັນທີ 14 ມິຖຸນາ 2018 ແລະ ປະກາດໃຊ້ຢ່າງເປັນທາງການຕາມລັດຖະດໍາລັດຂອງປະທານປະເທດ ສະບັບເລກທີ 202/ປປທ, ລົງວັນທີ 31 ກໍລະກົດ 2018, ເຊິ່ງປະກອບມີ V ພາກ, 8 ໝວດ, 50 ມາດຕາ, ຜ່ານການຈັດຕັ້ງປະຕິບັດກົດໝາຍສະບັບດັ່ງກ່າວ ເປັນເວລາ 7 ປີ ເຫັນວ່າກົດໝາຍສະບັບນີ້ ແມ່ນເປັນພື້ນຖານ ແລະ ເປັນບ່ອນອີງ ໃຫ້ແກ່ການເຄື່ອນໄຫວວຽກງານຂອງນາຍທະຫານກອງທັບປະຊາຊົນລາວ ໂດຍສະເພາະແມ່ນການກໍານົດມາດຖານ ແລະ ເງື່ອນໄຂ, ການປະດັບຊັ້ນ ແລະ ທຽບຊັ້ນ, ການແຕ່ງຕັ້ງ, ຍົກຍ້າຍ ຫຼື ປົດຕໍາແໜ່ງ, ການຕິດຕາມ-ກວດກາ ແລະ ການປະຕິບັດນະໂຍບາຍຕ່າງໆ ຂອງນາຍທະຫານກອງທັບປະຊາຊົນລາວ ເຮັດໃຫ້ການປະຕິບັດໜ້າທີ່ວຽກງານມີຄວາມສະດວກ, ສະບາຍຕະຫຼອດມາ. ຄຽງຄູ່ກັບດ້ານດີ ກໍຍັງເຫັນໄດ້ວ່າມີບາງເນື້ອໃນ ທີ່ຍັງຕ້ອງໄດ້ປັບປຸງແກ້ໄຂ ເຊິ່ງຜ່ານການປະເມີນຜົນການຈັດຕັ້ງປະຕິບັດກົດໝາຍ ເຫັນວ່ານາຍທະຫານຈໍານວນໜຶ່ງ ຍັງບໍ່ທັນເຂົ້າໃຈເປັນເອກະພາບ, ບໍ່ກໍາແໜ້ນກ່ຽວກັບ ທີ່ຕັ້ງ, ພາລະບົດບາດ, ສິດ, ໜ້າທີ່, ພັນທະ, ຄວາມຜິດຊອບຂອງນາຍທະຫານ ຈຶ່ງເຮັດໃຫ້ຂອດການຈັດຕັ້ງປະຕິບັດຕົວຈິງຢູ່ບັນດາກົມກອງກໍາລັງຫຼວງ, ກໍາລັງທ້ອງຖິິ່ນ ຍັງບໍ່ທັນເຂັ້ມງວດ, ສອດຄ່ອງ ແລະ ເປັນເອກະພາບກັນໃນທົ່ວກອງທັບ, ການກໍານົດເນື້ອໃນບາງມາດຕະຂອງກົດໝາຍ ຍັງບໍ່ທັນຈະແຈ້ງ, ຮັດກຸມ, ຄົບຖ້ວນ ແລະ ຍັງມີຊ່ອງວ່າງ ເປັນສາເຫດເຮັດໃຫ້ມີການຕີຄວາມໝາຍໄດ້ຫຼາຍແງ່. ສະນັ້ນ, ກະຊວງປ້ອງກັນປະເທດ ຈຶ່ງເຫັນດີປັບປຸງກົດໝາຍວ່າດ້ວຍ ນາຍທະຫານກອງທັບປະຊາຊົນລາວ ເພື່ອໃຫ້ເຮັດໃຫ້ກົດໝາຍມີເນື້ອຄົບຖ້ວນ, ຈະແຈ້ງ, ຮັດກຸມ, ສາມາດຈັດຕັ້ງປະຕິບັດໄດ້ ແລະ ສອດຄ່ອງກັບການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ. ຈາກນັ້ນຜູ້ແທນກອງປະຊຸມ ໄດ້ປະກອບຄໍາຄິດເຫັນ ຢ່າງມີສີສັນ, ເລິກເຊິ່ງ, ກວ້າງຂວາງ ເພື່ອເຮັດໃຫ້ເນື້ອໃນຮ່າງກົດໝາຍສະບັບດັ່ງກ່າວ ສໍາເລັດໂດຍພື້ນຖານ. ໂດຍ: ຮອ ນາງ ລີ ທະວີພອນ

news to day and hot news