POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອັງຄານ, ວັນທີ 03 ທັນວາ 2024

ປະສານສົມທົບກັບ ບັ້ນຮົບ ດຽນບຽນຝູ ຕີເອົາຊະນະພວກລ່າເມືອງຂຶ້ນຝຣັ່ງ ຢູ່ແນວຮົບເຂດເໜືອລາວ
ເວລາອອກຂ່າວ: 2024-05-03 09:35:48 | ຜູ້ຂຽນ : admin3 | ຈຳນວນຄົນເຂົ້າຊົມ: 2484 | ຄວາມນິຍົມ:

ໃນ 3 ແຂວງຄື: ຫຼວງພະບາງ, ບໍ່ແກ້ວ ແລະ ຜົ້ງສາລີ ເຊິ່ງຕິດກັບຊາຍແດນຂອງ 4 ປະເທດ (ຫວຽດນາມ, ຈີນ, ມຽນມາ, ໄທ) ແມ່ນຂົງເຂດໜຶ່ງທີ່ມີທີ່ຕັ້ງອັນສຳຄັນ ທາງດ້ານການທະຫານ ແລະ ການເມືອງຢູ່ທິດ ຕາເວັນຕົກສ່ຽງເໜືອຂອງປະ ເທດລາວ ໃນນັ້ນ, ຫຼວງພະບາງ ແລະ ເມືອງໄຊ ສັດຕູໄດ້ຖືເປັນ “ຫຼັກໝາຍໜຶ່ງຂອງໂລກເສລີເຊິ່ງຄອມມູນິດບໍ່ສາມາດຜ່ານໄດ້”. ພາຍຫຼັງແຂວງ ລາຍເຈົ້າ ໄດ້ຮັບການປົດປ່ອຍ ແລະ ດຽນບຽນຝູ ຫວຽດນາມ ໄດ້ຕົກຢູ່ໃນ ສະພາບການອັນໂດດດ່ຽວ, ນາຍພົນ ນາວາ ຟ້າວຟັ່ງສົ່ງ 6 ກອງພັນເພີ່ມໃຫ້ “ແນວປ້ອງກັນ ແນວຮົບນ້ຳອູ” ເພື່ອປ້ອງກັນ “ສາຍພົວພັນຍຸດທະສາດ” ລະ ຫວ່າງ ຫຼວງພະບາງ, ເມືອງໄຊ ກັບ ດຽນບຽນຝູ. ກ່ຽວກັບລາວ ໂດຍປະຕິບັດແຜນການບຸກ ໂຈມຕີຍຸດທະສາດລະດູແລ້ງ ປີ 1953-1954 ຢູ່ເຂດເໜືອ, ລັດ ຖະບານລາວຕໍ່ຕ້ານ ໄດ້ສົ່ງກອງ ຮ້ອຍຈຳປາສັກ ໂດຍແມ່ນ ທ່ານ ປະດິດ ທ່ຽງທຳ ເປັນຜູ້ບັນຊາ ເພີ່ມໃຫ້ຫຼວງພະບາງ, ກອງຮ້ອຍນີ້ໄດ້ພ້ອມກັບໝວດເມືອງງອຍ ແລະ ທະຫານລາດກອງຫຼອນ ສົມທົບຕີສັດຕູ ແລະ ເຮັດວຽກງານກໍ່ສ້າງຮາກຖານແຕ່ນ້ຳບາກ ລຽບຕາມສອງຝັ່ງແມ່ນ້ຳອູຮອດເມືອງຊື່ນ. ກຳລັງປະກອບອາວຸດທ້ອງຖິ່ນ ແລະ ທະຫານກອງຫຼອນ ຂອງ 2 ແຂວງຄື: ຜົ້ງສາລີ ແລະ ບໍ່ແກ້ວ ສົມທົບກັບທະຫານອາສາສະໝັກ ຫວຽດນາມ ຈຳນວນໜຶ່ງສະກັດຕີສັດຕູ ແລະ ເຮັດວຽກງານກໍ່ສ້າງຮາກຖານ ຢູ່ເຂດເມືອງໄຊ, ເມືອງຂວາ, ເມືອງຫຼາ. ຂະບວນການຕ້ານບັ້ນກວາດລ້າງ, ສະກັດລັດຕີຢູ່ບ້ານໂພນໄຊ, ບ້ານທຽນແທນ, ລຽບຕາມແມ່ນ້ຳອູ, ນ້ຳບາກ, ເມືອງງອຍ ໄດ້ຮັບໄຊຊະນະ ເຮັດໃຫ້ສັດຕູຖືກເສຍຫາຍຢ່າງຫຼວງຫຼາຍ. ເພື່ອເຮັດໃຫ້ການຕີລາຄາຂອງສັດຕູຜິດພາດຫຼົງທິດ, ບັງຄັບໃຫ້ພວກເຂົາສືບຕໍ່ການແຈກຢາຍກຳລັງທະຫານ, ສ້າງເງື່ອນໄຂໃຫ້ພວກເຮົາ ກະກຽມບຸກໂຈມຕີເຂົ້າປ້ອມຕ່າງໆຢູ່ ດຽນບຽນຝູ, ກອງບັນຊາການຢູ່ແນວໜ້າຂອງຫວຽດນາມ ໂດຍແມ່ນ ທ່ານ ຫວໍຫງວຽນຢາບ ເປັນຜູ້ຊີ້ນຳໂດຍກົງ ໄດ້ຄົ້ນຄວ້າເປັນເອກະພາບກັບຄະນະບັນຊາສູງສຸດ ຂອງກອງທະຫານລາວອິດສະຫຼະ ເປີດບັ້ນຮົບບຸກໂຈມຕີເຂົ້າເຂດປ້ອງກັນແນວຮົບ “ຕິດຕໍ່ຍຸດທະສາດ” ຂອງສັດຕູຢູ່ລ້ອງນໍ້າອູ. ບັນດາກອງທະຫານຫຼວງ ແລະ ທະຫານທ້ອງຖິ່ນຂອງພວກ ເຮົາ ໄດ້ຈັດຕັ້ງອອກເປັນ 2 ປີກຈາກຊາຍແດນ ລາວ-ຫວຽດນາມ ຜ່ານພູຜາປ່າດົງອັນທຸລະກັນດານ ຢູ່ທິດຕາເວັນອອກສ່ຽງເໜືອຂອງແຂວງຫຼວງພະບາງ ແລະ ຜົ້ງສາລີ, ພາຍຫຼັງເຄື່ອນທັບໄດ້ 4 ມື້, ກຳລັງພວກເຮົາໄດ້ເຄື່ອນເຂົ້າໄປມໍ່ກັບເຂດປ້ອງກັນແນວຮົບ ພ້ອມກັນນັ້ນ, ກອງໜຶ່ງໄດ້ຮັບຄຳສັ່ງໃຫ້ເຄື່ອນໄປແຂວງຜົ້ງສາລີ ຢ່າງໄວວາ ສົມທົບກັບ ທະຫານລາວອິດສະຫຼະ ແລະ ປະຊາຊົນຢູ່ທ້ອງຖິ່ນ ເພື່ອດັບສູນກຳລັງຂອງສັດຕູບາງພາກສ່ວນ, ປົດປ່ອຍດິນແດນ ແລະ ເປີດກວ້າງເຂດທີ່ໝັ້ນປະຕິວັດຢູ່ເຂດເໜືອລາວ. ສັດຕູໄດ້ສືບຮູ້ວ່າ ກຳລັງຫຼວງຂອງພວກເຮົາມໍ່ຈະເລີ່ມບຸກໂຈມຕີ, ໃນວັນທີ 25 ມັງກອນ 1954 ພວກເຂົາໄດ້ຟ້າວຖອນໜີອອກຈາກເຂດປ້ອງກັນແນວຮົບນ້ຳອູ, ຖອນມາທິດເມືອງໄຊ, ຫຼວງພະບາງ ໂດຍບໍ່ປ່ອຍໂອກາດໃຫ້ສັດຕູລອດໜີໄປໄດ້, ທະຫານຫຼວງພວກເຮົາ ໄດ້ຮັບການຊ່ວຍເຫຼືອຈາກທະຫານ ແລະ ປະຊາຊົນທ້ອງຖິ່ນ, ຜ່ານຜ່າຄວາມຫຍຸ້ງຍາກໃນການລຳລຽງຂົນສົ່ງ ທັງເວັນ ແລະ ຄືນ ເພື່ອໄລ່ຕີສັດຕູ. ວັນທີ 31 ມັງກອນ 1954 ກຳລັງທະຫານເຮົາ ໄດ້ໄລ່ທັນທະຫານສັດຕູຢູ່ເມືອງຂວາ ປິດລ້ອມດັບສູນພວກເຂົາ 2 ກອງພັນ ໃນນັ້ນ, ກອງພັນ ເລຊົງແນ ຂອງສັດຕູຖືກດັບສູນຢ່າງຮາບກ້ຽງ, 3 ມື້ຕໍ່ມາ ປີກທີ 2 ລວມມີທະຫານຫຼວງ 2 ກອງ ສົມທົບກັບ ທະຫານທ້ອງຖິ່ນ ແລະ ທະຫານກອງຫຼອນ ໄດ້ບຸກເຂົ້າຕີສັດຕູຢູ່ເມືອງງອຍ ດັບສູນພວກເຂົາໄດ້ 100 ກວ່າຄົນ. ບັງເອີນກຳລັງພວກເຮົາມາຮອດນ້ຳງາພົບທະຫານສັດຕູ 2 ກອງຮ້ອຍ ທີ່ຂຶ້ນກັບ ກອງພັນໝາຍເລກທີ 1 ທະຫານເລວຮັບຈ້າງຂອງໄທ, ພວກເຮົາສືບຕໍ່ຂະຫຍາຍວົງກວ້າງດັບສູນພວກເຂົາ. ວັນທີ 11 ກຸມພາ 1954 ພວກເຮົາໄດ້ເຄື່ອນໄຫວຮອດແຄມແມ່ນໍ້າຂອງຫ່າງຈາກ ຫຼວງພະບາງ 15 ກິໂລແມັດ, ຜ່ານປາກນ້ຳອູບຸກໂຈມຕີເຂົ້າຄ້າຍບ້ານນາ ດັບສູນທະຫານສັດຕູ 70 ກວ່າຄົນ. ຜ່ານການສູ້ຮົບໃນ 10 ວັນ ແລະ ໄລ່ຕີສັດຕູຢູ່ຕາມໄລຍະທາງຍາວ 200 ກວ່າກິໂລແມັດ, ທະຫານພວກເຮົາ ໄດ້ດັບສູນທະຫານສັດຕູ 17 ກອງຮ້ອຍ ໃນນັ້ນ, ມີກອງພັນ ເລຊົງແນ ຖືກດັບສູນຢ່າງຮາບກ້ຽງ, ຢຶດອາວຸດໄດ້ 10 ກວ່າໂຕນ, ປົດປ່ອຍລ້ອງນຳອູ ເຮັດໃຫ້ທະຫານສັດຕູຢູ່ ດຽນບຽນຝູ ຖືກໂດດດ່ຽວ. ໃນເວລາສັດຕູພວມກະວົນກະວາຍ, ປີກໜຶ່ງຂອງທະຫານພວກເຮົາ ໄດ້ເຄື່ອນຂຶ້ນໄປທາງຜົ້ງສາລີ, ພາຍຫຼັງສູ້ຮົບກັນໃນໄລຍະຢ່າງລຽນຕິດກໍສາມາດປົດປ່ອຍ ບຸນໃຕ້, ບຸນເໜືອ ແລະ ເມືອງຜົ້ງສາລີ ຕິດລຽນກັນ, ເຂດທີ່ໝັ້ນຕໍ່ຕ້ານຂອງປະຊາຊົນເຮົາ ໄດ້ເປີດກວ້າງອອກຕື່ມ 10.000 ກວ່າກິໂລຕາແມັດ, ເຂດປົດປ່ອຍຢູ່ເຂດເໜືອຂອງພວກເຮົາໄດ້ຕິດກັບ ເຂດຕາເວັນຕົກສ່ຽງເໜືອ ຂອງຫວຽດນາມ. ເມື່ອຢ້ານພວກເຮົາບຸກຕີເຂົ້າຫຼວງພະບາງ, ນາຍພົນ ນາວາ ຈຳຕ້ອງສົ່ງທະຫານ 10 ກອງພັນ ມາທາງອາກາດເພີ່ມໃຫ້ຫຼວງພະບາງ ແລະ ເມືອງໄຊ, ສ້າງບັນດາປ້ອມຕ້ານທານໃໝ່ຂຶ້ນ. ພ້ອມກັບໄຊຊະນະອັນໃຫຍ່ຫຼວງຢູ່ໃນບັ້ນຮົບເຂດກາງ, ເຂດໃຕ້ ແລະ ລ້ອງນ້ຳອູ, ບັນດາກອງທະຫານເຮົາ ຢູ່ທິດຕາເວັນຕົກຂອງປະເທດທີ່ໄດ້ຮັບການຊ່ວຍເຫຼືອຈາກປະຊາຊົນ ກໍສວຍໂອກາດຍາມທີ່ສັດຕູຕົກຢູ່ໃນທ່າຮັບ, ກະວົນກະວາຍ ແລ້ວບຸກໂຈມຕິດັບສູນພວກເຂົາຢູ່ທີ່ຕັ້ງຕ່າງໆ, ເປີດກວ້າງເຂດທີ່ໝັ້ນໄດ້ຫຼາຍບ່ອນ. ຢູ່ເຂດພາກກາງ ໃນຕົ້ນເດືອນມັງກອນ 1954 ກອງຮ້ອຍຟ້າງຸ່ມ (ວຽງຈັນ) ສົມທົບກັບທະຫານກອງຫຼອນທ້ອງຖິ່ນ ສະກັດຕີສັດຕູຢູ່ສຳພັນນາ, ເມືອງໂພນໂຮງ ດັບສູນສັດຕູຕາຍຄາທີ່ 10 ຄົນ, ຢຶດປືນໄດ້ 3 ກະບອກ, ສ່ວນສັດຕູທີ່ຍັງເຫຼືອກໍປົບໜີເຂົ້າປ່າ, ວັນທີ 29 ມັງກອນ 1954 ກອງຟ້າງຸ່ມ ແລະ ກອງຫຼອນເມືອງທຸລະຄົມ ສົມທົບກັບ ທະຫານອາສາສະໝັກຫວຽດນາມ ຈຳນວນໜຶ່ງ ບຸກໂຈມຕີທະຫານສັດຕູ 1 ກອງຮ້ອຍ ຢູ່ບ້ານຊາຍ ຕາມເສັ້ນທາງເລກທີ 13 ດັບສູນສັດຕູຕາຍ 40 ຄົນ, ຈັບເປັນສະເລີຍເສິກ 35 ຄົນ, ຢຶດອາວຸດ ແລະ ເຄື່ອງຂອງໄດ້ທັງໝົດ, ວັນທີ 12 ກຸມພາ 1954 ທະຫານສັດຕູ 1 ກອງຮ້ອຍ ໄດ້ອອກກວາດລ້າງຢູ່ເຂດບ້ານເພຍລາດ (ນ້ຳຕອນ) ເພື່ອປ້ອງກັນເສັ້ນທາງລຳລຽງຂົນສົ່ງແຕ່ ວຽງຈັນໄປຫຼວງພະບາງ ໄດ້ຖືກທະຫານພວກເຮົາສະກັດຕີ ດັບສູນສັດຕູຕາຍ 5 ຄົນ, ບັງຄັບໃຫ້ສັດຕູຕ້ອງຖອຍກັບຄືນ, ວັນທີ 25 ກຸມພາ 1954 ທະຫານທ້ອງຖິ່ນ ເມືອງບໍລິຄັນ ສົມທົບກັບ ທະຫານຫຼວງໂຈມຕີດັບສູນທະຫານສັດຕູ 1 ໝວດ ຢູ່ບ້ານປາກທວາຍ, ວັນທີ 1 ມີນາ 1954 ກອງຮ້ອຍຟ້າງຸ່ມ ແລະ ໝວດທະຫານທ້ອງຖິ່ນ ເມືອງທຸລະຄົມ ສົມທົບກັບ ທະຫານອາສາສະໝັກຫວຽດນາມ ຈຳນວນໜຶ່ງ ສະກັດລັດຕີສັດຕູຢູ່ ທ່າງ່ອນ ສາມາດດັບສູນສັດຕູຕາຍກັບທີ່ 50 ຄົນ, ຈັບເປັນສະເລີຍເສິກ 30 ຄົນ, ຢຶດອາວຸດໄດ້ທັງໝົດ, ວັນທີ 16 ມີນາ 1954 ກອງຮ້ອຍຟ້າງຸ່ມ ສົມທົບກັບ ພະນັກງານຮາກຖານຢູ່ທ້ອງຖິ່ນ ປິດລ້ອມສັດຕູຢູ່ໃນຄ້າຍນາການ (ເມືອງເຟືອງ), ພົນທະຫານຢູ່ໃນຄ້າຍນີ້ຈຶ່ງພ້ອມກັນ ຂ້າຜູ້ບັນຊາ ແລ້ວນຳເອົາອາວຸດ 60 ກະບອກ ໂຕນມາຫາທະຫານອິດສະຫຼະພວກເຮົາ, ວັນທີ 24 ມີນາ 1954 ກອງຮ້ອຍຟ້າງຸ່ມ ສົມທົບກັບ ທະຫານອາສາສະໝັກຫວຽດນາມ ຈຳນວນໜຶ່ງ ບຸກໂຈມຕີສັດຕູຢູ່ ບ້ານນ້ຳແຮ ແຄມນ້ຳຂອງ, ພາຍຫຼັງສູ້ຮົບກັນໄດ້ 3 ຊົ່ວໂມງ ທະຫານພວກເຮົາ ສາມາດດັບສູນສັດຕູໄດ້ 35 ຄົນ, ຈັບເປັນສະເລີຍເສິກ 80 ຄົນ, ຢຶດອາວຸດໄດ້ທັງໝົດ. ບັນດາໄຊຊະນະທີ່ຍາດມາໄດ້ຢ່າງລຽນຕິດຂອງກອງທັບ ແລະ ປະຊາຊົນເຮົາ ຢູ່ເຂດຕາເວັນຕົກຂອງປະເທດ, ເປັນຕົ້ນແມ່ນທິດຕາເວັນອອກ ແລະ ທິດຕາເວັນຕົກຂອງວຽງຈັນນັ້ນ ຍິ່ງເຮັດໃຫ້ສັດຕູຕົກຢູ່ໃນທ່າຈົນຕາແຈ, ບັງຄັບໃຫ້ພວກເຂົາຕ້ອງຖອນກັບມາຫາແນວປ້ອງກັນແນວຮົບ ຢູ່ບັນດາຕົວເມືອງນ້ອຍ-ໃຫຍ່, ສ້າງເງື່ອນໄຂໃຫ້ທະຫານ ແລະ ປະຊາຊົນເຮົາ ປັບປຸງເປີດກວ້າງເຂດທີ່ໝັ້ນຢູ່ແນວຫຼັງຂອງສັດຕູ. ໃນເວລາດຽວກັນນີ້, ຢູ່ເຂດທີ່ໝັ້ນຊຳເໜືອ, ສັດຕູໄດ້ເພີ່ມທະວີການເຄື່ອນໄຫວຂອງພວກປຸ້ນ ແລະ ເອົາ 1 ກອງຮ້ອຍ ອອກມາຢຶດຕັ້ງຢູ່ພູ 3 ໜ່ວຍ ມໍ່ກັບເມືອງງາ-ຄັງແຄ ເພື່ອຂົ່ມຂູ່ຕົວເມືອງຊຳເໜືອ, ສະກັດກັ້ນການໄປ-ມາຂອງພວກເຮົາ, ວັນທີ 12 ມິຖຸນາ 1954 ທະຫານຫຼວງ ແລະ ທະຫານທ້ອງຖິ່ນແຂວງຫົວພັນ ບຸກໂຈມຕີດັບສູນສັດຕູທີ່ຢູ່ປ້ອມດັ່ງກ່າວ ຕາຍກັບທີ່ 43 ຄົນ, ຖືກບາດເຈັບ ແລະ ຈັບເປັນສະເລີຍເສິກ 61 ຄົນ, ຢຶດອາວຸດ ແລະ ເຄື່ອງໃຊ້ໄດ້ທັງໝົດ ເຮັດໃຫ້ເລກົນຂອງສັດຕູ ທີ່ຫວັງທັບມ້າງເຂດທີ່ໝັ້ນສູນກາງຂອງການປະຕິວັດພວກເຮົາ ພັງທະລາຍລົງ. ການຂະຫຍາຍກຳລັງແຮງສັງລວມຂອງກອງທັບ ແລະ ປະຊາຊົນເຮົາໃນທົ່ວປະເທດ, ປະສານສົມທົບກັບການຕໍ່ສູ້ຂອງກອງທັບ ແລະ ປະຊາຊົນຫວຽດນາມ ຢ່າງແໜ້ນແຟ້ນ ຈຶ່ງເຮັດໃຫ້ຂະບວນການບຸກໂຈມຕີສັດຕູຢູ່ເຂດຍຸດທະສາດ ໃນລະດູແລ້ງປີ 1953-1954 ຢູ່ບັນດາສະໜາມຮົບລາວ ຍາດໄດ້ໄຊຊະນະຢ່າງໃຫຍ່ຫຼວງ, ສາມາດປັດເຂ່ຍທະຫານສັດຕູອອກຈາກວົງສູ້ຮົບໄດ້ 8.000 ກວ່າຄົນ, ປົດປ່ອຍດິນແດນໄດ້ 100.000 ກວ່າກິໂລຕາແມັດ (ບໍ່ນັບແຂວງຫົວພັນ) ໃນນັ້ນ, ມີຫຼາຍເຂດຍຸດທະສາດທີ່ສຳຄັນ, ຂົ່ມຂູ່ສັດຕູໃນທົ່ວສະໜາມຮົບອິນດູຈີນ, ບັງຄັບໃຫ້ພວກເຂົາຕ້ອງແຈກຢາຍກຳລັງເຄື່ອນທີ່ຍຸດທະສາດ, ສ້າງເງື່ອນໄຂໃຫ້ທະຫານ ແລະ ປະຊາຊົນຫວຽດນາມ ບຸກໂຈມຕິດັບສູນບັນດາປ້ອມທີ່ໝັ້ນຂອງສັດຕູທັງໝົດຢູ່ ດຽນບຽນຟູ ໃນວັນທີ 7 ພຶດສະພາ 1954 ເຮັດໃຫ້ແຜນການ ນາວາ ບໍ່ສຳເລັດຜົນ. ໄຊຊະນະລະດູແລ້ງ ປີ 1953-1954 ໄດ້ເປີດສັງກາດໃໝ່ ໃຫ້ແກ່ການຕໍ່ຕ້ານພວກລ່າເມືອງ ຂຶ້ນຝຣັ່ງຜູ້ຮຸກຮານ ຂອງກອງທັບ ແລະ ປະຊາຊົນລາວບັນດາເຜົ່າ, ເຂດທີ່ໝັ້ນສູນກາງຂອງການ ປະຕິວັດ ໄດ້ຕິດລຽນກັບເຂດທີ່ໝັ້ນຕໍ່ຕ້ານຢູ່ເຂດກາງ ແລະ ເຂດໃຕ້, ບັນດາເຂດທີ່ໝັ້ນຕໍ່ຕ້ານ ແລະ ເຂດກອງຫຼອນຢູ່ທິດຕາເວັນຕົກ ກໍໄດ້ຮັບການປັບປຸງ ແລະ ເປີດກວ້າງ, ເຂດປົດປ່ອຍເກົ່າ ແລະ ໃໝ່ຂອງການປະຕິວັດ ກວມຫຼາຍກວ່າ 1/2 ຂອງດິນແດນທົ່ວປະເທດ, ມີພົນລະເມືອງເກືອບ 1/2, ເຊິ່ງເປັນເງື່ອນໄຂໃຫ້ແກ່ກຳລັງປະຕິວັດເຮົາ ເຕີບໃຫຍ່ຂະຫຍາຍຕົວຂຶ້ນສູ່ບາດກ້າວໃໝ່ຕື່ມອີກ. ຮຽບຮຽງໂດຍ: ນາງ ຍ້ອມເພັດ ວິໄລພັນ

news to day and hot news