POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນເສົາ, ວັນທີ 07 ທັນວາ 2024

ຖະແຫຼງຂ່າວ ຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ປະຈໍາວັນທີ 24 ເມສາ ປີ 2020
ເວລາອອກຂ່າວ: 2020-04-24 16:47:40 | ຜູ້ຂຽນ : admin2 | ຈຳນວນຄົນເຂົ້າຊົມ: 316 | ຄວາມນິຍົມ:

ໂດຍ: ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີ ກະຊວງສາທາລະນະສຸກ, ຜູ້ປະຈໍາການ ຄະນະສະເພາະກິດ ສະພາບການເຝົ້າລະວັງ COVID-19 ຢູ່ ສປປ ລາວ ຮອດ 5 ໂມງແລງ ຂອງວັນທີ 23 ເມສາ 2020 1. ວຽກງານຈຸດຜ່ານດ່ານ • ຈໍານວນຜູ້ເດີນທາງເຂົ້າມາ ມີທັງໝົດ 1,264 ຄົນ ຜູ້ເດີນທາງ ຜ່ານດ່ານລາວ-ໄທ ທັງໝົດ 792 ຄົນ, ໃນນັ້ນມີແຮງງານລາວມາແຕ່ໄທ 08 ຄົນ (ຜ່ານດ່ານຊ່ອງແມັກ ແຂວງຈໍາປາສັກ ຈໍານວນ 05 ຄົນ ແລະ ຜ່ານດ່ານຂົວມິດຕະພາບ II ສະຫວັນນະເຂດ ຈໍານວນ 03 ຄົນ), ເຫຼືອນັ້ນແມ່ນພະນັກງານຂັບລົດສົ່ງສິນຄ້າ • ຜູ້ເດີນທາງ ຜ່ານດ່ານລາວ-ຈີນ ທັງໝົດ 157 ຄົນ, ທັງໝົດ ແມ່ນຜູ້ຂັບລົດບັນທຸກຂົນສົ່ງສິນຄ້າ • ຜູ້ເດີນທາງ ຜ່ານດ່ານລາວ-ຫວຽດ ທັງໝົດ 315 ຄົນ, ທັງໝົດແມ່ນຜູ້ຂັບລົດບັນທຸກຂົນສົ່ງສິນຄ້າ • ຜູ້ເດີນທາງ ຜ່ານດ່ານລາວ-ກຳປູເຈຍ ທັງໝົດ 00 ຄົນ • ຜູ້ເດີນທາງ ຜ່ານສະໜາມບິນ ທັງໝົດ 00 ຄົນ • ໃນທຸກດ່ານ ແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້ 2. ການເຝົ້າລະວັງ ແລະ ວິເຄາະ • ໃນວັນທີ 23 ເມສາ 2020, ໄດ້ເກັບຕົວຢ່າງມາກວດທັງໝົດ 83 ຄົນ, ໃນນັ້ນມີ ຜູ້ມີມີອາການສົງໄສມາກວດຢູ່ໂຮງໝໍ 12 ຄົນ ແລະ ແຮງງານລາວທີ່ກັບມາຈາກ ປະເທດໄທ 71 ຄົນ (ມີອາການ 02 ຄົນ ແລະ ບໍ່ມີອາການ 69 ຄົນ). • ໃນຈໍານວນ 83 ຄົນ ທີ່ມາກວດນັ້ນ ມີ ນະຄອນຫຼວງວຽງຈັນ 09 ຄົນ ແລະ ຕ່າງແຂວງ 74 ຄົນ ລາຍລະອຽດ ດັ່ງລຸ່ມນີ້: - ຈຳປາສັກ 46 ຕົວຢ່າງ - ສະຫວັນນະເຂດ 19 ຕົວຢ່າງ - ຄຳມ່ວນ 04 ຕົວຢ່າງ - ສາລະວັນ 03 ຕົວຢ່າງ - ຫຼວງນ້ຳທາ 01 ຕົວຢ່າງ - ບໍລິຄຳໄຊ 01 ຕົວຢ່າງ • ຜົນກວດທັງໝົດ 83 ກໍລະນີ ບໍ່ພົບເຊື້ອ. ໝາຍຄວາມວ່າໃນວັນທີ 23 ເມສາ 2020 ບໍ່ມີກໍລະນີໃໝ່. • ນັບແຕ່ເດືອນມັງກອນ ຮອດ ວັນທີ 23 ເມສາ 2020 ໄດ້ເກັບຕົວຢ່າງມາກວດທັງໝົດ ມີ 1,611 ຄົນ, ກວດພົບເຊື້ອທັງໝົດ 19 ຄົນ (12 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ). • ຈໍານວນຜູ້ສໍາຜັດໃກ້ຊິດກັບຜູ້ຕິດເຊື້ອທັງໝົດ ທີ່ໄດ້ຕິດຕາມ ແຕ່ວັນທີ 09 ມີນາ ຮອດ 23 ເມສາ 2020 ມີ ທັງໝົດ 313 ຄົນ, ໝົດກໍານົດຕິດຕາມ ທັງໝົດ 311 ຄົນ, ຍັງສືບຕໍ່ຕິດຕາມທັງໝົດ 02 ຄົນ ທັງໝົດແມ່ນຢູ່ນະຄອນຫຼວງວຽງຈັນ ແລະ ຕິດຕາມຢູ່ໂຮງໝໍ 103, ຍັງອີກ 01 ມື້ ແມ່ນຈະຄົບກຳນົດຕິດຕາມ 14 ວັນ, ຖືວ່າຜູ້ສໍາພັດໃກ້ຊິດກັບຄົນເຈັບ ທັງໝົດແມ່ນຢູ່ນະຄອນຫຼວງວຽງຈັນ. 3. ການຕິດຕາມ ຢູ່ສະຖານທີ່ຈຳກັດບໍລິເວນຂອງແຂວງ ແລະ ຜູ້ຈຳກັດບໍລິເວນ ຢູ່ເຮືອນ ສຳລັບຜູ້ເດີນທາງມາຈາກຕ່າງປະເທດ • ມາຮອດວັນທີ 23 ເມສາ 2020 ທົ່ວປະເທດ ຍັງມີ ສູນຈໍາກັດບໍລິເວນ ທັງໝົດ 292 ສູນ, ມີຜູ້ຈຳກັດບໍລິເວນຢູ່ສູນ 1,228 ຄົນ, ຈໍາກັດບໍລິເວນຢູ່ເຮືອນ 880 ຄົນ, ເກັບຕົວຢ່າງມາກວດວິເຄາະຫາເຊື້ອ ມີທັງໝົດ 366 ຄົນ. ທັງໝົດບໍ່ພົບເຊື້ອ. 4. ການຕິດຕາມປີ່ນປົວຄົນເຈັບຢູ່ໂຮງໝໍ - ປະຈຸບັນຍັງເຫຼືອມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍທັງໝົດ 15 ຄົນ. - ຢູ່ໂຮງໝໍແຂວງຫຼວງພະບາງ ມີ 01 ຄົນ ເປັນເພດຊາຍ, ເຫັນວ່າມີອາການຄົງຕົວ ຂັ້ນເບົາບາງ ແລະ ຍັງຕິດຕາມປິ່ນປົວຕາມອາການ ແລະ ກວດຫາເຊື້ອເພື່ອຢັ້ງຢືນ. - ຢູ່ໂຮງໝໍມິດຕະພາບ ມີ 14 ຄົນ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມປິ່ນປົວຕາມອາການ ແລະ ກວດຫາເຊື້ອເພື່ອຢັ້ງຢືນ. 5. ພວກເຮົາໄດ້ສືກສາສະພາບການລະບາດຂອງປະເທດໃກ້ຄຽງ ແລະ ສະພາບການລະ ບາດຢູ່ໃນທົ່ວໂລກ ເຫັນວ່າ: ມາຮອດເວລາ 6:00 ໂມງເຊົ້າ ຂອງວັນທີ 24 ເມສາ 2020, ທົ່ວໂລກມີການລາຍງານການລະບາດ ທັງໝົດ 210 (ປະເທດ/ເຂດ). - ມີການຢັ້ງຢືນ ຜູ້ຕິດເຊື້ອພະຍາດ COVID-19 ແມ່ນ 2,714,995 (83,210 ໃໝ່) - ເສຍຊິວິດ 190,397 (6,331 ໃໝ່) - ປີ່ນປົວຫາຍດີ 744,961 (27,741 ໃໝ່). ຜູ້ປິ່ນປົວຫາຍດີປະຈໍາວັນກວມເອົາ 33.3 % ຂອງຈໍານວນຜູ້ຕິດເຊື້ອໃໝ່ປະຈໍາວັນ. - ມີບາງປະເທດ ຈຳນວນຜູ້ຕິດເຊື້ອມື້ດຽວ ມີເຖິງ 30,257 ຄົນ ແລະ ເສຍຊີວິດ 2,095 ຄົນ ຕໍ່ມື້. - ອັດຕາຄວາມຮ້າຍແຮງຂອງມື້ນີ້ແມ່ນເພິ່ມຂຶ້ນ 7.01 % (ມື້ວານນີ້ 6.98 %). • ສະເພາະກຸ່ມປະເທດອາຊຽນ ຍັງມີບາງປະເທດທີ່ມີອັດຕາການຕິດເຊື້ອ ແລະ ເສຍຊີວິດສູງຢູ່ ມີບາງປະເທດຕິດເຊື້ອໃໝ່ ໃນວັນທີ 23 ເມສາ 2020 ນີ້ ເຖິງ 1,037 ຄົນ ແລະ ເສຍຊີວິດໃນມື້ດຽວໃນກຸ່ມປະເທດ ອາຊຽນ 31 ຄົນ. 6. ຂໍ້ແນະນຳ ບັນດາທ່ານທີ່ນັບຖື ແລະ ຮັກແພງ, • ສະເພາະ ສປປ ລາວ ກໍ່ຍັງເຫັນວ່າ 12 ມື້ທີ່ບໍ່ມີຜູ້ຕິດເຊື້ອໃໝ່. ໃນຈໍານວນຜູ້ຕິດເຊື້ອ 19 ຄົນ ກໍ່ໄດ້ອອກໂຮງໝໍແລ້ວ 04 ຄົນ ແລະ ຍັງເຫຼືອ 15 ຄົນ ທີ່ຈະໄດ້ສືບຕໍ່ຕິດຕາມ ປິ່ນປົວຕາມອາການຢ່າງໃກ້ຊິດ. ສະພາບການລະບາດຄົງທີ່ຄືແນວນີ້ ກໍ່ຍ້ອນວ່າ ປະຊາຊົນບັນດາເຜົ່າ ໄດ້ເປັນເຈົ້າການ ຮ່ວມໄມ້ຮ່ວມມື ໃນການຈັດຕັ້ງປະຕິບັດ ຄໍາສັ່ງ ເລກທີ 06/ນຍ, ແຕ່ພວກເຮົາ ຈະບໍ່ໄດ້ລົດລະມາດຕະການເຝົ້າລະວັງ ຕິດຕາມຄົ້ນຫາ ຜູ້ສົງໄສທີ່ຈະຕິດເຊື້ອ ໂດຍສະເພາະຜູ້ທີ່ຍັງຈຳກັດບໍລິເວນຕົນເອງຢູ່ສູນ ແລະ ຢູ່ເຮືອນ ລວມທັງຜູ້ເດີນທາງຜ່ານຊາຍແດນເຂົ້າມາໃໝ່ ເພື່ອມາກວດວິເຄາະຢັ້ງຢືນພະຍາດໃຫ້ໄດ້ໄວ ແລະ ປິ່ນປົວຢ່າງທັນການ, ສະກັດກັ້ນ ບໍ່ໃຫ້ມີການລະບາດຄືນຄັ້ງທີ 2. • ເພື່ອເປັນການສືບຕໍ່ເຝົ້າລະວັງຢ່າງເຂັ້ມງວດຕໍ່ຜູ້ທີ່ຈະເດີນທາງເຂົ້າມາ ສປປ ລາວ ຈາກຕ່າງປະເທດລວມທັງແຮງງານລາວທີ່ຈະມາຈາກປະເທດໄທ ຫ້ອງວ່າການສຳນັກງານນາຍົກລັດຖະມົນຕີຈິ່ງມີແຈ້ງການ ເລກທີ 507/ຫສນຍ ວັນທີ່ 24 ເມສາ 2020 ເຖິງເຈົ້າຄອງນະຄອນຫຼວງ ແລະ ບັນດາແຂວງທົ່ວປະເທດ ໃຫ້ ກະກຽມ ສະຖານທີ່ ຈຳກັດບໍລິເວນ ຜູ້ເດີນທາງມາຈາກຕ່າງປະເທດ ແລະ ຜູ້ສຳພັດໃກ້ຊິດກັບຜູ້ຕິດເຊື້ອ ສອດຄ່ອງກັບເງື່ອນໄຂ ແລະ ມາດຕະຖານ ທີ່ຄະນະສະເພາະກິດວາງອອກ ເພື່ອຮອງຮັບການຜ່ອນຜັນມາດຕະການ ຄຳສັ່ງ ເລກທີ 06/ນຍ ໃນຕໍ່ໜ້າ. • ໃນວັນທີ 24 ເມສາ 2020, ໄດ້ມີ ຖະແຫຼງຂ່າວກ່ຽວກັບ ກອງປະຊຸມ ລັດຖະບານ ສະໃໝສາມັນ ປະຈຳເດືອນ ເມສາ 2020. ໂດຍໄດ້ເນັ້ນໃຫ້ ຄະນະສະເພາະກິດ ບັນດາຂະແໜງການທີ່ກ່ຽວຂ້ອງ ທ້ອງຖິ່ນ ແລະ ທົ່ວສັງຄົມ ເອົາໃຈໃສ່ການຈັດຕັ້ງປະຕິບັດ ຄຳສັ່ງເລກທີ 06/ນຍ ແລະ ແຈ້ງການ ຫຼື ຄຳແນະນຳ ຂອງ ຄະນະສະເພາະກິດ, ຂະແໜງການທີ່ກ່ຽວຂ້ອງຢ່າງເຂັ້ມງວດຈົນຮອດວັນທີ່ 3 ພຶດສະພາ 2020 • ສະນັ້ນ ຈຶ່ງຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າ, ອົງການຈັດຕັ້ງທຸກພາກສ່ວນ ຈົ່ງສືບຕໍ່ຮ່ວມໄມ້ຮ່ວມມື ເປັນເຈົ້າການສືບຕໍ່ ຈັດຕັ້ງປະຕິບັດຄຳສັ່ງ ເລກທີ 06/ນຍ ແລະ ບັນດາຂໍ້ແນະນຳຕ່າງໆຢ່າງຖືກຕ້ອງ ແລະ ເຂັ້ມງວດ. • ຖ້າວ່າບັນດາທ່ານ ຫຼື ຄົນໃນຄອບຄົວຂອງທ່ານມີອາການຄ້າຍຄືໄຂ້ຫວັດ ຫຼື ອາການອື່ນໆຜິດປົກກະຕິ ຂໍໃຫ້ມາກວດນໍາແພດໝໍຢູ່ໂຮງໝໍ ບໍ່ໃຫ້ຢ້ານວ່າຈະມາຕິດເຊື້ອ COVID-19 ຢູ່ໂຮງໝໍ ເພາະວ່າ ແຕ່ລະໂຮງໝໍມີການຈັດສັນລະບົບ ຄັດແຍກຜູ້ສົງໃສເປັນພະຍາດ COVID-19 ແລະ ຜູ້ເຈັບເປັນທົ່ວໄປອອກຈາກກັນ ເປັນເຂດໜຶ່ງສະເພາະ. • ບັນດາທ່ານໄດ້ຮັບຮູ້ຂໍ້ມູນຂ່າວສານສະພາບການລະບາດຂອງພະຍາດ COVID-19 ຢູ່ປະເທດເຮົາ ແລະ ໃນໂລກແລ້ວ. • ພັກ ແລະ ລັດຖະບານໄດ້ເປັນຫ່ວງເປັນໄຍ ຕໍ່ການຄວບຄຸມ ແລະ ການແກ້ໄຂການ ລະບາດຢູ່ປະເທດຂອງພວກເຮົາ ໄດ້ວາງມາດຕະການ ແລະ ຂໍ້ແນະນຳຕ່າງໆ ອອກ ຊຶ່ງກໍ່ຊາບດີວ່າມີຜົນກະທົບຕໍ່ການດຳລົງຊີວິດປະຈໍາວັນຂອງພໍ່ແມ່ປະຊາຊົນ ກໍ່ຄືກະທົບຕໍ່ການດໍາເນີນທຸລະກິດ ແຕ່ກໍ່ຂໍໃຫ້ຮຽກຮ້ອງບັນດາທ່ານໃຫ້ມີຄວາມອົດທົນ ພ້ອມກັນຜ່ານຜ່າວິກິດນີ້, ຂໍໃຫ້ບັນດາທ່ານຈົ່ງພ້ອມກັນປ້ອງກັນຕົນເອງ, ປ້ອງກັນ ຄອບຄົວ ແລະ ຜູ້ທີ່ຮັກແພງໃກ້ຊິດກັບບັນດາທ່ານຈາກການຕິດເຊື້ອພະຍາດ COVID-19 ຖືວ່າແມ່ນພັນທະ ແລະ ຄວາມຮັບຜິດຊອບຂອງບັນດາທ່ານ ແລະ ເປັນການປະກອບສ່ວນອັນສຳຄັນໃຫ້ແກ່ປະເທດຊາດ. ຂໍຂອບໃຈ

news to day and hot news