ວັນພຸດ, ວັນທີ 04 ທັນວາ 2024
ປະຫວັດສາດແຫ່ງການຕໍ່ສູ້ຂອງປະຊາຊົນ ລາວ-ຫວຽດນາມ ຕ້ານລັດທິລ່າເມືອງຂຶ້ນແບບໃໝ່ ( ປີ 1955-1975)
ເວລາອອກຂ່າວ: 2022-08-30 09:52:11 | ຜູ້ຂຽນ : admin3 | ຈຳນວນຄົນເຂົ້າຊົມ: 726 | ຄວາມນິຍົມ: 
ໂດຍຍຶດໝັ້ນສາຍພົວພັນ,
ຄວາມສາມັກຄີການຊ່ວຍເຫຼືອເຊິ່ງກັນ ແລະ ກັນ ລະຫວ່າງ ລາວ-ຫວຽດນາມ ໄດ້ຂະຫຍາຍຕົວຂຶ້ນສູ່ລະດັບສູງສຸດ, ການຮ່ວມສຳພັນສູ້ຮົບຍຸດທະສາດ ຕ້ານກັບພວກຈັກກະພັດອາເມຣິກາ ໄດ້ກາຍເປັນແບບຢ່າງທີ່ຫາຍາກ ກ່ຽວກັບຄວາມສາມັກຄີສູ້ຮົບ ສະໜັບສະໜູນຊ່ວຍເຫຼືອກັນໃນທຸກດ້ານ, ດ້ວຍຄວາມບໍລິສຸດຜຸດຜ່ອງ ຕໍ່ສາຍພົວພັນມິດຕະພາບທີ່ເປັນມູນເຊື້ອ, ຊື່ສັດບໍລິສຸດຕໍ່ລັດທິສາກົນຂອງຊົນຊັ້ນກຳມະກອນ, ພັກ ແລະ ປະຊາຊົນ ຫວຽດນາມ ໄດ້ໃຫ້ການຊ່ວຍເຫຼືອ, ອູ້ມຊູທັງດ້ານວັດຖຸ ແລະ ຈິດໃຈ ແກ່ຂະບວນການຕໍ່ສູ້ຂອງປະຊາຊົນລາວ. ນອກນີ້, ພັກ ແລະ ປະຊາຊົນລາວ ໄດ້ສ້າງທຸກເງື່ອນໄຂສະ ດວກ, ສະໜັບສະໜູນຢ່າງໝົດຈິດໝົດໃຈ ແລະ ຊ່ວຍເຫຼືອຫວຽດນາມ ຢ່າງຈິງໃຈ ໃນພາ ລະກິດປົດປ່ອຍພາກໃຕ້ຫວຽດ ນາມ ເພື່ອປະເທດຊາດເປັນເອກະພາບ, ທັງສອງປະເທດສືບຕໍ່ດຳ ເນີນການຕໍ່ສູ້ກູ້ຊາດຕ້ານຈັກກະ ພັດອາເມຣິກາ, ໂດຍເສີມຂະ ຫຍາຍມູນເຊື້ອຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ "ເຂົ້າເມັດຫັກ ຜັກເສັ້ນດຽວກໍແບ່ງປັນກັນກິນ "ສອງຊາດລາວ ແລະ ຫວຽດນາມ ໄດ້ຮັດແໜ້ນ ແລະ ສົມທົບກັນສູ້ຮົບທັບມ້າງຍຸດທະສາດສົງຄາມພິເສດ ຂອງຈັກກະພັດ ໃຫ້ປະລາໄຊລົງຢ່າງເຈັບແສບໃນຫຼາຍບັ້ນຮົບ ຢູ່ ລາວ ແລະ ຫວຽດນາມ.
ໃນປີ 1959-1960, ບັນດາຜູ້ນຳຂອງສອງພັກ (ພັກແຮງງານຫວຽດນາມ ແລະ ພັກປະ ຊາຊົນລາວ) ໄດ້ພົບປະ, ປຶກສາຫາລືກັນ ແລະ ເປັນເອກະພາບກັນທາງດ້ານຍຸດທະສາດ, ຍຸດ ໂທບາຍ ແລະ ວິທີປະຕິບັດເພື່ອຕີເອົາຊະນະຈັກກະພັດອາເມຣິກາ. ໃນໄລຍະນີ້, ກອງທັບ ແລະ ປະຊາຊົນຫວຽດນາມ ມີຄວາມຈຳເປັນທີ່ສຸດ ຕ້ອງມີເສັ້ນທາງ ຜ່ານດິນແດນຂອງລາວ ລົງໄປສູ່ພາກໃຕ້ຫວຽດນາມ, ໂດຍຕອບ ສະໜອງຄວາມຮຽກຮ້ອງຕ້ອງ ການອັນຈຳເປັນຂອງຝ່າຍຫວຽດ
ນາມ, ສູນກາງພັກປະຊາຊົນປະຕິວັດລາວ ໂດຍ ປະທານ ໄກ ສອນ ພົມວິຫານ ເປັນຜູ້ນຳໜ້າໄດ້ຕອບສະໜອງ ບົນຈິດໃຈສາມັກຄີອັນສະໜິດສະໜົມ, ປະທານ ໄກສອນ ພົມວິຫານ ໄດ້ກ່າວວ່າ “ຊາຕະກຳຂອງສອງປະເທດພວກເຮົາໄດ້ສະໜິດຕິດພັນກັນຢ່າງແໜ້ນແຟ້ນ, ປະຊາຊົນລາວຈະເຮັດສຸດຄວາມສາມາດຂອງຕົນ ເພື່ອປະກອບສ່ວນເຂົ້າ ໃນໄຊຊະນະຂອງປະຊາຊົນຫວຽດນາມອ້າຍນ້ອງ”. ດັ່ງນັ້ນ, ໃນພຶດຕິກຳຕົວຈິງແລ້ວ ເສັ້ນທາງໂຮ່ຈີມິນ ໄດ້ຕິດພັນສະໜິດແໜ້ນຂອງຄວາມສາມັກຄີຮ່ວມສຳພັນສູ້ຮົບແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ເຊິ່ງການຮ່ວມສຳ ພັນສູ້ຮົບຢູ່ໃນຫຼາຍບັ້ນຮົບ ແລະ ໃນຫຼາຍສະໜາມຮົບຢູ່ລາວ ເປັນຕົ້ນ: ບັ້ນຮົບປົດປ່ອຍ ແຂວງຫົວພັນ, ບັ້ນຮົບປົດປ່ອຍທົ່ງໄຫຫີນ, ບັ້ນຮົບປົດປ່ອຍຫຼວງນ້ຳທາ... ແຕ່ລະບັ້ນຮົບລ້ວນແຕ່ໄດ້ຮັບໄຊຊະນະອັນຍິ່ງໃຫຍ່ໃນການຕໍ່ສູ້ທັບມ້າງສົງຄາມພິເສດຂອງພວກຈັກກະພັດອາເມຣິກາ ແລະ ລູກມືໃຫ້ປະລາໄຊ, ຍ້ອນຖືກປະລາໄຊໜັກຢ່າງຕໍ່ເນື່ອງໃນທຸກສະໜາມຮົບຈັກກະພັດອາເມຣິກາ ແລະ ລູກມື ຈຳຕ້ອງຍອມເຊັນສັນຍາເຊີແນວ ໃນວັນທີ 23 ກໍລະກົດ 1962 ກ່ຽວກັບລາວ, ຍອມຮັບຮູ້ຄວາມເປັນເອກະລາດ, ເປັນກາງ, ເອກະພາບ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ, ຮັບຮູ້ລັດຖະບານປະສົມ 3 ຝ່າຍ ທີ່ໄດ້ຮັບການສ້າງຕັ້ງຂຶ້ນໃນວັນທີ 12 ມິຖຸນາ 1962. ສັນຍາເຊີແນວ ປີ 1962 ກ່ຽວກັບລາວ ເປັນໄຊຊະນະທາງດ້ານການທະຫານ, ການເມືອງ ແລະ ການຕ່າງປະເທດ ເປັນຂີດໝາຍແຫ່ງການຂະຫຍາຍຕົວໃໝ່ ທີ່ມີລັກສະນະກະໂດດຂຶ້ນຂອງກຳລັງປະຕິວັດ. ການເຊັນສັນຍາເຊີແນວ ປີ 1962 ກ່ຽວກັບລາວ ຍັງແມ່ນໄຊຊະນະແຫ່ງຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ (ອ່ານຕໍ່ສະບັບໜ້າ)
ລະຫວ່າງປະຊາຊົນ ລາວ-ຫວຽດນາມ ອ້າຍນ້ອງ, ແມ່ນການປະສານສົມທົບສູ້ຮົບຢ່າງແໜ້ນແຟ້ນ ລະຫວ່າງ ກອງທັບປະຊາຊົນລາວກັບກອງ ທັບປະຊາຊົນຫວຽດນາມ ໃນສະໜາມຮົບຕ້ານສັດຕູໂຕດຽວກັນ, ແມ່ນການສະໜັບສະໜູນຂອງບັນດາປະເທດສັງຄົມນິຍົມອ້າຍນ້ອງ ແລະ ບັນດາປະເທດເພື່ອນມິດ ກໍຄືປະເທດທີ່ຮັກຫອມສັນຕິພາບ ແລະ ຄວາມກ້າວໜ້າໃນໂລກ. ເຫດການປະຫວັດສາດອັນໜຶ່ງທີ່ມີຄວາມໝາຍສຳຄັນ ໃນວັນທີ 5 ກັນຍາ 1962 ລັດ ຖະບານ ສາທາລະນະລັດ ປະຊາ ທິປະໄຕ ຫວຽດນາມ ແລະ ລັດ ຖະບານລາຊະອານາຈັກລາວ (ລັດຖະບານປະສົມ 3 ຝ່າຍ) ໄດ້ສ້າງສາຍພົວພັນການທູດນຳກັນຢ່າງເປັນທາງການ. ເຫດການດັ່ງກ່າວນີ້ ມີຄວາມໝາຍສຳຄັນທາງປະຫວັດສາດ ຂອງສອງຊາດ ລາວ-ຫວຽດນາມ, ໃນດ້ານໜຶ່ງແມ່ນເຮັດໃຫ້ລັດຖະບານລາຊະອານາຈັກລາວ ຕ້ອງຕັດຄວາມສຳພັນການທູດກັບອຳນາດຫຸ່ນໄຊງ່ອນ, ໄປພ້ອມດຽວກັນນັ້ນ, ຫວຽດນາມ ກໍມີປະເທດລາວ ເປັນປະເທດໃກ້ຄຽງທີ່ມີສັນຕິພາບ, ເປັນກາງ ຢູ່ເບື້ອງຕາເວັນຕົກຂອງຕົນ ເປັນເທື່ອທຳອິດທີ່ຊາວໂລກຮັບຮູ້ນຳ, ດິນແດນເຄິ່ງໜຶ່ງເປັນຖານທີ່ໝັ້ນຂອງການປະຕິວັດລາວ.
ໄລຍະປີ 1964-1968, ຈັກກະພັດອາເມຣິກາ ໄດ້ເພີ່ມທະວີສົງຄາມຮຸກຮານຢູ່ລາວ ແລະ ພາກໃຕ້ຫວຽດນາມ, ໂດຍສະເພາະພວກຈັກກະພັດອາເມຣິກາ ໄດ້ນຳໃຊ້ກອງທັບອາກາດຂອງພວກເຂົາໃຊ້ເຮືອບິນ ຖິ້ມລະເບີດໃສ່ເຂດປົດປ່ອຍ ແລະ ໃຊ້ກຳລັງທະຫານຫຸ່ນເປີດບັ້ນບຸກໂຈມຕີບຽດຢຶດເຂົ້າເຂດປົດປ່ອຍດ້ວຍການປະສົມປະສານກັນຢ່າງໜັກແໜ້ນ ແລະ ມີຄວາມໝາຍຍຸດທະສາດ ຢູ່ໃນຂະໜາມຮົບລະຫວ່າງລາວ ແລະ ຫວຽດນາມ, ໃນປີ 1968 ຢູ່ ພາກໃຕ້ຫວຽດນາມ ກອງທັບ ແລະ ປະຊາຊົນຫວຽດນາມ ໄດ້ລຸກຂຶ້ນຕໍ່ສູ້ສົງຄາມພາກສ່ວນຂອງຈັກກະພັດອາເມຣິກາ ໃຫ້ພັງທະລາຍລົງ, ໃນໄລຍະດຽວກັນນັ້ນ ກອງທັບ ແລະ ປະຊາຊົນລາວ ໄດ້ເປີດບັ້ນຮົບປົດປ່ອຍນ້ຳບາກ ແຂວງຫຼວງພະບາງ, ບັ້ນຮົບປົດປ່ອຍຜາຖີ່ (ແຂວງຫົວພັນ) ບຸກຕີສັດຕູໃຫ້ປະລາໄຊຢ່າງເຈັບແສບ, ອັນນັ້ນ ແມ່ນການສົມທົບຢ່າງແໜ້ນແຟ້ນລະຫວ່າງສອງສະໜາມຮົບຂອງ ລາວ-ຫວຽດນາມ ໄດ້ໂມ່ງບາດຄ້ອນອັນໜັກໃສ່ສັດຕູໂຕດຽວກັນ, ເຮັດໃຫ້ຍຸດທະສາດສົງຄາມພິເສດຂອງ ໂຢນເຊີນຖືກພັງທະລາຍ.
ໄລຍະປີ 1969-1973 ກອງທັບ ແລະ ປະຊາຊົນລາວ ພ້ອມກັບກອງທັບ ແລະ ປະຊາຊົນຫວຽດ ນາມ ໄດ້ສາມັກຄີຄຽງບ່າຄຽງໄຫຼ່ກັນ ຕໍ່ສູ້ຕີເອົາຊະນະສົງຄາມພິເສດເພີ່ມທະວີຂອງຈັກກະພັດອາເມຣິກາ. ປີ 1969 ນິກເຊີນຂຶ້ນເປັນປະທານທິບໍດີສະຫະລັດອາເມຣິກາ, ຕໍ່ກັບລາວ ພວກເຂົາໄດ້ເຮັດໃຫ້ສົງຄາມເປັນສົງຄາມພິເສດ ເພີ່ມທະວີຫຼາຍກຳລັງເຂົ້າຮ່ວມຂອງກອງທັບອາກາດອາເມຣິກາ, ຂອງກອງທະຫານໄທເລວຮັບຈ້າງ ແລະ ທະຫານຫຸ່ນໄຊງ່ອນ, ພ້ອມກັນນັ້ນ ກໍ່ເປີດກວ້າງສົງຄາມອອກໄປທົ່ວອິນດູຈີນ. ດ້ວຍການນຳພາຂອງພັກ ແລະ ດ້ວຍຈິດໃຈປະຕິວັດອັນສູງສົ່ງຂອງ ກອງທັບປະຊາຊົນລາວ ແລະ ດ້ວຍຄວາມສາມັກຄີຮ່ວມສຳພັນສູ້ຮົບອັນສະໜິດແໜ້ນຂອງສອງພັກ, ສອງກອງທັບ ແລະ ປະຊາຊົນສອງປະເທດ ລາວ-ຫວຽດນາມ ໄດ້ພ້ອມກັນຄຽງບ່າຄຽງໄຫຼ່ກັນຕໍ່ສູ້ຢ່າງເດັດດ່ຽວພິລະອາດຫານໃນຫຼາຍບັ້ນຮົບ ອັນພົ້ນເດັ່ນແມ່ນ ບັ້ນຮົບລາມເຊີນ 719 (ທາງເລກ 9) ແຂວງສະຫວັນນະເຂດ ໃນປີ 1971 ໄຊຊະນະຂອງບັ້ນຮົບລາມເຊີນ 719 ເປັນມະຫາໄຊ
ຊະນະທີ່ບໍ່ເຄີຍມີມາກ່ອນ, ເປັນການຕີເອົາຊະນະກັບທິດສະດີນິກເຊີນ ແລະ ຕີເອົາຊະນະກຳລັງສູ້ຮົບຍຸດທະສາດ ຂອງຈັກກະພັດອາເມຣິກາ, ສ້າງໄດ້ທ່ວງທ່າອັນໃໝ່ໃຫ້ແກ່ການປະຕິວັດລາວ ແລະ ການປະຕິວັດຫວຽດນາມ ກ້າວຂຶ້ນຍາດເອົາໄຊຊະນະອັນໃຫຍ່ຫຼວງ.
ໃນຊຸມປີ 1971-1972 ກອງ ທັບ ແລະ ປະຊາຊົນລາວ ປະສານສົມທົບກັບກອງທະຫານອາສາສະໝັກຫວຽດນາມ ໄດ້ເປີດບັ້ນຮົບບຸກໂຈມຕີຢ່າງຕໍ່ເນື່ອງໃນຫຼາຍບັ້ນຮົບຍຸດທະສາດສຳຄັນເຊັ່ນ: ບັ້ນຮົບປົດປ່ອຍທົ່ງໄຫຫີນ-ຊຽງຂວາງ, ທົ່ງໄຫຫີນ-ລ້ອງແຈ້ງ... ໃນທຸກສະໜາມຮົບລ້ວນແຕ່ໄດ້ສ້າງທ່າແຮງ ແລະ ກຳລັງໜູນໜີບບັງຄັບໃຫ້ຝ່າຍວຽງຈັນຕ້ອງຍອມເຊັນສັນຍາ ປະຕິບັດຄວາມຖືກຕ້ອງປອງດອງ ແລະ ຄວາມເປັນເອກະພາບຂອງຊາດ ຄັ້ງທີ III ໃນວັນທີ 21 ກຸມພາ ປີ 1973, ສ້າງເງື່ອນໄຂອັນສະ ດວກໃຫ້ການປັບປຸງ ແລະ ກໍ່ສ້າງກຳລັງປະຕິວັດໃນທຸກດ້ານໄດ້ເຮັດໃຫ້ມີການຫັນປ່ຽນທີ່ເປັນຜົນດີ ໃຫ້ແກ່ການປະຕິວັດທັງສາມປະເທດ ອິນດູຈີນ, ວັນທີ 17 ເມສາ 1975 ກອງທັບ ແລະ ປະຊາຊົນກຳປູເຈຍ ຕີປົດປ່ອຍພະນົມເປັນ ແລະ ທົ່ວປະເທດຢ່າງສົມບູນ, ວັນທີ 30 ເມສາ 1975 ກອງທັບ ແລະ ປະຊາຊົນພາກໃຕ້ຫວຽດນາມ ບຸກຕີເຂົ້າປົດປ່ອຍໄຊງ່ອນ ແລະ ທົ່ວພາກໃຕ້ຫວຽດນາມ ໄດ້ຮັບໄຊຊະນະຢ່າງສົມບູນ ເຊິ່ງໄດ້ທ້ອນໂຮມປະເທດຫວຽດນາມ ເປັນເອກະພາບອັນຫນຶ່ງອັນດຽວ; ໄຊຊະນະຂອງສອງປະເທດອ້າຍນ້ອງດັ່ງກ່າວ ໄດ້ສ້າງໂອກາດພັນປີມີເທື່ອໜຶ່ງ ພັກປະຊາຊົນປະຕິວັດລາວ ໄດ້ນຳພາປະຊາຊົນລາວບັນດາເຜົ່າລຸກຮື້ຂຶ້ນຢຶດອຳນາດການປົກຄອງ ດ້ວຍ 3 ບາດຄ້ອນຍຸດທະສາດ ໄດ້ຮັບໄຊຊະນະຢ່າງສົມບູນ ໃນຂອບເຂດທົ່ວປະເທດ ແລະ ສະຖາປະນາເປັນ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975, ໄຊຊະນະອັນຍິ່ງໃຫຍ່ ຂອງການປະຕິວັດລາວດັ່ງກ່າວນັ້ນ ບັນຫາຫນຶ່ງທີ່ສຳຄັນແມ່ນໄຊຊະນະຂອງການສຳພັນຮ່ວມຮົບ ລະຫວ່າງ ປະຊາຊົນລາວ, ປະຊາຊົນຫວຽດນາມ ທີ່ໄດ້ຄຽງບ່າຄຽງໄຫຼ່ກັນຕ້ານສັດຕູໂຕດຽວກັນ ຕະຫຼອດໄລຍະ 45 ປີຜ່ານມາ,
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
