ວັນພະຫັດ, ວັນທີ 12 ທັນວາ 2024
ກອງປະຊຸມມອບໝາຍໜ້າທີ່ ໃຫ້ແຕ່ລະພາກສ່ວນ ເພື່ອເຂົ້າຮ່ວມການເຝິກຊ້ອມກອບກູ້ໄພພິບັດ 3 ກອງທັບ ທີ່ຣາຊະອານາຈັກກໍາປູເຈຍ
ເວລາອອກຂ່າວ: 2024-11-13 15:18:26 | ຜູ້ຂຽນ : admin2 | ຈຳນວນຄົນເຂົ້າຊົມ: 1075 | ຄວາມນິຍົມ: 
ວັນທີ 13 ພະຈິກ 2024 ນີ້, ຢູ່ກະຊວງປ້ອງກັນປະເທດ ໄດ້ຈັດກອງປະຊຸມມອບໝາຍໜ້າທີ່ ໃຫ້ແຕ່ລະພາກສ່ວນ ທີ່ຈະເດີນທາງເຂົ້າຮ່ວມການເຝິກຊ້ອມກອບກູ້ໄພພິບັດ 3 ກອງທັບ (ລາວ, ຫວຽດນາມ ແລະ ກຳປູເຈຍ) ທີ່ຣາຊະອານາຈັກກໍາປູເຈຍ ເປັນເຈົ້າພາບ ໃນລະຫວ່າງ ວັນທີ 15-26 ພະຈິກ 2024 ນີ້, ໂດຍການເປັນປະທານຂອງ ສະຫາຍ ພົນຕີ ສົມພອນ ມິດຕະພອນ ຮອງຫົວໜ້າກົມໃຫຍ່ເສນາທິການກອງທັບ, ຮອງຫົວໜ້າຄະນະຊີ້ນຳການ ເຝິກຊ້ອມກອບກູ້ໄພພິບັດຮ່ວມ 3 ກອງທັບ, ມີອະນຸກຳມະການ, ຄະນະຮັບຜິດຊອບ, ພາກສ່ວນທີ່ກ່ຽວຂ້ອງ ແລະ ນັກເຝີກຊ້ອມ ເຂົ້າຮ່ວມ.
ສະຫາຍ ພັນເອກ ເຂັມພອນ ແກ້ວວິໄຊ ຮອງຫົວໜ້າຫ້ອງການ ກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງ ຂອງກະຊວງປ້ອງກັນປະເທດ ວ່າດ້ວຍການແຕ່ງຕັ້ງຄະນະຊີ້ນຳ ແລະ ນັກເຝີກຊ້ອມກອບກູ້ໄພພິບັດ ກອງທັບປະຊາຊົນລາວ ເຂົ້າຮ່ວມການເຝິກຊ້ອມກອບກູ້ໄພພິບັດ 3 ກອງທັບ ແລະ ຜ່ານແຜນການເດີນທາງໄປ-ກັບ. ຈາກນັ້ນ, ສະຫາຍ ພັນໂທ ຄຳຜາຍ ອ້ວນວິໄລ ຮອງຫົວໜ້າກົມອົບຮົມ ກົມໃຫຍ່ເສນາທີການກອງທັບ, ຫົວໜ້າຄະນະຊີ້ນໍາພາກສະໜາມ ໄດ້ລາຍງານການກະກຽມຄວາມພ້ອມດ້ານຕ່າງໆ ຂອງຄະນະທີ່ຈະເດີນທາງເຂົ້າຮ່ວມການເຝິກຊ້ອມກອບກູ້ໄພພິບັດ 3 ກອງທັບ ທີ່ຣາຊະອານາຈັກກໍາປູເຈຍ ເປັນເຈົ້າພາບ ເປັນຕົ້ນແມ່ນ ລາຍງານການດຳເນີນໜັງສືຜ່ານແດນ, ການດໍາເນີນເອກະສານຂໍຍົກເວັ້ນພາສີອຸປະກອນການເຝີກຊ້ອມ, ວຽກງານຮັບປະກັນພາຫະນະຮັບ-ສົ່ງ, ລາຍງານແຜນການເດີນທາງ ແລະ ວຽກງານຮັບປະກັນດ້ານອື່ນໆ... ລວມເຖິງການມອບໝາຍໜ້າທີ່ຄວາມຮັບຜິດຊອບ ໃຫ້ແຕ່ລະພາກສ່ວນຢ່າງລະອຽດຈະແຈ້ງ ຖືກຕ້ອງກັບໜ້າທີ່ວຽກງານຕົວຈິງ ຂອງແຕ່ລະສະຫາຍ ເພື່ອສະດວກໃນການນຳພາ, ຄຸ້ມຄອງ ກໍາລັງເຝີກຊ້ອມເຂົ້າຮ່ວມການເຝິກຊ້ອມກອບກູ້ໄພພິບັດ 3 ກອງທັບ ໃຫ້ສຳເລັດຕາມແຜນການ.
ໂອກາດນີ້, ສະຫາຍ ພົນຕີ ສົມພອນ ມິດຕະພອນ ໄດ້ສະແດງຄວາມຍ້ອງຍໍຊົມ ເຊີຍຕໍ່ຄະນະຮັບຜິດຊອບທຸກພາກສ່ວນ ທີ່ໄດ້ເອົາໃຈໃສ່ປະຕິບັດໜ້າທີ່ຕາມພາລະບົດບາດ ຂອງຕົນໃຫ້ປະສົບຜົນສໍາເລັດ. ພ້ອມທັງ ເນັ້ນໜັກໃຫ້ຄະນະຊີ້ນຳ, ຄະນະຮັບຜິດຊອບ ແລະ ກໍາລັງເຝີກຊ້ອມ ທຸກພາກສ່ວນ ທີ່ເຂົ້າຮ່ວມການເຝິກຊ້ອມກອບກູ້ໄພພິບັດ 3 ກອງທັບ ໃນຄັ້ງນີ້, ຈົ່ງພ້ອມກັນຍົກສູງຄວາມຮັບຜິດຊອບຕໍ່ໜ້າທີ່ການເມືອງ ທີ່ໄດ້ຮັບມອບໝາຍ, ເປັນເຈົ້າການປະຕິບັດຕາມຂໍ້ກຳນົດ, ກົດລະບຽບ ຂອງກອງທັບວາງອອກຢ່າງເຂັ້ມງວດ, ປະຕິບັດລະບຽບວິໄນ, ມະຕິຄຳສັ່ງ ຂອງຜູ້ບັນຊາ ແລະ ແຜນການເຝິກຊ້ອມ ຢ່າງເຄັດຄັດ, ເອົາໃຈໃສ່ເຝິກຊ້ອມດ້ວຍຄວາມຫ້າວຫັນ ເພື່ອແນໃສ່ຮັບປະກັນຄວາມປອດໄພ ແລະ ໄດ້ຮັບສຳເລັດຜົນຢ່າງຮອບດ້ານ. ສິ່ງສຳຄັນແມ່ນ ຕ້ອງຮັກສາໄດ້ສາຍພົວພັນຮ່ວມມື ແລະ ຮັດແໜ້ນຄວາມສາມັກຄີ ຂອງສາມຊາດ, ສາມກອງທັບ ກໍາປູເຈຍ-ລາວ-ຫວຽດນາມ ໃຫ້ນັບມື້ນັບແໜ້ນແຟ້ນຍີ່ງໆຂຶ້ນ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
