ວັນສຸກ, ວັນທີ 06 ທັນວາ 2024
ປະກາດການເລື່ອນຊັ້ນໃຫ້ນາຍທະຫານ ຢູ່ເຂດພາກເໜືອ 2
ເວລາອອກຂ່າວ: 2024-10-25 15:02:19 | ຜູ້ຂຽນ : admin2 | ຈຳນວນຄົນເຂົ້າຊົມ: 2765 | ຄວາມນິຍົມ: 
ວັນທີ 24 ຕຸລາ 2024 ນີ້, ຢູ່ເຂດພາກເໜືອ 2 ທີ່ກອງພັນໃຫຍ່ 643 ໄດ້ຈັດຕັ້ງປະກາດການເລື່ອນຊັ້ນ, ເລື່ອນທຽບຊັ້ນ ໃຫ້ນາຍທະຫານຊັ້ນ ພັນຕີ ຂຶ້ນຊັ້ນ ພັນໂທ, ໂດຍການເປັນປະທານຂອງ ສະຫາຍ ພົນຕີ ສອນທອງ ພົມລາວົງ ຄະນະປະຈຳພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ການເມືອງກອງທັບ, ພ້ອມດ້ວຍຄະນະພັກກົມ, ມີບັນດາສະຫາຍ ພະນັກງານນາຍທະຫານ ຜູ້ທີ່ໄດ້ຮັບການເລື່ອນຊັ້ນ ແລະ ທຽບຊັ້ນໃໝ່ຈາກກອງບັນຊາການທະຫານແຂວງຊຽງຂວາງ, ກອງບັນຊາການທະຫານແຂວງຫົວພັນ, ກອງບັນຊາການທະຫານແຂວງໄຊສົມບູນ, ໂຮງຮຽນເຫຼົ່າຮົບບ້ານແປນ, ກອງພັນໃຫຍ່ 584 ແລະ ກອງພັນໃຫຍ່ 643 ເຂົ້າຮ່ວມ.
ສະຫາຍ ພັນເອກ ຄຳເອ້ຍ ສຸກແສງເໜືອ ຮອງຫົວໜ້າ ກົມພະນັກງານກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງ ວ່າດ້ວຍການເລື່ອນຊັ້ນ, ເລື່ອນທຽບຊັ້ນໃຫ້ນາຍທະຫານ, ໂດຍອີງຕາມ ກົດໝາຍນາຍທະຫານກອງທັບປະຊາຊົນລາວ ວ່າດ້ວຍການເລື່ອນຊັ້ນນາຍທະຫານ, ອີງຕາມການຄົ້ນຄວ້າ ແລະ ນໍາສະເໜີຂອງກົມໃຫຍ່ການເມືອງກອງທັບ, ກະຊວງປ້ອງກັນປະເທດ ຕົກລົງ, ເລື່ອນຊັ້ນ, ເລື່ອນທຽບຊັ້ນ ພັນຕີ ຂຶ້ນ ຊັ້ນພັນໂທ ຈໍານວນ 69 ສະຫາຍ.
ສະຫາຍ ພົນຕີ ສອນທອງ ພົມລາວົງ ຍັງໄດ້ ຮຽກຮ້ອງໃຫ້ນາຍທະຫານຜູ້ທີ່ໄດ້ຮັບການປະກາດເລື່ອນຊັ້ນໃໝ່ໃນຄັ້ງນີ້, ຈົ່ງພ້ອມກັນເອົາໃຈໃສ່ສືບຕໍ່ເຝິກຝົນຫຼໍ່ຫຼອມຕົນເອງໃນທຸກດ້ານ, ມີຄຸນສົມບັດສິນທໍາປະຕິວັດ, ເຊື່ອມຊຶມ, ກໍາແໜ້ນແນວທາງນະໂຍບາຍປ່ຽນແປງໃໝ່ຂອງພັກ, ປະຕິບັດທຸກມະຕິ, ຄໍາສັ່ງ ແລະ ຂໍ້ກໍານົດກົດລະບຽບຕ່າງໆ ຂອງຂັ້ນເທິງວາງອອກຢ່າງເຂັ້ມງວດ, ຍົກສູງສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງສັດຕູ, ຕອບຕ້ານ ແລະ ສະກັດກັ້ນໃນການໂຄສະນາ ບິດເບືອນໃສ່ຮ້າຍປ້າຍສີຕໍ່ແນວທາງນະໂຍບາຍຂອງພັກ-ລັດ, ປະຕິບັດຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ, ແບ່ງງານໃຫ້ບຸກຄົນຮັບຜິດຊອບ, ຍົກສູງນໍ້າໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ເພີ່ມທະວີຄວາມຮັບຜິດຊອບທາງດ້ານການເມືອງຂອງພະນັກງານໃຫ້ເປັນບູລິມະສິດ1 ໃນການຈັດຕັ້ງປະຕິບັດໜ້າທີຢູ່ໃນກົມກອງ, ສ້າງກົມກອງກໍ່ຄືກອງທັບເປັນກອງທັບປະຕິວັດມີແບບແຜນທັນສະໄໝ.
ພາບ+ຂ່າວ: ຄຳໝັ້ນ ຄົງວິໄລ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
