ວັນສຸກ, ວັນທີ 16 ພຶດສະພາ 2025
ໂຮນລັງ ສະໜອງເຮືອບິນຮົບ F-16 ຊຸດທຳອິດ ໃຫ້ ອູແກຣນ
ເວລາອອກຂ່າວ: 2024-10-11 09:56:04 | ຜູ້ຂຽນ : admin3 | ຈຳນວນຄົນເຂົ້າຊົມ: 349 | ຄວາມນິຍົມ: 
ສຳນັກຂ່າວ ສະປຸດນິກ ປະຈຳມົດສະກູ ລາຍງານໃນວັນທີ 7 ຕຸລາ 2024 ນີ້, ໂດຍອ້າງແຫຼ່ງຂ່າວຈາກທ່ານ ຣູແບນ ເບຣເກວແມນ (Ruben Brekelmans) ລັດຖະມົນຕີກະຊວງປ້ອງກັນປະເທດໂຮນລັງ ກ່າວວ່າ: ໂຮນລັງ ໄດ້ສະໜອງເຮືອບິນຮົບ F-16 ຊຸດທຳອິດໃຫ້ແກ່ອູແກຣນ ຕາມທີ່ເຄີຍໃຫ້ຄຳໝັ້ນສັນຍາໃນປີ 2023.
ທ່ານ ຣູແບນ ຂຽນຂ່າວລົງ ໃນສື່ອອນລາຍ ພາຍຫຼັງໄປຢ້ຽມຢາມກີແອັບ ແລະ ເມືອງ ຄາຄັອບ (Kiev ແລະ Kharkov) ຂອງອູແກຣນ ວ່າ, ເປັນຄັ້ງທຳອິດ ທີ່ຂ້າພະເຈົ້າສາມາດປະກາດຢ່າງເປັນທາງການວ່າ: F-16s ຊຸດທຳອິດຂອງໂຮນລັງ ໄດ້ຖືກຈັດສົ່ງໄປໃຫ້ອູແກຣນແລ້ວ (ຕາມຂ່າວບໍ່ໄດ້ເປີດເຜີຍຈຳນວນ). ຕາມສັນຍາຈະສົ່ງໃຫ້ທັງໝົດ ແມ່ນ 24 ລຳ.
ກ່ອນໜ້ານີ້ມີລາຍງານວ່າ, ກອງທັບອາກາດໂຮນລັງ ຈະປົດປະຈຳການຍົນຮົບ F-16 ທີ່ເກົ່າແກ່ທັງໝົດຂອງຕົນ ແລະ ທົດແທນດ້ວຍ F-35 ລຸ້ນໃໝ່ກວ່າ. ເນື່ອງຈາກ F-16 ລຸ້ນເກົ່າ ລັດຖະບານໂຮນລັງ ໄດ້ຕັດສິນໃຈບໍລິຈາກໃຫ້ອູແກຣນ, ເຊິ່ງເປັນສ່ວນຫນຶ່ງຂອງການຫັນປ່ຽນໃນຄັ້ງນີ້.
ໂດຍລວມແລ້ວ, ໂຮນລັງ ໄດ້ໃຫ້ຄຳໝັ້ນສັນຍາວ່າ, ຈະສົ່ງເຮືອບິນຮົບ F-16 ໃຫ້ອູແກຣນ ຈຳນວນທັງໝົດ 24 ລຳ, ເຖິງແມ່ນວ່າ ອຳນາດການປົກຄອງ ໂຮນລັງ ບໍ່ໄດ້ເປີດເຜີຍວ່າ, ມາຮອດປັດຈຸບັນເຮືອບິນລຸ້ນນີ້ ໄດ້ສົ່ງໄປຮອດອູແກຣນ ແລ້ວຈຳນວນເທົ່າໃດ.
ນອກຈາກນັ້ນ, ກະຊວງປ້ອງກັນປະເທດໂຮນລັງ ຍັງມີແຜນການທີ່ຈະສົ່ງເຮືອບິນຮົບລຸ້ນນີ້ 18 ລຳ ໄປຍັງສູນເຝິກຊ້ອມໃນປະເທດ ໂຣມານີ ບ່ອນທີ່ນັກບິນອູແກຣນ ຈະໄດ້ຮຽນຮູ້ວິທີການນຳໃຊ້ F-16.
ດ້ານໂຄສົກປະຈຳທຳນຽບເຄຣມລິນ ຣັດເຊຍ ໃຫ້ຄວາມເຫັນວ່າ: ການສະໜອງອາວຸດໃຫ້ອູແກຣນ ເປັນອຸປະສັກຕໍ່ການແກ້ໄຂບັນຫາ, ໂດຍລະບຸວ່າ, ຣັດເຊຍ ມີສ່ວນກ່ຽວຂ້ອງໂດຍກົງກັບບັນດາປະເທດ ນາໂຕ (NATO) ໃນຄວາມຂັດແຍ້ງນີ້ ແລະ ພວມ "ຫຼິ້ນກັບໄຟ." ເຄຣມລິນ ຢັ້ງຢືນວ່າ, ການປະກອບອາວຸດຂອງຝ່າຍຕາເວັນຕົກ ໃຫ້ອູແກຣນ ເປັນໂຕຂັດຂວາງການເຈລະຈາສັນຕິພາບ ແລະ ຈະສົ່ງຜົນສະທ້ອນທາງລົບຕໍ່ອູແກຣນເອງຍິ່ງຂຶ້ນ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
