ວັນພະຫັດ, ວັນທີ 12 ທັນວາ 2024
ແຂວງບໍ່ແກ້ວ ຕີລາຄາການຈັດຕັ້ງປະຕິບັດການແກ້ໄຂບັນຫາຢາເສບຕິດຕິດພັນກັບສອງວາລະແຫ່ງຊາດ
ເວລາອອກຂ່າວ: 2024-11-13 11:54:25 | ຜູ້ຂຽນ : admin2 | ຈຳນວນຄົນເຂົ້າຊົມ: 989 | ຄວາມນິຍົມ: 
ໃນວັນທີ 11-12 ພະຈິກ 2024 ນີ້, ທີ່ສະໂມສອນໃຫຍ່ຂອງແຂວງບໍ່ແກ້ວ ໄດ້ເປີດກອງປະຊຸມຕີລາຄາການຈັດຕັ້ງປະຕິບັດການແກ້ໄຂບັນຫາຢາເສບຕິດ ຕິດພັນກັບສອງວາລະແຫ່ງຊາດ ແຕ່ປີ 2021-2024 ແລະ ທິດທາງແຜນການປີ 2024-2025. ໂດຍການເປັນປະທານຂອງ ສະຫາຍ ພົນຕີ ສາຍໃຈ ກົມມະສິດ ຮອງເລຂາພັກແຂວງ, ຮອງເຈົ້າແຂວງ, ຮອງປະທານຄະນະກຳມະການ ປກຊ-ປກສ ແຂວງບໍ່ແກ້ວ, ມີ ສະຫາຍ ປອ ທອງຈັນ ມະນີໄຊ ກໍາມະການສູນກາງພັກ ເລຂາພັກແຂວງ ເຈົ້າແຂວງ ແຂວງບໍ່ແກ້ວ, ມີບັນດາຄະນະກຳມະການແກ້ໄຂບັນຫາຢາເສບຕິດຂັ້ນແຂວງ, ຂັ້ນເມືອງ, ອຳນາດການປົກຄອງບ້ານໃນເທດສະບານແຂວງ, ນັກຮຽນນັກສຶກສາເຂົ້າຮ່ວມ.
ສະຫາຍ ພົນຈັດຕະວາ ບຸນມີ ພາມີໄຊ ຄະນະປະຈໍາພັກແຂວງ ຫົວໜ້າການເມືອງກອງບັນຊາການທະຫານແຂວງບໍ່ແກ້ວ ໄດ້ຜ່ານແຜນການການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຂອງຄະນະກຳມະການແກ້ໄຂບັນຫາຢາເສບຕິດລະດັບຊາດ ພ້ອມທັງໄດ້ສະຫຼຸບຕີລາຄາຄືນກ່ຽວກັບການຈັດຕັ້ງປະຕິບັດວຽກງານຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢູ່ແຂວງບໍ່ແກ້ວ ປີ 2021-2024, ຍົກໃຫ້ເຫັນດ້ານດີຜົນງານການຈັດຕັ້ງປະຕິບັດກໍ່ຄືການສະກັດກັ້ນ-ອັດປ່ອງຂ້າມລອຍ, ຍົກສູງປະສິດທິພາບດ້ານການຄຸ້ມຄອງ, ຊີ້ນຳໃນການຈັດຕັ້ງປະຕິບັດຮອບດ້ານໃນການແກ້ໄຂບັນຫາຢາເສບຕິດ, ຜ່ານການຈັດຕັ້ງປະຕິບັດແຜນຜັນຂະຫຍາຍວາລະແຫ່ງຊາດມາຮອດປະຈຸບັນສາມາດມ້າງຄະດີຢາເສບຕິດໄດ້ທັງໝົດ 683 ເລື່ອງ, ກັກຜູ້ຕ້ອງຫາໄດ້ 1.124 ຄົນ, ຢຶດຂອງກາງປະເພດຢາບ້າໄດ້ 254.337.702 ເມັດ, ຢາໄອ໋ 6.932 ຫໍ່, ໜັກ 6.932 ກິໂລກຣາມ, ເຮໂລອິນ 1.244 ແທ່ງນ້ຳໜັກ 497 ກິໂລກຣາມ, ເຄຕາມິນ 1.227 ຫໍ່ນ້ຳໜັກ 1.227 ກິໂລກຣາມ ແລະ ສິ່ງເສບຕິດອື່ນໆນຳອີກ, ໄດ້ຂຶ້ນບັນຊີເປົ້າໝາຍຄ້າຂາຍຢາເສບຕິດລາຍໃຫຍ່ 342 ຄົນ, ລາຍຍ່ອຍ 536 ຄົນ, ໄດ້ກຳນົດພື້ນທີ່ຫຼໍ່ແຫຼມເສັ້ນທາງຈຸດຂ້າມລອຍຂົນສົ່ງຢາເສບຕິດທຸກຊະນິດມີ 37 ຈຸດໃນທົ່ວແຂວງ, ມາຮອດປະຈຸບັນມີຜູ້ເສບຢາເສບຕິດທັງໝົດ 9.103 ຄົນ, ຍິງ 401 ຄົນ, ເຂົ້າບຳບັດແລ້ວ 314 ຄົນ, ຍິງ 10 ຄົນໄດ້ການດຳເນີນຄະດີຢາເສບຕິດລາຍໃຫຍ່ແຕ່ຫົວທີ 25 ຄັ້ງ, ມີ 25 ເລື່ອງ, ມີຜູ້ຖືກຫາ 29 ຄົນ ແລະ ໄດ້ສັ່ງຟ້ອງສານຕັດສິນຄະດີຢາເສບຕິດຕິດທັງໝົດ 473 ເລື່ອງ, ໄດ້ອອກຄຳສັ່ງຕ່າງໆທີ່ພົວພັນຢາເສບຕິດເຂັ້ມງວດເດັດຂາດໄດ້ 1.214 ສະບັບ. ສຳຫຼັບແຜນການສືບຕໍ່ແມ່ນຈະໄດ້ປະຕິບັດຕາມ 6 ແຜນວຽກຈຸດສຸມໂດຍສະເພາະແມ່ນ: ການສ້າງຄວາມຮັບຮູ້ໃນທົ່ວສັງຄົມດ້ວຍການສຶກສາອົບຮົມ, ໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຂອງຢາເສບຕິດ, ສ້າງ ແລະ ປັບປຸງກົດໝາຍ-ນິຕິກຳໃຕ້ກົດໝາຍທີ່ກ່ຽວຂ້ອງກັບບັນຫາຢາເສບຕິດ, ວຽກງານປັບປຸງກົງຈັກການຈັດຕັ້ງ ແລະ ຍົກລະດັບຄວາມສາມາດໃນການເຄື່ອນ ໄຫວເຮັດໜ້າທີ່ການເມືອງຂອງອົງການກວດສືບສວນ-ສອບສວນ, ອົງການໄອຍະການປະຊາຊົນ, ສານປະຊາຊົນ, ອົງການປະຕິບັດຄຳຕັດສິນຂອງສານ ແລະ ພາກ ສ່ວນທີ່ກ່ຽວຂ້ອງຕໍ່ການແກ້ໄຂບັນຫາຢາເສບຕິດ, ຍົກສູງປະສິດທິພາບດ້ານການຄຸ້ມຄອງ, ຊີ້ນຳໃນການຈັດຕັ້ງປະຕິບັດຮອບດ້ານໃນການແກ້ໄຂບັນຫາຢາເສບຕິດ, ປັບປຸງຂີດຄວາມສາມາດໃນການເຄື່ອນໄຫວເຮັດໜ້າຂອງລະບົບການເມືອງແຕ່ລະຂັ້ນເພື່ອຊີ້ນຳ-ນຳພາການແກ້ໄຂບັນຫາຢາເສບຕິດໃນຂົງເຂດຕົນຮັບຜິດຊອບຢ່າງຕັ້ງໜ້າ. ຈາກນັ້ນ, ບັນດາຜູ້ແທນເຂົ້າຮ່ວມກອງປະຊຸມແມ່ນໄດ້ປະກອບຄຳເຫັນຢ່າງກົງໄປກົງມາຕາມຄຳຖາມເຈາະຈິ້ມຊອກໃຫ້ເຫັນຈຸດດີຈຸດອ່ອນ ເພື່ອຊອກຫາວິທີທາງແກ້ໄຂໃນຕໍ່ໜ້າ.
ໂອກາດດຽວກັນນີ້, ປະທານກອງປະຊຸມ ໄດ້ເຈາະຈິ້ມ ແລະ ເນັ້ນໜັກໃຫ້ຄະນະກຳມະການແກ້ໄຂບັນຫາຢາເສບຕິດຂັ້ນແຂວງ, ຂັ້ນເມືອງ, ອຳນາດການປົກຄອງບ້ານໃນເທດສະບານແຂວງ ຈົ່ງພ້ອມກັນເປັນເຈົ້າການຕິດຕາມລູກຫຼານຄົນພາຍໃນຄອບຄົວຢ່າງໃກ້ຊິດຕິດແທດ, ເອົາໃຈໃສ່ເຝົ້າລະວັງການມົ້ວສຸມຂອງລູກຫຼານ-ກຸ່ມໄວລຸ້ນ, ຊຸກຍູ້ໃຫ້ເຂົາເຈົ້າຫັນມາຫຼິ້ນກິລາໃຫ້ຫຼາຍ ເພື່ອຫຼີກລ້ຽງການມົ້ວສຸມ ແລະ ບໍ່ໄປຫຍຸ້ງກ່ຽວກັບສິ່ງເສບຕິດ ແນ່ໃສ່ເຮັດໃຫ້ປະເທດຊາດ ກໍ່ຄືແຂວງບໍ່ແກ້ວ ໄດ້ປອດຈາກຢາເສບຕິດ ເຮັດໃຫ້ແຂວງບໍ່ແກ້ວມີຄວາມສະຫງົບປອດໄພ.
ໂດຍ: ພາກ ສຸທິປັນຍາ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
