ວັນສຸກ, ວັນທີ 06 ທັນວາ 2024
ງານປະກວດເຮືອໄຟ ຢູ່ນະຄອນຫຼວງພະບາງ ມີເຮືອໄຟເຂົ້າຮ່ວມ ຫຼາຍກວ່າ 20 ພາກສ່ວນ
ເວລາອອກຂ່າວ: 2024-10-22 09:57:51 | ຜູ້ຂຽນ : admin3 | ຈຳນວນຄົນເຂົ້າຊົມ: 136 | ຄວາມນິຍົມ: 
ແຫຼ່ງຂ່າວຈາກ ແຂວງຫຼວງພະບາງ ໃຫ້ຮູ້ວ່າ: ງານປະກວດເຮືອໄຟງາມ ໃນບຸນອອກພັນສາປະວໍລະນາ ຢູ່ນະຄອນຫຼວງພະບາງ ເມືອງມໍລະດົກໂລກ ປີນີ້ ຈັດຂຶ້ນໃນຕອນຄ່ຳວັນທີ 18 ຕຸລາ 2024 ໂດຍມີ ທ່ານ ສົມສະຫວາດເລັ່ງສະຫວັດ ອະດີດຮອງນາຍົກລັດຖະມົນຕີ, ທ່ານ ຄໍາຂັນຈັນທະວີສຸກ ເຈົ້າແຂວງ ແຂວງ
ຫຼວງພະບາງ ພ້ອມດ້ວຍການນຳຂອງກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ, ການນຳຂອງແຂວງ, ການນຳນະຄອນຮວາຍອານ ແຂວງກວາງນາມ ສສ ຫວຽດນາມ, ຄະນະກຳມະການ ຕະຫຼອດຮອດມວນຊົນ, ແຂກທັງພາຍໃນ ແລະຕ່າງປະເທດ ເຂົ້າຮ່ວມຢ່າງຫຼວງຫຼາຍ.
ພິທີເລີ່ມຕົ້ນຈາກພິທີທາງສາສະໜາ, ເທດສະຫຼອງເຮືອໄຟ ຢູ່ວັດປ່າຮວກ ເຂດໜ້າຫໍພິພິທະພັນແຫ່ງຊາດຫຼວງພະບາງ ຈາກນັ້ນ, ທ່ານ ວຽງທອງ ຫັດສະຈັນ ເຈົ້ານະຄອນຫຼວງພະບາງ, ປະທານຈັດງານປະກວດເຮືອໄຟງາມ ມີຄຳເຫັນເປີດງານວ່າ: ບຸນອອກພັນສາທຸກປີ ຢູ່ນະຄອນຫຼວງພະບາງ ໄດ້ຈັດຂຶ້ນ ໃນມື້ແຮມ 1 ຄ່ຳຂອງເດືອນ 11, ເປັນປະເພນີທີ່ປະຊາຊົນຫຼວງພະບາງ ພ້ອມກັນສືບທອດມາໄດ້
ຫຼາຍເຊັ່ນຄົນ, ເປັນຄຸນຄ່າທາງດ້ານວັດທະນະທຳ ຮີດຄອງປະເພນີ ຂອງປະຊາຊົນນະຄອນຫຼວງພະບາງ ເພື່ອບູຊາຄຸນພະທຳ-ພະສົງ ແມ່ນ້ຳຄົງຄາ ທີ່ໄດ້ຊຸບລ້ຽງຊີວິດ ຂອງມວນມະນຸດຕະຫຼອດມາ ເຊິ່ງທຸກປີ ອົງການປົກຄອງນະຄອນ ໄດ້ປຸກລະດົມໃຫ້ທຸກພາກສ່ວນ ຈັດຕັ້ງການປະດັບປະດາໂຄມໄຟນ້ອຍ-ໃຫຍ່ ຢູ່ຕາມວັດວາອາຮາມ ແລະ ເຮືອນຊານບ້ານຊ່ອງ ລວມທັງສຳນັກງານອົງການ. ສຳລັບການປະກວດເຮືອໄຟທີ່ນະຄອນຫຼວງພະບາງ ເປັນກິດຈະກຳສຳຄັນ ເພື່ອຊຸກຍູ້ກິດຈະກຳການສະເຫຼີມສະຫຼອງປີທ່ອງທ່ຽວລາວ ຢູ່ແຂວງຫຼວງພະບາງ ເຊິ່ງປີນີ້ ມີເຮືອໄຟເຂົ້າຮ່ວມປະກວດ ແລະ ສ້າງສີສັນ ເປັນເອກະລັກສະເພາະຫຼາຍກວ່າ 20 ພາກສ່ວນ.
ພາຍຫຼັງເປີດພິທີຢ່າງເປັນທາງການ, ເຮືອໄຟແຕ່ລະຂະບວນ ໄດ້ເຄື່ອນໄປຕາມເສັ້ນທາງສີສະຫວ່າງວົງ ຫາ ປາກແມ່ນ້ຳຄານ ແລ້ວນຳເອົາເຮືອໄຟໄຫຼລົງ
ແມ່ນ້ຳຂອງ ໂດຍຄະນະກຳມະການ ໄດ້ກຳນົດ 6 ມາດຖານຂອງການປະກວດຄື: ມາທັນເວລາ ແລະ ຕັ້ງຂະບວນເປັນລະບຽບ, ໂຄງສ້າງ ແລະ ສິລະປະການຕົບແຕ່ງ ເຮັດດ້ວຍວັດສະດຸທຳມະຊາດ ແລະ ມີຄວາມສວຍງາມ, ຮູບຮ່າງ ແລະ ແນວຄິດສ້າງສັນ, ຂະບວນແຫ່ມີຄວາມເປັນລະບຽບ ແລະ ນຸ່ງຖືສຸພາບ, ແສງໄຟ
ໃຫ້ຄວາມສະຫວ່າງໃນເວລາແຫ່ຮຸ່ງແຈ້ງດີ, ແສງໄຟໃຫ້ຄວາມສະຫວ່າງ ໃນເວລາລົງນ້ຳບໍ່ມອດ ແລະ ເຮືອໄຟບໍ່ຈົມນ້ຳ.
ໂດຍ: ອາພຸດເດດ ບຸບຜາ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
