ວັນອັງຄານ, ວັນທີ 03 ທັນວາ 2024
ກອງປະຊຸມປຶກສາຫາລືກ່ຽວກັບແບບໂຄງການກໍ່ສ້າງ ອະນຸສອນສະຖານກອງໄຊຈັກກະພັດ
ເວລາອອກຂ່າວ: 2023-08-25 16:04:43 | ຜູ້ຂຽນ : admin2 | ຈຳນວນຄົນເຂົ້າຊົມ: 1561 | ຄວາມນິຍົມ: 
ໃນວັນທີ 21 ສິງຫາ 2023 ນີ້, ກອງບັນຊາການທະຫານແຂວງຈຳປາສັກ ໄດ້ຈັດກອງປະຊຸມປືກສາຫາລືກ່ຽວກັບແບບໂຄງການກໍ່ສ້າງ ອະນຸສອນສະຖານກອງໄຊຈັກກະພັດ ທີ່ຕັ້ງຢູ່ຂອບເຂດບ້ານຝັ່ງແດງ ເມືອງໂພນທອງ ແຂວງຈຳປາສັກ. ໂດຍການເປັນປະທານຮ່ວມຂອງ ສະຫາຍ ພົນຈັດຕະວາ ວຽງໄຊ ສົມວິຈິດ ຫົວໜ້າກົມວິທະຍາສາດ-ປະຫວັດສາດການທະຫານ, ສະຫາຍ ພົນຈັດຕະວາ ຄຳມ່ວນ ເລື່ອງວັນຫຼ້າ ຮອງຫົວໜ້າຫ້ອງວ່າການ ກະຊວງປ້ອງກັນປະເທດ, ສະຫາຍ ພົນຈັດຕະວາ ສຸໄກ ພິມມະສານ ຫົວໜ້າການທະຫານ ກອງບັນຊາການທະຫານແຂວງຈຳປາສັກ, ມີຕາງໜ້າຈາກ ກົມກໍ່ສ້າງ-ຄຸ້ມຄອງຊັບສິນ ກົມໃຫຍ່ພະລາທິການກອງທັບ, ກົມໂຄສະນາອົບຮົມ ກົມໃຫຍ່ການເມືອງກອງທັບ, ມີຄະນະພັກ-ຄະນະບັນຊາ 5 ຫ້ອງກອງບັນຊາການທະຫານແຂວງ, ພະແນກຖະແຫຼ່ງຂ່າວ,ວັດທະນະທຳ ແລະ ທ່ອງທ່ຽວແຂວງ, ອຳນາດການປົກຄອງເມືອງໂພນທອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມໄດ້ເປີດຂຶ້ນ ແລະ ໄດ້ດໍາເນີນໄປຕາມວາລະ ຈາກນັ້ນ ສະຫາຍ ພັນໂທ ສຸກສັນ ຄ້າຍພົມ ຮອງຫົວໜ້າຫ້ອງການ ກົມວິທະຍາສາດ-ປະຫວັດສາດການທະຫານ ໄດ້ສະເໜີກ່ຽວກັບແຜນຜັງລວມແບບໂຄງການກໍ່ສ້າງອະນຸສອນສະຖານກອງໄຊຈັກກະພັດ ໃນນັ້ນປະກອບມີ: ປະຕູໂຂງທາງເຂົ້າ-ອອກ, ຫຼັກເສົາທຸງ, ເດີ່ນຈັດກິດຈະກຳ, ເດີ່ນພິທີການ, ອະນຸສອນສະຖານຮູບປັ້ນຫຼໍ່, ອາຄານຫໍມູນເຊື້ອ, ເຮືອນລາວ, ອາຄານສະໂມສອນແລະບ່ອນກິນເຂົ້າລວມ, ອາຄານຫ້ອງນໍ້າ, ເຮືອນພັກພະນັກງານ, ອ່າງເກັບນໍ້າສູງ ແລະ ອ່າງເກັບນໍ້າໃຕ້ດິນ, ບ່ອນຈອດລົດການນຳ ແລະ ແຂກທົ່ວໄປ, ກຳແພງດີນຈີ່, ຮົ້ວຕາໜ່າງເຫຼັກ ແລະ ເສົາຊີມັງສຳເລັດຮູບ. ພ້ອມດຽວກັນນັ້ນຜູ້ແທນແຕ່ລະພາກສ່ວນກໍໄດ້ປະກອບຄຳຄິດຄຳເຫັນຢ່າງກົງໄປກົງມາກ່ຽວກັບການອອກແບບໂຄງການກໍ່ສ້າງອະນຸສອນສະຖານກອງໄຊຈັກກະພັດ ເປັນຕົ້ນແມ່ນການອອກແບບເຮືອນພໍ່ແມ່ປະຊາຊົນທີ່ກອງໄຊຈັກກະພັດອາໃສຢູ່ໃນເມື່ອກ່ອນ, ອອກແບບຫໍມູນເຊື້ອ, ເຮືອນນອນ ແລະ ຫ້ອງນໍ້າຂອງພະນັກງານທີ່ປະຈຳການຢູ່, ອອກແບບຫ້ອງນໍ້າສາທາລະນະ, ອອກແບບປະຕູໂຂງ-ປ້ອມຍາມ, ອອກແບບຮູບປັ້ນຫຼໍ່, ສະຖານທີ່ອາຄານ ແລະ ສະຖານທີ່ຕ່າງໆ ເພື່ອປະກອບເຂົ້າໃນໂຄງການກໍ່ສ້າງອະນຸສອນສະຖານກອງໄຊຈັດກະພັດ ໃຫ້ຖືກຕ້ອງ, ເໝາະສົມ ແລະ ມີຜົນສຳເລັດຢ່າງຈົບງາມ.
ໂອກາດດຽວກັນນັ້ນຜູ້ແທນກອງປະຊຸມກໍ່ໄດ້ເດີນທາງລົງສໍາຫຼວດເບີ່ງພື້ນທີ່ຕົວຈິງ ເພື່ອໃຫ້ສະດວກ, ຖືກຕ້ອງ ແລະ ສອດຄ່ອງ ກັບສະພາບພູມີປະເທດຕົວຈີງ ໃນການຈັດວາງ ໂຄງການກໍ່ສ້າງ ອະນຸສອນສະຖານກອງໄຊຈັກກະພັດຕື່ມອີກ.
ຂ່າວ-ພາບ: ດາວົງ ບຸດຕະວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
