ວັນສຸກ, ວັນທີ 06 ທັນວາ 2024
ຍົກລະດັບດ່ານທ້ອງຖິ່ນ ບ້ານວັງ ເມືອງໝື່ນ ແຂວງວຽງຈັນ ຂຶ້ນເປັນດ່ານສາກົນ
ເວລາອອກຂ່າວ: 2024-10-21 09:45:48 | ຜູ້ຂຽນ : admin3 | ຈຳນວນຄົນເຂົ້າຊົມ: 116 | ຄວາມນິຍົມ: 
ພິທີປະກາດການຍົກລະດັບດ່ານທ້ອງຖິ່ນບ້ານວັງ ເມືອງໝື່ນ ແຂວງວຽງຈັນ ຂຶ້ນເປັນດ່ານສາກົນ ໄດ້ຈັດຂຶ້ນໃນວັນທີ 15 ຕຸລາ 2024 ໂດຍມີ ທ່ານ ໂພໄຊ ໄຂຄຳພິທູນ ຮອງລັດຖະມົນຕີກະຊວງການຕ່າງປະເທດ, ທ່ານ ຄຳພັນ ສິດທິດຳພາ ເຈົ້າແຂວງ ແຂວງວຽງຈັນ, ທ່ານ ກິດຕິຄູນ ບຸດຄູນ ຮອງຜູ້ວ່າຣາຊະການແຂວງເລີຍ, ທ່ານ ນາງ ມໍຣະກົດ ສີສະຫວັດ ເອກອັກຄະຣາຊະທູດຜູ້ມີອຳນາດເຕັມ ແຫ່ງຣາຊະອານາຈັກໄທ ປະຈຳ ສປປ ລາວ ພ້ອມດ້ວຍບັນດາການນຳກະຊວງ, ແຂວງ, ເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ດາວເຮືອງ ນັນທະວົງ ຮອງເຈົ້າແຂວງ ແຂວງວຽງຈັນ ໄດ້ລາຍງານປະຫວັດຄວາມເປັນມາຂອງດ່ານທ້ອງຖິ່ນບ້ານວັງ ແລະ ການກະກຽມຄວາມພ້ອມທີ່ຈະຍົກລະດັບດ່ານດັ່ງກ່າວຂຶ້ນເປັນດ່ານສາກົນ ວ່າ: ແຂວງວຽງຈັນ ໃນໄລຍະຜ່ານມາ ມີດ່ານປະເພນີ 2 ແຫ່ງ ຄື: ດ່ານປະເພນີຊະນະຄາມ ແລະ ປະເພນີບ້ານວັງ ທີ່ໄດ້ເປີດນຳໃຊ້ນັບແຕ່ຊຸມປີ 80 ເປັນດ່ານທີ່ປະຊາຊົນໄປມາເຂົ້າ-ອອກ ເພື່ອແລກປ່ຽນສິນຄ້າລະຫວ່າງເມືອງກັບເມືອງ ຂອງສອງປະເທດ, ໃຊ້ພຽງບັດປະຈຳຕົວແຈ້ງເຂົ້າ-ອອກເທົ່ານັ້ນ; ຕໍ່ມາໄດ້ມີການຂະຫຍາຍ ຕົວຂອງເສດຖະກິດ ແລະ ສັງຄົມໃນແຕ່ລະໄລຍະ, ຍົກລະດັບຊີວິດການເປັນຢູ່ຂອງປະຊາຊົນລາວ ກໍຄືຊາວແຂວງວຽງຈັນ ໃຫ້ນັບມື້ດີຂຶ້ນ. ຄະນະພັກ, ອົງການປົກຄອງແຂວງ ຈຶ່ງໄດ້ເອົາໃຈໃສ່ຍົກລະ ດັບດ່ານປະເພນີທັງສອງພາຍໃນແຂວງ ຂຶ້ນເປັນດ່ານທ້ອງຖິ່ນນັບແຕ່ວັນທີ 23 ກັນຍາ 1993. ດ່ານທ້ອງຖິ່ນບ້ານວັງ ມີທີ່ຕັ້ງລຽບຕາມລຳແມ່ນໍ້າຂອງ ຕາມເສັ້ນທາງເລກທີ 11, ຫ່າງຈາກນະຄອນຫຼວງວຽງຈັນ ປະມານ 99 ກິໂລແມັດ, ຫ່າງຈາກຂົວມິດຕະພາບ ລາວ-ໄທ ແຫ່ງທີ 1 ປະມານ 122 ກິໂລແມັດ, ຫ່າງ
ຈາກເທສະບານແຂວງວຽງຈັນ 177 ກິໂລແມັດ, ຫ່າງຈາກສະຖານີລົດໄຟ ລາວ-ຈີນ (ເມືອງໂພນໂຮງ) ປະມານ 144 ກິໂລແມັດ ແລະ ຫ່າງຈາກດ່ານທ້ອງ
ຖິ່ນຊະນະຄາມ ປະມານ 38 ກິໂລແມັດ. ມີທີ່ຕັ້ງຢູ່ກົງກັນຂ້າມກັບຈຸດຜ່ານແດນຖາວອນ ບ້ານຄົກໄຜ່ ຕຳບົນປາກຊົມ ອຳເພີປາກຊົມ ແຂວງເລີຍ ຣາຊະອານາຈັກໄທ. ອີງໃສ່ຈຸດພິເສດທາງດ້ານທີ່ຕັ້ງພູມສັນຖານທີ່ກ່າວມານັ້ນ ເຫັນວ່າດ່ານບ້ານວັງ ເມືອງໝື່ນ ເປັນຈຸດຍຸດທະສາດ ທີ່ມີຄວາມສຳຄັນໃນການເຊື່ອມໂຍງ-ເຊື່ອມຈອດ ສຳລັບການຄ້າ, ການບໍລິການ, ການຂົນສົ່ງ ແລະ ການທ່ອງທ່ຽວໃນສະເພາະໜ້າ ແລະ ຍາວນານ.
ທ່ານເຈົ້າແຂວງ ແຂວງວຽງຈັນ ໄດ້ກ່າວວ່າ: ການເປີດດ່ານສາກົນບ້ານວັງ ຈະສ້າງໂອກາດອັນດີເພື່ອບໍລິການຮັບໃຊ້ນັກທຸລະກິດຜູ້ປະກອບການປະຊາຊົນ ຂອງສອງປະເທດ ລາວ-ໄທ, ໄທ-ລາວ ເວົ້າສະເພາະແຂວງວຽງຈັນ ກັບແຂວງເລີຍໃຫ້ມີຄວາມໃກ້ຊິດ, ມີຄວາມສຳພັນຮ່ວມມືກັນຢ່າງແໜ້ນແຟ້ນຍິ່ງຂຶ້ນ, ສ້າງຄວາມສະດວກສະບາຍກວ່າເກົ່າ ໃນການໄປມາຫາສູ່ພົບປະຢ້ຽມຢາມທ່ອງທ່ຽວ ແລກປ່ຽນຊື້ຂາຍສິນຄ້ານານາພັນ, ກາຍເປັນທ່າແຮງບົ່ມຊ້ອນ ແລະ ສ້າງຜົນປະໂຫຍດອັນໃຫຍ່ຫຼວງຫຼາຍດ້ານ ປະກອບສ່ວນເຂົ້າໃນການພັດທະນາເສດຖະກິດສັງຄົມຂອງແຂວງວຽງຈັນ ກໍຄືເມືອງໝື່ນ ໂດຍທາງກົງ ແລະ ທາງອ້ອມ ໃຫ້ມີບາດກ້າວຂະຫຍາຍຕົວໃໝ່ດີກວ່າເກົ່າ. ນອກຈາກຈະນຳຜົນປະໂຫຍດທາງດ້ານເສດຖະກິດມາສູ່ແຂວງວຽງຈັນແລ້ວ ຍັງຈະປະກອບສ່ວນສຳຄັນເຂົ້າໃນການພັດທະນາລວມຂອງຊາດ ໃນການລຶບລ້າງຄວາມທຸກຍາກ ແລະ ຫຼຸດພົ້ນຈາກປະເທດດ້ອຍພັດທະນາໃນອະນາຄົດອີກດ້ວຍ, ຈະປະກອບສ່ວນສຳຄັນສ້າງໃຫ້ເຂດຊາຍແດນ ລາວ-ໄທ, ໄທ-ລາວ ມີຄວາມສະຫງົບມີ ຄວາມເປັນລະບຽບຮຽບຮ້ອຍ ສັນຕິພາບ ມິດຕະພາບ ມີການພົວພັນຮ່ວມມືທີ່ດີປອດໄພຮອບດ້ານ ຕາມກົດໝາຍ ແລະ ລະ ບຽບການຂອງສອງປະເທດ.
ຍ້ອນເຫັນໄດ້ຄວາມສຳຄັນດັ່ງກ່າວ ລັດຖະບານ ສປປ ລາວ ຈິ່ງໄດ້ເຫັນດີອະນຸມັດການຍົກລະດັບດ່ານທ້ອງຖິ່ນບ້ານວັງ ເມືອງໝື່ນ ແຂວງວຽງຈັນ ຂຶ້ນເປັນດ່ານສາກົນ ເພື່ອສ້າງຂີດຄວາມສາມາດໃນການອຳນວຍຄວາມສະດວກ, ຊ່ວຍກະຕຸກຊຸກຍູ້ການພັດທະນາເສດຖະສິດ-ສັງຄົມຂອງປະເທດຊາດ ແລະ ຊຸກຍູ້ການເປີດປີທ່ອງທ່ຽວລາວ 2024 ຕາມຄຳຂວັນທີ່ວ່າ: “ທ່ອງທ່ຽວລາວ, ທ່ອງທ່ຽວແຂວງວຽງຈັນ ປອດໄພ, ຊື່ນໃຈວັດທະນະທຳ, ທຳມະຊາດ ແລະ ປະຫວັດສາດ” ເພາະແຂວງວຽງຈັນ ເປັນຈຸດເຊື່ອມຕໍ່ທ່ອງທ່ຽວຫຼວງພະບາງ ເມືອງມໍລະດົກໂລກ, ທ່ອງທ່ຽວ ພູເບ້ຍແຂວງໄຊສົມບູນ, ທ່ອງທ່ຽວທົ່ງໄຫຫີນມໍລະດົກໂລກ ແຂວງຊຽງຂວາງ, ເຊື່ອມຕໍ່ແຂວງພາກເໜືອ, ເຊື່ອມຕໍ່ນະຄອນຫຼວງວຽງຈັນ, ແຂວງພາກກາງ ລົງສູ່ແຂວງພາກໃຕ້ຂອງ ສປປ ລາວ.
ໂດຍ: ບຸນທະວີ ພົມມະສິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
