ວັນພະຫັດ, ວັນທີ 05 ທັນວາ 2024
ປະກາດບົ່ງຕົວແຕ່ງຕັ້ງກໍາມະການ ຄະນະບໍລິຫານງານພັກ ກົມໃຫຍ່ເສນາທິການກອງທັບ
ເວລາອອກຂ່າວ: 2023-08-31 15:35:07 | ຜູ້ຂຽນ : admin2 | ຈຳນວນຄົນເຂົ້າຊົມ: 967 | ຄວາມນິຍົມ: 
ພິທີປະກາດບົ່ງຕົວແຕ່ງຕັ້ງ-ປ່ຽນແທນ ກໍາມະການຄະນະບໍລິຫານງານພັກ ກົມໃຫຍ່ເສນາທິການກອງທັບ, ໄດ້ຈັດຂຶ້ນໃນວັນທີ 31 ສິງຫາ 2023 ນີ້, ໂດຍການເປັນປະທານຂອງ ສະຫາຍ ພົນໂທ ຄໍາລຽງ ອຸທະໄກສອນ ກໍາມະການສູນກາງພັກ, ຮອງລັດຖະມົນຕີ ກະຊວງປ້ອງກັນປະເທດ ເລຂາຄະນະພັກກົມໃຫຍ່, ຫົວໜ້າກົມໃຫຍ່ເສນາທິການກອງທັບ, ມີບັນດາສະຫາຍຄະນະປະຈໍາພັກ, ກໍາມະການຄະນະພັກ, ກົມຈັດຕັ້ງພັກ, ຄະນະກົມຫ້ອງການ ເຂົ້າຮ່ວມ.
ສະຫາຍ ພົນຈັດຕະວາ ແສງມະນີວອນ ຄໍາມະນີ ຫົວໜ້າກົມຈັດຕັ້ງພັກ, ກົມໃຫຍ່ການເມືອງກອງທັບ ໄດ້ຜ່ານມະຕິຕົກລົງຂອງ ຄະນະພັກກະຊວງປ້ອງກັນປະເທດ, ວ່າດ້ວຍການແຕ່ງຕັ້ງປ່ຽນແທນ ກໍາມະການຄະນະບໍລິຫານງານພັກ ກົມໃຫຍ່ເສນາທິການກອງທັບ, ອີງຕາມກົດລະບຽບຂອງພັກປະຊາຊົນປະຕິວັດລາວ ສະໄໝທີ XI ໝວດທີ II ມາດຕາ 13, ອິງຕາມໜັງສືສະເໜີ ຂອງກົມໃຫຍ່ການເມືອງກອງທັບ ຄະນະພັກກະຊວງປ້ອງກັນປະເທດ ຕົກລົງ: ແຕ່ງຕັ້ງ ສະຫາຍ ພົນຈັດຕະວາ ເພັດສະຫວ່າງ ຫຼ້າວົງຄໍາ ເປັນກໍາມະການຄະນະບໍລິຫານງານພັກ ກົມໃຫຍ່ເສນາທິການ, ສະຫາຍ ພົນຈັດຕະວາ ບຸນຕຽນ ໄຊຍໍາວົງທັນ ເປັນ ກໍາມະການຄະນະບໍລິຫານງານພັກ ກົມໃຫຍ່ເສນາທິການ, ສະຫາຍ ພັນເອກ ຈັນທາ ບຸນນະວົງ ເປັນ ກໍາມະການຄະນະບໍລິຫານງານພັກ ກົມໃຫຍ່ເສນາທິການກອງທັບ.
ໂອກາດນີ້, ສະຫາຍ ພົນໂທ ຄໍາລຽງ ອຸທະໄກສອນ ໄດ້ສະແດງຄວາມຍ້ອງຍໍຄວາມຊົມເຊີຍຕໍ່ຜົນງານທີ່ຜູ້ໄດ້ຮັບໜ້າທີ່ໃໝ່ຍາດມາໄດ້ໃນຕະຫຼອດໄລຍະຜ່ານມາ, ພ້ອມເນັ້ນໜັກໃຫ້ແຕ່ລະສະຫາຍ ຍົກສູງໜ້າທີ່ພາລະບົດບາດຄວາມຜິດຊອບຂອງຕົນ ຊີ້ນໍາ-ນໍາພາ ສຶກສາອົບຮົມການເມືອງ-ນໍາພາແນວຄິດ ນໍາເອົາບັນດາເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງພັກ ມະຕິກອງປະຊຸມກອງປະຊຸມໃຫຍ່ ຄັ້ງທີ V ຂອງຄະນະພັກກະຊວງປ້ອງກັນປະເທດ, ມະຕິກອງປະຊຸມໃຫຍ່ ຄັ້ງທີ VI ຂອງຄະນະພັກກົມໃຫຍ່ເສນາທິການ ເຜີຍແຜ່-ເຊື່ອມຊຶມໃຫ້ ສະມາຊິກພັກ ພະນັກງານ-ນັກຮົບ ກໍາແໜ້ນ ແລະ ເຂົ້າໃຈຢ່າງເລິກເຊິ່ງ, ສືບຕໍ່ຝຶກຝົນຫຼໍ່ຫຼອມຕົນເອງທາງດ້ານຄວາມຮູ້, ຄວາມສາມາດ, ຄຸນທາດການເມືອງຄຸນສົມບັດສິນທໍາປະຕິວັດ ແລະ ປັບປຸງແບບແຜນວິທີເຮັດວຽກບົນພື້ນຖານຫຼັກການລວມສູນປະຊາທິປະໄຕ ຕາມ 5 ຫຼັກການ 3 ທິດນໍາຂອງພັກ, ເສີມຂະຫຍາຍຄວາມສາມັກຄີພາຍໃນໃຫ້ເປັນປຶກແຜ່ນແໜ້ນໜາ ແລະ ເຊີດຊູຄວາມເປັນແບບຢ່າງນໍາໜ້າໃນການປະຕິບັດບັນດາຂໍ້ກໍານົດ, ກົດລະບຽບຕ່າງໆ ໃຫ້ເຂັ້ມງວດ, ເອົາໃຈໃສ່ປັບປຸງໜ່ວຍພັກພາຍໃນທົ່ວອົງການ-ກົມກອງໃຫ້ປອດໃສ ເຂັ້ມແຂງ ແລະ ໜັກແໜ້ນ ຢ່າງຕໍ່ເນື່ອງ.
ໂດຍ: ພຸດທະວອນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
