ວັນສຸກ, ວັນທີ 06 ທັນວາ 2024
ໂຮງໝໍສູນກາງ 103 ກອງທັບ ສໍາເລັດການເຜີຍແຜ່ເຊື່ອມຊຶມ 2 ເອກະສານ
ເວລາອອກຂ່າວ: 2024-10-25 14:55:50 | ຜູ້ຂຽນ : admin2 | ຈຳນວນຄົນເຂົ້າຊົມ: 3012 | ຄວາມນິຍົມ: 
ວັນທີ 24 ຕຸລາ 2024 ນີ້, ທີ່ໂຮງໝໍສູນກາງ 103 ກອງທັບ ໄດ້ເຜີຍແຜ່ເຊື່ອມຊຶມມະຕິກອງປະຊຸມຂອງກົມການເມືອງສູນກາງພັກ ແລະ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ VIII ສະໄໝ XI, ພ້ອມດ້ວຍເອກະສານມະຕິວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່. ໂດຍພາຍໃຕ້ການເປັນປະທານຂອງ ສະຫາຍ ພົນຈັດຕະວາ ດຣ. ນາງ ມາລີວອນ ສຸລິຍະແສງ ເລຂາຄະນະພັກ ຫົວໜ້າການເມືອງໂຮງໝໍສູນກາງ 103 ກອງທັບ, ມີຄະນະພັກຮາກຖານ, ຄະນະພັກເອກະລາດ ແລະ ໜ່ວຍພັກຂຶ້ນກັບຄະນະພັກຮາກຖານ ເຂົ້າຮ່ວມ.
ສະຫາຍ ພົນຈັດຕະວາ ດຣ. ນາງ ມາລີວອນ ສຸລິຍະແສງ ໄດ້ເຜີຍແຜ່ມະຕິກອງປະຊຸມຂອງກົມການເມືອງສູນກາງພັກ ແລະ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ VIII ສະໄໝ XI ຕາມຄໍາສັ່ງແນະນໍາກ່ຽວກັບການຈັດຕັ້ງເຜີຍແຜ່ເຊື່ອມຊຶມເອກະສານມະຕິ ຂອງກົມການເມືອງສູນກາງພັກ ເລກທີ 5037/ກມທ. ຈຸດປະສົງເພື່ອໃຫ້ພະນັກງານ-ນັກຮົບໃນໂຮງໝໍສູນກາງ 103 ກອງທັບ ໄດ້ຮັບຮູ້, ເຊື່ອມຊຶມ ແລະ ເຂົ້າໃຈໃນແຕ່ລະເນື້ອໃນຂອງມະຕິກອງປະຊຸມ. ເຊິ່ງເນື້ອໃນກອງປະຊຸມໄດ້ຍົກໃຫ້ເຫັນແຈ້ງສິ່ງທ້າທາຍ ແລະ ກາລະໂອກາດ, ເຊິ່ງຕ້ອງກໍາແໜ້ນ ແລະ ໜູນໃຊ້ຢ່າງປະດິດສ້າງ, ສົມເຫດສົມຜົນ ເຂົ້າໃນການຂຸດຄົ້ນ ແລະ ນໍາໃຊ້ທ່າແຮງບົ່ມຊ້ອນພາຍໃນ ເພື່ອສືບຕໍ່ຈັດຕັ້ງປະຕິບັດວຽກງານຈຸດສຸມໃນ 6 ເດືອນທ້າຍປີ 2024 ເຊິ່ງເຫັນໄດ້ບັນຫາຫຼັກຄື: ສືບຕໍ່ແກ້ໄຂຄວາມເຄັ່ງຮ້ອນດ້ານເສດຖະກິດ-ການເງິນ, ເລັ່ງແກ້ໄຂອັດຕາເງິນເຟີ້ໃຫ້ຫຼຸດລົງ, ດຶງອັດຕາແລກປ່ຽນເງິນຕາຕ່າງປະເທດໃຫ້ຕໍ່າລົງ, ເອົາໃຈໃສ່ການຄຸ້ມຄອງເງິນຕາ, ການແລກປ່ຽນເງິນຕາຂອງທະນາຄານທຸລະກິດ ແລະ ລາຄາສິນຄ້າໃຫ້ຖືກຕ້ອງ, ຮັດກຸມຕາມກົດໝາຍ ຕິດພັນການຜະລິດ-ທຸລະກິດ ດ້ວຍມາດຕະການ, ກົນໄກ, ເຄື່ອງມືດ້ານເສດຖະກິດທີ່ມີແລ້ວ ສົມທົບກັບການຄົ້ນຄວ້າບາງນະໂຍບາຍ, ວິທີການໃໝ່ດ້ານການເງິນ-ເງິນຕາ (ນະໂຍບາຍດອກເບ້ຍ, ສິນເຊື່ອ, ເງິນເດືອນ) ເພື່ອແກ້ໄຂບັນຫາໃຫ້ແທດເຖິງ ແລະ ເປັນຮູບປະທໍາຕົວຈິງ.
ພ້ອມດຽວກັນນີ້, ສະຫາຍ ພັນເອກ ໄພວັນ ໄຊພູບານ ກຳມະການຄະນະພັກ ຫົວໜ້າຫ້ອງພະລາທິການ ໂຮງໝໍສູນກາງ 103 ກອງທັບ ກໍໄດ້ເຜີຍແຜ່ມະຕິວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ເພື່ອເຮັດໃຫ້ຄະນະພັກ-ຄະນະບັນຊາແຕ່ລະຂັ້ນຕະຫຼອດຮອດພະນັກງານ, ສະມາຊິກພັກ, ນາຍ ແລະ ພົນທະຫານ ມີຄວາມຮັບຮູ້ເຂົ້າໃຈເຊື່ອມຊຶມ ແລະ ກໍາແໜ້ນຢ່າງເລິກເຊິ່ງກ່ຽວກັບ ການສ້າງເສດຖະກິດເອກະລາດ ເປັນເຈົ້າຕົນເອງ ໃນໄລຍະໃໝ່ ແລະ ຄວາມເປັນເຈົ້າໃນການປະຕິບັດພັນທະ, ໜ້າທີ່ຂອງແຕ່ລະພາກສ່ວນກົມກອງໃນທົ່ວກອງທັບ ແລະ ເປັນການສ້າງບາດກ້າວບຸກທະລຸໃນການພັດທະນາ, ຮັບປະກັນໃຫ້ແກ່ການເຕີບໂຕທາງດ້ານເສດຖະກິດດ້ວຍຈັງຫວະທີ່ໝັ້ນທ່ຽງ ແລະ ຕໍ່ເນື່ອງຮັບປະກັນໃຫ້ແກ່ການພັດທະນາແບບຍືນຍົງ ຕາມທິດສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ ເຊິ່ງເປັນເງື່ນໄຂພື້ນຖານຮັບປະກັນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ກໍ່ຄືການພັດທະນາເສດຖະກິດຕະຫຼາດ ຕາມທິດສັງຄົມນິຍົມຢູ່ປະເທດເຮົາໃຫ້ນັບມື້ເປັນຮູບປະທໍາຍິ່ງຂຶ້ນ.
ຂ່າວ: ໂຊກທະວີ ແກ້ວບຸດຕະລາດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
