ວັນສຸກ, ວັນທີ 06 ທັນວາ 2024
ໂຄງການຂົນສົ່ງແບບຍືນຍົງໃນຕົວເມືອງ ນະຄອນຫຼວງວຽງຈັນ ຕາມແຜນຈະໃຫ້ສຳເລັດໃນກາງປີ 2025
ເວລາອອກຂ່າວ: 2024-10-31 08:50:50 | ຜູ້ຂຽນ : admin3 | ຈຳນວນຄົນເຂົ້າຊົມ: 265 | ຄວາມນິຍົມ: 
ທ່ານ ລິດຕາ ຂັດຕິຍະ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ພ້ອມດ້ວຍຄະນະ ໄດ້ເຄື່ອນໄຫວຕິດຕາມຄວາມຄືບໜ້າຂອງການຈັດຕັ້ງປະຕິບັດໂຄງການຂົນສົ່ງແບບຍືນຍົງໃນຕົວເມືອງ ນະຄອນຫຼວງວຽງຈັນ (ນວ) (ໂຄງການລົດເມ BRT) ຢູ່ພາກສະໜາມຂອງໂຄງການກໍ່ສ້າງຕົວຈິງໃນຫຼາຍຈຸດ ໃນວັນທີ 28 ຕຸລາ 2024 ນີ້, ໂດຍການຕ້ອນຮັບຂອງ ທ່ານ ຄຳພັນ ວັນທະນາ ຫົວໜ້າໂຄງການຂົນສົ່ງແບບຍືນຍົງໃນຕົວເມືອງ ນວ (ລົດເມ BRT), ມີຮອງຫົວໜ້າພະແນກໂຍທາທິການ ແລະ ຂົນສົ່ງ ນວ, ຜູ້ຕາງໜ້າທະນາຄານພັດທະນາອາຊີປະຈຳ ສປປ ລາວ, ບໍລິສັດຮັບເໝົາກໍ່ສ້າງ ພ້ອມດ້ວຍພະນັກງານວິຊາການ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນການຕິດຕາມພາກສະໜາມກໍ່ສ້າງຕົວຈິງໃນຄັ້ງນີ້ ໄດ້ເລີ່ມຕົ້ນຈຸດກໍ່ສ້າງໜ້າ
ໂຮງແຮມຊຳເມີເຊັດ, ຈຸດເສັ້ນທາງໂພນສະອາດ ຂຶ້ນໄປຫາປະຕູໄຊ ເຊິ່ງແຜນຈະກໍ່ສ້າງສະຖານີຂຶ້ນ-ລົງ ລົດເມ BRT ແລະ ສະຖານີໃຫຍ່ ແລະ ເຂດປັບປຸງລະ
ບົບລະບາຍນ້ຳ. ຈາກນັ້ນ, ໄດ້ເບິ່ງຈຸດກໍ່ສ້າງອູ່ລົດເມຫຼັກ 16 ເຊິ່ງແຜນຈະສ້າງບ່ອນຈອດລົດເມ, ອາຄານ, ສູນບັນຊາລົດ, ອູ່ສ້ອມແປງ ແລະ ອື່ນໆ. ສຳລັບ
ຈຸດສຸດທ້າຍໄດ້ເບິ່ງຢູ່ເສັ້ນທາງດົງໂດກ-ໜ້າມະຫາວິທະຍາໄລແຫ່ງຊາດ ເຊິ່ງຈຸດດັ່ງກ່າວ ປັດຈຸບັນໄດ້ເລັ່ງປັບປຸງພື້ນຖານໂຄງລ່າງ ທີ່ຈະກໍ່ສ້າງສະຖານີຂຶ້ນ-ລົງ ລົດເມ ຄາດຄະເນວ່າຈະໄດ້ເລີ່ມລົງມືຕິດຕັ້ງໂຄງສ້າງດ້ານເທິງ ເປັນຕົ້ນແມ່ນ ຫຼັງຄາ, ຮາວຈັບ ແລະ ສິ່ງອຳນວຍຄວາມສະດວກ.
ໃນໂອກາດນີ້, ທ່ານ ຄຳພັນ ວັນທະນາ ໄດ້ໃຫ້ສຳພາດວ່າ: ປັດຈຸບັນ ໂຄງການມີຄວາມຄືບໜ້າລວມທັງໝົດ 30%, ສຳລັບໂຄງການລົດເມ BRT ມີສະຖານີຂຶ້ນ-ລົງ 27 ຈຸດ ໂດຍແບ່ງການຮັບເໝົາກໍ່ສ້າງອອກເປັນ 2 ໄລຍະ ສະເພາະບໍລິສັດ ເລກ8 ມີຢູ່ 19 ສະຖານີ ປັດຈຸບັນສຳເລັດໂຄງລ່າງພື້ນຖານປະມານ 9 ສະຖານີ, ສ່ວນຈຸດທີ 10 ຢູ່ໂພນສະອາດ ແມ່ນສຳເລັດ 100%, ເວົ້າລວມແລ້ວຍັງເຫຼືອ 9 ຈຸດ ກຳລັງກໍ່ສ້າງ, ສ່ວນຫຼາຍແມ່ນສຳເລັດການກໍ່ສ້າງຮາກຖານສະຖານີລົດເມ BRT, ປັດຈຸບັນໂຄງການສຸມໃສ່ໃນການເຮັດຂອບທາງ ອີງໃສ່ບົດຮຽນຜ່ານມາຈຸດໃດທີ່ແຄບກໍຕ້ອງໄດ້ຂະຫຍາຍທາງອອກກ່ອນ ເພື່ອເຮັດໃຫ້ລົດແລ່ນໄປໄດ້ສະດວກເຊິ່ງສະຖານີຕັ້ງຢູ່ຈຸດກາງທາງຈຳເປັນຕ້ອງໄດ້ຂະຫຍາຍຂອບ
ທາງກ່ອນການສັນຈອນ ກໍຈະບໍ່ລຳບາກ ແລະ ອື່ນໆ. ສຳລັບໂຄງການກໍ່ສ້າງສະຖານີຂຶ້ນ-ລົງລົດເມ BRTໂດຍລວມແມ່ນຈະໃຫ້ສຳເລັດທັງໝົດໃນກາງປີ
2025 ແລະ ການເປີດໃຫ້ບໍລິການແບ່ງອອກເປັນ 2 ໄລຍະຄື: ຈະເປີດທົດລອງ 3 ເດືອນໃຫ້ໃຊ້ບໍລິການບໍ່ເສຍຄ່າ ຫຼັງຈາກນັ້ນ ຈະເປີດເປັນທາງການ. ໂຄງການ BRT ເປັນໂຄງການແກ້ໄຂການສັນຈອນແອອັດໂດຍທີ່ພວກເຮົາພະຍາຍາມໃຫ້ມາໝູນໃຊ້ລົດເມສາທາລະນະໃຫ້ຫຼາຍຂຶ້ນເປັນການປ່ຽນທັດສະນະຄະຕິໃນການຊົມໃຊ້ລົດສ່ວນຕົວມາໃຊ້ລົດເມສາທາລະນະ, ຖ້າບໍ່ປ່ຽນພຶດຕິກຳລົດກໍຍັງຈະຕິດຄືເກົ່າເພາະສະນັ້ນ ເຫດຜົນຫຼັກທີ່ເລືອກເສັ້ນທາງມາ ມະຫາວິທະຍາໄລແຫ່ງຊາດໍຍ້ອນມີການສັນຈອນຢູ່ຈຸດດັ່ງກ່າວຫຼາຍ ເຊັ່ນ: ມີນັກຮຽນ, ນັກສຶກສາ ແລະ ລົດສັນຈອນຫຼາຍ ດັ່ງນັ້ນ, ຖ້າໂຄງການສຳເລັດ ຈະມີຜົນດີໃນຫຼາຍຢ່າງ ເປັນຕົ້ນຈະເຮັດໃຫ້ການຊົມໃຊ້ລົດສ່ວນຕົວຫຼຸດລົງ ເຮັດໃຫ້ການສັນຈອນສະດວກສະບາຍບໍ່ແອອັດ ເປັນການປະຢັດເວລາ ປະຢັດຄ່າໃຊ້ຈ່າຍ ແລະ ອື່ນໆ.
ປັດຈຸບັນທາງໂຄງການແມ່ນໄດ້ສຸມໃສ່ໃນການກໍ່ສ້າງຮາກຖານຂອງສະຖານີຂຶ້ນ-ລົງລົດເມ ແລະ ປັບປຸງລະບົບພື້ນຖານໂຄງລ່າງ ເຊິ່ງອາດຈະສ້າງຄວາມແອ
ອັດຫຍຸ້ງຍາກໃນການສັນຈອນ ເຮັດໃຫ້ບາງສາຍທາງມີລົດຕິດຂັດ ແຕ່ທາງໂຄງການກໍໄດ້ແນະນຳໃຫ້ຜູ້ຮັບຜິດຊອບ ເອົາໃຈໃສ່ບໍ່ໃຫ້ກີດຂວາງການສັນຈອນ ຮັບປະກັນບໍ່ໃຫ້ເກີດຜົນກະທົບ ແລະ ອຸບັດຕິເຫດ ພ້ອມນີ້, ຂໍຝາກເຖິງຜູ້ຂັບຂີ່ ກໍຄືຜູ້ໃຊ້ລົດ-ໃຊ້ຖະໜົນ ເປັນເຈົ້າການມີສ່ວນຮ່ວມຊ່ວຍກັນ ໄປມາຢ່າງມີສະຕິ ລະມັດລະວັງ ທັງສັງເກດເບິ່ງສັນຍານປ້າຍຫ້າມ ປ້າຍເຕືອນ ທີ່ໂຄງການໄດ້ຕິດຕັ້ງໄວ້ ເພື່ອປ້ອງກັນການເກີດອຸບັດຕິເຫດ ແລະ ມີສ່ວນຮ່ວມຊ່ວຍກັນອຳນວຍຄວາມສະດວກໃນການກໍ່ສ້າງໂຄງການ ໃຫ້ມີຜົນສຳເລັດໂດຍໄວ.
ໂດຍ: ບຸນອູ້ມ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
