ວັນເສົາ, ວັນທີ 07 ທັນວາ 2024
ກອງບັນຊາການທະຫານ ນະຄອນຫຼວງວຽງຈັນ ຈັດພິທີມອບເງິນອຸດໜູນເສຍຊີວິດ
ເວລາອອກຂ່າວ: 2023-09-01 14:44:45 | ຜູ້ຂຽນ : admin2 | ຈຳນວນຄົນເຂົ້າຊົມ: 1880 | ຄວາມນິຍົມ: 
ໃນຕອນບ່າຍຂອງວັນທີ 31 ສິງຫາ 2023 ນີ້, ກອງບັນຊາການທະຫານນະຄອນຫຼວງວຽງຈັນ ໄດ້ຈັດພິທີມອບເງິນອຸດໜູນເສຍຊີວິດເທື່ອດຽວ ໃຫ້ພະນັກງານບຳນານເສຍອົງຄະ, ໂດຍການເປັນປະທານຂອງ ສະຫາຍ ພັນໂທ ບຸນຖົມ ໄຊສັງທອງ ຮອງຫົວໜ້າຫ້ອງການເມືອງ, ກອງບັນຊາການທະຫານນະຄອນຫຼວງວຽງຈັນ, ມີບັນດາພະແນກການ ແລະ ພະນັກງານວິຊາການທີ່ກ່ຽວຂ້ອງ ພ້ອມດ້ວຍຄອບຄົວຜູ້ທີ່ເສຍຊີວິດເຂົ້າຮ່ວມ.
ໃນໂອກາດດັ່ງກ່າວ, ສະຫາຍ ພັນໂທ ໂພໄຊ ແກ້ວມີໄຊ ຫົວໜ້າພະແນກປະກັນສັງຄົມ ກອງບັນຊາການທະຫານນະຄອນຫຼວງວຽງຈັນ ໄດ້ໃຫ້ຮູ້ວ່າ: ຜູ້ທີ່ໄດ້ຮັບເງິນອຸດໜູນເສຍຊີວິດເທື່ອດຽວໃນຄັ້ງນີ້ ມີຈຳນວນ ທັງໝົດ 30 ສະຫາຍ; ໃນນັ້ນ, ມີພະນັກງານບໍານານ ເສຍອົງຄະ 23 ສະຫາຍ, ຄູ່ສົມລົດ 04 ສະຫາຍ ແລະ ພະນັກງານປະຈໍາການ 03 ສະຫຍ, ສ່ວນເງິນທີ່ມອບແມ່ນລວມມີທັງໝົດ 2.118.110.415 ກີບ. ທັ້ງນີ້, ກໍເພື່ອເປັນການຈັດຕັ້ງປະຕິບັດຕາມກົດໝາຍ ວ່າດ້ວຍ ປະກັນສັງຄົມ ສະບັບເລກທີ 54/ສພຊ, ລົງວັນທີ 27/06/2018 (ສະບັບປັບປຸງ), ຄຳສັ່ງແນະນຳເພີ່ມເຕີ່ມຂອງກະຊວງປ້ອງກັນປະເທດ ສະບັບເລກທີ 390/ກປທ, ລົງວັນທີ 13/01/2021 ແລະ ແຈ້ງການຂອງກົມໃຫຍ່ການເມືອງກອງທັບ ສະບັບເລກທີ 4503/ກມທ ລົງວັນທີ 26/08/2021 ກ່ຽວກັບການປະກອບເອກະສານ ແລະ ການຈັດຕັ້ງປະຕິບັດ ກົດໝາຍວ່າດ້ວຍ ປະກັນສັງຄົມໃນກອງທັບປະຊາຊົນລາວ ໃຫ້ມີຄວາມຖືກຕ້ອງ ແລະ ສອດຄ່ອງກັບສະພາບຄວາມເປັນຈິງຕາມທີ່ຂັ້ນເທິງວາງອອກຢ່າງເຂັ້ມງວດ ແລະ ຍັງເປັນການປະຕິບັດນະໂຍບາຍຕໍ່ຜູ້ເສຍຊີວິດ ທີ່ມີຜົນງານດີເດັ່ນໃນການປະຕິບັດໜ້າທີ່ ປະກອບສ່ວນອັນສຳຄັນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດປະເທດຊາດ ໃນໄລຍະຜ່ານມາ ໃຫ້ມີຄວາມໝາຍຄວາມສຳຄັນ ແລະ ສົມກຽດ.
ພ້ອມກັນນັ້ນ, ສະຫາຍ ພັນໂທ ບຸນຖົມ ໄຊສັງທອງ ໄດ້ເນັ້ນໜັກໃຫ້ແຕ່ລະຄອບຄົວທີ່ມາຮັບເງິນອຸດໜູນເສຍຊີວິດໃນຄັ້ງນີ້, ຈົ່ງພ້ອມກັນນຳເອົາເງິນໄປໜູນໃຊ້ເຂົ້າໃນການພັດທະນາຄອບຄົວຂອງຕົນ ແບບມີຫົວຄິດປະດິດສ້າງຢ່າງຖືກຕ້ອງ ແລະ ໃຫ້ເກີດເປັນປະໂຫຍດອັນລໍ້າຄ່າທີ່ສຸດ ເພື່ອແນໃສ່ເຮັດໃຫ້ຄອບຄົວຂອງຕົນ ມີຊີວິດທີ່ດີໃນອະນາຄົດຕໍ່ໜ້າ ໃຫ້ເປັນຄອບຄົວທີ່ມີຄວາມສົມບູນພູນສຸກຕະຫຼອດໄປ.
ໂດຍ: ຮ້ອຍໂທ ແສງດາລາ ໄຊຍະລາດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
