POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນເສົາ, ວັນທີ 07 ທັນວາ 2024

ພິທີຊາປະນະກິດສົບ ສະຫາຍ ພົນໂທ ໄອ່ ສຸລິຍະແສງ ໄດ້ຈັດຂຶ້ນຢ່າງສົມກຽດ
ເວລາອອກຂ່າວ: 2024-11-04 18:13:21 | ຜູ້ຂຽນ : admin2 | ຈຳນວນຄົນເຂົ້າຊົມ: 966 | ຄວາມນິຍົມ:

ພິທີຊາປະນະກິດສົບຂອງ ສະຫາຍ ພົນໂທ ໄອ່ ສຸລິຍະແສງ ໄດ້ຈັດຂຶ້ນຢ່າງສົມກຽດໃນວັນທີ 4 ພະຈິກ 2024 ນີ້, ຢູ່ທີ່ວັດໂສກປ່າຫຼວງ ນະຄອນຫຼວງວຽງຈັນ ໂດຍການເຂົ້າຮ່ວມຂອງສະຫາຍທອງລຸນ ສີສຸດລິດ ປະທານປະເທດ ແຫ່ງ ສປປລາວ,ມີບັນດາການນໍາຂັ້ນສູງຈາກບັນດາກະຊວງຕ່າງໆ, ອະດີດການນຳຂັ້ນສູງ, ຕະຫຼອດຮອດ ພະນັກງານສະມາຊິກພັກ, ພະນັກງານ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ, ຄອບຄົວລູກຫຼານ ແລະ ຍາດຕິພີ່ນ້ອງເຂົ້າຮ່ວມຢ່າງຫຼວງຫຼາຍ. ສະຫາຍ ພົນໂທ ປອ ວົງຄໍາ ພົມມະກອນ ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ປະ ທານຄະນະກຳມະການຮັບຜິດຊອບງານຊາປະນະກິດສົບ ໄດ້ຂຶ້ນກ່າວສະດຸດີຜ່ານປະຫວັດຫຍໍ້ແຫ່ງການກຳເນີດ ແລະ ການເຄື່ອນໄຫວປະຕິບັດຂອງ ສະຫາຍ ພົນໂທ ໄອ່ ສຸລິຍະແສງ. ເຊິ່ງ ສະຫາຍ ພົນໂທ ໄອ່ ສຸລິຍະແສງ ອາດີດກໍາມະການສູນກາງພັກ ສະໄໝທີ IV, V, ອາດີດຮອງ ລັດຖະມົນຕີກະຊວງປ້ອງກັນປະເທດ, ອາດີດຫົວໜ້າກົມໃຫຍ່ເສນາທິການກອງທັບ, ອາດີດພະນັກງານອາວຸໂສບຳນານ ກະຊວງປ້ອງກັນປະເທດເກີດເມື່ອວັນທີ 01/01/1935 ທີ່ບ້ານ ຫີນລາດ, ເມືອງ ສະໜາມໄຊ ແຂວງ ອັດຕະປື ເປັນບຸດຂອງ ທ່ານ ບຸນລອດ ສຸລິຍະແສງ ແລະ ທ່ານ ນາງ ທອງ ສຸລິຍະແສງ ມີອ້າຍ, ເອື້ອຍ, ນ້ອງ ຮ່ວມອຸທອນດຽວກັນ 08 ຄົນ, ຍິງ 03 ຄົນ, ສະຫາຍໄດ້ສ້າງຄອບຄົວຮ່ວມກັບ ນາງ ຄຳປ່ຽງ ສຸລິຍະແສງ ມີບຸດຮ່ວມກັນ 04 ຄົນ, ຍິງ 02. ໃນໄລຍະຜ່ານມາຍ້ອນ ສະຫາຍ ເຫັນໄດ້ຄວາມໂຫດຮ້າຍປ່າເຖື່ອນຂອງພວກຈັກກະພັດລ່າເມືອງຂື້ນແບບເກົ່າ ແລະ ໃໝ່ ກໍຄືລູກແຫຼ້ງຕີນມືຂອງພວກເຂົາ ທີ່ໄດ້ສ້າງໂທດກໍາຕໍ່ປະຊາຊົນລາວບັນດາເຜົ່າ ສະຫາຍຈິ່ງໄດ້ຕັດສິນໃຈຈາກຄອບຄົວ ພໍ່ ແມ່, ບ້ານເກີດເມືອງນອນ ເພື່ອເຂົ້າຮ່ວມການປະຕິວັດ ເມື່ອວັນທີີ 01/01/1948 ແລະ ໄດ້ເຂົ້າເປັນສະມາຊິກພັກປະຊາຊົນປະຕິວັດລາວ ເມື່ອວັນທີ່ 16/12/1956. ນັບແຕ່ເຂົ້າການປະຕິວັດເປັນຕົ້ນມາ ສະຫາຍ ກໍໄດ້ເຂົ້າຮ່ວມໃນຂະບວນການຕໍ່ສູ້ກູ້ຊາດ ຕໍ່ຕ້ານກັບຈັກກະພັດຜູ້ຮຸກຮານ, ເຊິ່ງສະແດງອອກໃນຫຼາຍບັ້ນຮົບ, ບັ້ນຕີທີ່ສໍາຄັນ ເພື່ອປົດປ່ອຍປະເທດຊາດ ແລະ ທຸ່ມເທເຫື່ອແຮງສະຕິປັນຍາ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເຊິ່ງໄດ້ມີຜົນງານ ແລະ ການເຄື່ອນໄຫວປະຕິບັດໜ້າທີ່ ທີ່ສຳຄັນໃນແຕ່ລະໄລຍະຂອງສະຫາຍດັ່ງນີ້: - ປີ 1952-1953 ເປັນຮອງຫົວໜ້າໝູ່ ຮັບຜິດຊອບວຽກງານພະລາທິການ ຢູ່ກອງບັນຊາການທະຫານເມືອງສະໜາມໄຊ ແຂວງອັດຕະປື. - ປີ 1954 ເປັນຮອງຫົວໜ້າໝວດບັນຊາ ກອງ 95 ຂື້ນກັບເຂດເຕົ້າໂຮມຊໍາເໜືອ ແຂວງຫົວພັນ. - ປີ 1955-1956 ເປັນຫົວໜ້າໝວດບັນຊາຢູ່ກອງຮ້ອຍ 3 ກອງພັນ 705. - ປີ 1957-1959 ໄປຮຽນວັດທະນະທໍາຢູ່ປະເທດ ຫວຽດນາມ. - ປີ 1960-1961 ໄດ້ຮັບການແຕ່ງຕັ້ງເປັນຮອງຫົວໜ້າກອງພັນທີ 2 ບັນຊາກໍາລັງເຂົ້າຮ່ວມບັ້ນຮົບປົດປ່ອຍ ເຂດເສັ້ນທາງ ເລກທີ 13 ເໜືອ. - ປີ 1962 ໄປຮຽນການທະຫານຊັ້ນສູງ ຢູ່ປະເທດ ຫວຽດນາມ. - ປີ 1963 ໄດ້ຮັບການແຕ່ງຕັ້ງເປັນຫົວໜ້າພະແນກສູ້ຣົບຫ້ອງເສນາທິການກອງບັນຊາການສູງສຸດ. - ປີ 1964-1965 ເປັນຄະນະຊີ້ນໍາດ່ານຮົບປົດປ່ອຍ ຫົວເມືອງ, ຮ່ອງນົນ ຢູ່ຊໍາເໜືອ. - ປີ 1966-1967 ເປັນຫົວໜ້າຫ້ອງເສນາທິການກອງບັນຊາການສູງສຸດຢູ່ຊໍາເໜືອ. - ປີ 1968 ເປັນຄະນະຮັບຜິດຊອບດ່ານຮົບປົດປ່ອຍນໍ້າບາກ, ຜ່າຖີ່, ໜອງຄ້າງ, ຖໍ້າລາ-ນາຄັງ. - ປີ 1969-1972 ຊີ້ນໍາຕີຕ້ານບັ້ນຮົບກູ້ກຽດ, ບັ້ນຮົບ 3 ສອນ, ບັ້ນຮົບສອນໄຊ ແລະ ບັ້ນຮົບບໍ່ຕ່າວຄືນຂອງສັດຕູ ຢູ່ເຂດຊຽງຂວາງ. - ປີ 1973-1975 ຊີ້ນໍາກໍາລັງທະຫານເຂົ້າປ້ອງກັນລັດຖະບານປະສົມ ແລະ ຄະນະມົນຕີປະສົມການເມືອງຢູ່ 2 ຕົວເມືອງເປັນກາງ ວຽງຈັນ ແລະ ຫຼວງພະບາງ. - ປີ 1976-1978 ໄດ້ຮັບການແຕ່ງຕັ້ງເປັນຮອງຫົວໜ້າກົມໃຫ່ຍເສນາທິການກອງທັບປະຊາຊົນລາວ. - ປີ 1979-1980 ໄປຮຽນນາຍທະຫານເສນາທິການຊັ້ນສູງ ຢູ່ອະດີດສະຫະພາບໂຊວຽດ ພ້ອມທັງໄດ້ຮັບການເລື່ອນຊັ້ນເປັນນາຍທະຫານຊັ້ນ ພົນຈັດຕະວາ. - ປີ 1981-1983 ໄປຮຽນທິດສະດີຊັ້ນສູງຢູ່ໂຮງຮຽນທິດສະດີການເມືອງ ຫງຽນອ້າຍກ໋ວກ ສສ ຫວຽດນາມ. - ປີ 1984 -1988 ເປັນຄະນະຊີ້ນໍາບັ້ນຮົບ 3 ໝູ່ບ້ານ ແລະ ບັ້ນຮົບບໍ່ແຕນ ແຂວງໄຊຍະບູລີ, ໃນໄລຍະນີ້ປີ 1986 ໄດ້ຮັບການແຕ່ງຕັ້ງເປັນຫົວໜ້າກົມໃຫຍ່ເສນາທິການກອງທັບ ປະຊາຊົນລາວ ແລະ ໄດ້ຮັບການເລື່ອນຊັ້ນເປັນນາຍທະຫານ ຊັ້ນ ພົນໂທ. - ປີ1989 ໄດ້ຮັບການແຕ່ງຕັ້ງເປັນຄະນະກໍາມະການປ້ອງກັນຊາດ-ປ້ອງກັນຄວາມສະຫງົບສູນກາງ. - ປີ 1990-2006 ໄດ້ຮັບການແຕ່ງຕັ້ງເປັນຮອງລັດທະມົນຕີກະຊວງປ້ອງກັນປະເທດ. ດ້ວຍຜົນງານ ແລະ ຄຸນງາມຄວາມດີ ຂອງສະຫາຍທີ່ໄດ້ອຸດທິດໃຫ້ແກ່ປະເທດຊາດຕະຫຼອດໄລຍະທີ່ຜ່ານມາ ສະຫາຍຈຶ່ງໄດ້ຮັບການຍ້ອງຍໍສັນລະເສີນຈາກພັກ, ລັດດ້ວຍການປະດັບຫຼຽນໄຊ, ຫຼຽນກາ ແລະ ໃບຍ້ອງຍໍປະເພດຕ່າງໆ ຈາກພາຍໃນ ແລະ ຕ່າງປະເທດຢ່າງຫຼວງຫຼາຍ ແລະ ສົມກຽດ. ການສູນເສຍສະຫາຍໄປໃນຄັ້ງນີ້ ແມ່ນເປັນການສູນເສຍອະດີດການນຳທີ່ມີຜົນງານ, ປະສົບການ ແລະ ມີບົດຮຽນຕົວຈິງໄປອີກຜູ້ໜຶ່ງ. ແຕ່ຢ່າງໃດກໍຕາມ ພັກ, ລັດຖະບານ ແລະ ປະຊາຊົນລາວບັນດາເຜົ່າຈະສືບຕໍ່ເພີ່ມທະວີຄວາມສາມັກຄີພາຍໃນຊາດໃຫ້ເປັນປຶກແຜ່ນ ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມຄວາມມຸ້ງ ປາດຖະໜາຂອງສະຫາຍ ເຊິ່ງເປັນອຸດົມການອັນດຽວຂອງພັກ ແນໃສ່ເພື່ອພັດທະນາປະເທດຊາດໃຫ້ກ້າວຂຶ້ນຢ່າງບໍ່ຢຸດຢັ້ງ.

news to day and hot news