POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນສຸກ, ວັນທີ 06 ທັນວາ 2024

26 ປີ ແຫ່ງການກຳເນີດເຕີບໃຫຍ່ຂະຫຍາຍຕົວ ແລະ ສູ້ຮົບມີໄຊຂອງກອງພັນໃຫຍ່ຕີພິເສດ 497
ເວລາອອກຂ່າວ: 2023-07-18 08:35:00 | ຜູ້ຂຽນ : admin1 | ຈຳນວນຄົນເຂົ້າຊົມ: 5501 | ຄວາມນິຍົມ:

ກ່ອນໜ້ານີ້ 26 ປີ, ພາຍຫຼັງປະເທດຊາດໄດ້ຮັບການປົດປ່ອຍ, ການປະຕິວັດໄດ້ກ້າວເຂົ້າສູ່ໄລຍະໃໝ່ ເຊິ່ງແມ່ນໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ດັ່ງນັ້ນ, ເພື່ອຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ກໍຄືການປັບປຸງກໍ່ສ້າງກອງທັບປະຕິວັດໃຫ້ເຕີບໃຫຍ່ເຂັ້ມແຂງໜັກແໜ້ນ, ກະຊວງປ້ອງກັນປະເທດ ຈຶ່ງໄດ້ເຕົ້າໂຮມເອົາບັນດາກອງພັນຕີພິເສດຄື: ກອງພັນ 423, ກອງພັນ 424 ແລະ ກອງພັນ 428 ມາປະກາດສ້າງຕັ້ງເປັນກອງພັນໃຫຍ່ຕີພິເສດ 497 ໃນວັນທີ 16 ກໍລະກົດ 1997 ຢ່າງເປັນທາງການ, ຄະນະບັນຊາກອງພັນໃຫຍ່ຮຸ່ນທຳອິດປະກອບມີ ສະຫາຍ ພັນຕີ ສົມພອນ ໄມບຸນ ເປັນຫົວໜ້າການທະຫານ, ສະຫາຍ ພັນຕີ ໂສນີ ອຸດົມສັກ ເປັນຫົວໜ້າການເມືອງ, ສະຫາຍ ພັນຕີ ສົມທອນ ວົງພະຈັນ ເປັນຮອງຫົວໜ້າການທະຫານ, ສະຫາຍ ພັນຕີ ຈັນທີ ທຳມະສິນ ເປັນຮອງຫົວໜ້າການເມືອງ ແລະ ສະຫາຍ ຮ້ອຍເອກ ບຸນເຈີ ຄຳມະວົງ ເປັນຫົວໜ້າພະລາທິການ, ໂຄງປະກອບການຈັດຕັ້ງປະກອບມີ: 3 ກອງພັນ, 5 ພະແນກການ, 1 ກອງຮ້ອຍກຳລັງໄຟແບກຫາບທີ່ຂຶ້ນກັບ, ມີພາລະບົດບາດໃນການປັບປຸງກໍ່ສ້າງກຳລັງ, ກໍ່ສ້າງພະນັກງານ-ນັກຮົບ ໃຫ້ມີຄວາມໜັກແໜ້ນທາງດ້ານການເມືອງແນວຄິດ, ເຂັ້ມແຂງທາງດ້ານການຈັດຕັ້ງ, ເປັນກຳລັງກຽມພ້ອມສູ້ຮົບ ເຄື່ອນໄຫວຈຸດໜັກໃນຂອບເຂດທົ່ວປະເທດ ຕາມຄຳສັ່ງຂອງກະຊວງປ້ອງກັນປະເທດໂດຍກົງ. ການສ້າງຕັ້ງກອງພັນໃຫຍ່ 497 ແມ່ນເຫດການປະຫວັດສາດທີ່ສຳຄັນຂອງກອງທັບປະຊາຊົນລາວ, ໂດຍຈຸດພິເສດຂອງກອງພັນໃຫຍ່ 497 ເປັນເຫຼົ່າຮົບ ຕີພິເສດ ການປະກອບແບບກະທັດຮັດເບົາບາງແຕກຕ່າງຈາກເຫຼົ່າຮົບອື່ນ, ວິທີຕີແມ່ນເອົານ້ອຍຕີຫຼາຍ, ເອົາຄຸນນະພາບຊະນະປະລິມານ, ຕີຖືກເປົ້າໝາຍຈຸດໜັກ, ຕີໄວດັບສູນກ້ຽງ ປະສານສົມທົບແໜ້ນກັບ 5 ຫຼັກການຄື: ຕີນຮອດ, ມືເຖິງ, ຫູຟັງ, ດັງດົມ, ຕາເຫັນ ແລະ ໄດ້ສຳຜັດກັບຕົວຈິງ. ນັບແຕ່ມື້ໄດ້ຮັບການສ້າງຕັ້ງຂຶ້ນມາເຖິງປັດຈຸບັນ ໄດ້ມີການສັບຊ້ອນການຈັດຕັ້ງສືບທອດປ່ຽນແທນຄະນະພັກ-ຄະນະບັນຊາແຕ່ລະຮຸ່ນຢ່າງຕໍ່ເນື່ອງ ເພື່ອຮັບປະກັນໃຫ້ແກ່ການເຄື່ອນໄຫວເຮັດສຳເລັດໜ້າທີ່ການເມືອງຂອງພັກໃນໄລຍະໃໝ່, ໂດຍສືບທອດມູນເຊື້ອອັນດີງາມຂອງກົມ ກອງໃນຕະຫຼອດໄລຍະ 25 ປີຜ່ານມາ, ພາຍໃຕ້ການນຳພາຂອງພັກ ກໍຄືຄະນະກະຊວງປ້ອງກັນປະເທດ ຄະນະພັກ-ຄະນະບັນຊາ ແລະ ພະນັກງານ-ນັກຮົບແຕ່ລະຮຸ່ນ ສາມາດເຮັດສຳເລັດໜ້າທີ່ການເມືອງຂອງກົມກອງດ້ວຍດີຕະຫຼອດມາ. ໃນເມື່ອກ່ອນກົມກອງຕີພິ ເສດເປັນພຽງໝວດ, ກອງຮ້ອຍ, ກອງພັນທີ່ກະແຈກກະຈາຍຢູ່ໃນຂອບເຂດທົ່ວປະເທດ, ໃນໄລຍະຕໍ່ສູ້ກູ້ຊາດ ບັນດາກົມກອງເຫຼົ່າຮົບຕີພິເສດເຫຼົ່ານັ້ນ ໄດ້ມີມູນເຊື້ອອັນອົງອາດກ້າຫານໃນການເຄື່ອນໄຫວດັບສູນສັດຕູຄຽງບ່າຄຽງໄຫຼ່ຮ່ວມກັບບັນດາກົມກອງເຫຼົ່າຮົບອື່ນ, ເປັນຕົ້ນແມ່ນໄດ້ເຂົ້າຮ່ວມບັ້ນຫຼອນຕີໜອງຄ້າງປີ 1967, ບັ້ນຫຼອນຕີເດີ່ນບິນຫຼວງພະບາງປີ 1971, ບັ້ນຫຼອນຕີທ່າລາດ, ພູເຂົາຄວາຍ, ເມືອງເກົ່າ, ທ່າບົກ, ປາກຊັນ, ບັ້ນຕີພູວຽງ, ພູລານ, ດົງເຫັນເຊໂນ ແຂວງສະຫວັນນະເຂດ, ບັ້ນຕີພູບາຈຽງ, ນໍ້າພາກ ແຂວງຈຳປາກສັກ, ບັ້ນຫຼອນຕີໝາກ ກອງກຳລັງຕັນ ແຂວງອັດຕະປື ປີ 1971-1972, ອັນພົ້ນເດັ່ນແມ່ນໄດ້ເຂົ້າຮ່ວມບັ້ນຮົບປົດປ່ອຍຜາຖີ່ແຂວງຫົວພັນ ປີ 1968 ແລະ ບັ້ນຮົບສຳຄັນອື່ນໆອີກ. ໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ກົມກອງເຫຼົ່າຮົບຕີພິເສດ ກໍໄດ້ສືບຕໍ່ເຄື່ອນໄຫວສູ້ຮົບຕີສັດຕູ ເປັນຕົ້ນແມ່ນບັ້ນກວາດລ້າງຕີພວກປຸ້ນຢູ່ໜອງແປນ-ຜາຮຸງ-ຜາມົນ ເຂດຊຽງຮ່ອນ ເມືອງຫົງສາປີ 1980-1983, ພິເສດແມ່ນບັ້ນຫຼອນຕີການບຽດຍຶດຂອງທະຫານໄທຢູ່ 3 ໝູ່ບ້ານ ເມືອງທົ່ງ ແຂວງໄຊຍະບູລີປີ 1984 ສາມາດປັດເຂ່ຍສັດຕູອອກຈາກວົງສູ້ຮົບໄດ້ 119 ຄົນ, ດັບສູນກັບທີ່ 79 ຄົນ ແລະ ທຳລາຍອາວຸດສົງຄາມຈຳນວນໜຶ່ງ ຈາກນັ້ນ, ກໍໄດ້ ສືບຕໍ່ເຄື່ອນໄຫວບັ້ນກວາດລ້າງພວກປຸ້ນຢູ່ຜາຫຼັງ-ຜາແດງ, ລອງເຢັນ-ລອງຈານ, ກິ່ວເງິນ-ຖໍ້າອົງ ເຂດກາສີ-ວັງວຽງປີ 1985-1986, ວັນທີ 24 ພຶດສະພາ 1987 ກອງພັນຕີພິເສດ 424 ໄດ້ນຳໃຊ້ກຳລັງ 23 ສະຫາຍ, ສົບທົບກັບກອງຮ້ອຍ 415 ປິດລັບຫຼອນຕີພວກພັດຖິ່ນລາວຢູ່ພູປ່າຫວານ (ປະເທດໄທ), ເຂົ້າຮ່ວມບັ້ນຮົບ ບໍ່ແຕນ ແຂວງໄຊຍະບູລີ ປີ 1987-1988, ບັ້ນກວາດລ້າງພວກປຸ້ນຢູ່ເມືອງໝອກ ເຂດພິເສດ ໄຊສົມບູນປີ 1991-1992, ບັ້ນກວາດລ້າງພວກປຸ້ນຢູ່ຍອດຫ້ວຍປາຊີວ, ນໍ້າເຕົ້າສາມແສນ, ຍອດຫ້ວຍນໍ້າແຈ ເຂດພິເສດໄຊສົມບູນ ປີ 1995-1996 ແລະ ບັນຫຼອນຕີ-ບັ້ນຮົບອື່ນໆຢ່າງພິລະອາດຫານ ແລະ ຍາດໄດ້ໄຊຊະນະເປັນກ້າວໆມາ. ໃນປີ 2001 ກົມໃຫຍ່ເສນາທິການກອງທັບ ໄດ້ມອບໝາຍໃຫ້ກອງພັນໃຫຍ່ 497 ອອກເຄື່ອນໄຫວປ້ອງກັນກອງປະຊຸມສຸດຍອດອາຊຽນ ຄັ້ງທີ 10 ຢູ່ນະຄອນ ຫຼວງວຽງຈັນ, ປີ 2003 ກົມກອງໄດ້ອອກເຄື່ອນໄຫວກວາດລ້າງຕີພວກປຸ້ນຢູ່ບໍລິເວນເຂດນ້ຳຊັງ, ນ້ຳປວນ, ຕາດແກ້ວ ສາມາດປັດເຂ່ຍສັດຕູອອກຈາກວົງສູ້ຮົບໄດ້ 300 ຄົນ, ຢຶດອາວຸດໄດ້ 6 ກະບອກ ແລະ ລູກປືນຄົກ 60 ລູກ ໃນປີດຽວກັນນັ້ນ, ກອງພັນໃຫຍ່ 497 ກໍໄດ້ ຮັບຄຳສັ່ງໃຫ້ອອກເຄື່ອນໄຫວເຮັດໜ້າທີ່ສູ້ຮົບ ກໍ່ສ້າງຮາກຖານການເມືອງຢູ່ແຂວງຫົວພັນ ເຊິ່ງນຳໃຊ້ກຳລັງ 428 ບັນຊາໂດຍ ສະຫາຍ ພັນຕີ ຄຳສຸກ ໄຊມວນສິນ ແລະ ສະຫາຍ ຮ້ອຍເອກ ແພງແກ້ວ ແສງຄຳມີ ສາມາດດັບສູນສັດຕູໄດ້ 27 ຄົນ, ຍິງບາດເຈັບ 8 ຄົນ, ຈັບເປັນສະເລີຍເສິກ 16 ຄົນ ແລະ ຍຶດອາວຸດໄດ້ 16 ກະບອກ. ປີ 2004 ກອງພັນໃຫຍ່ 497 ໄດ້ຮັບໜ້າທີ່ໃຫ້ອອກເຄື່ອນໄຫວສູ້ຮົບຢູ່ເຂດຜາງູ ແຂວງໄຊສົມບູນ ແລະ ເຄື່ອນໄຫວແກ້ໄຂພວກປຸ້ນ, ພວກພັດຖິ່ນລາວ ແລະ ກຸ່ມຄົນບໍ່ດີທີ່ລີ້ຊ່ອນ ແລະ ກໍ່ຄວາມບໍ່ຫງົບຢູ່ບາງບໍລິເວນຂອງປະເທດຊາດ. ນອກນັ້ນ, ຍັງໄດ້ເຂົ້າຮ່ວມປ້ອງກັນບັນດາວັນບຸນສຳຄັນຕ່າງໆຂອງພັກ, ຂອງຊາດ, ປ້ອງກັນການນຳພັກ-ລັດ, ແຂກທັງພາຍໃນ ແລະ ຕ່າງປະເທດທີ່ມາຢ້ຽມຢາມກົມກອງ ໃຫ້ມີຄວາມສະຫງົບປອດໄພ. ໄປຄຽງຄູ່ກັນນັ້ນ, ຄະນະພັກ-ຄະນະບັນຊາກອງພັນໃຫຍ່ 497 ແຕ່ລະລຸ້ນ, ຍັງໄດ້ຫັນເອົາກຳລັງ ລົງກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ, ເພື່ອແກ້ໄຂຊີວິດການເປັນຢູ່, ລົບລ້າງຄວາມທຸກຍາກຂອງປະຊາຊົນ, ໂດຍເຊື່ອມຊຶມກຳແໜ້ນຍຸດທະສາດ ການຫັນລົງກໍ່ສ້າງຮາກຖານການເມືອງ ແລະ ສືບທອດມູນເຊື້ອຂອງກອງທັບ, ຂອງກົມກອງ ບໍ່ວ່າໄລຍະໃດ ແລະ ຕັ້ງທັບຢູ່ບ່ອນໃດ ກອງພັນໃຫຍ່ 497 ກໍໄດ້ຖືສຳຄັນຕໍ່ວຽກງານກໍ່ສ້າງຮາກຖານການເມືອງ ເຊິ່ງໄດ້ຈັດຕັ້ງປະຕິບັດດ້ວຍຫຼາຍຮູບການຕົ້ນຕໍຄື: ຮູບການທາງກວ້າງ ແລະ ທາງເລິກ. ຜ່ານການຈັດຕັ້ງປະຕິບັດໃນການຫັນລົງກໍ່ສ້າງຮາກຖານການເມືອງໃນໄລຍະຜ່ານມາ, ໄດ້ປະກອບສ່ວນເຮັດໃຫ້ສະພາບຢູ່ທ້ອງຖິ່ນຮາກຖານມີຄວາມສະຫງົບ, ສັງຄົມມີຄວາມເປັນລະບຽບຮຽບຮ້ອຍ, ປະຊາ ຊົນໄດ້ຮັບຮູ້ເຊື່ອມຊຶມຕໍ່ແນວທາງຂອງພັກ-ລັດ, ການພັດທະນາເສດຖະກິດແກ້ໄຂຊີວິດການເປັນຢູ່ຂອງປະຊາຊົນນັບມື້ດີຂຶ້ນ, ໂດຍສະເພາະແມ່ນຢູ່ແຂວງໄຊສົມບູນ ເຊິ່ງເປັນເຂດທີ່ຫຍຸ້ງຍາກ, ທຸລະກັນດານ, ກຸ່ມຄົນບໍ່ດີຍັງເຄື່ອນໄຫວກໍ່ຄວາມບໍ່ສະຫງົບຢ່າງລຽນຕິດ ດັ່ງນັ້ນ, ກອງພັນໃຫຍ່ 497 ຈຶ່ງໄດ້ຮັບມອບໝາຍໃຫ້ ເຄື່ອນໄຫວກໍ່ສ້າງຮາກຖານຢູ່ຂອບເຂດດັ່ງກ່າວ, ມາຮອດປັດຈຸບັນໄດ້ມີຄວາມສະຫງົບໂດຍພື້ນຖານ, ຊີວິດການເປັນຢູ່ຂອງປະຊົນດີຂຶ້ນເທື່ອລະກ້າວ. ຕະຫຼອດໄລຍະ 26 ປີຜ່ານມາ, ນອກຈາກກອງພັນໃຫຍ່ 497 ໄດ້ເຮັດສຳເລັດໜ້າທີ່ການເມືອງຂອງກົມກອງຕາມການຈັດຕັ້ງຂັ້ນເທິງມອບໝາຍໃຫ້ແລ້ວ, ຄະນະພັກ-ຄະນະບັນຊາແຕ່ລະຮຸ່ນຍັງໄດ້ ເອົາໃຈໃສ່ປັບປຸງກໍ່ສ້າງກຳລັງໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ, ຖັນແຖວພະນັກງານ-ນັກຮົບໄດ້ຮັບການກໍ່ ສ້າງນັບມື້ເຕີບໃຫຍ່ຂະຫຍາຍຕົວ, ໄປພ້ອມໆກັນນັ້ນ ຍັງໄດ້ເອົາໃຈໃສ່ສ້າງພະລາທິການດ້ວຍການອອກແຮງເພີ່ມພູນຜະລິດຜົນ ຍົກສູງນໍ້າໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ໂດຍການສຸມໃສ່ປູກຝັງ-ລ້ຽງສັດ ເພື່ອແກ້ໄຂຊີວິດການເປັນຢູ່ຂອງພະນັກງານ-ນັກຮົບໃຫ້ດີຂຶ້ນເທື່ອລະກ້າວ, ມາຮອດປັດຈຸບັນກົມກອງ, ສຳນັກງານ, ຫ້ອງການ, ລະບົບສ້າງຄັງ ມີຄວາມແໜ້ນໜ້າຖາວອນ, ມີລະບົບໄຟຟ້າ, ນ້ຳປະປາ, ຄ້າຍຄູມີຄວາມສະອາດຈົບງາມ ເຕັມໄປດ້ວຍສີສັນ ນັກຮົບວັດທະນະທຳ-ກົມກອງວັດທະນະທຳ. ຕໍ່ກັບຜົນງານ, ໄຊຊະນະ ແລະ ວິລະກໍາອັນລໍ້າເລີດ ທີ່ກອງພັນໃຫຍ່ 497 ຍາດມາໄດ້ຕະຫຼອດໄລຍະຜ່ານມາ, ພັກ-ລັດຖະບານ ແລະ ກະຊວງປ້ອງກັນປະເທດ ຈຶ່ງໄດ້ຍ້ອງຍໍສັນລະເສີນປະດັບຫຼຽນໄຊ, ຫຼຽນກາ, ໃບຍ້ອງຍໍປະເພດຕ່າງໆໃຫ້ກົມກອງລວມໝູ່ ແລະ ບຸກຄົນຫຼາຍລະດັບຄື: ປະດັບຫຼຽນໄຊ, ຫຼຽນກາປະເພດ ຕ່າງໆ 1.338 ໜ່ວຍ, ໃບຍ້ອງຍໍ 5.712 ໃບ, ເປັນກົມກອງວິລະຊົນ 2 ກົມກອງ, ບຸກຄົນເປັນວິລະຊົນແຫ່ງຊາດ 3 ສະຫາຍ ແລະ ນັກຮົບແຂ່ງຂັນ 12 ສະຫາຍ ຢ່າງສົມກຽດ.

news to day and hot news