ວັນເສົາ, ວັນທີ 07 ທັນວາ 2024
ສ້າງຄວາມເຂັ້ມແຂງວຽກງານສ້າງ ແລະ ປັບປຸງນິຕິກຳ
ເວລາອອກຂ່າວ: 2024-11-04 09:40:50 | ຜູ້ຂຽນ : admin3 | ຈຳນວນຄົນເຂົ້າຊົມ: 161 | ຄວາມນິຍົມ: 
ກອງປະຊຸມສ້າງຄວາມເຂັ້ມແຂງກ່ຽວກັບວຽກງານສ້າງ ແລະ ປັບປຸງນິຕິກຳ ໃຫ້ພະນັກງານ-ລັດຖະກອນຂອງສະພາແຫ່ງຊາດ(ສພຊ) ແລະ ສະພາປະຊາຊົນຂັ້ນແຂວງ (ສພຂ) ໂດຍການເປັນປະທານຂອງ ທ່ານ ປອ ພູທອນ ວໍລະເພັດ
ຮອງປະທານກຳມາທິການກົດໝາຍ ສພຊ, ມີຄະນະກົມ, ຄະນະພະແນກ, ພະນັກງານຈາກບັນດາກົມ ແລະ ສູນພາຍໃນ ສພຊ ແລະ ສພຂ ຈາກ 5 ແຂວງຄື: ນະຄອນຫຼວງວຽງຈັນ, ໄຊຍະບູລີ, ວຽງຈັນ, ບໍລິຄຳໄຊ ແລະ ໄຊສົມບູນ ພ້ອມດ້ວຍແຂກຖືກເຊີນ ເຂົ້າຮ່ວມ.
ທ່ານ ປອ ພູທອນ ວໍລະເພັດ ໄດ້ເນັ້ນໜັກເຖິງຈຸດປະສົງຂອງກອງປະຊຸມ ເພື່ອຍົກລະດັບຄວາມຮູ້ຄວາມສາມາດໃຫ້ແກ່ພະນັກງານ-ລັດຖະກອນ ໄດ້ຮັບຮູ້ ແລະ ເຂົ້າໃຈກ່ຽວກັບວຽກງານສ້າງ ແລະ ປັບປຸງນິຕິກຳ ທັງເປັນການແລກປ່ຽນບົດຮຽນເຊິ່ງກັນ ແລະກັນ ໃນການຈັດຕັ້ງປະຕິບັດວຽກງານດັ່ງກ່າວໄລຍະຜ່ານມາ ເພື່ອຊອກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງ ຂອງການເປັນເສນາທິການໃນການສ້າງນິຕິກຳຂັ້ນແຂວງ, ວຽກງານປິ່ນອ້ອມ ໃຫ້ຄະນະນຳຂອງສ ສພຊ ແລະ ສພຂ ໄດ້ຮັບການປັບປຸງແກ້ໄຂໃຫ້ດີຂຶ້ນ; ບັນດາເນື້ອໃນ ແລະ ຫົວຂໍ້ທີ່ຈະໄດ້ຮັບຟັງ ແລະ ສົນທະນາກັນ ເປັນຫົວຂໍ້ກ່ຽວກັບການຈັດຕັ້ງປະຕິບັດຕົວຈິງ ເຊິ່ງຈະໄດ້ມີການແລກປ່ຽນ ແລະ ລະດົມຄຳເຫັນຕໍ່ໜ້າທີ່ວຽກງານດ້ານຕ່າງໆ ເພື່ອຊອກໃຫ້ເຫັນວິທີການ ແລະ ມາດຕະການແກ້ໄຂດ້ານອ່ອນໃນໄລຍະຜ່ານມາ ເພາະຈະນຳມາເປັນພື້ນຖານໃນການຄົ້ນຄວ້າ, ພິຈາລະນາ ແລະ ໝູນໃຊ້ເຂົ້າໃນໜ້າທີ່ວຽກງານໃຫ້ປາກົດຜົນເປັນຈິງ.
ບັນດາຜູ້ເຂົ້າຮ່ວມໄດ້ຮັບຟັງການສະເໜີບົດກ່ຽວກັບຂະບວນການ ແລະ ວິທີການໂຮມນິຕິກຳ, ຫຼັກການ ແລະ ຂັ້ນຕອນການສ້າງ ແລະ ປັບປຸງກົດໝາຍ, ເຕັກນິກ ແລະ ວິທີການຄົ້ນຄວ້າເນື້ອໃນຂອງນິຕິກຳ, ຂັ້ນຕອນການສ້າງ ແລະ ປັບປຸງນິຕິກຳ, ການເຮັດບົດບັນທຶກ ແລະ ບົດລາຍງານຕໍ່ກອງປະຊຸມຄະນະປະຈຳ ສພຊ;.ຈາກນັ້ນ, ໄດ້ຈັດເປັນກຸ່ມເພື່ອຄົ້ນຄວ້າ ແລະ ລາຍງານຜົນຂອງການຄົ້ນຄວ້າ.
ກອງປະຊຸມຈັດຂຶ້ນລະຫວ່າງວັນທີ 31 ຕຸລາ-2 ພະຈິກ 2024 ທີ່ເມືອງວັງວຽງ ແຂວງວຽງຈັນ ໂດຍໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກມູນນິທິເອເຊຍ (The Asia Foundation) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ ສພຊ ແລະ ງົບປະມານສົມທົບຈາກຄະນະເລຂາທິການສພຊ.
ໂດຍ: ນາງ ສຸພາວັນ ຫອມສະນິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
