
ເມືອງບາຈຽງຈະເລີນສຸກ ຖືເອົາວຽກງານ ປກຊ-ປກສ ເປັນສຳຄັນ
ເວລາອອກຂ່າວ: 2025-01-23 08:54:24 | ຜູ້ຂຽນ : admin1 | ຈຳນວນຄົນເຂົ້າຊົມ: 210 | ຄວາມນິຍົມ:
ໃນໄລຍະ 5 ປີຜ່ານມາ ເມືອງບາຈຽງຈະເລີນສຸກ ແຂວງຈຳປາສັກ ແມ່ນຮັກສາໄດ້ຄວາມໜັກແໜ້ນ ເຂັ້ມແຂງ ທາງດ້ານປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ທັງນີ້ກໍເນື່ອງ ຈາກວ່າຄະນະກຳມະການປ້ອງກັນຊາດ-ປ້ອງກັນຄວາມສະຫງົບແຂວງ ໄດ້ເອົາໃຈໃສ່ນຳພາ-ຊີ້ນຳປັບປຸງຕານ່າງ ປກຊ-ປກສ ຢ່າງຕໍ່ເນື່ອງ ແລະ ຫັນວຽກງານດັ່ງກ່າວເປັນໜ້າທີ່ຂອງທົ່ວປວງຊົນຮອບດ້ານຂອງພັກ.
ສະຫາຍ ພັນໂທ ສີພູມ ທອງສະໝຸດ ກຳມະການພັກເມືອງ ເລຂາຄະນະພັກຮາກຖານ ຫົວໜ້າກອງບັນຊາການປ້ອງກັນຄວາມສະຫງົບເມືອງບາຈຽງຈະເລີນສຸກ ແຂວງຈຳປາສັກໃຫ້ຮູ້ວ່າ: ໃນໄລຍະຜ່ານມາໄດ້ສຸມໃສ່ການປັບປຸງກໍ່ສ້າງບ້ານຕົວແບບ ເຮັດວຽກງານປ້ອງກັນຊາດເຂັ້ມແຂງ-ປ້ອງກັນຄວາມສະຫງົບດີ ໃຫ້ໄປຕາມມາດຖານເງື່ອນໄຂ, ຮັບປະກັນໄດ້ທາງດ້ານຄຸນະພາບ ແລະ ປະລິມານ ໂດຍເລັງໃສ່ການປັບປຸງກໍ່ສ້າງ ແລະ ນຳພາກຳລັງ ປກຊ-ປກສ ບ້ານ ໃຫ້ມີຄວາມຮັບຮູ້-ເຂົ້າໃຈ ໃນການເຄື່ອນໄຫວໜ້າທີ່ຕາມພາ ລະບົດບາດ ແລະ ໜ້າທີ່ຄວາມຮັບຜິດຊອບ ເຮັດໃຫ້ກຳລັງປ້ອງກັນຊາດ-ປ້ອງກັນຄວາມສະຫງົບ ເປັນກຳລັງຫຼັກແຫຼ່ງ ເຮັດວຽກງານປ້ອງກັນຄວາມສະຫງົບຢູ່ຂັ້ນຮາກຖານບ້ານໄດ້ເປັນຢ່າງດີ. ສຳລັບວຽກງານຮາກຖານໃນໄລຍະຜ່ານມາ ສາມາດປະກາດ ແລະ ຮັບຮອງເປັນບ້ານຕົວແບບດ້ານວຽກງານ ປກຊ-ປກສ ໄດ້ 47 ບ້ານ ເທົ່າກັບ 100% ຂອງຈຳນວນບ້ານທັງໝົດໃນທົ່ວເມືອງ. ພ້ອມນີ້, ໃນແຕ່ລະປີກໍໄດ້
ເຄື່ອນໄຫວຕິດຕາມກວດກາ ແລະ ຊຸກຍູ້ປະເມີນຜົນຄືນ ໃນແຕ່ລະໄລຍະ ເພື່ອຮັບປະກັນໄດ້ໃນການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງ, ບ້ານປ້ອງກັນຄວາມສະຫງົບດີ ແລະ ມີຫຼາຍບ້ານໄດ້ຮັບໃບຢັ້ງຢືນເປັນບ້ານປ້ອງກັນຄາມສະຫງົບດີ 3 ປີຊ້ອນ 46 ບ້ານ ມີ 11.678 ຄອບຄົວ.
ສຳລັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໂດຍປະຕິບັດຕາມຄຳສັ່ງຂອງກົມການເມືອງສູນກາງພັກ ສະບັບທີ 02/ກມສພ ວ່າດ້ວຍການເພີ່ມທະວີການນຳພາ-ຊີ້ນຳຂອງຄະນະພັກ, ຄະນະນຳແຕ່ລະຂັ້ນຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ ວ່າດ້ວຍການແກ້ໄຂບັນຫາຢາເສບຕິດ, ຄະນະພັກຮາກຖານປ້ອງກັນຄວາມສະຫງົບເມືອງ ໄດ້ສ້າງແຜນ ແລະ ປັບປຸງນິຕິກຳຈຳນວນໜຶ່ງ ເພື່ອເປັນບ່ອນອີງແກ່ການຈັດຕັ້ງປະຕິບັດ ໂຄສະນາເຜີຍແຜ່ການແກ້ໄຂບັນຫາຢາເສບຕິດ, ຜົນຮ້າຍ ແລະ ໄພອັນຕະລາຍຂອງຢາເສບຕິດ, ການຄ້າມະນຸດ, ປະ ມວນກົດໝາຍອາຍາ, ລະບຽບການສັນຈອນຕາມທ້ອງຖະໜົນ ແລະ ນິຕິກຳອື່ນໆ ໄດ້ 65 ຄັ້ງ, ມີຜູ້ເຂົ້າຮ່ວມ 9.580 ຄົນ ຍິງ 3.779 ຄົນ. ນອກນັ້ນຍັງມີການຕິດຕັ້ງປ້າຍໂຄສະນາ ຢູ່ຕາມພື້ນທີ່ຈຸດສຸມທີ່ມີຄວາມສ່ຽງຕ່າງໆ, ໄດ້ປັບປຸງກົງຈັກການຈັດຕັ້ງຂັ້ນພະແນກ ແລະ ບັນຈຸຊັບຊ້ອນນາຍ ແລະ ພົນຕຳຫຼວດຢູ່ແຕ່ລະຂັ້ນ ໄດ້ຮັບອຸປະກອນຮັບໃຊ້ ກ່ຽວກັບວຽກງານແກ້ໄຂຢາເສບຕິດຕ່າງໆ ເຊັ່ນ: ເສື້ອເກາະກັນກະສຸນ, ເຄື່ອງກວດປັດຢ້ຽວ ເພື່ອຊອກຫາສານເສບຕິດ ແລະ ອື່ນໆ ການແກ້ໄຂ ໃນ 3 ປີຜ່ານ ມາສາມາດເລີກຮື້ກຸ່ມຄ້າ-ຂາຍ ແລະ ມົ້ວສຸມເສບຢາເສບຕິດ ໄດ້ 361 ລາຍ, ກັກຕົວຕ້ອງຫາ ໄດ້ 528 ຄົນ ຍິງ 15 ຄົນ ພ້ອມເຄື່ອງຂອງກາງ ປະເພດຢາບ້າ 163.142 ເມັດ, ຢາໄອ 2 ຖົງນ້ອຍ, ປືນດັດແປງ 4 ກະບອກ, ປືນແກັບ 12 ກະບອກ, ລູກປືນ AK ຈຳນວນ 11 ລູກ ແລະ ວັດຖຸມີຄ່າຈຳນວນໜຶ່ງ.
ພ້ອມນີ້, ກຳລັງ ປກສ ເມືອງ ຍັງໄດ້ສົມທົບກັບກຳລັງ ປກສ ບ້ານ ໃນ 47 ບ້ານ ເພື່ອເຮັດໜ້າ ທີ່ເຄື່ອນໄຫວໂຄສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດທີ່ວາງອອກໃນແຕ່ລະໄລຍະ, ເກັບກຳຂຶ້ນສະຖິຕິເປົ້າໝາຍແກ້ໄຂປະກົດການຫຍໍ້ທໍ້ໃນສັງຄົມ, ເກັບກຳປັດໄຈໜໍ່ແໜງຂອງຄວາມບໍ່ສະຫງົບທາງດ້ານການເມືອງ ໂດຍສະ ເພາະໄດ້ສຸມໃສ່ແກ້ໄຂບັນຫາຢາ ເສບຕິດ ໃນໄລຍະປະຕິບັດວາ ລະແຫ່ງຊາດໃຫ້ມີໝາກຜົນສູງ, ເອົາໃຈໃສ່ພົວພັນໃນການປະ ສານສົມທົບກັບບັນດາເມືອງ, ແຂວງທີ່ມີເຂດເຊື່ອມຕໍ່ເພື່ອແລກປ່ຽນສະພາບຮອບດ້ານເປັນຕົ້ນ ເມືອງເລົ່າງາມ, ນະຄອນປາກເຊ, ເມືອງປາກຊ່ອງ, ເມືອງຊະນະສົມບູນ, ເມືອງໂພນທອງ ແລະ ບັນດາບໍລິສັດ, ໂຮງງານຂອງຕ່າງປະເທດທີ່ມາລົງທຶນຢູ່ເມືອງບາຈຽງຈະເລີນສຸກ ເພື່ອເຮັດໃຫ້ສັງຄົມມີຄວາມສະຫງົບໂດຍພື້ນຖານ.
ສະຫາຍ ພັນໂທ ສີພູມ ທອງສະໝຸດ ກ່າວຕື່ມວ່າ: ສຳລັບແຜນການເຄື່ອນໄຫວນຳພາ-ຊີ້ນຳ ວຽກງານໃນຕໍ່ໜ້ານີ້, ຄະນະພັກ-ຄະນະນຳ ປກຊ-ປກສ ເມືອງບາຈຽງຈະເລີນສຸກ ຈະສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ຂອງຄະນະພັກ ແຕ່ລະຂັ້ນ ໃຫ້ເຂົ້າສູ່ລວງເລິກ ແລະ ສ້າງການຫັນປ່ຽນໃໝ່ທີ່ແທ້ຈິງ, ໃນນັ້ນບັນດາໜ້າວຽກທີ່ເປັນຈຸດສຸມໃນການນຳພາ ກໍຄື ວຽກກໍ່ສ້າງພັກ-ພະນັກງານ ໃນກຳລັງ ປກຊ-ປກສ ໃຫ້ມີຄວາມໜັກແໜ້ນ, ຈົ່ງຮັກພັກດີຕໍ່ປະເທດຊາດ ແລະ ປະຊາຊົນ, ສ້າງກຳລັງໃຫ້ຮັບປະກັນທັງ 3 ຮຸ່ນ ໄປພ້ອມກັບການປັບປຸງກົງຈັກການຈັດຕັ້ງ ໃຫ້ໜັກແໜ້ນ ເຂັ້ມແຂງ.
ໂດຍ: ເກດສະໜາ ແກ້ວສຸວັນນະແສງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ