ວັນອັງຄານ, ວັນທີ 10 ທັນວາ 2024
ນາຍົກລັດຖະມົນຕີ ແຫ່ງ ສປປ ລາວ ເດີນທາງເຂົ້າຮ່ວມ ກອງປະຊຸມ ທີ່ ສປ ຈີນ
ເວລາອອກຂ່າວ: 2024-11-06 15:36:50 | ຜູ້ຂຽນ : admin2 | ຈຳນວນຄົນເຂົ້າຊົມ: 2836 | ຄວາມນິຍົມ: 
ວັນທີ 6 ພະຈິກ 2024, ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍ ພັນລະຍາ ແລະ ຄະນະ ໄດ້ເດີນທາງເຖິງ ສະໜາມບິນສາກົນ ສາງສຸຍ, ນະຄອນຄຸນມິງ, ສປ ຈີນ, ໂດຍມີ ທ່ານ ຫຼິວ ຫົງຈ້ຽນ, ເລຂາພັກນະຄອນຄຸນມິງ, ຄະນະປະຈໍາພັກແຂວງຢຸນນານ ພ້ອມດ້ວຍຄະນະ, ຄະນະສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສປ ຈີນ, ຄະນະສະຖານກົງສຸນໃຫຍ່ ແຫ່ງ ສປປ ລາວ ທີ່ ນະຄອນຄຸນມິງ ແລະ ພາກສ່ວນກ່ຽວຂ້ອງຕ່າງໆ ໃຫ້ການຕ້ອນຮັບຢ່າງອົບອຸ່ນ ແລະ ສົມກຽດ.
ການເດີນທາງຢ້ຽມຢາມ ສປ ຈີນ ໃນຄັ້ງນີ້ ແມ່ນເພື່ອຕອບສະໜອງຕາມການເຊື້ອເຊີນຂອງ ສະຫາຍ ຫຼີ ສຽງ ນາຍົກລັດຖະມົນຕີ ແຫ່ງ ສປ ຈີນ ໂດຍມີຈຸດປະສົງເພື່ອເຂົ້າຮ່ວມກອງປະຊຸມສຸດຍອດອະນຸພາກພື້ນແມ່ນໍ້າຂອງ (GMS) ຄັ້ງທີ 8 ແລະ ກອງປະຊຸມສຸດຍອດ ກໍາປູເຈຍ-ລາວ-ມຽນມາ-ຫວຽດນາມ (CLMV) ຄັ້ງທີ 11, ພ້ອມທັງເປັນປະທານ ກອງປະຊຸມສຸດຍອດຂອບຍຸດທະສາດການຮ່ວມມືດ້ານເສດຖະກິດ ແມ່ນໍ້າອິຣະວະດີ-ແມ່ນໍ້າເຈົ້າພະຍາ-ແມ່ນໍ້າຂອງ (ACMECS) ຄັ້ງທີ 10 ໃນລະຫວ່າງວັນທີ 6-7 ພະຈິກ 2024, ທີ່ ນະຄອນຄຸນມິງ, ສປ ຈີນ.
ຈາກນັ້ນ, ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ຈະໄດ້ສືບຕໍ່ເດີນທາງໄປຢ້ຽມຢາມເຮັດວຽກຢູ່ ແຂວງເຈີ້ຈ່ຽງ ແລະ ນະຄອນຊຽງໄຮ້ ໃນລະຫວ່າງວັນທີ 8-10 ພະຈິກ 2024.
ນອກນັ້ນໃນການຢ້ຽມຢາມ ສປ ຈີນ ໃນຄັ້ງນີ້, ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ຍັງຈະໄດ້ໄປຢ້ຽມຢາມ ບັນດາຫົວໜ່ວຍທຸລະກິດຈຳນວນໜຶ່ງທີ່ມາລົງທຶນຢູ່ ສປປ ລາວ ແລະ ເປັນບໍລິສັດຫຼັກແຫຼ່ງ ແລະ ມີທ່າແຮງຂັບເຄື່ອນທາງດ້ານເສດຖະກິດຂອງ ສປ ຈີນ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
