ວັນສຸກ, ວັນທີ 06 ທັນວາ 2024
ເອສຣາ ເປັນທີມນຳ ລາວລີກ 1 ລະດູການ 2024-25
ເວລາອອກຂ່າວ: 2024-11-07 09:06:08 | ຜູ້ຂຽນ : admin3 | ຈຳນວນຄົນເຂົ້າຊົມ: 122 | ຄວາມນິຍົມ: 
ບານເຕະລາຍການລາວລີກ 1 ລະດູການ 2024-2025 ວັນ ທີ 3 ພະຈິກ ຜ່ານມາ ທີ່ສະໜາມ ກິລາແຫ່ງຊາດຫຼັກ 16 ສະໜາມນອກ, ສະໂມສອນເອສຣາ ພົບກັບສະໂມສອນ ວຽງຈັນ. ຜ່ານການແຂ່ງຂັນຜົນປະກົດວ່າ: ສະໂມສອນ ເອສຣາ ໂຊຟອມການຫຼິ້ນໄດ້ດີກວ່າ ສາມາດເອົາຊະນະ ສະໂມສອນ ວຽງຈັນ ໄປແບບຂາດລອຍ ດ້ວຍຄະແນນ 12-0 ປະຕູ, ຈາກການຍິງປະຕູຂອງ ໂຈນີ້ ແຫວນປະເສີດ ຍິງ 5 ປະຕູ ນາທີ 3, 6, 32, 48 ແລະ 62. ປີເຕີ ພັນທະວົງ ຍິງໄປ 3 ປະຕູ ນາທີ 18, ຍິງລູກໂທດນາທີ 31 ແລະ 82. ວົງສັກດາ ຈັນທະລືໄຊ ນາທີ 39, ພຸດທະລັກ ທອງຊະນິດ ນາທີ 52, ໄຊຍະສຸກ ແກ້ວວິສອນ ນາທີ 80 ແລະ ຣຽວ ນາກາມູຣະ (Reo nakamura) ນາທີ 90+4.
ສ່ວນຜົນຄູ່ອື່ນໆ: ສະໂມສອນ ຊ້າງນ້ອຍ ເປີດສະໜາມກິລາກາງ ມຊ ໄລ່ສະເໝີກັບ ສະໂມສອນມາສເຕີ ເຊເວັນ ດ້ວຍຄະແນນ 1-1 ປະຕູ, ໂດຍ ມາສເຕີ ເຊເວັນ ໄດ້ປະຕູຂຶ້ນນຳກ່ອນຈາກການຍິງລູກໂທດຂອງ ສຸກພະຈັນ ເລື່ອນທະລາ ນາທີ 65, ແຕ່ຊ້າງນ້ອຍ ກັບມາຕີສະເໝີໄວຈາກຜູ້ຫຼິ້ນຕົວສຳຮອງ ວິໄລ ກຸລັງສີ ນາທີ 69. ຂະນະທີ່ຫຼວງພະບາງ ເປີດສະໜາມກິລາກາງແຂວງເອົາຊະນະ ຈຳປາສັກ ດ້ວຍຄະແນນ 2-0 ປະຕູ ແລະ ນ້ຳທາ ເປີດສະໜາມກິລາກາງແຂວງເອົາຊະນະ ກອງທັບ ດ້ວຍຄະແນນ 3-1 ປະຕູ.
ຕາຕະລາງຄະແນນຂະນະນີ້ ເອສຣາ ເປັນທີມດຽວຊະນະ 6 ຕິດຕໍ່ກັນ ໃນລີກລະດູການນີ້ ເປັນທີມນຳຕໍ່ໄປ ມີ 18 ຄະແນນເຕັມ ນຳ ຊ້າງນ້ອຍ ແຊັມເກົ່າ 5 ຄະແນນ ແຕ່ແຂ່ງຫຼາຍກວ່າໜຶ່ງນັດ, ຂະນະທີ່ ມາສເຕີ ເຊເວັນ ຢູ່ອັນດັບ 3 ແຂ່ງຄົບຈາກ 7 ນັດນັດຮອບຂາໄປ ມີ 13 ຄະແນນ, ສ່ວນຫຼວງພະບາງ ແຂ່ງ 6 ນັດ ມີ 9 ຄະແນນ, ນ້ຳທາ ແຂ່ງ 5 ນັດ ມີ 7 ຄະແນນ, ກອງທັບ ແຂ່ງຄົບຈາກ 7 ນັດນັດຮອບຂາໄປ ມີ 7 ຄະແນນ, ວຽງຈັນ ແຂ່ງ 6 ນັດ ມີ 2 ຄະແນນ ແລະ ຈຳປາສັກ ແຂ່ງ 6 ນັດ ຍັງບໍ່ຄະແນນ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
