ວັນເສົາ, ວັນທີ 07 ທັນວາ 2024
ກອງປະຊຸມພົບປະແລກປ່ຽນວຽກງານປ້ອງກັນຊາຍແດນ ປະຈໍາປີ 2024
ເວລາອອກຂ່າວ: 2024-11-11 13:44:38 | ຜູ້ຂຽນ : admin2 | ຈຳນວນຄົນເຂົ້າຊົມ: 938 | ຄວາມນິຍົມ: 
ກອງປະຊຸມພົບປະແລກປ່ຽນວຽກງານປ້ອງກັນຊາຍແດນ ປະຈໍາປີ 2024 ລະຫວ່າງ ກອງບັນຊາການທະຫານແຂວງຫຼວງນໍ້າທາ ກັບ ກອງບັນຊາການທະຫານປ້ອງກັນຊາຍແດນກິ່ງແຂວງສິບສອງປັນນາ ກອງທັບປົດປ່ອຍປະຊາຊົນຈີນ. ໄດ້ຈັດຂຶ້ນໃນວັນທີ 5 ພະຈິກ 2024 ນີ້, ຢູ່ທີ່ໂຮງຮຽມຈິ່ງລ່ານ ເມືອງຫຼ້າ ສປ ຈີນ. ຝ່າຍລາວນຳໂດຍ ສະຫາຍ ພົນຈັດຕະວາ ອິ່ນແກ້ວ ມະນີຈັນ ກໍາມະການປະຈໍາພັກແຂວງ, ຫົວໜ້າການທະຫານກອງບັນຊາການທະຫານແຂວງຫຼວງນໍ້າທາ, ຝ່າຍຈີນນຳໂດຍ ສະຫາຍ ພັນເອກ ຢ່າງຈີ້ງ ຫົວໜ້າກອງບັນຊາການທະຫານປ້ອງກັນຊາຍແດນກີ່ງ ແຂວງສິບສອງປັນນາ ກອງທັບປົດປ່ອຍປະຊາຊົນຈີນ, ມີພາກສ່ວນທີ່ກ່ຽວຂ້ອງທັງ 2 ຝ່າຍ ລາວ-ຈີນ, ຈີນ-ລາວເຂົ້າຮ່ວມ.
ໂອກາດນີ້, ທັງ 2 ຝ່າຍໄດ້ມີການທົບທວນຄືນຜົນຂອງການປະຕິບັດວຽກງານທີ່ຜ່ານມາ ທັງເປັນການແລກປ່ຽນຄວາມຄິດເຫັນ ແລະ ປຶກສາຫາລືກ່ຽວກັບການແກ້ໄຂບັນຫາຕ່າງໆຮ່ວມກັນ. ເປັນຕົ້ນ, ການລັກລອບຂ້າມແດນຜິດກົດໝາຍ, ຄ້າຂາຍເຖື່ອນ, ຄ້າຂາຍຢາເສບຕິດ, ຜ່ານມາເຫັນວ່າທັງສອງຝ່າຍໄດ້ພ້ອມກັນເອົາໃຈໃສ່ສຶກສາອົບຮົມປະຊາຊົນທັງສອງປະເທດ, ປະຕິບັດກົດໝາຍການເຂົ້າ-ອອກເມືອງໃຫ້ຖືກຕ້ອງຕາມລະບຽບ, ເປັນເຈົ້າການສະກັດກັ້ນພາກສ່ວນລັກລອບຂ້າມແດນຜິດກົດໝາຍ, ຄ້າຂາຍຢາເສບຕິດ, ລັກລອບເອົາພາຫະນະຂ້າມແດນ, ເພີ່ມທະວີການພົວພັນປະສານສົມທົບລະຫວ່າງກອງບັນຊາການທະຫານແຂວງຫຼວງນໍ້າທາ ກັບ ກອງບັນຊາການທະຫານປ້ອງກັນຊາຍແດນກິ່ງ ແຂວງສິບສອງປັນນາ ກອງທັບປົດປ່ອຍປະຊາຊົນຈີນ ເພື່ອພ້ອມກັນສຸມໃສ່ເຮັດໃຫ້ບໍລິເວນຊາຍແດນມີຄວາມສະຫງົບ ແລະ ເປັນລະບຽບຮຽບຮ້ອຍດີ.
ໃນຕອນທ້າຍຄະນະຜູ້ແທນທັງ 2 ຝ່າຍກໍ່ໄດ້ສະແດງຄວາມຂອບໃຈ ແລະ ໃຫ້ການຮ່ວມມືເປັນເອກະພາບກັນໃນຫຼາຍບັນຫາທີ່ສຳຄັນ ກ່ຽວກັບການແກ້ໄຂບັນຫາທີ່ຈະເກີດຂຶ້ນຕາມບໍລິເວນຊາຍແດນ ລາວ-ຈີນ ຈີນ-ລາວ ໃຫ້ມີຄວາມສອດຄ່ອງດີຂຶ້ນ ແລະ ມີປະສິດທິພາບສູງ. ທັງນີ້, ກໍ່ເພື່ອເປັນການເສີມຂະຫຍາຍສາຍພົວພັນມິດຕະພາບ ອັນເປັນມູນເຊື້ອຖານບ້ານໃກ້ເຮືອນຄຽງທີ່ດີລະຫວ່າງສອງຊາດ, ສອງກອງທັບ ລາວ-ຈີນ ບົນພື້ນຖານຫຼັກການຂອງຄວາມສະເໝີພາບ, ຕ່າງຝ່າຍຕ່າງມີຜົນປະໂຫຍດ, ເຄົາລົບສິດອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນ, ເຄົາລົບຄວາມເປັນເອກະລາດທາງດ້ານການເມືອງ, ພ້ອມກັນສ້າງໃຫ້ຂອບເຂດຊາຍແດນມີສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍດີຂຶ້ນເປັນກ້າວໆ.
ໂດຍ: ແສງທອນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
